الفرق بين الناس حتى بالأخوان

[الحمدان]

الفرق بين الناس حتى بالأخوان
وفرق الاوادم ما يجي في نسبها

الفرق بالأفعال والطيب برهان
والنار ولعت نارها من حطبها

من يكتسب خمسة مواضيع كسبان
يا كبر حظ اللي بحظه كسبها

خمسة مواضيع لها شان وأحسان
تتعب لكن الفايدة في تعبها

لو تنشرى محد قدرها بالأثمان
ولو تنجلب بالسوق محد جلبها

ولو تنوزن ترجح على كل ميزان
ولو تنوخذ بالجاه كل طلبها

ومن سمعها يقول تشبه للأركان
ولا هن من الأركان يوم تحسبها

الاوله بالبعد عن كل شيطان
والثانيه نفسك تملّك غضبها

والعافيه والستر في كل الأحيان
منها نفوس الناس يكثر عجبها

والخامسه بالصبر لو كان ما كان
والصبر مفتاح الفرج من كربها

ولا تستمع ما قاله فلان وفلان
وسم العقارب دايم في ذنبها


مبارك البخيّت السبيعي