رد: ديوان شعراء السعودية في العصر الحديث (متجدد)☘️☘️
 

قصيدة شلة حراميه
الشاعر: زايد الرويس زايد الرويس
#العصر الحديث
#المملكة العربية السعودية
0
196 مشاهدة

تستاهلين الغلا ميّه على ميّه

من قصة الشعر حتى روس اصابيعك!

أهديتك القلب وانتي فيه محميّه

إسمك وختمك بوسطه فوق توقيعك!

لو اقدر اسجله باوراق رسميّه

يصير ملكك بتصريفك وتسنيعك!

رموشك الناعسه شلة حراميّه

مني خذوني وصرت اكبر مشاريعك

والا مشاريع غيرك فيّ وهميّه

مادامي اعصاني بدنياي واطيعك

صرت اتعلّم معك في محو الاميّه

أمشي على منهجك واقرا مواضيعك

وصارت حروفي على سكّتك مرميّه

الجهل ظلما وابانهل من ينابيعك

علاقتي فيك بابلغ وصف حتميّه

شوفيني احيا على دعمك وتشجيعك!

عساني اخذ معك ميّه على ميّه

وابوّسك من جبينك ليييييين اصابيعك!!

رد: ديوان شعراء السعودية في العصر الحديث (متجدد)☘️☘️
 

قصيدة مع الإعتذار للجنة التحكيم
الشاعر: زايد الرويس زايد الرويس
#العصر الحديث
#المملكة العربية السعودية
0
196 مشاهدة

يا اجمل قصيدة شعر ما قالها انسان

ولااحتواها فكر عاقل ومجنون

لو تنعرض على العميمي وغسان

تاخذ مع المليون.. مليون

ولو شافها تركي يصفق على شان

ينوبه من الحب جانب ومضمون

ولو السعيد تمّر به صابه جنان

ينسى القنص واللي على الريم يرمون

ولو شافها المسعودي أصبح خبر كان

!ما يعرف أيّ الهاشمي! وأيّ زيدون!!

حتى ولو روضة بالالماس تزدان

هذي تخطف قلوب وتضيّع عيون!!

لو تدخل التصويت في كل الاوطان

في كفها البيرق! مع الكاش! مضمون

رد: ديوان شعراء السعودية في العصر الحديث (متجدد)☘️☘️
 

قصيدة من يد ما نعدمها
الشاعر: زايد الرويس زايد الرويس
#العصر الحديث
#المملكة العربية السعودية
0
195 مشاهدة

ليتك هنا يوم السهر يشكي علي احوالي

أبني قصوري ف الهوا واتذكرك واهدمها

كل القصايد تحترق لا جابتك في بالي

وانا احترق من لهفةٍ تجتاحني وافهمها!

يا ام الرموش اللي لها فيّه كرهت ظلالي

في وحدتي مالي سوى ونّة عجزت اكتمها

مالك على قلبي يمين الجرح منّك غالي

واغلى الجروح اللي تجي من يد ما نعدمها!!

حطيّك في نفس المكان وجربيّها اغلالي

كم تلتوي بي ضيقةٍ ما يلتوي معصمها

أكثر دفاتر غربتي تبني علي اطلالي

وشلون افسر غربتي في يديك وآترجمها

أمشي على نفس الطريق المُر ذاااك لحالي

واقول تكفى يالصبر لاشفتها علمها

إن السهر جنبي هنا يشكي علي احوالي

واجمل قصوري تنبني ويمر من يهدمها!!

رد: ديوان شعراء السعودية في العصر الحديث (متجدد)☘️☘️
 

قصيدة المشكلة ماهيب في جرح الصديق
الشاعر: زايد الرويس زايد الرويس
#العصر الحديث
#المملكة العربية السعودية
0
193 مشاهدة

يا جرح لو بارميك من قلبي لقارعة الطريق

خايف يدوسونك وقدرك فوق يا جرح الفراق

يا جرح في قلبي مكانك ماحدٍ يقدر يويق

ماحدٍ يشوفك غير دمعات الخفوق اللي تراق

كم لي وانا اقول السعه باكر ومن باكر تضيق

بعض الهموم الموجعه فالقلب والله ما تطاق

استكثرت سود الليالي ضحكتين وطعم ريق

شحّت علي ولا عطتني غير ضحكات النفاق

شيٍ يليق وشي لا والله ما اظنه يليق

سوالفٍ مثل الظلام وهمهمات الإختناق

وين انت ياللي قلت لي باشيل عن متنك طويق

شفني وانا اشيله على متني أحاول باللحاق

ابلحقك واعلمك علمٍ من الخافق وثيق

وما ابغاك تتعذر ولا ابغى منك علي الطلاق

المشكله ماهيب في جرح الصديق من الصديق

المشكله لامن جرحك وشدّ لك حبل الفراق

رد: ديوان شعراء السعودية في العصر الحديث (متجدد)☘️☘️
 

قصيدة فواتير الغلا
الشاعر: زايد الرويس زايد الرويس
#العصر الحديث
#المملكة العربية السعودية
0
190 مشاهدة

الليل يبكي والنجوم دموعه

متناثره في صدر سقفٍ عالي

والقلب له صرخة ألم مسموعه

لمّت علي الاولي والتالي

كل الهموم اليوم بي مجموعه

تنازعتني وابتدا غربالي

ياللي غرامك ما يلاقى نوعه

اشغلت قلبي وانشغل بك بالي

سببت لك لوعه بعدها لوعه

اشقيت حالك وانشقى بك حالي

جيتك وانا قلبي تذوب شموعه

واثري طعنتك يالحبيب الغالي

سميت لا قلبك تصيبه روعه

من حيرتي من لهفةٍ تبرا لي

ورود حبك فالحشا مزروعه

ذبلت وماتت من سبب إهمالي

اعطش لصوتك لاهمس واجوعه

وان غاب صوتك ويش اجل يبقى لي

بك عالمٍ يلفني بالروعه

اشرب ولا اهز بيدي فنجالي

واللي جعل سبعٍ لنا مرفوعه

انك هنا ياغايتي وامالي

في وسط قلبي سيرتك مطبوعه

من معرفتنا للزمان الحالي

لكن فواتير الغلا مدفوعه

واللي حصل كله نتاج هبالي

حلفت قلبك ما يهل دموعه

وانا معك وانا معك ياغالي

رد: ديوان شعراء السعودية في العصر الحديث (متجدد)☘️☘️
 

قصيدة سكرة قلبي
الشاعر: زايد الرويس زايد الرويس
#العصر الحديث
#المملكة العربية السعودية
0
185 مشاهدة

