رد: ديوان شعراء السعودية في العصر الحديث (متجدد)☘️☘️
 

قصيدة القصيد وذكرياتي
الشاعر: زايد الرويس زايد الرويس
#العصر الحديث
#المملكة العربية السعودية
0
136 مشاهدة

جف صوتي يا غدير الشوق وانواري توارت

والظلام اطلق يدينه في زوايا ذكرياتي

ما بقى للعمر معنى دام الاحلام استخارت

والسنين الموغلة بالحزن تكتب لي وصاتي

وين اروح وكل فرحة دون ما ترتاح طارت

بالحياة اللي معك كانت تمثّل لي حياتي!

سيدة حزني إذا ابياتي من الحرمان ثارت

كيف اسمّعك القصيدة دامها ضاعت شفاتي!

في غيابي عنك اشوف الأرض باهل الأرض دارت

وانتي لحالك هنا متعلّقة في وسط ذاتي

صدقيني ما بقى دمعة محبة ما استجارت

بالطيوف اللي تمر احيان تجمع لي شتاتي

وان بغيتي الصدق كل الناس من عقبك توارت

ولا بقى لي غير حبك والقصيد وذكرياتي

رد: ديوان شعراء السعودية في العصر الحديث (متجدد)☘️☘️
 

قصيدة رسالة قديمة
الشاعر: زايد الرويس زايد الرويس
#العصر الحديث
#المملكة العربية السعودية
0
136 مشاهدة

تكفى يا ابو قلبي وعمّه وخاله

تكفى يا ابو كل الجروح القديمه

تكفى تعزّيني بجرحٍ بقى له

في خاطري مثل انتظار الهزيمه

لدّيت يمّك شفت جرحك لحاله

لدّيت يمّي شفت ضحكه يتيمه

ضايق واقول اني بخير وسهاله

ومواجعي مداتها لي كريمه

تعبت ادوّر موقفٍ من خلاله

أنسف ركام الذكريات الأليمه

خادم غلاك ان صار صاحب جلاله

يعرف حدود خطوطه المستقيمه

يقراك حتى في ملامح ظلاله

ويشوف عينك لا ارتكت في صميمه

بينه وبينه ما شغله انشغاله

في غيرك الا فيك ذكرى مقيمه

فالحب أية شي سهل احتماله

إلا جريمه بس ياهي جريمه

وشلون قلبك شحّ يرسل رساله

أرسل ولو حتى رساله قديمه

رد: ديوان شعراء السعودية في العصر الحديث (متجدد)☘️☘️
 

قصيدة طيفك مارجع
الشاعر: زايد الرويس زايد الرويس
#العصر الحديث
#المملكة العربية السعودية
0
135 مشاهدة

البارحة..
طيفك تشكّل لي على هيئة بحر
وكان الغرق..
طوق النجاة!!
جلست الملمني على شاطيك..
لين الصبح لاح!
جلست اتابع موجتك
تقرب وتقرب.. لاول حدودي
وتتلاشى
وانا ادوّر عيونك في زراق البحر
واغرق.. من جديد!
البارحة.. كان البحر موجه عبوس
وكانت احلامي رضا
جلست اسولف له.. عن الأحباب والأحلام والألام والغيّاب
والعشق القديم..
سولفت له سولفت لك
عن كل فرحة ساورتني عن شفاي
عن كل دمعة راودتني في مداي
إلى آخر حدود الوجع
البارحة صبيت حزني في بحر جدة
وطيفك ما رجع!

رد: ديوان شعراء السعودية في العصر الحديث (متجدد)☘️☘️
 

قصيدة السما جردا
الشاعر: زايد الرويس زايد الرويس
#العصر الحديث
#المملكة العربية السعودية
0
134 مشاهدة

ماهي غريبه إذا سال الظما فينا

الارض تمطر تعاسه والسما جردا

يا حادي الحزن خذني لو تبي مينا

وش رايك ابدا ب حزني قبل ما تبدا

تعال نتقاسم الدمعات ب يدينا

ونعلّم الأصدقا عن خوّة الأعدا

أو خلنا نفترق ونقول يكفينا

نهايةٍ مالها ذمّه ولا مبدا

يا حادي الحزن لو ما للتعب جينا

ما كان شفت الليالي من كذا واردى

ما عاده الليل بالضحكات يغرينا

الدمع مرات لا طال الطريق اجدى

قل للسعاده لو ان الوقت يمدينا

طرنا سعاده ولكن للأسف ما امدى

أضحى التنائي بديلاً عن تدانينا

والارض يبست تقول ان السما جردا!!

