رد: ديوان شعراء السعودية في العصر الحديث (متجدد)☘️☘️
 

قصيدة ماهيب الليلة أخلاقي
الشاعر: زايد الرويس زايد الرويس
#العصر الحديث
#المملكة العربية السعودية
0
548 مشاهدة

أبكتب ضيقتي قدام تكتبني

باسيّل دمّها حبرٍ على اوراقي

انا تعبان.. ما به شي متعبني

غريق.. بلا يدين تحاول اغراقي

أحس ان العطش يعطش ويشربني

واحس اني مفارق.. واجهل فراقي

حزين وكن هالاحزان تصلبني

على جذع السهر وتسمّر أحداقي

أبسألني ولا ادري كيف أجاوبني

وانا اخلاقي ماهيب الليلة اخلاقي

طلع نور الصباح وقلت ابشطبني

من البارح وضيقٍ مر ف اعماقي

نسيت اني قبل ما اقوم واكتبني

نزف بعضي وانا مدري على اوراقي

رد: ديوان شعراء السعودية في العصر الحديث (متجدد)☘️☘️
 

قصيدة الأحرار
الشاعر: زايد الرويس زايد الرويس
#العصر الحديث
#المملكة العربية السعودية
0
465 مشاهدة

يضيق البال واشتال الهموم برغبة الإصرار

على دفن السهر في دفتر الماضي ومشواره

خلاص انكفت يا قلبي من الترحال والأسفار

بلاش تجمّع جيوش الغرام وتشرب انهاره

عشقت الله يخرب بيت عشقٍ حدّني لافكار

مليئه بالجنون وبالتسكع داخل الحاره

طموحٍ شايله في داخلي يا للأسف وانهار

تحت حصن الجهل مابين بوابته واسواره

وما نيل المطالب بالتمني واسأل الأحرار

غلاباً تؤخذ الدنيا بركضٍ طال مضماره

وانا لو سولفت عني جروحي ربما تحتار

لأني ما خضعت لها بدربٍ تاهت انواره

يموت من العطش قلبي واحس بداخلي أنهار

من العزه من السؤدد ومجدٍ ما طفت ناره

ولكن طفلةٍ لا سولفت تستيقظ الأزهار

خذتني للضياع وقلت لجلك باعكس الطاره

مادام العمر فاني وش علينا نعكس التيار

نذوق من الحلى في وقتنا اللي تهطل امراره

يصير اللي يصير وما نقول ش صار أو ما صار

مادام انّا حرقنا دفتر الماضي ومشواره

رد: ديوان شعراء السعودية في العصر الحديث (متجدد)☘️☘️
 

قصيدة تساهيل
الشاعر: زايد الرويس زايد الرويس
#العصر الحديث
#المملكة العربية السعودية
0
449 مشاهدة

النار مشتبّه على اطراف الايام

واليوم يولد من رحم مغربه ليل

لا الوقت يرحمني ولا حبر الاقلام

سيّل بعض نبضي وانا كلي يسيل

يا موجعٍ قلب الغلا حزن وهيام

لك وحشةٍ تبقى مثل لهفة بخيل

ما عاد باقي لي سوى بيض الاحلام

ذخرتها قدام اعرف المقابيل

ليتك تعرف انك معي مسك وختام

صوتك حياة وذكرياتك مراسيل

تصدق ان قلت لك مشتاق من عام!

وانك معي حتى على شاطي النيل!!

يا كثر حبي لك ويا كثر الالام

ويا قل فرحتنا.. وقل المواصيل

شفني بقايا انسان باقي به حطام

أصبر على حزني واردد تسااااهيل

ولاعاد باقي لي سوى بيض الاحلام

غير الدموع اللي بليا مناديل!!

رد: ديوان شعراء السعودية في العصر الحديث (متجدد)☘️☘️
 

قصيدة عندي سؤال
الشاعر: زايد الرويس زايد الرويس
#العصر الحديث
#المملكة العربية السعودية
0
441 مشاهدة

مدري وش اللي عني البارح اشغلك

وخلاك تنساني وانا ميتٍ فيك

اسأل عليك من اخر الشوق لاولك

وافكر اليا جيت يمي وش اهديك

ولاجيت يمي قلت لك يوووه ما اجملك

في ناظري حتى عيوبك تحليك

يا خف دمك في عيوني وما اثقلك

ثقيل بس اموت لحظة تغليك

تصدق اني صرت لاشفتك آزعلك

عشان لامنك زعلت ارجع ارضيك

عندي سؤال وكل ماجيت ابسألك

يضيع مني قبل ما اضيع واجيك

ابسألك وش اللي البارح اشغلك

وخلاك تنساني وانا ميتٍ فيك

رد: ديوان شعراء السعودية في العصر الحديث (متجدد)☘️☘️
 

قصيدة ليلة السبت
الشاعر: زايد الرويس زايد الرويس
#العصر الحديث
#المملكة العربية السعودية
0
432 مشاهدة

ضايق ولا ادري ضيقتي وش وراها

مليان حزن... ولو تبعثر! ترتبت

أشطب ملامح حيرتي من سماها

لا من تنفس داخلي شي من كبت!

مالت عناقيد التعب واحتواها

كف السهر في ليلةٍ تنجب السبت!!

واللي مساي مضمخٍ من مساها

ما تدري اني كثر ما اسهر تعذبت

جالس مع الحرمان ادوّر رضاها

واقول يمكني وانا مدري اذنبت!

رغم ان قلبي كلما ضاق جاها

وانا ليا ضاقت على القلب جنبت!

