قالوا علامك غادي اليوم شيبة

[الحمدان]

قالوا علامك غادي اليوم شيبة
توك شباب وماليٍ راسك الشيب

إن كان شيبك فاقدٍ لك حبيبة
ياما فقدنا والليالي تجاريب

قلت الهوى كبيت خبثه وطيبه
لو الهوى ما هو حرامٍ ولا عيب

شيبي فراق أهل العلوم العجيبة
أهل النخاوي عند عوج العراقيب

غابوا وغيبتهم عليّه مصيبة
وفارقتهم ما فيه شكٍ ولا ريب

الموت خصمٍ مالقينا طبيبه
علة نحر ما تنعرض للأطابيب

والفقر غلّقها عسى الله حسيبه
واللي ما شاب بوقتنا اليوم مايشيب

أن كان تقدير الرجل غير جيبه
من وين لك تقدير يا فارغ الجيب

حيٍ يجيب اله المكاسب نصيبه
وحيٍ نصيبه لا يودي ولا يجيب

وتخلي الأصحاب ماهي غريبة
لكن الغريبة لاكرهوك المعازيب

والرزق غير الله ما احدٍ يجيبه
اللي يجيبه عالم السر والغيب

والا لو أن الرزق يؤخذ غصيبة
ما الفقر هان مفتلين الأشانيب

ولا كان حدتهم ظروفٍ صعيبه
على خدوشٍ ما تعرف المواجيب

القلّ قطّاع القريب وقريبه
ورجلٍ بليا مال كله عذاريب

المال يعطي الرجل طنخة وهيبة
ويقال له ذيبان وهو ولاذيب

‎
سالم محمد المرواني