رد: ديوان شعراء السعودية في العصر الحديث (متجدد)☘️☘️
 

قصيدة يا مسافر للجفا
الشاعر: زايد الرويس زايد الرويس
#العصر الحديث
#المملكة العربية السعودية
0
134 مشاهدة

يا مسافر للجفاء والبعد قتال الأماني

خذ معك بعض الشعور وشاعر ضيع طريقه

لو تسافر في عيون الليل وتلامس حناني

تنبت اجمل كذبة بيضاء على وجه الحقيقه

لا تساومني على موت الدقايق والثواني

كم غدير جف والعطشان ماقد بل ريقه

الفراق اسهل كثير من الوصال اللي نساني

الفراق اسهل من الضحكات بوجيه الخليقه

رح وسافر عن مدى شوفي وخلك في كياني

مثل دخان تصاعد والحطب يعني حريقه

كل خطوة بعد تطرد اخر فلول الأماني

ذي نهاية واقعية كل واحد في طريقه

رد: ديوان شعراء السعودية في العصر الحديث (متجدد)☘️☘️
 

قصيدة اللهم إني عاشق
الشاعر: زايد الرويس زايد الرويس
#العصر الحديث
#المملكة العربية السعودية
0
133 مشاهدة

السهر قنديل هم معلقة ف اكتافي

والمخدة كنها حست ب قلب مفارق

قلت وحروفي بحر وحكايتي مجدافي

وارتفاع الموج يغرق واكسجيني خانق

يا حبيبي والجدب ينهش جميع اطرافي

ما كذبت ان قلت احبك بس ماني صادق

لنّك اكبر من محبة يا الحبيب الوافي

ولنّ قلبي دايم مقصر وحبك سابق!

لو دروبك شوك وش يمنع أجي لك حافي

ولو مسافاتك طويلة وارتفاعك شاهق

شفني اتوسل غلاك وما طلبت انصافي

أدري انك تدري اني من غرامك واثق

كيف انام وصورتك تدخل معي ف لحافي

ولا لمحتك.. قلت: اللهم إني عاشق

رد: ديوان شعراء السعودية في العصر الحديث (متجدد)☘️☘️
 

قصيدة شتات أخلاقي
الشاعر: زايد الرويس زايد الرويس
#العصر الحديث
#المملكة العربية السعودية
0
133 مشاهدة

ياللي طعونك تستحل اعماقي

يحق لك.. من يمنعك لا تطعن!

طعنت بعضي كمله بالباقي

ينصاع لك قلبٍ تهاوى واذعن

ما تدري انك تستفز اشواقي

وان الجفا معروف حكمه شرعاً!!

مادامها انكشفت جميع اوراقي

ما الوم قلبك لو تمادى وامعن

وانا اعرف ان اسلوبك اصلاً راقي

بالرغم من كونك أسأتَ صُنعاً

لا خانت الهقوه دروب الهاقي

وش ينتظر غير التعاسه والعن!!

مع السهر شانت عليك اخلاقي

باعاتبك واصغِ إلي سمعاً

أبيك في وصلك تشد وثاقي

في ليلةٍ نقطف ثمرها جمعاً

ومادام طعناتك تجي فاعماقي

باموت احبك يا حبيبي.. طبعاً

رد: ديوان شعراء السعودية في العصر الحديث (متجدد)☘️☘️
 

قصيدة خجلك
الشاعر: زايد الرويس زايد الرويس
#العصر الحديث
#المملكة العربية السعودية
0
133 مشاهدة

صبي السكر اللي في شفايفك ذاب

واخلطيه بخجلك وب اصبعك حركيه!

خلي الحسن يشعر بعدها ب ارتياب

كيف يشعر ب ذل! وكيف يشعر ب تيه!

جدّلي فتنتك شمس ونجوم وسحاب

وفكي ازرار صدرك دون ما تلمسيه

يمكن اكتب حروف! ويمكن اقرا كتاب

سطر باضحك عليه وسطر بابكي عليه!

كل ريحٍ تزمجر تفتح الفين باب

ضعت ما بينهن مدري وش اللي أبيه

في غيابك حضور وفي حضورك غياب

أبتدي في غيابك والمحك وانتهيه

رد: ديوان شعراء السعودية في العصر الحديث (متجدد)☘️☘️
 

قصيدة أغنيه
الشاعر: زايد الرويس زايد الرويس
#العصر الحديث
#المملكة العربية السعودية
0
132 مشاهدة

وياخذني حديثك للبعيد الأصدق الأقرب

واحس ان الزمان يعيد نفسه أو يكررني!

قبل ما ارتاح بك مرتاح لك قلبي وجات اغلب

ظنوني:كن قلبي ضاع بك مني يدورني

أحس اني أعرفك قبل اعرفك! والحنين أغرب

لصوتك وابتساماتك وصفوٍ ما يكدرني

كأنك أغنية مرت علي ول لحنها أطرب

أو انك حلم شفته قبل ه الليلة يعبرّني

أنا مدري! ولكني لقيت بقلبك المهرب

عن اللي عشت فيه سنين من قبلك يكبرّني

من ايام الدفا جيتي.. مطر عمري قبل تشحب

تفاصيل الحياة بغلطةٍ تعجز تبررني

وش الأصعب من اسهل كلمةٍ إحساسها الأصعب؟

نسيت اقولها من فضل قلبك لو يذكرني!

أحبك!! إيه أنا لك قلتها.. بس الزمن يلعب

علينا! يا هو يعيدك! أو انه بك يكررني!!