حبيبتي.. سكّرة قلبي.. بعد عمري

روحي.. حياتي.. عيوني.. كل ما فيني

لو ما كتبت القصيدة فيك.. وش عذري؟

مالي عذر صدقيني... لو عذرتيني

مشورني الحزن في غيبتك من بدري

وقمت آتساقط وله.... يا ضيعة سنيني

من دونك العمر ما يجري ولو يجري

وانا اسأله وينها.. أو يا ترى.. ويني

غياب صوتك معلّقني على صبري

وانا اتمايل... يطيح الكون من عيني

أمر بيتك واحس ان الوله يسري

داخل عروقي.. يقطّع في شراييني

واقول هو شكلها باقي على خبري!

والا التعب ما رحمها من سكاكيني!!

رد: ديوان شعراء السعودية في العصر الحديث (متجدد)☘️☘️
 

قصيدة اطيب قلب
الشاعر: زايد الرويس زايد الرويس
#العصر الحديث
#المملكة العربية السعودية
0
183 مشاهدة

من ثمان الا ربع وانت ما انت اللي زمان

انت صرت انسان ثاني ما اعرفه من تكون

شفت كيف القلب مجروح من قل الحنان

شفت كيف الشك ممكن يؤدي للجنون

كيف قلبك ما التفت لي؟ وكيف الحب هان؟

يوم تتركني على الدرب في يدين الطعون

دامي اطيب قلب. معقول.. ما عشت بأمان!

ليه تفتح باب شك ونوافذ للظنون؟

آآآه من قسوتك وآآآهين من ضيق المكان

يوم صار الكون سجني وسجّاني يمون!

إنتصف ليلي وليلك ووقت الدمع حان!

طاب سوق الدمع فالعين من طيب الزبون!!

ابتدا المشوار يالحزن وجروحي كمان

ضجةٍ ما تحتملها تراتيل السكون

بانتظر وش عاد يعني تجي الساعة ثمان

ليه؟؟ ما تدري حبيبي بحياتي من تكون؟

أنت حاجه ثانية ما يغيّرها الزمان

أنت..... كل الناس عندي... يابو قلبٍ حنون

رد: ديوان شعراء السعودية في العصر الحديث (متجدد)☘️☘️
 

قصيدة ما تسمى طريقة
الشاعر: زايد الرويس زايد الرويس
#العصر الحديث
#المملكة العربية السعودية
0
184 مشاهدة

جالس من اليوم اتحرى اتصالك

واراقب الساعة دقيقة دقيقة

مشغول بالي: ب ايش مشغول بالك

عن قلبي اللي تشتعل به حريقة

عقب الغياب ابسألك: كيف حالك؟

اسبوع كامل مر ما كنت اطيقه

من يوم رحتي لين جيتي ب فالك

وانا ادفن احلامي بوجه الحقيقة

عبرت حزني والسهر من خلالك

مع كل مشرق شمس يبدا بضيقة

شوفي حبيبك واسعديه بوصالك

ترى الصبر ما كل عاشق يطيقه

وشلون اببدا رجعتك في جدالك

وانا جروحي في غيابك طليقة

وبراحتك.. ما عندي الا حلالك

لو ان هذي ما تسمى طريقة

جالس من اليوم اتحرى اتصالك

واقول يمكن تتصل هالدقيقة!!

رد: ديوان شعراء السعودية في العصر الحديث (متجدد)☘️☘️
 

قصيدة توصي بشي من قلبي
الشاعر: زايد الرويس زايد الرويس
#العصر الحديث
#المملكة العربية السعودية
0
178 مشاهدة

مدخل

يا قلب وش صايبك مانتب على بعضك

يلعب بك الشوق... ويكسر جناحينك

ماهوب نبضك.. أبد ماهوب ذا نبضك

ولا هيب هذي سوايا الدمع في عينك

سماك متغيرة.. وشلون عاد ارضك

لا الكون كونك ولا هذي عناوينكمدخل آخر:

يا رياح الشوق هبي وعيثي بي غرام

وكل غصنٍ في طريقك بقلبي كسريه

كم لي اتقلّب على جمر تنهيد الخصام

واتنفس ضيقتي بين ضحكات الوجيه

والحبيب اللي نساني ولا ردّ السلام

صرت احسه ما يبيني وانا بالعكس ابيه

آآآه من صدات قلبه وقل الاهتمام

وذكرياتٍ كثر ما احب اشوفه تشتهيه

يا حبيبي وانت مسك البداية والختام

وانت كل اللي رجيته فعمري واحتريه

ضاعت ايامي بدونك وجا شهر الصيام

كيف ابارك لك قدومه وانا فاقدك فيه؟مخرج:

يا المترف الناعم الهادي

يا الاقرب اقرب من يديني

أحبك وتشرق اعيادي

وافارقك واختنق فيني

محبتك أعظم امجادي

وخسارتك.. غلطة سنيني!!!

وشلون أبوصفك لاحفادي

لا شافوا الدمع في عينيمخرج أخير:

مسيّك بالورد.. يا العشق الجرّي اللحوح

يا منتهى.. لذته.. وغوايته.. والجراح

مسيّك بالورد.. لو هو معك يخجل يفوح

مادامك اجمل وارق انسان بالعطر فاح

مسيّك بالورد.. وانت الورد جسمٍ وروح

مسيّك بالورد.. واسمع للكلام المُباح:

توصي ب شي من قلبي.. قبل لا يروح!!

ما به من الشوق أدراج الأسى والرياح!

