رد: فوق هام السحب ( الشعر الشعبي) على متن القوافي
 

‏تذكّر ترى الذكرى مثل ردة المعروف
‏لاهب البراد وجمرة الشوق وهاجه

‏مجيك على ايّة حال ماهو مجي ضيوف
‏مجي العزيز الي يبي عرشه وتاجه

‏تجي لأي حاجه شوق ضيقه غرام ظروف
‏أنا لأي حاجه تاخذك لي في حاجه

.....

رد: فوق هام السحب ( الشعر الشعبي) على متن القوافي
 

‏انت الشعور الصادق وغيرك سراب
‏وانت المقرّ الثابت وغيرك ممر

‏غلاك بضلوعي تربّع ليين ذاب
‏يفوح مثل العود من فوق الجمر

‏يا أغلى البشر وجهك علاج الإكتئاب
‏ومواصلك مثل السحاب المنّهمر

‏حتى ولو قلبي شَعر بالإغتراب
‏انت الوطن واجمل ملذّات العمر

.....

رد: فوق هام السحب ( الشعر الشعبي) على متن القوافي
 

‏أحبّه ولو إن الزّعل بيننا له باب
‏يسكِّر مزاليجه ليا من ضحك سنهّ
‏
‏وأحبّه وأنا راضي وأحبّه عليه عتاب
‏كثر مايحب المؤمن الزَّاهد الجنهّ
‏
‏ولا يحيي فؤادي ليا من محلّه غاب
‏سوى مواصلٍ يسقى يباسه ليا حنّه
‏
‏جعلني هواه ليا تنهّت وهو مرتاب
‏أضيع بفؤاده كل تنفاسه وكنّه

.....

رد: فوق هام السحب ( الشعر الشعبي) على متن القوافي
 

‏الصيف ودّع شمسه وعوّد البرد
‏وعادت صباحات المطر والنسايم

‏قم ياصباح الغيم والعشب والورد
‏شف وش كثر نشتاق لك وانت نايم

.....

رد: فوق هام السحب ( الشعر الشعبي) على متن القوافي
 

كل علـى قده همومه تضده
‏وكل بعظم ارياه تعظم دعاويه

‏وكل بزود غناه يزداد وده
‏وكل بعد خطاه تبعد هقاويه

‏إن كان ماتصبر على كل شده
‏لامرقب ٍ ترقاه ولا قصر تبنيه

‏من لايودك صادقٍ لاتوده
‏ومن لايداري خاطرك لاتداريه

‏القلب يجفل من وجيهٍ مصده
‏أنا أشهد إن القلب دليل لراعيه

‏وما فات من دنياك صعب مرده
‏خذ لك من الماضي عباره وتوجيه

.....

رد: فوق هام السحب ( الشعر الشعبي) على متن القوافي
 

الطيب خصله فيه مجموعة خصال
‏ماينحصر بين الرخامه والظفر

‏مير الردي مثل الصفر على الشمال
‏لو تضربه فأكبر عدد يبقى صفر

.....

رد: فوق هام السحب ( الشعر الشعبي) على متن القوافي
 

‏اسم مع اهل المرجله ماهو سريع الاحتراق
‏يوم الاسامي بعضها بالانقراض مهدده

‏يكرم عن الهفوات والزلات والهرج الدقاق
‏لاهان راس تعب الاجيال قبله وبعده

‏يسعى لفعل الخير والمعروف والحق الحقاق
‏من يحتزم في المحزم المليان يبشر بسعده

.....

رد: فوق هام السحب ( الشعر الشعبي) على متن القوافي
 

‏يالمعنق لو تماديت لاتاخذ قرار
‏رحلة استجمام موتي واقعة في حينها

‏شاعرك غاوي بشعره ويكره الانكسار
‏وده إنْه يهيم في واديك وتغنينها

‏بين نفله وأقحاونه وربله والعشار
‏راودت نفسه لنفسه أسئلة تضمينها

‏لو تمادت رشة العطر وش ذنب الزرار
‏مايفرّق بين ريح الزهور وبينها

.....

رد: فوق هام السحب ( الشعر الشعبي) على متن القوافي
 

‏إقتنعت إن الليالي متاحف ذكريات
‏يوم تبطي سجّة البال بين أسوارها

‏اللي ظاهرها سعادة و باطنها شتات
‏وحشةٍ ما ملّت النفس من تكرارها

‏ما لفقدك غير نعمه وحيدة فالحياة
‏باحت الدنيا بعدك بجميع أسرارها

‏العيون تداري الدمع من كل الجهات
‏مثل الأم اللي تداري شعور صغارها

.....

رد: فوق هام السحب ( الشعر الشعبي) على متن القوافي
 

‏يامبعد عن شوف عيني مسافات
لاتحسب انه يخلف البعد ظني

حبك بقلبي شامخ ما بعد مات
وما هزته بعد المسافات عني

لو نبتعد روحي وروحك قريبات
حب جمعهن غصب عنك وعني

.....