رد: ديوان شعراء السعودية في العصر الحديث (متجدد)☘️☘️
 

قصيدة تنهيده
الشاعر: زايد الرويس زايد الرويس
#العصر الحديث
#المملكة العربية السعودية
0
132 مشاهدة

يغفى على دفتري شعرٍ سجن قيده

واتذكّر انك قصيدي مصدر الهامي

واكتبك صوتٍ يبل القلب ترديده

واقراك طفله تقول لدمعتي نااااامي

والدمع لو كان لعبه! عيني تجيده

لكنه الأصدق الأقرب من ايامي

يسري مع الليل جرحي وارجع آآآعيده

واليّل الصبح لجلك واسرق احلامي

واقول: يا طفلتي منك تنهيده

منها اقشعّر البدن واهتزت عظامي

يا اجمل أغاني زماني فرحته عيده

نبضه سكونه جنونه عشقي السامي

الوقت كذاب ما تصدق مواعيده

والحب غلاب والامي هي الامي

والشوق لو ينطفي حسراتي تزيده

والصبر ما بلّل عروق الغلا الظامي

كل المسافات تركض وانتي بعيده!!

هذا مكانك وهذا موضع اقدامي

رد: ديوان شعراء السعودية في العصر الحديث (متجدد)☘️☘️
 

قصيدة نكهة اعنابك
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

خليني ارضي عنادك وارضي غروري

وانا اوعدك لا رضيتي عني ارضى بك

تأملّي وش تخبّى داخل سطوري

وانا اوعدك ما تعدّى عيني كتابك!!

واما احترقت بك في لحظة دفا ثوري!!

وانا اوعدك لاحترق بك حيل وادفى بك

ويش الدلال بحضورك وش هو الجوري

لا صار عقدك يغار وتخجل اطيابك

يا مغيّبتني وانا حاضر عن حضوري

ب اعلّم الشمس لا غابت عن غيابك

وان جابك الله على يسري وميسوري

عزفت لحن الوصال ب نكهة اعنابك

يا غصن الاحلام كم حنّت لك طيوري

وكم حنّ قلبي وهو واقف على بابك

إشتقت لك لين صرت استسخف شعوري

إشتقت لك لين صرت اشتاق لثيابك

هذا الغلا صار ضارب ف اعمق جذوري

والمشكله كان هذا الشوق ما جابك

أبي وعد منك بس ارضي لي غروري

وانا اوعدك لاصبح اول واخر احبابك

رد: ديوان شعراء السعودية في العصر الحديث (متجدد)☘️☘️
 

قصيدة مدي يدك
الشاعر: زايد الرويس زايد الرويس
#العصر الحديث
#المملكة العربية السعودية
0
132 مشاهدة

لو اقدر اجمع كل الايام في يوم!

جمعت كل ايامي ف يوم لقياك!

عشان اعيشك صح! وازهر بك نجوم

واقضيك عمرٍ ما يكدره فرقاك!

أزعلّك في يوم واصالحك دوم

واضيّعك لحظة! وادورك والقاك!

أقطفك زهرة.. وازرعك داخل غيوم

واذا امطرتْ بك أرتوي منك واظماك!

وانتي معي يا بعده الحزن.. والنوم

وانا معك آآآآآآتساقط إلين ما ارقاك

أنتي بحر... وانا بشر! ما اقدراعوم!!

مدي يدك... قدام لا اضيع في ماك!

رد: ديوان شعراء السعودية في العصر الحديث (متجدد)☘️☘️
 

قصيدة الخطا شين
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

رميت قلبي في يدين السهر لين

أصبحت والكون أصبح لمالك الكون

ما طاب لي ليلي ولا غمضت عين

حرٍ طليق بداخلي شوق مسجون

كن السهر دين وتعبت اوفي الدين

غرقان به والنوم ما مد لي عون!

طيفك يداعبني وانا اداعبه بين

صحو النعاس وعاشقٍ فيك مجنون

آخر رسالة منك جتني وانا وين؟؟

معهم واحاسيسي معك لو يحسوّن!

أقول في نفسي خطا والخطا شين

أخطيت في حقك خطا دون مضمون

وشلون خليتك بدوني تنامين؟

سألت نفسي لين مليّت... وشلون؟؟

عجزت لا القى لي عذر بس.. تدرين!

لا ترحمين القلب لو كله طعون

وانا باقول اليا اتصلتي بي أهلين

لا والله اكثر من كذا فوق مليون

كني أبد ما اخطيت وانتي تغاضين

عن غلطة الشاطر ما دام انه يمون

أنا حبيبك وادري انك تحبين

غلطات قلبٍ ما سمحتي له يهون

أدري كذا قلبك يحنّ وتحنين

كذا الحبايب بالقساوة يحنوّن!!!