ما عاد للوصل برقٍ فالحنايا يلوح

واحلامنا فاللقا عمداً كذا تستباح

رد: ديوان شعراء السعودية في العصر الحديث (متجدد)☘️☘️
 

قصيدة اتجاوز حدودي
الشاعر: زايد الرويس زايد الرويس
#العصر الحديث
#المملكة العربية السعودية
0
175 مشاهدة

حبيبي والسهر دمعه وجفني للسهر شبّاك

وطيفك غيمةٍ مرّت سماي بكل عفويّه

احبك قل معي أمين يا جعلي أموت فداك

لأنك كل ما املك في حياتي واكثر شويّه

أحبك كثر ما تكذب علي بسالفة لقياك

واحبك كثرما تربت على قلبي بحنيّه

انا بسألك لو جف البحر وش حيلة الأسماك!!

بجاوب عنك لو تسمح تموت ومالها ديّه

تصدق من كثر ما احبك اتوقع كذا بانساك

غريبه!! صح لكني باخليها طبيعيه

تخيّل كل يوم اسهرانام اصحى على ذكراك

وانا اسولف مع اصحابي أشوفك تحضن يديّه

وانا اطالع وجيه الناس اشوفك بين ذاك وذاك

وانا جالس لحالي ما معي غيرك حواليّه

تخيّل بعدها لا صرت اسولف لك وانا ويّاك

بافكر فيك والا فيك جاوبني؟ على ذيّه

لأني وبصراحه ميت بهمسك وضحك شفاك

أخاف فحبك اتجاوز حدودي الائتمانيه

رد: ديوان شعراء السعودية في العصر الحديث (متجدد)☘️☘️
 

قصيدة على هوني
الشاعر: زايد الرويس زايد الرويس
#العصر الحديث
#المملكة العربية السعودية
0
165 مشاهدة

يا موجع الجرح خلك وسط وجداني

ابى اتنفسك ضيقه لاخر طعوني

مليّت من قاصي الهقوات والداني

والعاصف اللي هزمني واعلن سكوني

ما كني الا غريبٍ عاش وحداني

واخاف لا اعيش باق العمر من دوني!

نفس السؤال يتردد: وين عنواني؟

والعمر يجري وانا ماشي على هوني

مدري وش اخر مدى همي وحرماني

مدري وش اول سهادٍ نام فجفوني

لو كل دمعة تسيل تسيّل احزاني

ما كان خليّت دمعه تسكن عيوني

رد: ديوان شعراء السعودية في العصر الحديث (متجدد)☘️☘️
 

قصيدة أصعب الأشياء
الشاعر: زايد الرويس زايد الرويس
#العصر الحديث
#المملكة العربية السعودية
0
165 مشاهدة

حلّ عنّي!!
ما بقى فيني ملامح!
للغموض إن صار
واضح
ما بقى عندي إجابة
للسؤال اللي طعنّي
...........
صدّق إنّي
كثر ما اضحك من زماني
صرت محتاج ابتسامة
تنتشلني
من مكاني!!
............
ما تخيّل
كيف هذا العمر يصبح
كلمةٍ تاقف
على شفة غيابك
ما تزحزح
لين هذا الليل
يصبح!
................
تدري اصعب شي فالدنيا على الإطلاق وش هو؟
غيبتك عنّي؟
سكوتك؟
ذكرياتك؟
أغنياتك؟
دمعتك بينك وبينك؟
دمعتك
في وسط عينك؟
ضيقتك مني؟
عتبك إن زاد عن حدّه؟
حنيني؟
غيرتك في أكثر الأوقات
منهم!؟
الزعل منّي علي بدون داعي؟
لا أبد!
ماهيب هذي!
أصعب الأشياء على الإطلاق
لا منّي فقدتك!!!!

رد: ديوان شعراء السعودية في العصر الحديث (متجدد)☘️☘️
 

قصيدة ياضياع الحال
الشاعر: زايد الرويس زايد الرويس
#العصر الحديث
#المملكة العربية السعودية
0
161 مشاهدة

تراني واصلٍ حد البكا والحزن غاشيني

سماي معلقة باوتاد من دمعي وضيق البال

دخيلك يا مساي المُر مُر ولا تبكيني

ترى ما اصعب من الدمعة إلى من صافحت رجال

ذبحني هالغياب وطاولتني ضيقة سنيني

غيابٍ ما رحمني يوم طوّل.. يا ضياع الحال

حبيبي كيف اقول اني فقدتك وانت تسقيني

من طيوفك قراح الذكريات بنكهة الترحال

أحس بصوتك العذب يتوغل في شراييني

واحسك تاخذ امالي معك وابقى بدون امال

واحس اني كذا متشتت اكثر من عناويني

واحس بشي مدري كيف اقوله والحروف ثقال

على جمر انتظارك طاح كل الكون من عيني

واشوفك تنزرع داخل عيوني وابتسم واختال

مع اني واصلٍ حد البكا والحزن غاشيني

إلى مني ذكرتك ينقلب حزني لراحة بال

رد: ديوان شعراء السعودية في العصر الحديث (متجدد)☘️☘️
 

قصيدة كثري منها
الشاعر: زايد الرويس زايد الرويس
#العصر الحديث
#المملكة العربية السعودية
0
159 مشاهدة

كان الظروف ابعدت صوتك عن اسماعي

رسايلك لو سمحتي كثري منها

أخاف غيبتك تنثر باقي اوجاعي

وانا رسايلك لامن غبتي ازبنها

رسالةٍ ماتبي طابع ولا ساعي

تاصل على طول.. شفتي كيف ما اهونها؟؟!!

لكنها يوم تاصل تقلب اوضاعي

مادامها منك يا اغلى الناس باحضنها

في وقتها تطيح دمعة مالها داعي

ألا المحبة وقلبٍ كان ساجنها

والحزن لو كان ما يغلب على اطباعي

ملامحه تنتهك روحي وتدفنها

عذرت صوتك بغيباته عن اسماعي

أما الرسايل بعد!! لا.. كثرّي منها!!!

رد: ديوان شعراء السعودية في العصر الحديث (متجدد)☘️☘️
 

قصيدة ست الأحباب
الشاعر: زايد الرويس زايد الرويس
#العصر الحديث
#المملكة العربية السعودية
0
159 مشاهدة

الحزن للقلب ولراعيه تنهيده

لا ميّل الليل غصن وطاح عنقوده

أقطف سهر ويتمادى الشوق ويزيده

حلم الوصال بمدى ملحه وباروده

والعين لو تستريح بكل تسهيده

جف التعب.. والتعب ما يحتمل زوده

والعشق لا من تكسّر داخله قيده

تموت الاحلام مقتولة ومؤوده

يا ست الاحباب. قلبٍ جيتك ب عيده

يدّه من الشوق ملويّة وممدوده!

