بن خشير وبو ماجد

[ال حمدان]

ابن خشير وبو ماجد

بو زيد راعي الفيد ودى ولا جاب
لربعه يقول الصمت مثل العباده

ماكل مخلاب يشابه لمخلاب
معطي الجمل ما عاد همه قياده

البيت الأول هو سبب مس الأطناب
وراعيه عقله مثل عقل الجراده

والثاني ارفع قدر هيبه ومحراب
والكفو تعرف جرته من طراده

راعي المعالي يعرف حقوق الأصحاب
واللاش تبقى علته في فؤاده

ياجاهل التاريخ وبحور الأنساب
ابحث عن اهل المرجله والسياده

حنا ورثنا الطيب من روس شياب
شيخان قوم ومن بغى الطيب فاده

حنا سلالة كل شيخ وحراب
اسأل و تلقى الأجوبه بالأشاده

يوم الرجال بفعلها تفتل اشناب
كل بفعل ايديه حقق مراده

رجالنا لو غاب غيره فلا غاب
يخاف لا يلحقه هرج النقاده

عند اللوازم ما تقيصر ولا ارتاب
الطيب حبه مثل حب الشهاده

ومعاويه حلال فكاك الأنشاب
وعند اللقاء تلقاه يقدح زناده

صليب شور وحصن من دون الأقراب
ومن دون ربعه سور عالي عماده

لأجلالوفاء عايش وللطيب كساب
سلالة للطيب والطيب عاده

كبير فعل وللعلا دوم طلاب
نظرة صقر ما هي بنظرة بلاده

صيته تعلى عند الأقراب واجناب
بأفعاله اللي كل يوم ابزياده

اللي الكرم بأسمه فتح له مية باب
حاتم زمانه عاشق للرياده

ماعاش عيشة كبر والا به اعجاب
تواضعه بين البشر له شهاده

هذا هو التاريخ محفوظ بأكتاب
ساده و بأفعال المطاليق ساده

هذا جوابي والردي والردى خاب
اللي بحقده ما اهتنا في رقاده

وان كان ما كفى جوابي و لا طاب
نعيد لك بعد الأفاده افاده

@@@@@@@@@@@@@@@


بن خشير وبو ماجد

ياالله ياعالم خفيات الأسرار

ياعالما خافي خفايا السريره



تذل عدوانك عدى الدين الأشرار
وتعز دين اهل الوجيه السفيره



يا زهير يا ابن مداوس اطوال واكبار

يا ابن الشيوخ اللي تصد المغيره



يا ريف ربعك مكرم الضيف والجار

يا سيد الوافين قاله و غيره



متى تقوم لأهل تباله بمسيار

لك عند نا واجب مقام وجيره



من غير امر قل تم ما نقبل اعذار
ما ندري الدنيا طويله قصيره



هذا وصلى الله على سيد الأبرار
نبينا المبعوث عدل و بصيره


رد على بن خشير

يا مرحبا ترحيب الأخيار لأخيار
ترحيب فيه الطيب بأول واخيره

با للي لهم بالقلب حشمه ومقدار
الطيب للوافين في كل ديره

يابو خشير يا عسى ايامك ازهار
لك عند بو ماجد مكانه كبيره

لك عند بو ماجد محبه و تذكار
ذكرى الرجال الوافيه والقديره

ذكرى الوفاء والطيب ما بيننا سار
يوم المراجل والوفاء حن زيره

الوقت فرقنا من اديار لأديار
لأجل المعيشه لأجل كسب الستيره

لكن يبقى الطيب للي لهم كار
اللي تحب الشور واللي تديره

عزيمتك بأمر الله انجيك مشوار
لأديار قوم للمراجل سفيره

من بعدها عطني تفاسير واخبار
عن وقتنا وافعال بعض العشيره

اللي يغطون الحقايق والأنوار
والنور ساطع والفعايل تنيره

حنا شيوخ وطيبنا سر واجهار
ما يجحده غير الوجيه الحقيره

شيخان قوم وفعلنا يبهر ابهار
اسأل وتلقى لأل حمدان سيره

والا ردي الناس غادر ومكار
الغدر في دمهونفس شريره

بعض البشر ينكر طويلين الأشبار
اللي على طيب المراجل جديره

اما يقوك الحق والحق بتار
والا يخليها لرجال غيره

هذا زمان الغدر والوقت غدار
غدر الزمان يضيع اهل البصيره

يا وقت يا وقت الردى والزمن جار
خلى طويل اليد تصبح قصيره

يا وقت شنت وصاربك شي ما صار
خليتني يا وقت معمي بصيره

خليتني يا وقت محتار محتار
خليتني يا وقت عايش بحيره

ظلمك طغى والظلم نار على نار
ما تحرق الا قلب من فيه غيره

نصبر و نصبر والرجل دوم صبار
ونقول يمكن بأخر الامر خيره

لأجل الرفاقه صبرنا والصبر حار
لا صار عند الغير ضايع مصيره

لأجل الرفاقه من تعذر بالأعذار
وقفاتنا بالطيب تبقى شهيره

فعل يجملنا مع اكبار واصغار
فعل الرجال اللي لها الطيب سيره

الطيب لو انه بغبات الأبحار
نمشي دروبه لو دروبه عسيره

حنا وردناها طويلات واقصار
نأخذ طماعتنا بوقت الظهيره

من طيبنا نصبر على امرار وامرار
والغير شره يحترق في ضميره

واليوم صبر نهايته ظلم واضرار
ماله سوى النسيان شره وخيره