رد: ديوان شعراء السعودية في العصر الحديث (متجدد)☘️☘️
 

قصيدة البال ما روقه قهوة ولا شاهي
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

البال ما روّقه قهوة ولا شاهي

مشغول والمنشغل لا يمكن إشغاله

يا ساهي الطرف: وينه طرفك الساهي

ما قلت لك لا تخلي قلبي لحاله؟

خلك من العذر مادام العذر واهي

إرجع فديتك وضم احساسي الواله

إجلس هنا ترجع البسمة على شفاهي

والحزن يصبح بوضعٍ صعب يرثى له

يا سيّد القلب وانت الآمر الناهي

قرّب يدك لين قلبي تحيي آماله

لا يخدعك فالهوى لو كثروا اشباهي

لمواصلك لذةٍ عجلة ومختالة

أبك انت نكهتك لا قهوة ولا شاهي

من ذاقها ذوق! تصبح حالته حاله!!

رد: ديوان شعراء السعودية في العصر الحديث (متجدد)☘️☘️
 

قصيدة وقفت في نصف الطريق اتحراك
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

البارحة قلبي تشبّع بذكراك

ومن الوله وده بلا ذنب يقتلك!

يا تاركتني للظما في رجا ماك

بالله ما عمر العطش يوم بلّلك؟

أصعب من احساسي بفرقاك.. فرقاك

يا صعبها.. لامن جلست اتخيّلك

وقفت في نصف الطريق اتحراك

لا انتي رجعتي لي ولا انا مشيت لك

كنك زرعتي داخل عيوني اشواك

وشلون اغمّض جاوبي قبل ما اسألك

لا قلت أبنسا!! قبل ما اكمّل انساك

آتذكرك.. واقول يا ليل ما اطولك

لا صار ليلي ينتهي قبل يبداك

بينتهي عمري أجل قبل ما اصلك!!

والبارحة انا وقلبي ف ذكراك

ومن الوله.. ودي وانا بعيد اقبّلك

رد: ديوان شعراء السعودية في العصر الحديث (متجدد)☘️☘️
 

قصيدة الحب الكبير
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

ما يبّس غصون الغرام الا عنادي مع جفاك

والشك والحب الكبيروسالفة قلبٍ يبيك

واحلى ثلاث سنين مرّت من حياتي في سماك

خلتني اتنفس هواك وقبلها اقبّل يديك

والسالفه يا ليتها ومعها قول

السالفه فرقا قلوب وبعد لكن ما عليك

انا ادري ان الحب ما بين المحاني ما خفاك

وادري بأنه ما يجي له حاجةٍ مما لديك

لكن على فكره ترى قلبي بما يملك شراك

وحاجه طبيعيه اذا قلبي يحاول يشتريك

انتي عطيتيني وانا رجال واقدّر عطاك

وانا بعد معطيك روحٍ كل ساعه تفتديك

لبّا غلاك وضحكتك ألا بعد لبّا شفاك

ولبّا دموعٍ كلما طاحت همست اموت فيك

غلاك هذا لو تعرفينه وش يسوّي غلاك

سامحتي اللي غلطته إنه يموت وهو يبيك

وانا اعتقد لا لا انا متأكد ان اللي حداك

للبعد شيٍ ما تطيقينه وحزنٍ يكتسيك

لكن عزاي انك عرفتي داخلي وش مستواك

ومانيب قايل إسأليني بس اقول لك اسأليك

رد: ديوان شعراء السعودية في العصر الحديث (متجدد)☘️☘️
 

قصيدة أوراق الزهر
الشاعر: زايد الرويس زايد الرويس
#العصر الحديث
#المملكة العربية السعودية
0
131 مشاهدة

الصبح يتنفس شحوب الفجر ويلّم الخيال

والشمس تنثر مع أشعتها طموح العاشقين

والقلب غصنٍ لو تهبّ الريح فالوجدان مال

وطاحت ثماره في فياض الروح أشواق وحنين

وانا امتطي صهوة خيالي في جنون الإرتجال

مريت في مينا غرام البوح واتعبت السنين

واشعلت شمعه فوق طاولة المعاتب والجدال

وسيجارتي دخانها يصعد ويتوزع أنين

وتمرّ لحظه بعدها لحظه ويتبادر سؤال

يموت في مهده ويعقد من غبائه حاجبين

خوف وقلق يجتاحني وايمان إن الصبر طال

وجمله ترددّ في لساني يا معين الصابرين

لهفه حذر أوجاع حيرة شمس في رجوى ظلال

واحسب على اوراق الزهر تجين؟ والا ما تجين

لحظات ويمرّ العطر من قبل لا يختال شال

واحس رجفه في ضلوعي وارتباكه فاليدين

مثل المطر على الزجاج اذا تهادى ثم سال

جيتي وصحيّتي حنانك بين قلب وبين عين

رد: ديوان شعراء السعودية في العصر الحديث (متجدد)☘️☘️
 

قصيدة بشكل حصري
الشاعر: زايد الرويس زايد الرويس
#العصر الحديث
#المملكة العربية السعودية
0
130 مشاهدة