شوفيه لا مل من نبضه وترديده

يسترجع الذكريات ويكسر جموده

انتي ملاذه إذا اكتظوا حواسيده

وانتي وطن غربته لا جاوز حدوده

وانتي قريبة لو انك عني بعيده

تطير لك روح في لحظات معدوده

لا عربد الحزن وانكشفت تجاعيده

يلقى بحضنك وجوده يا اول وجوده

رد: ديوان شعراء السعودية في العصر الحديث (متجدد)☘️☘️
 

قصيدة حبيبة قلبي البارح
الشاعر: زايد الرويس زايد الرويس
#العصر الحديث
#المملكة العربية السعودية
0
156 مشاهدة

مسا البارح حزين بكل مابه من وجع وهموم

دفعني للضياع وطاح قلبي وانحنت هامه

مسا البارح نهاية حب صادق يرفض المقسوم

تعدتني مشاريهه بعد ما انهدّت احلامه

من اليوم الصباح اصبحت لا معطى ولا محروم

تركت الحب لاهل الحب واللي يتبع اوهامه

خلصت من المحبه وانتهيت بلوعتي مهزوم

تركتك يا المحبه ويش ابي بالحب وآلامه

بعد ما شكّ قلب المترفه فيني عداني اْللوم

ابطعن قلبي ب خنجر غلاها واكسر اقلامه

تركتك يا الغزل شعر ومشاعر يقظتي والنوم

وابرفع سعر قلبي لجل يبطي ماحدٍ سامه

اذا ان المترفه شكّت بحبٍ في سماه نجوم

عسى نور القمر يصبح وسط صدر السما شامه

حبيبة قلبي البارح ترى مالي حبيب اليوم

ولا بكره ولا بعده ولا في مقبل ايامه

حرام ان البني كل البني عنهن بديت آشوم

واذا انتي ما فهمتيني بلاش احيا ب دوّامه

تعبت اصدق معك وانتي تشوفين السراب غيوم

ابلعن جد ابو حبٍ خذلني وانتهى زامه

طعنتيني مسا البارح ب رمحٍ غادرٍ مسموم

وتلطّخ بالدما ثوب الغرام وزين هندامه

انا ماكان في قلبي سواك ودوك بعض علوم

حبيبٍ كان وافي لك ثلاث سنين ب صيامه

عسى دربك سفير ولا تقولين القدر محتوم

واباخذ في يدي قلبي واصونه واحكم لجامه

وابطرد شيٍ اسمه حب من قلبي بدون سلوم

بلا حب وبلا هم وقريباً ب اعلن اعدامه

رد: ديوان شعراء السعودية في العصر الحديث (متجدد)☘️☘️
 

قصيدة يانكون أو مانكون
الشاعر: زايد الرويس زايد الرويس
#العصر الحديث
#المملكة العربية السعودية
0
154 مشاهدة

الحياة الي تكوّرنا
وتركلنا على مرمى الحزن وتجيب قول!
ما يشجعها سوانا
ولايدربنا سواها
وكلْ ماْ نحاول نبادلها الهجوم
نكون آوت
ويتواصل لعبنا
شوط أول..
شوط ثاني..
شوط ثالث..
شوط رابع..
شوط خامس..
وكل ما ترتد هجمة
للأسف نطلع تسلل!!
الحياة اهداف
والهدّاف من يقدر يراوغ!
أو يسدّد
أو يناول!
أو يسوّي أي حاجة تثبت انه داخل الملعب أساسي!
وآآآه يا الملعب..
جماهيره تصفق..
للبعيد وللقريب وللغريب
والغريب انك تعيش العمر كله وانت تلعب..
ورغم هذا.. ما تفوز!.
الحياة.. إنك تكون!
أو ما تكون...
يا تكون اللاعب الحريّف!!
يا تقضي على الدكّة حياتك!!

رد: ديوان شعراء السعودية في العصر الحديث (متجدد)☘️☘️
 

قصيدة ضحكة صديق
الشاعر: زايد الرويس زايد الرويس
#العصر الحديث
#المملكة العربية السعودية
0
153 مشاهدة

الوقت مدري ويش اخذ ويش خلى

يطلق سراح الدمع والضحك يسجنه

لاصار فيك الوقت دوم يتسلى

يهدي لك اللوعات والهم ديدنه

تشوف غيرك صار وقته محلّى

ووقتك من الضيقات تاخذ وتلعنه

اللي تعلّى فوق يومه تعلّى

يرقى ولكنّه يعوّد لموطنه

وانا الذي ما قلت في يوم كلا

للي يبي قربٍ على الطيب نعلنه

شفت النهار بكل مافيه ولّى

والليل قبرٍ كل مجروح يزبنه

الحق نوره عن قريب يتجلى

والباطل اللي مرتفع غصب ندفنه

احدٍ بحسرات الذنوب يتملى

واحدٍ تغني له وروده وسوسنه

وخل الذي لا جيت رحّب وهلاّ

يسمع كلامٍ واضحٍ عني وعنه

في ذمتي مايجرح الخاطر الا

ضحكة صديق وبعدها طعنةٍ منه

رد: ديوان شعراء السعودية في العصر الحديث (متجدد)☘️☘️
 

قصيدة اشك إنه صديقي
الشاعر: زايد الرويس زايد الرويس
#العصر الحديث
#المملكة العربية السعودية
0
152 مشاهدة

هي جت على همي وحزني وضيقي!!!

كم للتعب في داخل الروح يختال؟!

مرات اشك اني مضيّع طريقي

لا شفت ما حولي من العالم ظلال!

ومرات اشك ان الحزن هو صديقي

واقف معي في دنيتي وقفة رجال!

أبطيت اكابد والعذاب الحقيقي:

ولادة الألام من رحم الآمال!