رد: ديوان شعراء السعودية في العصر الحديث (متجدد)☘️☘️
 

قصيدة أطلق شنب
الشاعر: زايد الرويس زايد الرويس
#العصر الحديث
#المملكة العربية السعودية
0
413 مشاهدة

البارحه ليل الهواجس قام يجتاح الفصول

الغى مواعيد الشتا واحرق بقايا الياسمين

المشكله سهله ولكن يا ترى وين الحلول

وين انت يا عبد المعين ان كان لك قدره تعين

قامت سوالف بعض خلق الله على الفاضي تطول

والدرب واضح ما يبي لفه يسار ولايمين

لكن شتات الفكر يخلف ماتبقى من عقول

ووقت الفراغ يسبب الفوضى لكل العاطلين

حتى المهاه اليوم صارت ند تطمع فالزحول

اخر زمن فيه الشكوك تعوم في بحر اليقين

يا وردةٍ فاخر لياليها تغشاها الذبول

لايام مرت فايته اصبح يعاودها الحنين

علامة استفهام ضاعت في عبارات الذهول

تشرح لكل الحاضرين اسرار بعد الغايبين

ماني ضعيفٍ وارتجي من بعض خلق الله قبول

لي كلمةٍ لا قلتها تثبت على مر السنين

صريح واضح موقفي واذا بغيت اقول اقول

ولاهمني اطلق شنب بين الرجال الحاقدين

رد: ديوان شعراء السعودية في العصر الحديث (متجدد)☘️☘️
 

قصيدة طعنة احباب
الشاعر: زايد الرويس زايد الرويس
#العصر الحديث
#المملكة العربية السعودية
0
408 مشاهدة

البارحة وجروحي حسابها حساب

البارحة وظنوني تصيب وتخيب

ما كانت الا طعنة احباب لاحباب

توزعت بين السهر واللواهيب

يا تاركتني بين ضيقاتي ارتاب

ما عاد باقي في عيوني مكاتيب!

أرسلت لك دمعة وتنهيدة عتاب

جاني جوابك غيبةٍ عيّت تغيب!

وانا اختنق بين الدرايش والابواب

أتنفس الحرمان بين المحاديب

كن التعب في داخل الروح ينساب

ويرتب احزاني والالام ترتيب

إشتقت لك وانتي على شفة غياب

بارمي ف حضنك عاشقٍ دربه صعيب

وان ذاب قلبه قلت: ما ذاب.. كذاب

بك ذاب كله واعند جروحه يطيب

يحسب لغيباتك عن عيونه حساب

والمشكلة لا صارت ظنونه تصيب

رد: ديوان شعراء السعودية في العصر الحديث (متجدد)☘️☘️
 

قصيدة على كيفك
الشاعر: زايد الرويس زايد الرويس
#العصر الحديث
#المملكة العربية السعودية
0
392 مشاهدة

صحيح اني... مسافر... بس... قلبي.. في يدينك... ظل

على كيفك... تودينه.... تجيبينه... على....... كيفك

وانا... ما راح اسأل... ليه؟.... والا كيف؟.... والا هل؟

أعرفك زين.... دلوعه.... وحلوه.... والحلا.... كيفك

انا اتذكّر.... الى من قلت.... اب اشوفك.... جوابك طل

واذا تضايقت.... قلتي لي.... بكيفي!!... والبلا.... كيفك

يضيّعني طريقي.... وان مشيتي.... في طريقي.... دل

بكيفك...كل شي يمشي.... يا علّي... ما اخلى....... كيفك

كتبتك في مساراتي...... الا يا تل قلبي....... تل

تتلينه.... بكيفك.... وان دروا كل الملا...... كيفك!!!

وانا..... لو مل قلبي..... من عذابك... قلت... قلبي... مل

إذا كيفك.... بتعذيبي.... ابرخص.... ويغلى.... كيفك

ولكن.... صدقيني.... لو ب اقول.... الدمع مني.... هل

ولو تقولين.... مو بالكيف..... ابصرخ إمبلا.... كيفك

تطيح الأمنيات..... ب ليتها.... وال لو.... قبل... ال عل

تطيح.... من السما.... فجأه.... كذيا ويعلا.... كيفك

ومع ذلك.... احبك.... حب... أنفاس المحبه... لل

وصال.... وكان.... ما يرضيك وصلي.... مو على كيفك!!!

رد: ديوان شعراء السعودية في العصر الحديث (متجدد)☘️☘️
 

قصيدة كسرة وسكون وضمة وفتحة
الشاعر: زايد الرويس زايد الرويس
#العصر الحديث
#المملكة العربية السعودية
0
387 مشاهدة

ياعيون الشاعر اللي يشوف الكون كون

وان بعدتي كل هالكون في عيني يضيق

حبك اغلى شي عندي وتفداك العيون

والله ان الحب لجلك ولعيونك يليق

يابعد زايد غرامك خذاني للجنون

ياجنونٍ صرت احبه وصار اوفى صديق!!

هيه يا روما حياتي علشانك أكون

شاعرٍ تنزف جروحه وأحلامه طريق

كل ما قلتي احبك أشوف الفين لون

وسط خاتم من زمرد وخاتم من عقيق

كل كسره في حياتي أخليها سكون

لجل تصبح كل فتحه مثل ضمة غريق

أذكرك يوم المس يديك وتموت الطعون

ويستفيق الحلم... لالا.. أنا اللي كنت افيق

واصبح اعظم عاشقٍ صب في كاس المجون

مذهب العشق العفيف وشرب أحلى رحيق

قربي مني تراني أحس اني بدون

وانتي الموطن وانا جيت وعيوني تويق

شفت معك الحب كله وشفت الكون كون

وشفت كل الكون بعدك مساحاته تضيق

رد: ديوان شعراء السعودية في العصر الحديث (متجدد)☘️☘️
 

قصيدة جتك تكفى
الشاعر: زايد الرويس زايد الرويس
#العصر الحديث
#المملكة العربية السعودية
0
378 مشاهدة

ياصاحبي قلبي يدوّر مرفا

وفي وجنتك كني لمحت الضفه

وجنتك هذي سحرها ما يخفى

حتى ولو شالك عليها تلفه

بردان والبردان لازم يدفى

لو مادفى يمكن تصيبه خفه

تقول تكفى قلت جتك التكفى

مير الله الله لاتزم الشفه

يا اعز واغلى من وعدني واوفى

وعدك لا منك وعدته وفّه

ليتك ليا شقيت جرحي ترفى

قلبي علامك ما تصافح كفه؟؟

انا الغريب اللي لقى بك منفى

عن حزن دنياه وهمومه خفّه

تكفى دقايق خل قلبي يغفى

وان شفت لاهب نار فيني طفّه

الوقت لوّ انه يزين ويصفى

ما كل عاشق ينجرح من شفّه

ابك انت شفّي طالبك لا تجفى

خل الفرح يضحك بيوم الزفّه

اتلى العهد في فرحتي يوم اقفى

زولك وحزني راجحٍ بالكفه

وغليلي اللي لو بغيته ما اشفى

يشفيه شوفك يا أمير العفه

والله ما غيرك بعيني مرفا

في شفتك في وجنتك لي ضفه

رد: ديوان شعراء السعودية في العصر الحديث (متجدد)☘️☘️
 

قصيدة الزمن غافي
الشاعر: زايد الرويس زايد الرويس
#العصر الحديث
#المملكة العربية السعودية
0
376 مشاهدة

