البـــــــــــكرة

[ابو معاذ الغضنفر الأكلبي]

البكرة اللي سقتها صوب شمران=هديّة(ن) مني معزّة وتقدير
اهديتها على عواني وجيران=ما سقتها الا للوجيه المسافير
وسمي عليها خير شاهد وبرهان=هدية(ن) مني لروس المناعير
نحّرتها شمران ذربين الايمان=وقامت تزرفل كن في راسها طير
كنّه دعاها صوبهم برق ودّان=والا خوات(ن)كلبوهن على بعير
مانيب يا شمران لاهديت منّان=تستاهلون الطّيب صغير وكبير
لكن يا شمران انا خاطري شان=مدري ويش اللي صار ويصير ويصير
منوّل(ن)لاجيتكم ضيف شفقان=اشوفها قدامي تحنّ وتسير
وافخر بها يوم انها بنت ريمان=فيها لمكنون الضماير تعابير
واليوم لامريت بديار شمران=ودي اشوف البكرة بحزّة عصير
ماشفتها وانا على الشوف ظميان=يا الله عليك العاقبة والتدابير
عقّب بها الراعي سفوح(ن) وضلعان=حوّل بها للتّهم يا الله عسى خير
يا زينها يوم كانت تقود الاظعان= ومعها بكار(ن) خلفها غيرها كثير
متقدمة قدام بكرة كحيلان=ونشوفها قدام ذود المغاتير
اقول ياشمران في سر واعلان=البكرة اللي سقتها صوبكم غير
تزها بكم وانتم مطاليق واخوان=والمدح فيكم يستوي للشّواعير
تستاهلون بكار جزلات وسمان=اغلا من بكار(ن) مع ابل المناصير
والله ما اقوله محابى وبهتان=الا السموحة كان قصرت تقصير
بس اعرضوها باول الذود من شان=عشّاقها تشوفها باول السير
بكرة غلا من هيض شاعر وطربان=اغلا من اكياس الذهب والدنانير
منجوبة(ن) في بعض الاحيان ، واحيان=تجمع عرب والا تفرق طوابير
كسب العرب في ماضي الوقت والآن=اللي عليها يتعبون المداوير
من لقّح أفكار العرب ذربة لسان=ألذ واحلى من حليب المصاغير
وانا انفسي ما يقطعه ركض ميدان=شاعر ما همتني طوال المشاوير
ركزت للشعار قدّام نيشان=واللي يصيبه بندقه تطرح الطير
استنبش أهل الشعر رجلي وركبان=من قيف شمران الكرام المغاوير
كم شاعر(ن) شمراني(ن) عبر الازمان=يشرب بحر ماهوب يشرب من البير
ان غاص بحر(ن) جاء بلولو ومرجان=كثير عزَة أو بعد يطرح كثير
فان كان رد فلان منكم أو افلان=هذا الأمل فيكم وللعلم تفسير
وان كان عييتوا فلاني بزعلان=ما فيكم صغير(ن) وأنا ماني صغير
وانا كذا في كل الأحوال كسبان=مشامج أرباب السيوف البواتير
وبكرة صبي أكلب ترى الذيب سرحان=ما همّها وأنا ولد سالم الزير


هذي القصيدة جاشت بها قريحتي لسبب واضح في مضمون القصيدة وخاصة للشعار ولو بينت الاسباب لسمجت القصيدة على الشعار خاصة وأنا مهديها لشعار شمران خاصة ولشمران عامة وجميع رواد المنتدى من كل القبايل
وســـــــــــــــــــــــلا متكـــــــــم0

[ناظم الهمسات]

