يقول من قلبه تزايد هيامه

[الحمدان]

يقول من قلبه تزايد هيامه
فوقه رحا بقعا تطاحن لواحيه

يا حافرٍ للكنز تسعين قامة
خذ كنزٍ أعظم منه واحفظ معانيه

من لا يثمّن في المجالس كلامه
يطيح فيمن يصمخه لين يعميه

الخبل دايم ما يردّه خطامه
والقرم ما يحتاج قرمٍ يوصّيه

من يحسبنّ الذيب مثل النعامة
لو يرمي طويقٍ بكبره بيخطيه

من لا يبدّي للنشامى سلامه
عَدّه والى مرّيت به لا تحيّيه

احدٍ مثل نور القمر في تمامه
واحدٍ ظلامٍ تايهٍ من يقدّيه

احدٍ حسامه ما ذبح له حمامة
واحدٍ حسامه فالمصايب ينجّيه

كم واحدٍ فالناس خانه حزامه
وجاه الفرج من واحدٍ كان شانيه

الناس تدمح كلّش الا الكرامة
ولا فيه إناء إلا وينضح بما فيه

والشور في تركه دليل الغشامة
لا جاك شورٍ طيّبٍ لا تخلّيه

من لا تشيله في المواقف عظامه
ما شاف من عزٍّ سوا اسمه وطاريه

احدٍ فعل كفّه يعلّي مقامه
واحدٍ مقامه فعل كفّه يردّيه

من يبذر المعروف عند الهلامة
غير الفلَس ما فيه شيٍّ بيجنيه

من ملّك المقرود مقضب زمامه
يصبر على مايلحقه منه ويجيه

من لا تصحّيه العِبَر من منامه
مصيبةٍ وحده طلاق انْ تصحّيه

بالك عن الهالك تنشّد علامه
وانشد عن الناجي وش اللي منجّيه

ايامنا بين العوض والغرامة
انسان تاخذ منه وانسان تعطيه

احدٍ بنى فوق الثريا خيامه
واحدٍ تحَت في سابع ارضٍ مبانيه

من لايصلّي وش كسب من صيامه
إلاالعطش يصلاه والجوع صاليه

كم من قزم زاده غروره قزامة
وكم محسنٍ زاد التواضع حسانيه

طيبٍ مع الخايب يزيده لئامة
وطيب مع الطيّب يزيد الوفا فيه

من لا يسنّ غلامه أفسد غلامه
واليا كبر خيّب غلامه رجاويه

خمسٍ من الاسلام تكمل لزامه
شهادتينٍ ثمْ صلاةٍ تذرّيه

ثم الزكاة تطهّره من أثامه
والرابع صيام رمضان ومواريه

حسب الأهله عند ربي نظامه
والحج عند الاستطاعه تؤدّيه

اليا زعل منك النذل في قمامة
واليا زعل طيّب فحقّه تراضيه

في الطيّبين من المراجل وسامة
في كل وجهٍ غيهب النور غاشيه

وفي الخايبين من الرخامة دمامة
في كل وجهٍ قارٍ اسود مغطّيه

احدٍ قصر دون الطويلة لجامه
واحدٍ وصل من كل علمٍ حراويه

احدٍ على السفلى هفا به فطامه
واحدٍ على العليا رقت به مجانيه

واحدٍ عن الواجب ضرب له مهامه
يحتجّ بأدنى معذّره لا يسوّيه

ومن لا يحني دم الاعدا حسامه
والا بدمه سيف الاعدا تحنّيه

راح الشيوخ اهل السلف والجهامة
وجانا زمانٍ سابقاته مخازيه

في المجلس احدٍ كنّه ابو دلامة
واحدٍ رزينٍ كلمته ما توطّيه

من لا سرى في الليل خشية ظلامه
يجيه من سرّ الدهر ما يسرّيه

وعداد من حلوا قصور اليمامة
لا راح وفد جاك وفد متقفّيه

وعدة حصا كشبٍ ورمل الثمامة
على احمد المختار طابت مساعيه

ازكى صلاة طيّبه في ختامه
ينهي بها شاعر مضر هيض خافيه


ناصر الفراعنة