خـطــــار - قصائد حب

[عبير]

خـطــــار - قصائد حب
تأليف المرحوم أبي ضاري



إعداد و إلقاء : د . عدنان جواد الطعمة

http://adclub.ir.ae/Khitar.rm

تميز شعر المرحوم أبي ضاري ( سالم خالص ) بالرقة و العواطف الجياشة الإنسانية البديعة .
ففي هذه القصيدة يصف المحب أو المحبة في حالة من اليأس و التأمل في أبهى الصور والتشابيه ، قائلا :
واللي يموت ابشوفتك يا مسعده او هنياله ، الذي يموت برؤيتك و قربه منك فهو سعيد و محظوظ و هنيئا له . وفي مقطع من قصيدته يصور عندما يغيب الحبيب كيف تصبح دقات قلب المحب أو المحبة لحنا شجيا رائعا .
فلنقرأ وإياكم هذه القصيدة :


خـطار



خطار عندك و العمر : بـاچـر یشد ارحالـه
واللی یموت ابشوفتك يـا مسـعده او هنيالـه
متع شبابك و ابتسم
من دنيتك فرصه اغتنم
واتركني بنياب الـسـگم
ماريد أشوفن دمعتك . . . فـوگ الوجن هـمّـالـه
دنياي أنه عبرة وكت عوف الطبيب ابحالـه
خطار عندك و العمر : بـاچـر یشد ارحاله
* * *
خطار عندك و الحزن : ويّه الـگلب صاير حلف
ما أطمع ابغير الوصل . . ما أطمع ابغير العطف
مطعون بسويد الـگلب . . ودموع عيني ما تجف
محتاج للحب و الوفه . . محتاج : حـنّـيّـه او لـُطف
مشتاگ أشوفك بـِالهنا
واغفه على زندوك سنه
واگضی العمر ویاك أنه
او لو غبت مشوار اعتقد هالگلب يصبح عاله
و تصير دگاته لحن من یحس بيك اگباله
خطار عندك و العمر : بـاچـر یشد ارحاله
* * *
خطار عندك و انتظر . . يوم الرحيل بلهفه
مطعون و صوابي كلف ما تنفع المستشفه
طش الدوه او عزي الـگلب واحرگ ابناره الوصفه
متعوب نحّـلني الهوى و سِّـدني بلچن أغفه
خطار . . . آنه بدنيتك
عطشـان ... أريد مروّتك
غـمّـض اعيوني ابضحكتك
عمري : سراب او ينتهي أو بالعمر ماكو اچماله
یگضي او حزن كل البشر يندفن حدر اذياله
خطار عندك و العمر : بـاچـر یشد ارحاله
* * *
خطار عندك و الهوى : بالروح ثبّت سهمه
و الـگلب یا ولفي صفه . . مخزّن عذابه أو ظلمه
گلب المُحب : مثل الطفل . . من العطف لتحرمه
مدري اشردت أحچي بعد ؟ ضيّـعت أجمل چلمه
حلوه او أعز من دنيتي
او إلها علاقه بدمعتي
ذكرني شنهي احـچایتي
لیش أنسه من نگعد سوه ؟ مَتـگلـي شن هالحاله ؟
بس آنه ؟ لو كلمن يحب ما يظل كلشي ابباله ؟
خطار عندك و العمر : بـاچـر یشد ارحاله
* * *
خطار عندك و الـگلب : من لوعته یتحسّـر
یتمنه لو سار النعش . . عن الجسـد يتأخّـر
رايد عمر أطول بعد و يعيش وياك أكثر
لتضيّع أيّامك هدر
ويّـاي .. يا ريع العمر
إبعد .. إلك كل العذر
بيتي : جهنّـم و الحزن : آنه اصبحت تمثاله
معذور إلك كل العذر لو ردت ما تدناله
خطار عندك و العمر : بـاچـر یشد ارحاله
* * *
خطار عندك و ايّست واصبحت سود أحلامي
او خلصت شمعتي و الفرح : شح بتوالي أيامي
صدگني كل هَـمْ ينجلي من تبتسم جدامي
غالي او عزيز او شوفتك : تطرد جميع آلامي
لكن : أريدك تبتعد
عن العذاب او تنسعد
ماريد گلبك ينمرد
شگ من سجلّـك ورقتي واتركني بتعس حاله
واختار مثلك أريحي . . . يصفالك او تصفاله
خطار عندك و العمر : بـاچـر یشد ارحاله
دنياي أنه عبرة وكت عوف الطبيب ابحاله

شـرح بعض مفردات القصيدة
خطار = ضيف
بـاچـر = بكرة ، غدا
الـسـگم = السقم . المرض
فوگ = فوق
عوف الطبيب = أترك الطبيب
الـگلب = القلب
بسويد الـگلب = بسویداء القلب
مشتاگ = مشتاق
واگضي العمر ویاك = و آقضی العمر معك
مشوار = لحظه
هالـگلب = هذاالقلب
دگاته = دقاته
إگـبـاله = أمامه
و صوابي كلف = و جرحي بليغ ، عميق
طش الدوه = إرمي الدواء
واحرگ = و احرق
الوصفة = وصفة الطبيب ، الراجيته
چلمه = كلمة
بلچن = لعلّ ، عسى
بلـچن أغفه = لعلي أنام و أغمض عيني
ماكو اچـماله = لا توجد إضافة
يـگضی = ینتهي ، يقضي
أحچي = أحكي
إحچـایتی = حکایتی
نـگعـد سوه = نقعد ، نجلس سوية
مـتـگلی = إذن قل لي
صدگني = صدّقني
صدگني كل هم ينجلي = صدقني بأن كل هم سيزول
شـگ = مـزّق
أريحي = لطيف ، و مرح