تعالي تنبت ف صدري أغاني

من الحانك وتوزيعك وشعري

تعالي.. صرت بك إنسان ثاني

كأني.. بك بديت اعيش عمري

تعالي.. كل ما فالكون فاني

ويبقى حبي المجنون عذري

تعالي.. غيّري شكل الثواني

يطول الليل قبل يبين فجري

تعالي.. فسري كيف الأماني

تعيش بدون ما نشعر وندري

تعالي.. كل ما فيني يعاني

من الحرمان.. رمّد كل جمري

تعالي.. عطّري باقي زماني

وكوني لي أحاسيسي وعطري

تعالي.. إنعقد مني لساني

وانا ما قلت لك مكنون صدري

معك بالذات احس اني أناني

أب اعيشك غرام بشكل حصري

تعالي تنبت ف صدري أغاني

من الحانك وتوزيعك وشعري

رد: ديوان شعراء السعودية في العصر الحديث (متجدد)☘️☘️
 

قصيدة كرهت نفسي
الشاعر: زايد الرويس زايد الرويس
#العصر الحديث
#المملكة العربية السعودية
0
130 مشاهدة

كرهت نفسي كثر كرهي لفقري

ولو يكره الإنسان نفسه وش يصير؟!

تململت فيني مشاوير عمري

والسالفة ما عاد فيها معاذير

إي والله اني ضقت.. وش ذنب شعري

جرّيته لبحر الحزن دون تبرير

صحيح طاحت دمعتي بس عذري

إن الدموع تقول لي سرك فبير!!

ناديت صبري قلت محتاج صبري

محتاج لك.. جاوبني: وخير يا طير!!

ما عاد اشوف بهالزمن شي يغري

طاحت سنينه فوق روس المناعير!

والبسمة اللي بعض الاحيان تسري

فوق الشفايف صدقها فيه تزوير

أعيتني الضيقة وسلمتها امري

يمكنها تقصر علي المشاوير

يا ليتني عن مقبل ايامي ادري

أو ليتني... أو ليتني.. توي صغير!

ما كان عشت الجرح والحزن عبري

ولا حسبت حساب لعب المقادير

هذا التعب مكتوب والضيق مقري

والسالفة طالت وانا ماني بخير!

رد: ديوان شعراء السعودية في العصر الحديث (متجدد)☘️☘️
 

قصيدة مالك ومال للتعب ياجارة الوادي
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

هذا التعب.. من سنين العمر متمادي

رافقني سنين من عمري ورافقته

من كثر ماهو م هو عادي غدا عادي

ومن كثر ما كنت أكذّب فيه صدقته

مالك وما للتعب يا جارة الوادي

والله اعدّه كأنه حلم.. حققته!!

تعالي.. الليلة إيقاع السهر هادي

واخر كروت التعب لعيونك أحرقته

ما تسمعين الوله في قلبي ينادي؟

صوته م هو صوت! قيدٍ ضقت واطلقته

أبيك يمكن أعود ل يوم ميلادي

واعيش بك عمري اللي مر! ما ذقته

كوني لي العمر! والا كوني بلادي

أدفن على ارضك تعاسة قلبٍ أرهقته

بالله كوني شموس العمر وأعيادي

والا اتركي قلبي يكمّل تعب وقته

هذا التعب من سنين طوال متمادي

من كثر ما هو وفا لي عمر رافقته

رد: ديوان شعراء السعودية في العصر الحديث (متجدد)☘️☘️
 

قصيدة الله يقطع بليسها
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

أيووووه يا برد هالليلة يبي له دفا

حضن ويدٍ تفرك اللهفة باحاسيسها

مع ان فالقلب جمر من الوله ما طفى

لكن ليال الشتا الله يقطع ابليسها

حنيّت والليل طوّل والجفن ما غفى

يتابع طيوفها.. مدري جواسيسها!!

