بعض العرب حبه يوردك الجنون

[الحمدان]

بعض العرب حبه يوردك الجنون
ولا يوصف له غلاه احكاك له

مايقنعه وصف الغلا لو وش يكون
لو كل حرف بالحرير يحاك له

الموت جاك وهو تقلبه الظنون
ولا لك إلا الصبر وش وداك له

إن قلت ضايق قال هونها تهون
مايدري إن ضيقتك له وبكاك له

تقعد تحبه وأنت ساكت ومغبون
يمكن بيوم يقال له ما أوفاك له

وكانك مشكك هو يمون أو مايمون
تخيل إن عشت الصبر فرقاك له

غلاه من فوق الغلا ماهوب دون
وحكاه سمعك يجبرك برخاك له

ودك تحطه في العيون من العيون
وتبسط على رمض الثرا يمناك له

وتظله من الشمس في ظل الجفون
ولا يمر إذنه سوا لباك له

وتسج من غيره لو إنهم يذكرون
ومنين ماسقت القدم ممشاك له

غرو يميله الترف ميل الغصون
غصن ليان ومكرمه بسكاك له

جديله إلا أقفا ستر منه المتون
كني بريحه لالتفت لدعاك له

كيك وعسل لكن ما هو في صحون
ودعاك من عين الحسود غطاك له

الله لا يعطيه ناس ينظرون
ويستر عليه من النحل لا ياكله

الوصف والتعبير في وصفه يخون
غير أطلب الله يستجيب دعاك له

الله لايعطيه ناسن ينظرون
ويستر عليه من النحل لاياكله

وعذال قلبك في محبته يهبون
سكينهم عن قطع حبله حاكله

ناس عن أعراض العرب ما يعرضون
ودايم على نفس الشكل والشاكلة

اللي من لحوم الأوادم ياكلون
وحلوقهم دافع البلاء متواكلة

في سلمهم أولى بالأكل الأقربون
وأكذبهم اللي صيدته شكواك له

عازمهم الشيطان للذنب ويجون
هذا يقطع له وذاك يواكله

ياجعلهم فدوة ثرى الغض الفتون
اللى على الدرب الطويل خطاك له

طيفه ليا نام البشر زارك بهون
وطيفك إلا نام البشر سراك له

حبه دفان ومقبرة خضر الطعون
من العظام العوج كنك ناكله

اللي كذا حبه لو تموت مغبون
ولا لك إلا الصبر وش وداك له

محمد بن فطيس