يا صاحبي والزمن غافي

خله على كيف مشهاته

مادمت طيّب ومتعافي

اسرق من الوقت بسماته

واترك لمجدولك الضافي

حريته واطلق سكاته

ماجيتك ابحث عن انصافي

من وقت كثرت حماقاته

جيتلك باحساسي الدافي

قلبي تباريك خطواته

قرّب ابشرح لك الخافي

عن فارسٍ خان كبواته

واهداك من حبه الصافي

عشقٍ تضيّع مسافاته

وابسألك ليه يا جافي

تترك حبيبك لهقواته

ماتدري انه معك وافي

ما طاع فالحب نزواته

والشوق لو كان ينشافي

باعلمك باتجاهاته

في بحر عينك بمجدافي

بتحس وتشوف ضرباته

بتقول باحساس يا كافي

ارفق على القلب يا ذاته

رد: ديوان شعراء السعودية في العصر الحديث (متجدد)☘️☘️
 

قصيدة عش حياتك
الشاعر: زايد الرويس زايد الرويس
#العصر الحديث
#المملكة العربية السعودية
0
373 مشاهدة

عش حياتك!
غن
لو ودك تغني
إبكِ
لو سيّلك حزنك
ياخي حب!!!
والا تدري!
لا تغني
خل ماحولك يغني
وانت.. حب!!
.......
ليش تسكت؟
وانت في قلبك كلام!
ليش تكتمها جروحك!
حس ياخي في جروحك
خلها تعزف ألمها
وسط روحك
علّق احزانك على شمعة
وناااااااااااااام
والا تدري!!
لا تنام
أنت حب
وخل كل الكون يسهر
ما ينام!

رد: ديوان شعراء السعودية في العصر الحديث (متجدد)☘️☘️
 

قصيدة ألو
الشاعر: زايد الرويس زايد الرويس
#العصر الحديث
#المملكة العربية السعودية
0
357 مشاهدة

ليلة البارحة والشوق عيّا يغيب

والثواني تمر وكنها ما تمر

طحت في جمرة اشواقي وزاد اللهيب

واستثرت العيون وطاح منها جمر

كل نارٍ ترمّد غير نار الحبيب

تشتعل والضلوع الحدب ماهي سمر

يا بعيدٍ عن عيوني بقلبي قريب

عطني الآه عنك وخذ بقايا العمر

أنت في قلبي لحالك ولا لك طليب

تملك الروح دون البيض هم والسمر

صدّق اني أعيش بدون صوتك غريب

صرت اخاف الظلام بغيبة اجمل قمر

ما اتوقع جروحي في غيابه تطيب

دام بي شوق يغمرني لنبضه غمر

إتصل بي دقيقه دام ظرفك صعيب

تدري ان المواجع دامرتني دمر

قل آلووووو ثم قفّل ما بها ما يعيب

سوّها ولا على صوتك حبيبي أمر!!!

رد: ديوان شعراء السعودية في العصر الحديث (متجدد)☘️☘️
 

قصيدة علوم دقاقة
الشاعر: زايد الرويس زايد الرويس
#العصر الحديث
#المملكة العربية السعودية
0
350 مشاهدة

والله اني يا هوى البال متشفق

للسوالف معك ف علومٍ دقاقة

انت واعدني.. عسى ربي يوفق

نلتقي واهدي لك من الحب باقة

اليد الوحدة تراها ما تصفق

والأكل للجايع أشهى من الذواقة

والله ان الشوق فالروح متدفق

مثل سيلٍ عرم يجرفك اندفاقه

بس انا قلبي عليك انت مترفق

فالهوى يعرف وقوفه وانطلاقه

لا يغرك من يجيب ومن يلفق

للعلوم ولو لبس ثوب الصداقة

لا سمع له سالفة جاك متصلفق

وده يقطع من سلوك العلاقة

ما درى انك يا هوى البال متشفق

للسوالف معي ف علومٍ دقاقة

رد: ديوان شعراء السعودية في العصر الحديث (متجدد)☘️☘️
 

قصيدة يادلعها
الشاعر: زايد الرويس زايد الرويس
#العصر الحديث
#المملكة العربية السعودية
0
349 مشاهدة

يا دلعها ويش اسوي لا ذكرتك وانتشيت

ويش اسوي يا دلعها دام لي شوقٍ جهور

ياخجلها والله اني لاقرب عروقي حكيت

وقلت هذي روح روحي بنت حوى وحسن حور

يا ترفها لو توزّع في المداين بيت بيت

كل بنتٍ فالمدينه صابها تيه وغرور

يا تواضعها لك الله فيك كم مره غديت

ما رجعت الا وانا في داخلي سبع البحور

ياسوالفها متى ما طار بي شوقي وجيت

شفت نفسي مالكٍ كل المباني والقصور

يا براءتها براءة طفل فيها كم رأيت

نفحةٍ فيها صدوق الود وانفاس الزهور

يا اناقتها ملابسها تمام الايتكيت

وبسمةٍ منها على همسه ونفحات العطور

يا شعرهاالليل لامني تهقويت وسريت

ضعت في كل البلاد وضعت في كل العصور

ياغلاها والله اني فيك مابعت وشريت

تسري بروحي وانا في جلستي بين الحضور

يا حياتي اقبليني عاشقٍ مغرم هويت

سامحيني واعذريني كان جا مني قصور

والله اني في غرامك بين حي وبين ميت

في فراقك موت وان جيتي ملى قلبي السرور

ايه احبك ايه احبك قلتها لك ما استحيت

خلي الدنيا تدور وخلي افراحك تدور

يابعد كل البنات البيض لو منّك شكيت

اشتكي بعدك وانا قلبي ابد ماهو صبور

اجمعيني من بعض حزني وانا ياما بكيت

واطرحيني في بحر حبك وخليني شهور

سافري بي ف الف مينا واقتليني لو رويت

كيف ابروى من حنانك كيف ابلقى لي عبور

ودي اوصل شاطي احلامي واغني بك ياليت

اشعل شموع المحبه واهدي لحسنك بخور

داخلي نار المحبه لو طفت بك ما طفيت

داخلي بركان حب يثور من وجدي واثور

طالعي فيني وتلقيني على الحلم ارتميت

وشوفي احساسي كتبته وانتثر بين السطور

سولفي لي سولفي وان كان شفتيني غفيت

قولي اسمي لجل انادي سم يا بدر البدور

رد: ديوان شعراء السعودية في العصر الحديث (متجدد)☘️☘️
 

قصيدة لا تسهر
الشاعر: زايد الرويس زايد الرويس
#العصر الحديث
#المملكة العربية السعودية
0
342 مشاهدة

الليل ذر الرماد بعين سهرانه

والصبح ما قال للسهران لا تسهر!

