رد: ديوان الأمير بدر بن عبدالمحسن
 

من يقول اللقا غير الوداعْ
بينهم فرق واجد، ما صدقْ

أول اليوم عانقت الشفقْ
وآخر اليوم عانقني شفقْ

البدر

رد: ديوان الأمير بدر بن عبدالمحسن
 

ضاع القصيد وما بقى غير الأشواقْ
وأحلى الشعر ما يكتب الشوق في الشوقْ

إن خان بي الشاعر فأنا جيت عشّاقْ
وكل عاشق لا بد ما يطلب حقوق

يا سودة أبها خاشري كل شعاقْ
كبد السما لا شك لدّي لي بموقْ

البدر

رد: ديوان الأمير بدر بن عبدالمحسن
 

إن شكيت من الهوى قالوا فضيحهْ
وإن سكت استنقضوا جرحي عليّهْ

وإن نويت البعد ضاقت بي الفسيحهْ
وإن بغيت القرب خان القرب فيّهْ

البدر

رد: ديوان الأمير بدر بن عبدالمحسن
 

الجادل اللي لفتته ورد وشموعْ
يا حيف قلبي اللي احترق في لهبها

يمد لي حبلٍ من الود مقطوعْ
غير السلام وبسمته ما عبقها

البدر

رد: ديوان الأمير بدر بن عبدالمحسن
 

قلبي زوال الرجا راعهْ
ما ارتاح يوم ابعدوا منّي

وقّفت أنا لحظة وداعهْ
أبكي وأنا ضاحكٍ سنّي

مسكين من صاحبه باعهْ
وعيّن لياليه يشرنّي

البدر

رد: ديوان الأمير بدر بن عبدالمحسن
 

اجمع الرمل في ضلوعك غرامْ
واطوِ زندك على ضلعانها

عانق الرمث وعروق الثمامْ
واِصل خدك على صوانها

أرضك اللي بها البيت الحرامْ
أشرق النور من وديانها

ربعت بالمحبة والسلامْ
واعشبت بالفخر صمّانها


البدر

رد: ديوان الأمير بدر بن عبدالمحسن
 

الناس ما همَّها ظروفكْ
كود الذي يحزن لغمّكْ

وإن شلت حملك على كتوفكْ
بتموت ما احدٍ ترى يمّكْ


البدر

رد: ديوان الأمير بدر بن عبدالمحسن
 

عوّد الليل .. اوقد سراجك
واحبس الليل .. واطلق حجاجك

احبس هموم الغرام
واطلق البسمة سلام

إن شكى العاشق يلام
رحت يابدر التمام
عوّد الليل
فـ الضحى .. شدوا الركاب
وابحروا .. يم السراب

كانت عيونه حبيبي شمس
وعيوني سحاب

وآه يا سهيل اليماني
شدوا البدو بأماني

ليتهم ردوا الركايب
وربعوا بين المحاني

أوقدوا فـ النار نار
ما ورا ليلي .. نهار

من خذا فجرك حبيبي
ومن ترك لي .. الانتظار

آه يا رمل وهبايب
تدفن جروح الحبايب

يا ترى لو مر عام
يرجع الفجر اللي غايب

احبس هموم الغرام
اطلق البسمة سلام

إن شكى العاشق يلام
رحت يابدر التمام

وعوّد الليل

البدر

رد: ديوان الأمير بدر بن عبدالمحسن
 

شعرك كساه النور ما باج ظلماه
وخدّك غشاه الليل ما غاب نوره

فـ .. عيونك جنود .. وبواريد ورماه
غزو .. ورمشك صار مقدم سبوره

صبّح به اللي داله القلب بحماه
قبل النذير .. وقبل يملك شعوره

أنا الصويب اللي غشت صدره دماه
شلفا عيونك هشمت مش زوره

يامن يبي ذبحي .. وأبي منع لاماه
روحٍ شكت ظلمك تراها معذوره

البدر

رد: ديوان الأمير بدر بن عبدالمحسن
 

ياضاوي الليل .. نورك أخلف سراجي
خلاّ السفر .. وانطفي في عتمة عيونك

أقبلت .. صبحٍٍ نثر في متنه الداجي
جدايلٍٍ مشّطت بضلوع مضنونك

تسابقتك العيون وجرحي اللاجي
في القلب طفلٍٍ لمحته يقضب ردونك

يا مرحبا .. من ضميرٍٍ ظاميٍٍ راجي
كم ليلة قد طواني الياس من دونك

ليت الليال وعدك .. وكل من داجي
انت .. وجميع الثرى تذكر به ضعونك

البدر