ولو الزمن في لحظة يبل ريقي

ما صارت سنيني على قلبي اغلال

هذا حطب دنياي.. هذا حريقي

وهذي معالم باقية مثل الاطلال

في وقت ضيقي! شفت وشلون ضيقي

غنى على قلبي من الحزن موّال

رد: ديوان شعراء السعودية في العصر الحديث (متجدد)☘️☘️
 

قصيدة جرحي المسكين
الشاعر: زايد الرويس زايد الرويس
#العصر الحديث
#المملكة العربية السعودية
0
152 مشاهدة

يا جرحي المسكين
حاولت بك.. لكن!
ودك تعيش منين؟
قلي ش اسوي فيك
والا ش اسوي بي
أخفيتني... وتبين!!!!
ما عاد بي غيري
ما عاد بي.. غيرك
ما اقساك وانت تلين!!
نصف العمر روّح
واللي بقى مجهول!
أيام والا سنين؟

رد: ديوان شعراء السعودية في العصر الحديث (متجدد)☘️☘️
 

قصيدة ياعيبة الشوم
الشاعر: زايد الرويس زايد الرويس
#العصر الحديث
#المملكة العربية السعودية
0
151 مشاهدة

يا مسرفة في غيابك طالت الغيبه

وعاشقك ما ملّ يسأل عنك ويدوّر

احلامي تجر ب اذيال العشم خيبه

والياس فوق الليال السمر متكوّر

مابين شك الحنين الطاغي وريبه

ما شفت ف اخر طريقه شمعه تنوّر

يا عيبة الشوم من غيبتك يا عيبه!!

ما جت على بالي وما كنت متصوّر

قلبي وحزني وجرحي مالهم هيبه!!

باالله شوفيه شكله بعدك يعوّر

ولو كل من غاب تحسب غيبته غيبه

ما كان شفتيني اسأل عنك وادوّر

رد: ديوان شعراء السعودية في العصر الحديث (متجدد)☘️☘️
 

قصيدة إشتقت لك
الشاعر: زايد الرويس زايد الرويس
#العصر الحديث
#المملكة العربية السعودية
0
151 مشاهدة

إشتقت لك.. طارت من عيوني ايام

وعجزت الملم حيرة الوقت فيني

البارحة مريت في بال الاقلام

واثر الورق يسمع رجاوي حنيني

ما فل سبحة ضيقتي عضة ابهام

من ضيقتي عضيّت ماضي سنيني

بيني وبين البسمة عناد وخصام

حتى ابتسامة شفتي ما تبيني

يا غايبة صاروا أحاسيسي ايتام

شوفي اليتامى دمعهم وسط عيني!

أذكرك وابكي دمع واحياناً ايام

أسهر وابعثر حيرة الوقت فيني

رد: ديوان شعراء السعودية في العصر الحديث (متجدد)☘️☘️
 

قصيدة ياخيبة الحلم
الشاعر: زايد الرويس زايد الرويس
#العصر الحديث
#المملكة العربية السعودية
0
149 مشاهدة

واكسر ساقي ويا ضيعتك يا اليمنى

ويا خيبة الحلم والهقوات والهاقي

يا سيّد القوم قلّي وين خادمنا

يمكن حضوره يعدّل ميلة الساقي

تعبت ركابي تكبّر في عمايمنا

زودٍ على الحبر يوم يخالط اوراقي

سنابل القمح تتجاهل مواسمنا

هذا اول الدرب.. ليش آكمّل الباقي

والكلمه اللي توفّت في معاجمنا

تسلّلت داخلي تتعمّد اغراقي

في ليلةٍ شفت داعينا وعازمنا

يصفق كفوفه على الماطر من اشواقي

عرفت ليه البلاده دوم تكتمنا

وشلون اجل كلب ينهش جثّة عراقي

بعض الرفاقه لها يسرى بلا يمنى

والباب مفتوح للهقوات والهاقي!!!

رد: ديوان شعراء السعودية في العصر الحديث (متجدد)☘️☘️
 

قصيدة بديت اختنق
الشاعر: زايد الرويس زايد الرويس
#العصر الحديث
#المملكة العربية السعودية
0
149 مشاهدة

كسّر الثلج عن هذا المسا ب احترق

في دفا راحتينك واشتعل للأخير

خلني في زمان الياس معك انطلق

لاخر حدود حلمي دام وقتي ضرير

خلك اقرب من انفاسي بديت اختنق

والسهر كل ماله يعتبرني أسير

في عيوني سؤالٍ للرجا يعتنق

ليه ما نقتل الجفوى بسيفٍ شطير

يمكن نبرر الموضوع أو نختلق

عذر واهي يعوّضنا عن اللي يصير

صبح دمعتك عن ضحكتك لو ينفلق

يرتبك غيم ويسولف صباح وعبير

بالتقي بالدموع ومعك عنك افترق

في ملامح حنانك يالصغير الكبير

باحترق بك وفيك مع الحنين احترق

والفظ انفاس شرهاتي معك للأخير!!

رد: ديوان شعراء السعودية في العصر الحديث (متجدد)☘️☘️
 

قصيدة سحابة حزن
الشاعر: زايد الرويس زايد الرويس
#العصر الحديث
#المملكة العربية السعودية
0
149 مشاهدة

سحابة الحزن مرتني يابو طارق

خالط مطرها دموعي وانكشف ما بي

مرّت على حين غره مالها بارق

ولا راحت الا بعد ما بلت ثيابي

ضحكت للدمع يوم اني منْه غارق

وابكتني البسمه اللي ما غزت نابي

دنيا تصوّر ب عيني غصنها الوارق

تساقط اوراقها لو ب افتل اشنابي

يا وقتي المر قلي وش هو الفارق؟

دام النتايج تغالط دقة حسابي

والله ما اسألك يا بابي: من الطارق

باكذّب السمع: لا لا ماهو ب بابي

ماني ب خايف لأني ماني ب سارق

بس بصراحه خلاص احترقت اعصابي

الوقت يلوي ذراعي قيده الحارق

وانا اتصبر علشان ارضي احبابي

مادام شمس التعاسه نورها شارق

لا تشره ان طال عنك وعنهم غيابي

رد: ديوان شعراء السعودية في العصر الحديث (متجدد)☘️☘️
 

قصيدة لا تستحين
الشاعر: زايد الرويس زايد الرويس
#العصر الحديث
#المملكة العربية السعودية
0
148 مشاهدة

تمخطري في عيون العيد.. لا تستحين

مادامك اجمل وارق انثى بملبوسها

شانيلك الموف يذبح.. وش بعد تحترين؟

الناس جنّت عليك وصدّعت روسها

لو شالك الفرو ما يشعر بدفء اليدين

ما كان يقرب شوي شوي ويبوسها!!