ما اصعب من الشوق لا من فل جنحانه

بعيون من تكبر جروحه وهو يكبر

والغايب اللي غيابه ظلم وخيانة

خلى طيوفه وحبر الدمع والدفتر

جيت اكتبه في محيط الشعر واوزانه

لقيته اطلق شراعه للأسف وابحر!

من كثر ما احتاج له واوله لتحنانه

احس حتى جفاه بداخلي أزهر

يغيب عني ويدري صعب نسيانه

واشتاق له بس هو يشتاق لي أكثر

وان قلت عيني طوال الليل سهرانه

يقول: طيّب أنا ما قلت لا تسهر!

رد: ديوان شعراء السعودية في العصر الحديث (متجدد)☘️☘️
 

قصيدة الشيخ عبدالعزيز بن جامع
الشاعر: زايد الرويس زايد الرويس
#العصر الحديث
#المملكة العربية السعودية
0
329 مشاهدة

للشعر عشاقه وللشاعر افكار

وللفكره المعنى وزين التعابير

واليا بديت القاف مانيب محتار

كن المعاني قدم عيني طوابير

أختار منها مثل ما ودي اختار

وتمطر مثل غيث السحاب المزابير

الى تغزلت اهدي ورود وازهار

والى مدحت امدح رجالٍ مناعير

والمدح ما هو سرّ لا والله جهار

يستاهله شيخٍ كسب كل تقدير

هذاك ابو خالد عسى عمره اعمار

دون القبيله وقفته دايماً غير

لا قيل ابن جامع سكت كل هذّار

ريف اليتامى فالليال المعاسير

زبن الدخيل ومكرم الضيف والجار

ويشهد على ما اقول صفرٍ مباهير

في قصره اللي واضحٍ مد الابصار

متوسطٍ في نجد في منزل الخير

هو ذخرنا لا صار فالوقت ما صار

لاد المروّح ما شكوا منه تقصير

في مجلسه تلقاهم صغار وكبار

وزودٍ على الروسان تلقى الخطاطير

ما يبخل ب جاهه ولا ساق الاعذار

وفي نظرته تلقى لحاجتك تبشير

هو شيخنا اللي ياقف الماقف الحار

طبعٍ لجدانه وهو واصل السير

يوم انها غارات ومواجه اخطار

ومواقعٍ يشبع بها الذيب والطير

تلقى الجوامع من على قحص الامهار

خيّالهم يفتّك وان ثارت يغير

واليوم في وقت الرخا صاروا اسوار

درعٍ لنا نلجا لهم دون تفكير

هذي تعابيري وللشاعر افكار

ولا لي وراها غير صدق التعابير

رد: ديوان شعراء السعودية في العصر الحديث (متجدد)☘️☘️
 

قصيدة كيف اكتبك
الشاعر: زايد الرويس زايد الرويس
#العصر الحديث
#المملكة العربية السعودية
0
298 مشاهدة

كيف اكتبك وانتي معي وين ما اروح

طاريك يلحقني وانا الحق ب طاريك

لو بارسمك في لوحة العمر وآبوح

رسمت صرخه فالزوايا تناديك

غيبتك اصوّرها مثل نزعة الروح

حضورك ارباك الغلا في موانيك

في ضيقتي ثغرك ب بسماتك يلوح

في وحدتي حطيت كفي باياديك

إن قلت احبك يصرخ القلب مجروح

واذا سكت الدمع بالحال ينبيك

لك وحشةٍ تغتال الامال بوضوح

لك طلةٍ تضمني في لياليك

كيف اكتبك وانتي معك وين ما اروح

طاريك يلحقني وابلحق بطاريك

رد: ديوان شعراء السعودية في العصر الحديث (متجدد)☘️☘️
 

قصيدة ليلة خميس
الشاعر: زايد الرويس زايد الرويس
#العصر الحديث
#المملكة العربية السعودية
0
291 مشاهدة

ليلة خميس ولمة احباب واصحاب

يحلى السهر ما بين كف! وذوايب!!

وانا على مركى التعب خاطري طاب

من كل فرحة ما تمر الحبايب!

أحبابي اللي سكروا دوني الباب

خلوا جروحي عرضة للهبايب!

يا كثر ما في داخلي شوق وعتاب

موجود! لكني عن الناس غايب

وش حيلتي لا صرت مشدود الاعصاب

مثل الثرى لا من ترجّى السحايب

ليلة خميس وفاقدٍ شوف الاحباب

وغيري نصيبه شوف ذيك الذوايب!