اللي تجيني وتوعدني ب ساعة صفا

وروحي تكمل سهرها مع هواجيسها

مافيه فالحب أجمل من شعور الوفا

الى زرعت حولنا الدنيا متاريسها

ولا فيه أصعب من الحرمان والا الجفا

ف قلوب تطفي لياليها فوانيسها


5

رد: ديوان شعراء السعودية في العصر الحديث (متجدد)☘️☘️
 

قصيدة ممنوع الإزعاج
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

لا تتعبين اقدامك وقلبك ولا تتعذبين

أنا سمحت من الهوى والعشق يا أستاذتي

ما عاد ادوّر فالبحر لولو ولا در ثمين

وكسرت بيديني على شاطي البحر سنارتي

ماعاد نار الحب تحرقني ولا تتخيلين

إني مثل ما كنت.. اعزف الحب من قيثارتي

علقت فوق القلب لوحة واضحة من جملتين

ممنوع الإزعاج وبلاش تحاولين إثارتي

تأكدي ما عاد تفرق لو يميل الياسمين

ماعاد اشوفه صدقيني من ورا نظارتي

قسوة زماني علمتني كيف قلبي ما يلين

حتى ولو كان الهوى مرهون تحت إشارتي

أيام كنت بكل ما فيني من اشواق وحنين

أوقف بوجه الريح واشعل حلمي وسيجارتي

واليوم يا أستاذة الإغواء بي شاعر حزين

ما مل يكتب سالفة حزنه بجوف حكايتي

من يوم غابت سيدة حرفي وانا امر السنين

عابر سبيل وضيقة ايامي تشكّل حالتي

وانتي بلاش تتّعبين اقدامك وتتعذبين

على شبابيك الهوى أسدلتها ستارتي

رد: ديوان شعراء السعودية في العصر الحديث (متجدد)☘️☘️
 

قصيدة ملامح من شظايا وغياب
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

يا غيابك..
أسهل دروب الضياع اللي بها قلبي يمر!
وأوسع أبواب السهر للعين واصلبها أمر!
يا غيابك..
جمرةٍ ما تنطفي..
لين انطفي!!
والغياب يتساوى..
يوم..
أو حتى.. شهر!
لكن انتي..
كل ما غبتي.. أفارقني عُمر!
من رحلتي..
صرت اشوفك في قصايد أحمد الصانع ورقة شهرزاد
في ملامح من شتات..
صرت أحسك في حروف عقاب لا غنّى الغياب..
في طهارة فاتن وضحك العنود
في براءة شيخة الكتبي وف احساس الهنوف
ألمحك في غربة استقلال وف ضحكة أخوي
واتنفّس ذكرياتك مثل عطر الليل لا هز الصباح
في حكاية من مشاعل..
في سوالف مريم ب ذاك الطريق..
في رسايل فاطمة.. واحزان عارف..
في حروف إيمان وف دمعة هديل
في قناعات الغريبة شوق..
واتنّهد..
لا قريتك في سطور الضوّي ونبضات سامي
في عذوبة عذبة وألحان صالح..
وادري انك شي ثاني..
لا لمحتك.. من مكاني..
في رومانسية عوض نفاع وإيقاع الأغاني
في جنون الراشد احياناً وفي صمت الصدى
في فضاءات الأماني وابتهاج أبرار لا طال المدى!
صدقيني..
من رحلتي..
صرت اشوفك.. وين ما امشي..
في شظايا!!

رد: ديوان شعراء السعودية في العصر الحديث (متجدد)☘️☘️
 

قصيدة حسنك يُخلدك
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

حورية الحسن.. حسنك فتنة الناظرين

يسلب له عقول وارواح وقلوب وعيون

في وقفتك فاتنة وف جلستك تذبحين

والأخضر المشتعل أسهل دروب الجنون

حنّاك مرسوم كنّه خارطة فاليدين

تدل لاشهى كنوز الأرض طُهر ومجون!

عقدك تربّع على عرشٍ مهيبٍ مكين

لحظة تدلى على صدرك بعذره يمون!

يلتف في معصمك ماسٍ سعيدٍ حزين

وده لو انه مكان العقد مهما يكون

فيك اجتمع كل حسن وكل درٍ ثمين

يا كثر ما بك من الرقة ولا يعلمون

حسنك يخلدك لو درب الخلود السنين

اللي تخليك آيه دون شك وظنون

حورية الحسن وانتي فتنة الناظرين

يا خوف قلبي كثير الحب عندك يهون

رد: ديوان شعراء السعودية في العصر الحديث (متجدد)☘️☘️
 

قصيدة الحكي دخان
الشاعر: زايد الرويس زايد الرويس
#العصر الحديث
#المملكة العربية السعودية
0
129 مشاهدة

يدق الصمت ناقوس الكلام ويبتدي التخمين

تطير حروف وتقيّد غمامٍ للسما سجّان

شفاةٍ تحترق تلفظ من افواه السنين: سنين

يبعثرها الحنين وتختنق كن الحكي دخان

انا الساكن ورا أسوار حزني منتظرك تجين

أناا لأبعد من اللاممكن الأقرب من الإمكان

أنا الإنسان في داخل تجاعيده يعيش الطين

أنا الأكثر وضوح من الوضوح الغامض الإنسان!!

أنا ذاك الطريق المنتهي فبدايته.. تدرين؟؟

وش اصعب من طريقٍ مالقى في داخله عنوان؟؟

أنا ذاك الفقير اللي صنع من دمعته سكين!

زرعها في خفوقه وابتدا يتنفس الحرمان

انا اللي وين ما وديت وجهي شفتك تمرين

كأنك تاخذينه من دفاتر غربته: نسيان

أحبك كثر ما مر السهاد عيوني الثنتين

ولا ادري وين اودي لهفتي لك لو تثور الآن!!!

لأن الصمت ناقوس الكلام اتعلّم التخمين

شفاهي تحترق واسكت واعرف ان الحكي دخان!!

رد: ديوان شعراء السعودية في العصر الحديث (متجدد)☘️☘️
 

قصيدة صوت ريم
الشاعر: زايد الرويس زايد الرويس
#العصر الحديث
#المملكة العربية السعودية
0
128 مشاهدة

تفز الذكريات بصوت ريم وضحكها المنساب

جداول وسط سمعي لين اذوب بصوتها الراقي

أنا يا ريم شفتك في خيالي تفتحين الباب

لموج من المشاعر تنسكب في داخل اوراقي

فقدتك من ثلاث شهور يوم احترقت الأعصاب

وانا انده لك تعاااااااالي في ثواني عمري الباقي

مدى هذا الحنين يجغرف ايامي دروب غياب

وانا اسأل عنك طيفٍ ما نوى في لحظة عناقي!

