قصيدة الحروف الأبجدية

[الحمدان]

قصيدة الحروف الأبجدية
الشاعر عوض بن ناصر باصم


طعت القلم من هاجس ٍيشتكيله
ألفيّةٍ ترسل على الناس الأخبار

الألف ألّفت البيوت الجزيله
ملغومةٍ فيها الفكر يوقد النار

والباء برت حالي هنوف جميله
لها بوسط القلب ذكرى ومقدار

والتاء تحمّلنا هموم ٍ ثقيله
هموم ما ترحم صغيرين وكبار

والثاء ثلاث سنين مرّت بليله
يالله دِخيلك قبل قصّاف الاعمار

والجيم جاوبني زماني بحيله
عشنا ولو حظ ٍ بغيناه ما صار

والحاء حذاري من كفوف بخيله
كفوفها جدبا ولو فوقها امطار

والخاء خفايا رزقك الله كفيله
سبحان منهو يرزق الطير لا طار

والدال داو القلب بأسرع وسيله
اقرب من الله عالمٍ كل الأسرار

والذال ذَنبك بالدّعاء الله يزيله
يرحمك لا منْها اختفت عنْك الانظار

والراء رفيقك لا تدور بديله
من ينكر العشره له اللوم والعار

والزاء زهاب العمر فعلٍ تشيله
نرحل من الدنيا بلا سابق إنذار

والسين سِن العمر ما هو لجيله
ياكم كتمنا من مشاريه بستار

والشين شريان الكفو هد حيله
يا جعلني قبله على مر الاقدار

والصاد صحتني السنين الطويله
أصبحت أميّز ابخص الخلق واختار

والضاد ضم الصبر خلك زميله
بكره يجيب الله فرج يِسْعد الدار

والطا طموحي عاند المستحيله
العلم ساق الرجل في سطح الاقمار

والظا ظروف الوقت مثل الصقيله
سيوف حدتنا على كثر الاعذار

والعين عهدك لا تروغ و تميله
من يخلف الميثاق مخطي و غدار

والغين غادر مجلس اهل الرذيله
واقلط على نسل الأجاويد الاخيار

والفا فقدنا من كوانا رحيله
ياالله عساهم بين جنات وانهار

والقاف قم وأزهم ولو بالقليله
ولا بارك الله بيت ما هل زوار

والكاف كفك مدها بالجميله
جمايلٍ تبقى للاجيال تذكار

واللام لا يلحق لسانك فشيله
بالغيبه اللي تلحق النفس باضرار

والميم مركى الهم لا ترتكيله
خلك على صكّات الايام جبّار

والنون ناسبنا الرطب من نخيله
احرص على خوة طويلين الأشبار

والهاء هواجيسي سحابٍ مخيله
تسيل في ليلي مواويل وأشعار

والواو وِرْث الطّيب اثمن حصيله
ياللي على الفّيْ وتِذرّيك الاشجار

والياء يديني لخالقي مرجعي له
تمت وصلو عالنبي سر وإجهار