شعرك تدرّج يسولف من يسار ويمين

واصبح يرتب سوالف ناس ويحوسها

: من هالقمر؟: ما عرفتيها!!: أبد!!!: تمزحين!:

هذي فنار الليال وطلة شموسها

شوفي ابتسامة شفايفها مرافي حنين

شوفي رغدها بوقفتها وف جلوسها!

صاروا ضحاياك واجد دون ما تدركين

كم من قلوبٍ تحرى... رجلك تدوسها

وانا أنا عاشقك أوااااه لو تعلمين

قدام اعايدك قلت اكتب ف ملبوسها!!

رد: ديوان شعراء السعودية في العصر الحديث (متجدد)☘️☘️
 

قصيدة ختامها مسك
الشاعر: زايد الرويس زايد الرويس
#العصر الحديث
#المملكة العربية السعودية
0
146 مشاهدة

يسعد مسا قلبك ويسعد نواعسك

ويسعد مسا نبرات صوتك ومغناك

تفضلي بسم الذي دوم حارسك

نامي وخلي قلبي يضم ذكراك

لو كنت احسد وسادتك مع ملابسك!

كلي وله لمعانقك يوم لقياك

قدام امد يدين شوقي تلامسك

باغمّض عيوني وله واتحراك

بالعشق لو ما كنت باسلوب امارسك

ما كنت من عامين صبر اتمناك

كوني بحر.. يمكن تمادى نوارسك

والرمل يحضن مدّك ويختصر ماك!

وتطمّني.. ما غيرك احدٍ ينافسك

أنتي هنا.. والعالم بكبره هنااااك

يا مهرتي وان كان مانيب فارسك

عيبٍ علي الثم من اللهفة شفاك

ولو المحبة دايم ختامها مسك

ما كانت الورده يجي حولها اشواك

رد: ديوان شعراء السعودية في العصر الحديث (متجدد)☘️☘️
 

قصيدة ضاع الجمل والحمل والحمال
الشاعر: زايد الرويس زايد الرويس
#العصر الحديث
#المملكة العربية السعودية
0
145 مشاهدة

هزيت غصن الذكريات ومال

عمري ل حلمٍ ما لقى تأويل

أجمل سنيني عشتها رحّال

يا ضيعة أحلامٍ بلا تحصيل

أتعبت نفسي والحمول ثقال

وما بين دجلة ضيقتي والنيل:

ضاع الجمل والحمل والجمّال

ما بين احط حكايتي واشيل

يا دمعتيني.. والتعب همّال

اللي تبي منكم تسيل! تسيييييل!!

أدري صعيبة دمعة الرجّال

لا صارت جروحه هي المنديل!

الله يسامح مستريح البال

يضحك وصبحه في عيوني ليل

يا صاحبي.. ما عادها الآمال

تثمر ولا لاسبابها تعليل

صبيت ياسي وامتلى الفنجال

وقهويت عمري والجروح الهيل

ضربت باكبر حزني الأمثال

وما للمواجع وجه للتجميل

ما كل شيٍ ينعرف ينقال

والمختصر يكفي عن التفصيل

المرجلة ماهيب راس المال

في هالزمان المرجلة: تطبيل

رد: ديوان شعراء السعودية في العصر الحديث (متجدد)☘️☘️
 

قصيدة ضحكتها تسنعني
الشاعر: زايد الرويس زايد الرويس
#العصر الحديث
#المملكة العربية السعودية
0
146 مشاهدة

الضحكة اللي توزعني وتجمعني

تاخذني ابعد من حدودي وترميني

هي تدري ان ابتسامتها تقطعني

وشلون اجل يوم تضحك بينها وبيني

لو انها بس لا ونيت تسمعني

والا تشوف الحنين ان مرّ في عيني

كان عرفت كيف لا حبّت تدلعني

تسمح ليدها تصافح لهفة يديني

مع انها في طريق الياس تزرعني

لكنها اللي ولا يمكن تخليني

تغيب عني واحس اني مضيّعني

واذا رجعت لي عرفت اصل عناويني

هي بس تضحك! وضحكتها تسنعني

الى ضحكت.. جعلها فالنار ترميني

رد: ديوان شعراء السعودية في العصر الحديث (متجدد)☘️☘️
 

قصيدة محمد بن زايد
الشاعر: زايد الرويس زايد الرويس
#العصر الحديث
#المملكة العربية السعودية
0
146 مشاهدة

تضحك.. وتغتال الهموم الثقيلة

وتلوّن ايامي مسرات وافراح

قبلك مسافات السعادة طويلة

وضحكتك صارت لاجمل العمر مفتاح

لا جيت من شغلي وروحي عليلة

ألقاك.. وانسى مُتعب الحيل وارتاح

تلعب وما شفت ف طريقك تشيله

وتحوس حزني كنّك تقول له: باح

من فمك بابا صارت أسرع وسيلة

يطير فيها النوم غدوة ومرواح

تاقف وقلبي يبتسم لك نخيله

وان طحت.. قلبي من قبل طيحتك طاح

لا صرت تبكي قلت مافيك حيلة

إن طال عمرك شفت من وقتك جراح

لي يا محمد ذكرياتٍ جميلة

تخالطت فيها بالافراح الاتراح

عشت الزمان ب مُرّه وسلسبيله

وعايشت به بعض الخساير والارباح

لقيت فيه الممكنة... مستحيلة

والمستحيلة ممكنة جد ومزاح!