وحشني كل ما بك.. من نخيل ومن ثمر واعناب

وانا يا ريم شفتك جنتي واحساسي الساقي

غيابك نار.. وضلوعي هشيم وصدري الأعشاب

دخيلك فكري مليون مرة لحظة احراقي

لأنك غير عن كل البنات وما سواك احباب

يكفيني فقط لا من ضكحتي تزهر اعماقي

أحبك.. إيه احبك صدق.. لو هذا الزمن كذاب

جداول صوتك بسمعي يا ليت تحن ل اغراااااقي

عشان الذكريات اللي تمر بداخلي تنساب

ترجعني لتنهيدي واذوب بصوتك الراقي

رد: ديوان شعراء السعودية في العصر الحديث (متجدد)☘️☘️
 

قصيدة خل عندك دم
الشاعر: زايد الرويس زايد الرويس
#العصر الحديث
#المملكة العربية السعودية
0
127 مشاهدة

يا الفرح خل عندك دم مرة وشوف

كيف حتى فرحها مختلط بالعذاب

أسقها منك بعضك لين كلك يروف

راحت سنين وانت تلوح مثل السراب

خلها تهتني لحظات حسب الظروف

لا تعكر هناها في سنين الشباب

طفلة القلب.. ست الكل.. واجمل هنوف

حزنها فيه مني جرح يلبس ثياب

ضحّتْ الفين مرة للهوى دون خوف

وفتحت للمواجع وسطها ألف باب

عاشت لغيرها قلبٍ حنونٍ عطوف

كن من حولها أرض وعطاها سحاب

كثر ما احبها حسيت حزني سيوف

وكثر ما احبها حسيت هالحزن غاب!!

مشكلة قلبي انه غيرها ما يشوف

ومشكلتها فرحها مختلط بالعذاب!

رد: ديوان شعراء السعودية في العصر الحديث (متجدد)☘️☘️
 

قصيدة والله لاجي قدام بيتك
الشاعر: زايد الرويس زايد الرويس
#العصر الحديث
#المملكة العربية السعودية
0
126 مشاهدة

والله ل اجي قدام بيتك واصايح

واقول خلوها بسرعة تجيني

مجنون ما تنفع معاي النصايح

اعرف وينك بس ما اعرف ويني

يعني باخربها ولانيب رايح

ألا إذا جيتي وشفتك بعيني

الحب ما يعرف بنود ولوايح

مثل ما اخذتيني محبه عطيني

صحيح انا مانيب احب الفضايح

لكن رجاءً وبهدووووء أفهميني

لو قطّعوا قلبي عشانك شرايح

يعني واذا.. ماهمني.. صدقيني

أصلاً أنا قلبي له شهور فايح

ذابت عروقه من غلاك وحنيني

أشوف طيفك فالمزون الروايح

والى انتبهت اقوم والمس جبيني

وامر بيتك.. بس قدام اصايح

اقول يمكن قبل اصايح.. تجيني!!

رد: ديوان شعراء السعودية في العصر الحديث (متجدد)☘️☘️
 

قصيدة جنب السور
الشاعر: زايد الرويس زايد الرويس
#العصر الحديث
#المملكة العربية السعودية
0
125 مشاهدة

اراضي بور وقبور وشعور اللا شعور يثور

وادوّن لا مبالاتي على رزنامة ايامي

خجل مدري وجل مدري عجل مدري سؤال يدور

متى أو ليه أو لا لا بلاش آكسّر احلامي

لأن الشمس من كم يوم شحّت لاتمّر الدور

لأن الليل من كم ليل يحكي لي عن آلامي

لأن الجرح يبقى جرح والطابق ما هو مستور

تعالي نلعن الحب وسنين الحب واوهامي

تعالي لا باجي لك وقفتي هي هي بجنب السور

اذا السور يتذكرني باقول لطلتك ناااااااامي!!!

على شباكك اللي قال لعيونك مساء النور

بعد ما اشتاق ليدينك وزينك يا اجمل اعوامي

ابي عينك تشوف الخاطر اللي من فرح مكسور

وابي قلبك يبلّ الظامي اللي لو شرب ظامي

ابيك بكل حزنك أو بمزنك دمعك المنثور

ثلاث شهور او اكثر رجفتك ما هزّت عظامي

يقولون العرب فيما يقولون السنين تدور

واقول ان دارت سنيني بغيرك تاقف ايامي!!