رد: ديوان شعراء السعودية في العصر الحديث (متجدد)☘️☘️
 

قصيدة الذيابه تعاوي
الشاعر: زايد الرويس زايد الرويس
#العصر الحديث
#المملكة العربية السعودية
0
285 مشاهدة

الليل مسرى والذيابه تعاوى

والنجم طاح وضيّع الدرب ساريه

والجرح ينزف عقب ماهو تشاوى

ماعاد يقوى للعتب والمشاريه

كفة غرامي مع جروحي تساوى

لاشك صوتي مالقى من يناديه

ياليت قلبي من عذابه تداوى

ولاطاح حمله بين مبغض ومغليه

اتعبت فكري بالسهر والمراوى

بيني وبين اغفاية الهم قول ايه

اما يزول الهم والا نتخاوى

والهم لابعته ولانيب شاريه

سريت ليله والذيابه تعاوى

لاواعذاب اللي من العشق ساريه

رد: ديوان شعراء السعودية في العصر الحديث (متجدد)☘️☘️
 

قصيدة سوق الفيصلية
الشاعر: زايد الرويس زايد الرويس
#العصر الحديث
#المملكة العربية السعودية
0
274 مشاهدة

ليلة البارح وانا امشي وسط سوق الفيصليه

شفت بنتٍ يا جماعه مير بسم الله علاها

كنت رايح يعلم الله بس ابشري لي هديه

ماحسبت حساب بنتٍ يجهر الساري سناها

فز قلبي فزةٍ قشرا بغت تقضي عليه

زادت الخفقات في قلبي وجا روحي بلاها

عطرها مجنون باريسي وله نفحه قويه

لابسه طرحه خليجيه ومظهرةٍ حلاها

لعنبوها مالها والي ولا ربع ودنيه

ساعتين تدوج وسط السوق والعالم وراها

واحدٍ خلى عياله راح يلحقها شويه

طلّع الجوال من جيبه يبي يكسب رضاها

قلت انا لازم اعرف اليوم وش عند البنيه

ليش هالعالم وراها وين ماراحت معاها

اشغلوها كلموها ما تحكت باي شيه

قلت ياعيني على هالبنت يا مااكثر حياها

قرّبوا منها ثنينه واحد يكلّم خويه

قال تكفى لاتطوفك قال ازهلها وجاها

قال يسعد لي مساءك يالعيون النرجسيه

والمصيبه يا جماعه يوم شالت عن غطاها

واثرها ماغير خدامه وسوت هالقضيه

المعازيب تركوها من خلاها في خلاها

رد: ديوان شعراء السعودية في العصر الحديث (متجدد)☘️☘️
 

قصيدة عيون السهارى
الشاعر: زايد الرويس زايد الرويس
#العصر الحديث
#المملكة العربية السعودية
0
273 مشاهدة

قل المسا واقول: برد وسهارى

قل الدفا واقول: وين الحبايب

قل الوله واقول: صوت الحيارى

قل الظما واقول: طعنات غايب

قل الحنين آقول: نبضٍ توارى

قل الدموع آقول: مزن وسحايب

قل الفرح واقول: عنا تدارى

أقفت به ايام التعب والهبايب

يا صاحبي هالحزن صعب يتجارى

حتى الصبر قدام هالحزن ذايب

الليل لو يرحم عيون السهارى

ما كان غاب عن الحبايب حبايب

رد: ديوان شعراء السعودية في العصر الحديث (متجدد)☘️☘️
 

قصيدة بيتين بيتين
الشاعر: زايد الرويس زايد الرويس
#العصر الحديث
#المملكة العربية السعودية
0
266 مشاهدة

وشلون.. مدري.. ماتت احلامنا البيض

ماتت... وحنا نرجي ايامنا السود!!

لو للأمل نهرٍ على روحي يفيض

غمست فيه الياس يمكنه يجود

أنتي تعدين الليالي والايام

وانا هنا ماغير اعد الثواني!

تشكين بعدي.. واشتكي موت الاحلام

ولا ادري من اللي فالحقيقة يعاني!

ياللي جروحك غير وانتي بعد غير

يشبه قميصك! حزني المُر شفّاف

أنا اوعدك.. لا من رجعتي على خير!

تلقين جرحي طيّب وما به خلاف

آخر كلامٍ سمعته منك.... خلاني

أطيح واقف! من احلامي على حزني

والكلمة اللي خذتني منك ل احزاني

مثل الشريفة! إلى ماتت! وهي تزني!!!

حزني بحر! والفرح مثل السفينة

تبحر... ومن مينا توقف ب مينا

يجوز تتوقف سنة! في مدينة!

ويجوز تغرق فيه! وتموت فينا

رد: ديوان شعراء السعودية في العصر الحديث (متجدد)☘️☘️
 

قصيدة يصير خير
الشاعر: زايد الرويس زايد الرويس
#العصر الحديث
#المملكة العربية السعودية
0
254 مشاهدة

يا حبيبة قلبي الوضع من تالي خطير

والمشاعر في يديني ومعك افختها

وصاحبتك اللي تسامرك من عقب الاخير

كلما مرتك قلت آه الا وابختها

تاخذك مني برغبتك.. لكن وش يصير

لو تركتي بحور وقتك بليا يختها

صح انا ما اغار منها ولكن باستجير

بانتخي فيها واذا ساعدت شيّختها

وكانها ما ساعدتني باقول الله كبير

ينتصف لي وان تمادت بعد وبّختها

ما يضيّق صدر مثلي من العشاق غير

حاجتينٍ كل وحده أمرّ من اختها

المواصل لا تعذر بقول يصير خير

والأماني لا استماتت بعد نوّختها

مشكله لا من تعلّقت في سلك الحرير

والليالي لو تدوّخك ما دوّختها

والا انا من ليلة العام معدوم المصير

ليلة الوصل بمشاعر غلاك ارّختها

يوم كان الوضع ما بيني وبينك خطير

كانت يديني بيدّي وعقب.. افختّها

رد: ديوان شعراء السعودية في العصر الحديث (متجدد)☘️☘️
 

الشعراء
زايد الرويس

قصيدة كأنها الفرقى طلبتك حاجتين

قصيدة كأنها الفرقى طلبتك حاجتين
الشاعر: زايد الرويس زايد الرويس
#العصر الحديث
#المملكة العربية السعودية
0
254 مشاهدة

يا بخيلٍ فالوصال بنظرتين

ويا كريمٍ في طعونك والجروح

أنت زوّدت المفارق حبتين

والا انا.. ودي لو انك ما تروح

شف دموعي.. فوق خدي دمعتين

ودمعتين بوسط خفاقي تنوح

فالسهر.. صارت عيوني نجمتين

وصار نوم الليل لعيوني طموح

كل يوم احرق من الشوق بكتين

لين جسمي صار جسم بدون روح

وانت قبل تنام تطفي شمعتين

والمخدة من شذى خدك تفوح

ولا بقى في خاطري الا كلمتين

قرقعت في صدري وتبغى تبوح

كانها الفرقا طلبتك حاجتين

لا تخليني... وتكفى لا تروح

رد: ديوان شعراء السعودية في العصر الحديث (متجدد)☘️☘️
 

قصيدة لهفة الشيخ
الشاعر: زايد الرويس زايد الرويس
#العصر الحديث
#المملكة العربية السعودية
0
249 مشاهدة

ما ضاق صدري.. والسهر نزف الاهداب

والليل..... تنوّر ارتباك.. المجاريح

يا صبح.. قم شرّع لوقفاتك.. الباب

خل الغصون تعاند... ان هبّت الريح

يا كثر ما مديت لجروحي..... اسباب

واشعلت للظلما حروفي..... مصابيح

وش عذر حرفي... والموازين غيّاب

وانا لحالي.... والزمن... للمشافيح!!

