رد: فوق هام السحب ( الشعر الشعبي) على متن القوافي
 

‏اسافر من محطات الخيال لوقفة التفكير
‏واغني باللحون اللي صداها يطرب أسماعي

‏جناحي ذكرياتي والسما فكرة واحب اطير
‏كرهت الواقع اللي يحبس افكاري في قاعي

‏جفيت الليلة اللي تشغل الخاطر عن التعبير
‏وسكنت الليلة اللي في دجاها يظهر ابداعي

.....

رد: فوق هام السحب ( الشعر الشعبي) على متن القوافي
 

حنّيتك من العتب يوم ان بعض العتاب
‏اقطع من السيف واصدق من دموع اليتيم

‏اهديت لك ورد واهديتيني اخطر صواب
‏محدٍ رمى الورد غير انتي وعبدالحليم

‏شكراً على مامضى لي معْك حتى الغياب
‏انتي غيابك صنع للناس شاعر عظيم

.....

رد: فوق هام السحب ( الشعر الشعبي) على متن القوافي
 

تعبت أمد الصوت في صمت إمتّلى بالتايهين
‏وتعبت أدوّر للجواب اللي خنق هلأسئلة

‏عايش على قيد الأمل ماني على قيد اليقين
‏أكبر من الأحلام وأصغر من غموض المرحلة

.....

رد: فوق هام السحب ( الشعر الشعبي) على متن القوافي
 

ياعاشق الليل وش خليت لعيوني
لو هامت بالليل تنشد نظرة عيونك

ماهي عداله بحب اثنين مفتوني
امّا انا او سمو الليل مفتونك

.....

رد: فوق هام السحب ( الشعر الشعبي) على متن القوافي
 

‏بالمحبة والمودة لك حبيبٍ زاد شوقه
والمشاعر صادقة درب الوفا تمشيه رجله

ولا يداوي جرح ود القلب لازادت حروقه
غير قربك خل سير أقدامكم للوصل عجله

.....

رد: فوق هام السحب ( الشعر الشعبي) على متن القوافي
 

ياما على وصلك ركضت وتعنيت
وفتحت لك قلبٍ من الحب تايب

وياما كسرت خاطري كل ماجيت
ارجع ودمعي فوق خدي سكايب

والحين عنك ياهوى البال صديت
حال الفراق وخاطري منك طايب

.....

رد: فوق هام السحب ( الشعر الشعبي) على متن القوافي
 

ياصاحب الكف المخضب بحناء
يامن أسرت القلب في نقش حناك

ياناقش الكفين يسرى ويمنى
سبحان من صور جمالك وسواك

.....

رد: فوق هام السحب ( الشعر الشعبي) على متن القوافي
 

‏حي المساء اللي نشوفك تجي فيه
ياللي عليك الروح كل يوم توله

يالذ واجمل شي تطري طواريه
ياغاية المشتاق واللي يقوله

.....

رد: فوق هام السحب ( الشعر الشعبي) على متن القوافي
 

اشفق عليك واعتني بك واداريك
واسكّنك عنّ البشر وسط عيني

ياما زعلت وقلت ماعاد احاكيك
ويردني شوقي عليك وحنيني

خوذ الصراحه من حبيبٍ مصافيك
انت اجمل اللي مرني في سنيني

.....

رد: فوق هام السحب ( الشعر الشعبي) على متن القوافي
 

‏نمسي على حال ونصبح على حال
‏يوم ٍلنا واليوم الآخر علينا

يوم ٍسلا خاطر ويوم ٍغثا بال
‏طبع الزمان وحكمة الله فينا

.....