شفني وانا ابوك احترق في مليله

أضحك وانا في عالم الحزن سوّاح

مادمت حر وماكرك ف الطويلة

أسمع كلام اللي من الناس نصّاح

رجلٍ يساوي في فعوله قبيلة

تلقاه من طيبه مع الغير نضّاح

والخل دايم تعرفه من خليله

والحر يلقطها على طول.. لمّاح

ما يسبقنّ الا الخيول الأصيلة

ومن راح لا تنشد إذا راح.. من راح؟؟

خذ من سميّك مكسبه للجميلة

والوقفة اللي تثلج صدور وارواح

اسمك على اسمه وانت خله دليله

تمشي على نهجه مبرات واصلاح

راع الصفات النادرة ينعني له

الشيخ وابن الشيخ كسّاب الامداح

تفدا يمينه كل يمنىٍ بخيله

ويفداه من هو طيب يمناه ما فاح

خذ يا محمد من محمد سبيله

ومن نجد شف في وسط ابوظبي مصباح

يابوك وان شلت الهموم الثقيلة

عنّز عليه وينقلب حزنك افراح!

رد: ديوان شعراء السعودية في العصر الحديث (متجدد)☘️☘️
 

قصيدة الهيل والنعناع والقرفه
الشاعر: زايد الرويس زايد الرويس
#العصر الحديث
#المملكة العربية السعودية
0
141 مشاهدة

أمر من عند بيتك والمح الغرفه

شبّاكها يشتكي غفوة ستايرها

واخذ نفس من قصيدي واشهق بحرفه

واجدّل ابيات شعري من ظفايرها

واحس قلبي يغضّ شوي من طرفه

ويذوب في ملحها قدام سكّرها

الترفه اللي كثر ما احبها ترفه

أضيع فيها من اولها إلى اخرها

في صوتها الهيل والنعناع والقرفه

وفصمتها مسكها ما مل عنبرها

لو حبها ذنبي اللي كنت مقترفه

حبيتها اكثر وللزلات غافرها

ولو حبها الموت ما مانعت في صرفه

لعروق قلبي قبل حتى لا اشاورها

ولو حبها صبح يتسلل من الشرفه

حلفت لعيونها ماني مسكرّها

لكنه الحب عشته زين واعرفه

معها لقيته وعشته في مشاعرها

لو انها بس لا ملّت من الغرفه

تمر شبّاكها لعيون شاعرها!

رد: ديوان شعراء السعودية في العصر الحديث (متجدد)☘️☘️
 

قصيدة كيف اصوم
الشاعر: زايد الرويس زايد الرويس
#العصر الحديث
#المملكة العربية السعودية
0
141 مشاهدة

خلي جروحك على بابي ونامي

وغمّضي صوتك ابغفى به واقوووم

ما تعوّدت أصبح بحبك حرامي

لين شفتك فالسما مثل النجوم

صدقيني.. كثر ما تبرد عظامي

لا تذكرتك.. تناسيت الهموم

وانتِ اول نبض مدفون فكلامي

وانتِ اخر عشق يتساقط غيوم

يوم طاحت دمعتي ما كنت ظامي

كنت افكّر.. كيف مرّه كل يوم!!

خايف تنامين والعشق متنامي

كيف ابفطر وقتها.. أو كيف اصوم

والغرام اللي جمعنا حيل ساااااامي

مغتسل بالطهر وانفاسه تشوم

خلي اهدابك على قلبي ونامي

كلها كم يوم وتزين العلوم

رد: ديوان شعراء السعودية في العصر الحديث (متجدد)☘️☘️
 

قصيدة أي دمعة حزن
الشاعر: زايد الرويس زايد الرويس
#العصر الحديث
#المملكة العربية السعودية
0
141 مشاهدة

كنت خايف لا تمادى بي طعوني

لين شفت الضيق ف احضانه رماني

وابتديت ارسم محطات لسكوني

تبتدي مني ولا تاصل مكاني

أي دمعة حزن لا لا يا عيوني

ما بقى للحزن حبلٍ ما لواني

في عيون اللي توارت في جفوني

غضةٍ قد ليّنت قاسي زماني

علمتني كيف اعيش بكل كوني

واخلق من الدمع ضحكات وأغاني

من تعبها طاح قدامي ودوني

كل حلم وشلت حملٍ ما قواني

طحت كلي وابتديت المس متوني

واكتشفت اني وحيد بدون ثاني

كل حرفٍ ينكتب معطيه لوني

من قراه بدفتري كنّه قراني

من تهجاني عرف قيمة جنوني

من تعبها.. والحنين اللي خذاني

للطعون اللي تمادت في طعوني

يوم شفت الضيق ف احضانه رماني

رد: ديوان شعراء السعودية في العصر الحديث (متجدد)☘️☘️
 

قصيدة الى حال دون الباب
الشاعر: زايد الرويس زايد الرويس
#العصر الحديث
#المملكة العربية السعودية
0
139 مشاهدة

إلى حال دون الباب قفلٍ ومزلاج

يبى الله يفرجّها يبى الله يفرجّها

عن الضيق يا فرّاج بيديك الأفراج

تضيق الأراضي يوم وتوسّع فججها

طريق الظما يمكن يوصلك هداج

وبعض البحور الله بملحه مسمجها

لك الله يا نفسي على صفق الامواج

على الله مدخلها على الله مخرجها

لمحت الهدوء اللي بداياته ازعاج

ملامح حياةٍ سولفت لي مباهجها

عن احراج بعض الناس مالي والاحراج

وانا اقرا فصول الناس وافهم مناهجها

يطيح الملك لا طاح من راسه التاج

ولو كانت فعوله من الطيب توّجها

والى شفت فوق الباب قفلٍ ومزلاج

أبرجع واقول الله علينا يفرجّها

رد: ديوان شعراء السعودية في العصر الحديث (متجدد)☘️☘️
 

قصيدة أغرق
الشاعر: زايد الرويس زايد الرويس
#العصر الحديث
#المملكة العربية السعودية
0
139 مشاهدة

يا مساء النور مدري يا صباح حضورك

يا اجمل اجمل من جمالٍ في غلاف مزبرق

يا بعد عمري وروحي يااااااا ما ارقّ شعورك

إنني في بحر حبك يا حبيبي أغرررررق

يوم ترميني كذا فجأه بوسط بحورك

كيف اب انجو دام لا مينا ولابه زورق!!

يا مذوّبني ب حسنك كل هذا نورك

القمر غيران منك ويوم شافك أطرق

يوم شفتك ضعت في لبسك وريح عطورك

دوك قلبي يوم شافك بالدموع اغرورق

أنت عادل بس مع هذا ذبحني جورك

كيف قدامي تمخطر وانت لابس أزرق؟!!

