قصيده عند ال معيض من المسارده

[ال حمدان]

ال معيض قحطان


سلام تسليم يجمل موقفي بين الرجال
يعم كل اللي حضر والكل يأخذ مقسمه

سلام ياقحطان مني عد حبات الرمال
واعداد مالاحت بروق بالسماء مترزمه

سلام ياللي طيبهم من فوق هامات الطوال
تاريخهم بالطيب وافي والوفاء الهم سمه

مابين قحطان الوفاء والطيب عهد ولايزال
مادامت الروس الكريمه بالوفاء متعممه

الله خلقهم للمكارم والكرم سمح القبال
رجالهم لأجل الكرم تسمع لصوته همهمه

افعالهم بين القبايل واصله حد الخيال
ما احد تناسى فعل شالح بالسنين المظلمه

نمدح ولا نمدح سوى الوافين ذربين الفعال
اللي تعلت بالوفاء وكل ضيف تكرمه

والمسردي راس المراجل والمراجل راس مال
بالنفس يشري المرجله والطيب يجري في دمه

والمسردي عايش على العليا ولا فيها جدال
الطيب علا المسردي بين الرجال وعظمه

واللي خذت طيب المراجل من عمام ومن خوال
وابوهم اللي عاش لاجل للطيب يالله ترحمه

ذكره ينومسهم على طول الزمن في كل جال
زرع بهم حب الكرم والطيب فيهم علمه

مامات من خلف بعد موته وفيين الخصال
اللي مواقفهم عظيمه والكريم تحشمه

رجالهم لا ما ارتكى للحمل شيال الثقال
يشيل حمل مايشال ولا تراخى محزمه

يسعون للي يرفع الرجال والمطلق ينال
بالطيب وافعال الرجال واهل الوفاء متلزمه

الطيب غايه كل مطلق ما يبدل به بدال
العاليات يحبها والدانيات محرمه

هذاك بو راكان واخوانه جبال من جبال
بالعقل والجنب المتين شر المعادي تدحمه

سلالة ابن معيض عاشت للوفاء في كل حال
متوارثين المرجله والرجل يعرف مقدمه
ف
والا الوطن نفدي ترابه ولا حسبنا للقتال
نموت لأجلك ياوطن ولا تجيك المظلمه

لاجل الشهاده والولى لأملوكنا بأول وتال
احفاد ابو بكر وعمر شجعان مافينا ارخمه

ابو فهد من طيب راسه ما رضي ضيم وضلال
اما نعيش بمكرمه والا نموت بمكرمه

واللي يحاول زعزعت امن الوطن من كل ضال
خبث النوايا بالدمى وعقولها متسممه

فياالله عسى هذا الوطن يبقى على طول الليال
محفوظ بالله ثم جيش كل طاغي يهزمه

اقولها وانا من اللي فعلهم بالطيب طال
تاريخ دون بالذهب ولا انكتب بالمرسمه

شمران ربعي واسمهم بين القبايل له مجال
اللي يسالمنا سلم والا العدو نلجم فمه

والتهنيه لك يامحمد قلتها والكل قال
والكفو من بين الرجال يالله عساني مااعدمه