عفى الله عن عين حلا النوم جافيها

[الحمدان]

عفى الله عن عين حلا النوم جافيها
كراها قليل وذارف الدمع محفيها

الى قلت الا بالعين هيدي وهوّدي
جرا دمعها الصافي وهلّت عباريها

تبيّن فروع الصبح ما ذاقت الكرى
ولا لوم عين فارقت شوف غاليها

ولا زلّ يوم أو ليلة ما تعبّرت
عن النوح اعزيها ولا نيب قاويها

وانا في رجا جزل العطا علم بالخفا
يلطف بحال خافي الهم باريها

على نور عيني لب قلبي ومهجتي
تحنّ الضماير كل ما حلّ طاريها

حنين الخلوج اللي عن الضير فاختت
الى غاب عنها ساعة ما يباريها

وانا كيف ما ابكي طفلة غضة الصبا
حورية سبحان رب مسويها

نشت بالهدى والدين والحق والبها
فلو طالت الايام مانيب ناسيها

فيها طبوع كاملات حميده
حنون على الجيران ووصال عانيها

عفيفة نظيفة جيب ما داست الخطا
ولا هوجست بالمذهب اللي يزريّها

حشى ما بها من خافي العيب ذارب
حذا حشمة الوالد فهذا فهو فيها

كمل عمرها ثنتين مع عشر واربع
حذا محترمها تسفهه لو يحاكيها

خذت هجرة بالبيت عندي قليله
امانه وخذها الخيّر اللي عطانيها

ولانيب جزّاع فلا شك ولعة
اعرف الامانه ما لها غير واليها

فيا سامع دعواي في مظلم الدجا
تمحا جرايمها وتثبت حسانيها

وتجعل لها في جنة الخلد منزل
تقطف جنا جنّات طيبا وتجنها

وتعيضها فيما قصر من شبابها
برضاك يا خلاّقها وانت واليها

الهي ودودي دعوتي تستجيبها
على النفس كله من غلاها نبدّيها

الا واتكدّر خاطري من فراقها
ولولا غلاها ما تكلُّت راثيها

سمية دموع المزن في غبة البحر
سوى البنك ما يدرك ثمنها ويشريها

وانا مابي الا يوم يطرى سميها
عفى الله عن عين حلا النوم جافيها

وصلوا على من لا افترى سيد الورى
عدد ما جرا من رايح المزن واديها

عبدالله بن علي بن دويرج
رثاء في بنته