البكرة اللي سقتها صوب شمران=هديّة(ن) مني معزّة وتقدير


[

البكره اللي مرت ديار شمران = فيها من افعال الرجال المناعير
يالاكلبي غرد على اللال والدان= وانا بفسر لك مع اللحن تفسير
اكلب هل الصولات في كل ميدان = اللي لهم منا محبه وتوقير
جتنا علومك يالغضنفر بالاوزان = اتسوقها مثل البكار المغاتير
فيها الجزاله والصلابه والاحسان =وفيها الحروف الواضحات المباهير
ياحي بكره فاتنه مثل مرجان = من شافها يقرع لها الطبل والزير
نفخر بها حجزٍ وبدوٍ وتهمان =ونشعل لها نارٍ من الشعر والكير
في ريحها وردٍ وفلٍ وريحان = وفي وسطها تاجٍ يهد الاساطير
متربعه بين السحب فوق شمران = ورعودها تسطو على الارض وتصير
خطت وثيقه تحفظ عهود وايمان= نحن مع اكلب كما الريش للطير
صعبٍ تفرقنا عن العهد ازمان = وصعب تغيرنا روايات سكير
حنا نقدر صاحب الجود لابان = وحنا نكسر من نوى الجرح تكسير
ياصاحبي من جودكم شفت بركان = متفجرٍ في ارضنا شوق تعمير
بيشه زهت بافعالكم طول ازمان = والدايره دارت بكل الاداوير
وضيوفكم يفرش لها الدرب بستان= من زاركم ماواجهه اي تقصير
وقلوبكم بيضا كما الثلج تزدان= لاعانقت احبابها دون تعكير
وصغيركم يرضخ له الانس والجان = وكبيركم يعبر على النجم ويسير
في دياركم شفت الشعر صار رمان= من يقطفه يلقى له جنون تأثير
برهن على قولي معك ابن جذلان= الشاعر اللي حرر الفن تحرير
وابو معاذ الاكلبي مثل سلطان = عطر بلاد من الحروف المعاطير
يامرحبا ياسايق النوق لاهان = من انجبك ياصاحب الحب والخير
ان جا قصورٍ مننا دون عرفان = منك السموحه مالنا اي تبرير
مثلك طليق يغفر الذنب لابان = واحنا نعدّك من هل العفو والخير
وكل البكار اللي لفت منك شمران= نفخر بها نحرق لها العود تبخير
ونشيلها مثل الذهب خلف بيبان= نكتب لها وسط الورق كل تعبير
لك عندنا يالاكلبي العز نيشان = انعلقه في بذلتك دون تأخير

[عبدالله علي بركي]

الاخ ابو معاذ0

قصيده تبيض وجهك ووجوه قبيلتك الي نكن لهم كل التقدير والاحترام فمنهم النسيب ومنهم الصديق

الي نعتز بصداقته 0

لاعدمناااااااك0

بن بركي

[عبدالله علي بركي]

الاخ المبدع ناظم الهمسات (ابراهيم الشمراني )0

مهما قلت وامتدحت فلن اوفيك مما في خاطري شيء 0

لك كل الحب والتقدير وبيض الله وجهك 0



بن بركي

[بحرالعلوم]

الله يعطيك العافيه قصيده جميله

[ابو معاذ الغضنفر الأكلبي]

الأخ العزيز ناظم الهمسات -الشاعر القدير/ابراهيم الشمراني:


والله ان معرفة مثلك شرف وبارك الله في منتديات شمران اللي عرفتني عليك وعلى الشاعر ضيف الله العامري

الذي رد على أول قصيده نزلتها في منتداكم منتدانا كلنا

ابراهيم /أنت ناظم همسات وناظم أبيات وناظم قصايد وشعر

أنا ما اعرفك شخصيا وأنت ما انت بحاجة لمن يشهد لك لكن للأمانة أنت شاعر كبير

لايطوفك معنى ولا تزري بك قريحة وأعجبني طول نفسك وتسلسل أفكارك في قصيدك

ابراهيم/ تفضلت بالرد على (البكرة) وجمل الله حالك يا صبي شمران

كفيت ووفيت ولا فض فوك

ابراهيم/مدحك لي ولقبيلتي وشاعرنا كلنا / سعد بن جدلان وسام شرف منك ومن شمران

واللي بين اكلب وشمران هو بالظبط كما تفضلت انت وقلت:

خطت وثيقه تحفظ عهود وايمان= نحن مع اكلب كما الريش للطير

والمثل يقول : اللي في الخاطر كافي

ابراهيم/أنت مشرف الأقسام الأدبية وأنت كفو لهذي المسؤلية

وأبشر بما يسرك كل ما سنحت لي فرصة


ابراهيم/ أدركت المعنى وكفيت وزيادة ولكن هذا لا يمنع من أن يتفاعل معنا كذلك شعراء اخرون لاثراء المنتدى

وبيض الله وجيهكم يا شمران0

[ابو معاذ الغضنفر الأكلبي]

الأخ/عبد الله علي بركي

ما يحتاج اللي في الخاطر كافي يابو علي

أشكر مرورك


الأخ/بحر العلوم


شرفتنا بالمرور

[ابونايف الشمراني]

الاخ الكريم (ابومعاذ الغضنفر الاكلبي)

اولا : ارحب بك اجمل ترحيب (واسأل الله العلي العظيم في هذه الايام المباركه
ان يجعل اقوالنا وافعالنا طاعه لمولانا وان يجعل اخوتنا محبه في الله )

اخي الكريم ان امتدحت قبيلة شمران او عتبت فذلك من محبتك لهم وطيب اخلاقك
وسعت ادراكك لما تكتب ... وان امتدحت قبيلتك اكلب فنزيد على ذلك ونقول بأنكم اهلا للمدح
(وانت ونحن كسبانين في الحالتين وهذا هو ديدن التعامل بين الرجال وانت احد هؤلاء الرجال
فمرحبا بك بين اخوانك ابناء قبيلة شمران ( اللذين لن تجد منهم سوى الترحيب والتقدير والاحترام )