تكتبني الدمعات... واكتب.. للاحباب

والغيم لو يكتب.... كتب... لهفة الشيح

هذا الزمن صدقه.... مثل صدق... كذاب

يستسهل الكذبه..... وهو باله.... مريح

تركض على وجهه عداوات..... واصحاب

وتغسّل ايامه....... دموع التماسيح

بلاش من هذا الزمن..... خاطري طاب

مليت اشوف الناس من عيني..... تطيح

رد: ديوان شعراء السعودية في العصر الحديث (متجدد)☘️☘️
 

قصيدة مشكلة قلبي
الشاعر: زايد الرويس زايد الرويس
#العصر الحديث
#المملكة العربية السعودية
0
242 مشاهدة

للظما قلبٍ تضج به المحاني

ما تبلله السواليف القديمة

ينتظر والمنتظر لو ما يعاني

ما شهق رغبات قلبه من صميمه

عقرب الساعة لوى عنق الثواني

تختنق وتموت والخطوة جريمة

يا معلّقني على هامش زماني!

ما بقى للوقت في غيبتك قيمة

للسهر عندي محطات ومواني

وللتعب فيني مواويلٍ أليمة

إنتظرتك لين عاتبني مكاني

واعترفت اني معك ذقت الهزيمة

كن هذا الشوق مخلوقٍ عشاني

سينه اتعبني ولا حصلت جيمه!

مشكلة قلبي معك دايم يعاني

وانت مشكلتك نواياك السليمة!!

رد: ديوان شعراء السعودية في العصر الحديث (متجدد)☘️☘️
 

قصيدة الحاضرين يعلمون الغايبين
الشاعر: زايد الرويس زايد الرويس
#العصر الحديث
#المملكة العربية السعودية
0
242 مشاهدة

مع التحيه للجميع اللي هنا واللي هناك

الحاضرين يعلمّون الغايبين بما جرى

قصه وانا سجلتها من دون ما اشعر بارتباك

أمشّي الخطوه على قدام ماترجع ورى

ياصاحبي يا قايد الغزلان قلي وش دهاك

مافيه احد ياصاحبي ما حس بالوضع ودرى

شهر شهر شهر شهر شهر تمشيني وراك

اتعبتني مغير طالع نازل بطلعة كرى

ارفق شوي الله يسمّح دربك ويرضى علاك

شف جرحك اللي من ثلاث شهور توه ما برى

انا ادري انك كاملٍ بالزين يوم الله عطاك

زينك لحال ولا معك فالزين يا زين خشرا

يمكن اكون اخطيت يوم اني هرجت وقلت اباك

وانت استغليت الامور وصرت عني في ذرى

جفاك نارٍ تصطلي وانا انتظر حزة لقاك

مالد عيني للسفيه اللي بتعليقه زرى

ان كنت مخطي دلني وابشر بمن يتبع رضاك

عطني سياسه واضحه تكتب بخط وتنقرى

وانا اوعدك اني لاسرّي كل نجمٍ في سماك

وماعاد يبقى فالسما لو نجم واحد ما سرى

هذا وعد مني اكيد وكان هذا ما كفاك

ابسألك وش مطلبك بالله قلي يا ترى

ودك تموتني قهر؟ قلها وانا افهم مبتغاك

ياقشر حظك كان طبعك بيع من جاك وشرى

شفني هنا جالس لحالي والعرب عني هناك

والحاضرين يعلمون الغايبين بما جرى

رد: ديوان شعراء السعودية في العصر الحديث (متجدد)☘️☘️
 

قصيدة تلعثم الشوق
الشاعر: زايد الرويس زايد الرويس
#العصر الحديث
#المملكة العربية السعودية
0
241 مشاهدة

تلعثم الشوق من ليل امس والنور لاح

يكتب خطوط الفراق ويرجع يعيدها

أنشودة البعد غنتها طيور الصباح

وابتلّ ريق السكون بحس تغريدها

المزهريه تناظرني وتنزف جراح

وانا اتهجى مواجعها وتنهيدها

لو كل من راح دمع العين لا راح طاح

سالت دموع الخلايق في ضحى عيدها

بس انت روحتك تشعل بي جنون الرياح

لاسولفت عن غضبها وانكسر قيدها

البعد كانه حرام! الوصل ماهو مباح؟

السالفه لاتنقّصها ولا ازيدها

غيبتك خلتني اعرف قيمة الإنشراح

يوم الليالي تجيبك لي مواعيدها

تذكر حبيبي لقانا ليلة الكحل ساح؟

وقصيدةٍ فيك دوم تحب ترديدها

يوم انكسر خاطري مديت كف السماح

واشعلت نيران شوقي في مواقيدها

تلعثم الشوق يومك رحت والنور لاح

يكتب خطوط الفراق وعيني تعيدها

رد: ديوان شعراء السعودية في العصر الحديث (متجدد)☘️☘️
 

قصيدة أنت الحلو
الشاعر: زايد الرويس زايد الرويس
#العصر الحديث
#المملكة العربية السعودية
0
240 مشاهدة

صاحبي والسنين لها مزاج

وانت شف كيف هو بال السنين

فرّقتنا بصرخة واحتجاج

ولا نفعنا دموع ولا أنين

المطر لا تقفّاه العجاج

تذبل قلوب.. خل الياسمين

كيف وانت الحلو! تشرب هماج

ليييييه حنيّتك تصبح حنين

والا انا صارت اعصابي زجاج

وذكرياتي حجارٍ ما تلين

من فقدتك فقدت الإبتهاج

ليتك تشوفني بعدك حزين

يبني الحزن من حولي سياج

ولهفتي لك تثور ف كل حين

ليتني معك روّقت المزاج

كان ما همني بال السنين

رد: ديوان شعراء السعودية في العصر الحديث (متجدد)☘️☘️
 

قصيدة ياليتني مابديت
الشاعر: زايد الرويس زايد الرويس
#العصر الحديث
#المملكة العربية السعودية
0
235 مشاهدة

أحلامي المُتعَبة وايامي المُتعِبة

على الظما وردّني شرب حتى رويت

تعبت من قلبي اللي كل جرح كتبه

في ذاكرة نبضي الموجوع حزن وقريت:

أحزاني المعشبة وافراحي المجدبة

والخطوة اللي رجعت بها.. وفيها خطيت!