أنت ساحر شوف وش سويت في مسحورك

كل ما مرّت طيوفك في خياله أحرق!!!

بس قلّي قبلها كيفك وكيف آآآآمورك

ب اسألك بالله قلّي هي يديك استبرق!!

يا نعومة يدك تذبح والغريب فتورك!!

لو لمست الباب بيدينك بسرعه أورق

كل ما قلته خيالٍ بانتظار حضورك

أنت غايب بس انا في بحر حبك أغرق

رد: ديوان شعراء السعودية في العصر الحديث (متجدد)☘️☘️
 

قصيدة ماغيرها داخل البحرين مملوحة
الشاعر: زايد الرويس زايد الرويس
#العصر الحديث
#المملكة العربية السعودية
0
138 مشاهدة

الله على الضحكة اللي من عذوبتها

ما غيرها داخل البحرين مملوحة!!

بنتٍ إذا جات فرصة ما تفوّتها

من شافها.. بس! يمشي يحسب جروحه

خطواتها اللي تسولف عن أنوثتها!

زادتني إيمان ب إن العين مفضوحة!

في ضعفها حاجةٍ ترمز لقوّتها

وفي صمتها ما حدٍ يستعجل ف بوحه

قصيرها اللي مشت به من شقاوتها

يقول ماهيب للعشاق مسموحة

جت تسمع الشعر! واصل الشعر شوفتها

هي أجمله ف امسية والا ف أصبوحة

إن ما حصل حبها باقنع ب اخوّتها

وان ما حصل شي! يبلش زايد ب روحه!!

راحت وانا رحت افكر في عذوبتها

واقول يا كمّ فالبحرين مملوحة!!

رد: ديوان شعراء السعودية في العصر الحديث (متجدد)☘️☘️
 

قصيدة نايف صقر
الشاعر: زايد الرويس زايد الرويس
#العصر الحديث
#المملكة العربية السعودية
0
137 مشاهدة

كيف اببدا وانت نايف وصقرٍ من صقور

ما عشقت الا الثريّا وجاورك الجدي

وانت مسعد وابن مسعد وطالعك السرور

طايلٍ للطيب والطيب في كفك ندي

ما تشابه ما يشابهك غيرك ب الشعور

خل عاد الشعر لا قمت بالقاف تحدي

يوم مريت السحايب وهم تحت القبور

يكتبون اجداثهم وانت فالغيم تعدي

ليتهم يقرون ما بين نبضات السطور

يمكن التايه بعد أربعينه يهتدي

في دروبك للسهر نور زاد النور نور

مفرداته عظّمت لك: تحيه سيدي

ويوم جبت الوانك اغرقت ف بحورك بحور

ما بعد فاقوا من البير!! دربٍ سرمدي

وش عليك ان ضاقت صدور تستاسع صدور

توهم بالفكر ما شافوا ديار الجدي

رد: ديوان شعراء السعودية في العصر الحديث (متجدد)☘️☘️
 

قصيدة اسرع من الدمعه
الشاعر: زايد الرويس زايد الرويس
#العصر الحديث
#المملكة العربية السعودية
0
136 مشاهدة

الوقت ميلاته تراها سريعه

اسرع من الدمعه على خد الايتام

الصعب لو حاولت به تستطيعه

اليوم بكره بعد بكره وقدام

وماهوب شرط الوقت دايم تطيعه

خلك على صكات الايام مقدام

واحساسك اللي يتعبك لاتبيعه

حتى ولو باعك خوالك والاعمام

وسرك على غيرك أبد لا تذيعه

والقرش الابيض خله لسود الايام

وحاول اذا تقدر تجي ف الطليعه

ماغير الاول بس من يلبس وسام

واذا بدا لك من عدوك خديعه

لا تامنه حتى ولو مرت اعوام

واللي تبيه وما حصلك جميعه

خذ ما حصل لك دامها صارت اقسام

دايم خريف الوقت يتبع ربيعه

واذا ظلمت الناس بيجيك ظلاّم

اقسى شعور انك تشوف القطيعه

واجمل شعور تحس به وصل الارحام

رد: ديوان شعراء السعودية في العصر الحديث (متجدد)☘️☘️
 

قصيدة أجمل تفاصيلها
الشاعر: زايد الرويس زايد الرويس
#العصر الحديث
#المملكة العربية السعودية
0
136 مشاهدة

أيام الاسبوع ما عادت على خبري

تسبق بعضها.. واسابقها وتسبقني

واشوفني واقفٍ في منتصف عمري

أزفر سنيني من الضيقة وتشهقني

دون انكساري بقى لي شي من صبري

لو ان هالصبر بعض احيانا يخنقني!

في ذكرياتي رمادٍ سال من جمري

لو انثره فالدروب السمر يحرقني

تعبت مني ولو ان التعب مغري!

مرات احسه على غيمة يعلقني

واللي مع غيابها ضاع الهوى العذري

بطيوفها دون ما تدري تطوقني

كأنها تستحث الحزن في شعري

كأنها تستفز الدمع يغرقني

لو قلت ابنسى هواها العذب وش عذري؟

واجمل تفاصيلها ترفض تفارقني

رد: ديوان شعراء السعودية في العصر الحديث (متجدد)☘️☘️
 

قصيدة سيدة الليل القصير
الشاعر: زايد الرويس زايد الرويس
#العصر الحديث
#المملكة العربية السعودية
0
136 مشاهدة

سيدة كل المساءات والليل القصير

إفتحي للريح صدر السهر والذكريات

خلي الدنيا تمايل وينساق العبير

قبل ينشق الكلام وتموت الأمنيات

سولفي عن شمعتينٍ توسطهن سرير

ومزهرية ورد متفتّح وأحمر شفاة!

علميني كيف اذوّب جروحي للأخير!!

واغرقيني بين دجلة خيالك والفرات

بعثريني في دروبك قبل شوقي يطير

واجمعيني في زوايا العيون الناعسات

أدري انك حلم واشعر بتأنيب الضمير

كل ما مرّت على البال بعض الأغنيات

يا صغيرة وان كبرتي ترى قلبي كبير

ما يشيل الا عيونك وكل الذكريات!