فأهلا وسهلا بك وبما تجود به قريحتك اخ عزيز بيننا
اخوك: ابونايف الشمراني

[ابونايف الشمراني]

اسمحلي اخي (ابومعاذ الغضنفر الاكلبي)
ان اعبر عبر صفحتك عن شكري وتقديري للاخ (ناظم الهمسات)

اخي الكريم (ناظم الهمسات .. ابراهيم الشمراني)
شكرا لك من الاعماق على استقبالك لضيف منتدانا فأنت عبرت
بلسان حال ابناء هذا المنتدى (ابناء قبيلتك) وهذا ليس بغريب عليك

فلك ولضيفك كل التقدير والاحترام
اخوك: ابونايف الشمراني

[BO BO]

ارحب بك اجمل ترحيب يا النسيب


أكلب أكلب أكلب أكلب أكلب أكلب

[سلطان الأكلبي]

الأخوان

1- أبو معاذالغضنفر الأكلبي

بيض الله وجهك يا أبن عمي على هذه القصيده الجزله اللتي قلتها في شمران وهم يستاهلون المدح أخوان وعواني وجيران وعلومهم غانمه كلها

أخي أبا معاذ أنت شاعر معروف ومتمكن وكذلك كاتب وباحث ومثقف أقف إحتراماً لشخصك الكريم

__________________________________________________ ______________________

2- ناظم الهمسات


ماعليكم زود ياشمران و بيض الله وجهك ياذيبان على هذا الردود الذي يدل على إنك شاعر متمكن
لاهنت يالغالي جعلك تسلم

تقبلوووو تحياتي وتقديري

[سيف شمران]

http://www.al-nsa.com/up/uploads/a59e33714e.gif



تســـــــــــــــــــــلم والله على هل قصيده التي فعلا لا تنبع الأمن قلب صادق وشاعر مبدع ومتمكن000000000000

والله أنـــــــــــــــــــــا قلمي يقف عاجز عن شكرك ومدحك لكن 000000000 حقا حقا قصيد

اكثر من رائعه وتسلم والله 000000000والله يبيض وجهك يا ابن الغضنفر الاكلبي 000000000


http://www.al-nsa.com/up/uploads/cb9dd04a5e.gif


http://www.al-nsa.com/up/uploads/1265f609b0.gif

[سيف شمران]

http://www.al-nsa.com/up/uploads/a59e33714e.gif

اسمحلي اخــــــــــــي الكريم ابو معاذ الاكلبي ان احيي شاعر نا المبدع (( ابرهيم الشمراني ))

عبر صفحاتك التي نفتخر بها0000000000000000000

وقوله مشكور على هل قصيده المتميزه 000000000ونرحب بكم جميعا فأنتم شعار وفوق الراس والعين 000

والله الله يعطيكم العافيه وما قصرتو وبيض الله وجيهكم يا اولاد النشاما يا الاجاويد0000000


http://www.al-nsa.com/up/uploads/cb9dd04a5e.gif


http://www.al-nsa.com/up/uploads/b20c0f76de.gif

[عايض الشمراني]

السلام عليكم ورحمة الله وبركاته

الاخ ابومعاذ الاكلبي بيض الله وجهكـ على هذه القصيده التى امتدحت فيها بني عمكـ

وليس غريب عليكم هذا الشي فأنتم انساب واصحاب واصدقاء وتربطنا فيكم علاقات

حميمه فلكـ مني جزيل الشكر والتقدير.

كما لايفوتني ان اشكر شاعرنا الاستاذ الفاضل ناظم الهمسات على الرد على قصيدتكـ

وهذا ليس بغريب على شاعرنا العزيز ابراهيم الشمراني

تقبلوا خالص محبتي وتقديري

[أحمد الشمراني]

ماعليك زود يابو الغضنفر ياصبي اكلب ياوجه بني وايل

الاخ والشاعر القدير :ابراهيم بيض الله وجهك وانت وفيت عن شمران كافة

[ابو معاذ الغضنفر الأكلبي]

ابن أخي/ سلطان الأكلبي


سعيد بمرورك واشكرك على شعورك نحوي ونحو أشماجنا شمران

[ابو معاذ الغضنفر الأكلبي]

الاخوة:

ابو نايف الشمراني

وسيف شمران

واحمد الشمراني

وغيركم ان نسيت غير متعمد


وكل من اثنا علي وعلى الأخ الذي لا اخفيكم اني احترمه الاخ ناظم الهمسات

اشكر لكم مروركم العطر وشعوركم نحوي وتعليقاتكم وحسن اخلاقكم وكرمكم

غمرتوني بالحب والحفاوة ووالله اني لاحفظ لكم الجميل

ولايفوتني ان اقول لكم ولاصحاب المنتدى وادارته ورواده كل عام وانتم بخير بمنا سبة العيد

والله يديم المعرفة