الحب أعظم من انه يوصف بتجربة

تفشل وتنجح وتنهيها متى ما بغيت

الحب: عمرٍ نعيشه قبل نستوعبه

تعطيه يعطيك.. ياخذ منك لا من خذيت

الحب: هذا السؤال اللي بدون اجوبه

مهما ارتفع سور بيت.. يمر في كل بيت

وانا ابتديته وعشت من اسهله ل اصعبه

يا ليتني ما بديت وليتني ما انتهيت

ما كنت اعرفه.. وانا الغلطان يوم اقربه!!

ضيعتني واحسب اني للطريق اهتديت

رد: ديوان شعراء السعودية في العصر الحديث (متجدد)☘️☘️
 

قصيدة أطبطب وادلع
الشاعر: زايد الرويس زايد الرويس
#العصر الحديث
#المملكة العربية السعودية
0
231 مشاهدة

من قلب زايد عليك تنهيدة

ومع كل تنهيدة القى خافقي ولّع

لا مر طيفك علي ب حزنه وعيده

أشوف قلبي على متن السما شلّع

ما فاد شجبه لحرمانه وتنديده

قلبي.. ولكن.. أحسه منّي مطلّع

بيت الغلا اللي تشاركنا بتشييده

مالت ركونه علي وبابه مخلّع

وشلون اطبطب وادلّع وانتي بعيدة

والبعد ما فيه لا طبطب ولا دلّع!!

مافيه غير التعب وتنهيدة

ومع كل تنهيدة القى خافقي ولّع

رد: ديوان شعراء السعودية في العصر الحديث (متجدد)☘️☘️
 

قصيدة ما أشجعك
الشاعر: زايد الرويس زايد الرويس
#العصر الحديث
#المملكة العربية السعودية
0
225 مشاهدة

طال عمر الجروح وطال عمر البعاد

وكان عاشقك عمره طال.. ما ضيّعك

كل هذي السنين الموغلة بالسواد

علمتني غيابك قبل لا اودعك

يا بعيدة.. مثل نومي! سألت الرقاد

قلت لا جيت أو ماجيت! جبها معك!

ويا قريبة.. مثل حزني سألت السهاد

يومه اوجعني بقربه عسى ما اوجعك!

ويا غريبة.. مثل وقتي! صباحي هجاد!

كيف تقوين هذا البعد... مااااا أشجعك!

مشكلتنا نحب نعيش دااااايم بعاد

وكل ما اقرب شوي.... شوي! واضيّعك!

رد: ديوان شعراء السعودية في العصر الحديث (متجدد)☘️☘️
 

قصيدة قم ولع الشوق
الشاعر: زايد الرويس زايد الرويس
#العصر الحديث
#المملكة العربية السعودية
0
226 مشاهدة

قم ولّع الشوق في صدري وولّعني

توليعة الشوق ما تحتاج ولاّعه

قرّب شفايفك قرّبها وطاوعني

وش فيك خايف تراها بس سماعه

ابي اذا قلت احبك وانت تسمعني

تنهيدة الشوق تهدي قلبي اوجاعه

بعثرني البعد ليتك بس تجمعني

يكفيني الروح من فرقاك ملتاعه

شف ذكرياتك عليك بشوق تدفعني

ما كنت تصبر بدوني لو ربع ساعه

واليوم ف ارض الجفا وش فيك تزرعني

معقول يعني حبيبك تجهل اوضاعه؟؟؟

رد: ديوان شعراء السعودية في العصر الحديث (متجدد)☘️☘️
 

قصيدة هي بإختصار
الشاعر: زايد الرويس زايد الرويس
#العصر الحديث
#المملكة العربية السعودية
0
226 مشاهدة

مدري ش.. اقول لدمعتي وانكساري

مدري ش.. اقول لضيقتي يوم جتني

لا الليل ليل ولا نهاري نهاري

كن الجبال بكبرها فوق متني

ياليتها تلمح دموع اعتذاري

أو ليتها على الأقل كلمتني

حتى تعرف شلون شبيت ناري

في ليلةٍ من طولها طاولتني

كلي حزين وكل هالحزن داري

من اولي للدمعه اللي خذتني

لاخر مسافات الوله واحتضاري

على رصيف اللوعه ان خاصمتني

هي نبض عمري هي نهاية مساري

هي عمر نبضي لا حكت وسمعتني

هي رغبتي هي حاجتي واختياري

هي ذكرياتي لا انتهيت وبدتني

هي رحلتي وحكايتي واختصاري

هي ضحكتي لا رحت عنها وجتني

هي كوكبي لا والله الا مداري

هي طعنتي لا من ذكرت ونستني

هي من تقررني وتاخذ قراري

هي القرار وغيرها ما عنتني

هي راحتي هي رحلتي والمساري

هي التعب لامن بكيت وبكتني

هي حلم عمري يوم طال انتظاري

هي انتظاري لا غديت ولقتني

ياليتها تسمع ضجيج انكساري

والضيقه اللي ضقت منها وجتني

رد: ديوان شعراء السعودية في العصر الحديث (متجدد)☘️☘️
 

قصيدة طعنتينك
الشاعر: زايد الرويس زايد الرويس
#العصر الحديث
#المملكة العربية السعودية
0
217 مشاهدة

