يا ما بذرنا الطيب في راعي الطيب

[الحمدان]

يا ما بذرنا الطيب في راعي الطيب
وفي جاحد المعروف يا ما بذرنا

ولا عندنا للي جحدنا مطاليب
قد جاه من جوداتنا ما عذرنا

يا ما غدينا له قصور ومعازيب
وبظلالنا يا ما عليه انكسرنا

نشبّ ضارينن على الطيب ونشيب
متجملين ولا الجميل يعسرنا

وليا وردنا صافيات المشاريب
في جمة الماء ما رمينا حجرنا

وان طاحت الهقوات مثل المشاهيب
حنا مثل ولْد الكحيلة طمرنا

أما سرحنا وانتشعَّى المظاريب
والا سرينا تحت غرة قمرنا

واليا بدا للازم فلا يمكن نغيب
ونجمل اللي ما حضر لا حضرنا

عسى سبايل لحيتة للعراجيب
اللي قصر عنا وحن ما قصرنا

واليوم قد الاوراق تحتاج ترتيب
عقب العلاقات الكثير أختصرنا

بذر الوفا في النذل ينبت عذاريب
لا يا خسارة بذرنا اللي بذرنا


مهذل الصقور