قصيدة شبيه البدر

[ال حمدان]

الا ياشبيه البدر ياللي علي اخطيت
خطية محب ما يراعي لمحبوبه

تغيرت ياسيد المحبين واغتريت
وجرحك بعد ذالعمر لي اكبر عقوبه

وش السالفه يوم اتصل بك ولا رديت
وجازيت من كان الغلا كل عذروبه

وخليتني لاني بحي ولاني ميت
اعيش الضياع اللي تعيشه هل النوبه

جرحت الفؤاد اللي هنا فيك واتهنيت
ثلاثين عام وانت سيده وحبوبه

ثلاثين عام عايش فيه وتربيت
اخذت الغلا والحب عن كل رعبوبه

الى غبت ضاقبي الفضاء واكثر التنهيت
ودمع المحاجر لأجل فرقاك مسكوبه

وانا والله أني كل مارحت والا جيت
اراعيك مثل اللي يراعي طرف ثوبه

اراعي شعورك مثل واحد من اهل البيت
ملكني غلاه وسرت بيدينه العوبه

ادور رضاك وكل ماقلت وتمنيت
احقق لك المطلوب لو كله صعوبه

ولا خفت من لوم الخلايق ولا اهتميت
وكل المشاعر عاصيتني عن التوبه

وبادلتني بالصد ياهيه ماوفيت
وعيشتني يا مفتري عيشة اكذوبه

نهاية غدر والغدر من قسوته عانيت
مثل مايعاني كل تايب من ذنوبه

وهاذي نهاية من نوى البعد والتشتيت
ولكن تكفى خل الأسرار محجوبه

زهير الشمراني ( ابو ماجد )