لعلمك مابقى فيني سواي ولا بقى لك غير

مجرد إسم من ضمن الأسامي صوره وتذكار

تمر احيان في بالي مثل قولة صباح الخير

بشارع يزدحم فيه الرصيف الممتلي أشجار

اغمّض في سهادي والمحك جرحٍ بلا تبرير

سؤالٍ يحتضر في صمت لكنه يزيد اصرار

واشوفك في عيون الغير والعن كثرة التفكير

وامرّر بيني وبيني حكاية أخر المشوار

علشان اتناسى دمعتينٍ تحسن التأثير

وعلشان اتذكر طعنيتنك وانتخي للثار

تصوّر ليلة البارح ظميت وكنت اشوفك بير

رميت الدلو وعيوني تحرى عودة الأمطار

تصوّر كنت اشوفك حلم ما يستحمل التغيير

تصوّر كنت اسولف لي واقول انك حمامة دار

وفجأه شفتك بعيني تحاول عن سماي تطير

وشفتك تبتعد كنك تدوّر وش ورى الأقدار

بكيتك أو بكيت الحب والإحساس والتقدير

وضميت الجروح وقلت في قلبي فلك واندار

وشفني صار لي فتره ادوّر للخطا تفسير

واقول الوقت يمكنّه يبيّن خافي الأسرار

وبعد ما مرّت الأيام أعذرني على التقصير

أنا أقدر أقول اليوم للغدار يا غدار

لذلك لا تظن انه بقى لك في حياتي غير

مجرد إسم من ضمن الأسامي صوره وتذكار

رد: ديوان شعراء السعودية في العصر الحديث (متجدد)☘️☘️
 

قصيدة ناقوس الخطر
الشاعر: زايد الرويس زايد الرويس
#العصر الحديث
#المملكة العربية السعودية
0
213 مشاهدة

دقيت ناقوس الخطر عشر مرات

والحاديه عشره توقعته يطيح

لو انها هقوات ما قلت نزوات

لو انها تلميح ما قلت تصريح

بيض النوايا ما لقت غير شرهات

مع ان دمعاتي تناثر مشافيح

بعض السوالف ليتها جلد للذات

كان انثر جروحي على ذمة الريح

لو توخذ الدنيا خراصٍ وهقوات

سال الظلام بوجه كل المصابيح

عاتبت سمعي!! قال ما مرّت اصوات

عاتبت صوتي يوم غنّى مجاريح

قلت السهر! قال السهر: مات ما فات

قلت التعب! قال: السحاب المراويح

رد: ديوان شعراء السعودية في العصر الحديث (متجدد)☘️☘️
 

قصيدة البياض
الشاعر: زايد الرويس زايد الرويس
#العصر الحديث
#المملكة العربية السعودية
0
208 مشاهدة

البياض الغارق بأقصى مساحات الجمال

الهدوء المتشح بالحب فالطرف الكحيل

إنسكاب العطر ما يعني سوى حلم الوصال

نظرة الواقع تغض الطرف عند المستحيل

همهماتي صاخبه بالفعل مافيها جدال

شامخ الاحساس اغراه التحمل فالنخيل

إرتباك الصبر يثبت لي شكوك الإحتمال

الكثير انهار حتى صار في حكم القليل

إلتحفت الصمت واهديت الاجابه للسؤال

ليه احبك طاردتني لين ولعت الفتيل

التجافي والتصافي شمس ما تعطي ظلال

التصافي والتجافي واديٍ يرفض يسيل

والبياض الممحل اصبح يطرد فلول الجمال

والسواد انساق بغروره ورى الطرف الكحيل

رد: ديوان شعراء السعودية في العصر الحديث (متجدد)☘️☘️
 

قصيدة ست الكل
الشاعر: زايد الرويس زايد الرويس
#العصر الحديث
#المملكة العربية السعودية
0
198 مشاهدة

طفلة النور والصبح وحديث السحاب

أم الاحلام ست الكل كل القلوب

فاتنه من حلاوتها يضيع الجواب

طاهره من برائتها تموت الذنوب

ساطعه مثل شمسٍ ما عليها حجاب

مورقه مثل غصنٍ ميلته الهبوب

تسرق السمع لامن سولفت والف باب

ينفتح لا تخطّت مثل شمس الغروب

شامخه كنها طويق وعليك الحساب

تحضن الغيم لين يذوب مدري تذوب

تختصر كل واقع لين يصبح سراب

مترفه كل اوامرها بحكم الوجوب

مُخجِله في تواضعها وسمحة جناب

من رفع نظرته عنها تراه مغصوب

مدرسه في تعاملها وحُسن الخطاب

من صدفها يحس انّه مليّ بالعيوب

عطرها انفاسها ودّى خبرها وجاب

كل عقلٍ ثقيل وكل رجلْ مْحسوب

ما تشابه سواها بس مثل الضباب

يعمي العين عن غيره وصدقه كذوب

كنها الفرق مابين الخطا والصواب

حلمها علم نوب وعلمها حلم نوب

تعشق بصمت وان هامت تهيم بعذاب

لين تقلب رضا وجه الهواوي شحوب

تستلذ الزعل وتمرّره بالعتاب

والرضا لا رضتْ سحرٍ يلف الدروب

كل ما خاصمتني قلت قلبي مُصاب

وكل ما سامحتني قلت والله لا اتوب

ضعت منها ومعها ضعت والوقت شاب

كل ما اطرد وراها شفت كيف الهروب

علّقتني وخلتني ل جرح الغياب

لين صار اصغر جروح الغياب مْحبوب

ويوم ردّت لقلبي شفت كيف السحاب

يمطر احلام ويصحّي نداه القلوب

رد: ديوان شعراء السعودية في العصر الحديث (متجدد)☘️☘️
 

قصيدة منين ياحسرة
الشاعر: زايد الرويس زايد الرويس
#العصر الحديث
#المملكة العربية السعودية
0
197 مشاهدة

انا اسأل عنك يا اللي ما سألت وما طرى تسأل

عن اللي.. كل ما تطري عليّه.. يوّلم العبرة!

زمانه بالتعاسة والحزن والهم ما يبخل

دموعه في عيونه والبلى في خافقه جمره!

حبيبي من يقول إن الغياب ف وضعنا أفضل!

تفارقنا وكلٍ في حياته حالته خطره

سقى الله يوم كنا تزعل الدنيا... ولا نزعل

حبايب مالنا فالحزن وإدمان التعب خبره

حبيبي سامح الله الزمان اللي علينا اسدل

جراحه! لين سال احساسنا قطرة ورا قطرة!

طبيعي لو يمر الفرح جنب القلب ما يدخل!

نبي نفرح ولكن يا حبيبي منييييييين يا حسرة!