رد: ديوان شعراء السعودية في العصر الحديث (متجدد)☘️☘️
 

قصيدة لا تسلم لي عليه
الشاعر: زايد الرويس زايد الرويس
#العصر الحديث
#المملكة العربية السعودية
0
125 مشاهدة

طالت اوجاعي ومال الليل واهتزت غصونه

والصبر توي دريت انه تجاوز كل حده

يا رسول الحب قله ما اتدخل في شؤونه

هو حبيبي صح لكن مزحه اعياني وجده

لاتسلم لي عليه ولا تبوس لي عيونه

بس قله لو يجيني بست عينه قبل خده

لو قدرت اصبر عليه احتار كيف اصبر بدونه

لو مردي له أكيد لقلبي العاشق مرده

أدري انه صاين حبي مثل قلب يصونه

ويدري اني ودي بشوفه ولا ادري ويش وده

لو يحس بلوعة العاشق ويفهم وش جنونه

كان ما حبيت داره كثر ما أكره مصده

رد: ديوان شعراء السعودية في العصر الحديث (متجدد)☘️☘️
 

قصيدة اسم الله عليها
الشاعر: زايد الرويس زايد الرويس
#العصر الحديث
#المملكة العربية السعودية
0
124 مشاهدة

أقبلت مثل السحابه تهآآآآدى في خجل

عطرها علّم عليها وهي ما وصّته

يوم زمّت شفّتين العسل قلت: العسل

ما تخصص في شفاها هي اللي خصّته

الشعر مارس جنونه بما لا يحتمل

قلت اجل لو هي من اسبوع ما قد قصّته

طفلةٍ توحي لك ب شي يشبه للأمل

فرحة اللي ف اخر اللعب نجحت رصّته

ما تجنّن!! بس تذبح وتذبح ب الهبل

لا توارت من خجلها وجت ممتصّته

الف مره راودتني ملايين الجمل

ويرتبك قلبي إذا بالسوالف نصّته

وقلت اوصّي قلبي يقول بيت من الغزل

واثرها اسم الله عليها بسرعه وصّته

رد: ديوان شعراء السعودية في العصر الحديث (متجدد)☘️☘️
 

قصيدة تعال ابغاك
الشاعر: زايد الرويس زايد الرويس
#العصر الحديث
#المملكة العربية السعودية
0
123 مشاهدة

حبيبي اذا تسمح دقيقه تعال ابغاك

با اقول لك حاجه تشغل البال من يومين

احبك واموت بحبك ايضاً بعد واهواك

احبك من اول ياحبيبي الى هالحين

واحبك الى بكره وبعده ولا تخفاك

مشاعر غلا مستوطنه ماتبي تخمين

عذلني هذاك وقلت: خلك بعيد هناااااك

وهذيك جتني قلت اسف ما اعرفك مين؟؟

وخليت كل الناس لاجلك وقلت ابغاك

لإنك تساوي عندي عيوني الثنتين

سنه كامله ما لذّ لي غير هرج شفاك

ولا لاق في عيني من الزين غيرك زين

سنه كامله لامن طلبتك تجاوب جاك

سنه كامله ما مرّ في مسمعي: بعدين

سنه كامله مرّيت باحساسي الأفلاك

أسافر ولا ادري وين رايح؟ ولا من وين

سنه كامله يا علّ كل البنات فداك

وانا اشيلك بقلبي واحطك بنون العين

كأني كذا طوّلت في هرجتي وياك

اب اوجز لك الموضوع في بيت من شطرين

تبي الجد والله ما هويتك وانا بانساك

ولا يمكن اصبر عنك حتى ولو يومين

رد: ديوان شعراء السعودية في العصر الحديث (متجدد)☘️☘️
 

قصيدة مليون قلب
الشاعر: زايد الرويس زايد الرويس
#العصر الحديث
#المملكة العربية السعودية
0
123 مشاهدة

ليت لي مليون قلب
لجل احبك
كل يوم ب قلب غير
وشكل غير
وطعم غير!
وكل قلب يحبك اكثر
وكل يوم احبك اكثر
وكل ما مريت في بالي ثواني
تصبح الأيام سكر!
والسهر..
يصبح على ذكراك معزوفة أغاني
يا حبيبي..
وانت.. حلمٍ ما تحقق
وانت.. واقع ما يصدّق
صدق اني..
كثر ما احلم فيك
خاصمني خيالي
ما درى انك حيل غالي
ولا درى اني حيل احبك
كل يوم ب قلب غير
وشكل غير
وطعم غير

رد: ديوان شعراء السعودية في العصر الحديث (متجدد)☘️☘️
 

قصيدة ياشعل سيجارة
الشاعر: زايد الرويس زايد الرويس
#العصر الحديث
#المملكة العربية السعودية
0
123 مشاهدة

باشعل سيجارة من انفاسك وابنفث كلام

يطير... لين يتجاوز سقف هذا المدى

يا مبعدة.. والشوارع ما تمل الزحام

مليت من خطوةٍ تمشي.. وضاعت سدى

تعالي استوطني صدري.. يطير الحمام

من وجنتك... لين يزرع فالغصون الندى

باطفّي الوقت وارجع بك معك ألف عام

نمشي بليا هُدى... ونضيع رُشد وهدى

باعلمك عن سواليف المطر والغمام

والورد والعشق والأصحاب.. قبل العدا

في يدينك يديني تغني عن المستهام

اللي قبل ينتهي عشقه.. عشقك وبدا

يشعل سيجارة من انفاسك.. وينفث كلام

ويطير لين يتجاوز سقف هذا المدى!

رد: ديوان شعراء السعودية في العصر الحديث (متجدد)☘️☘️
 

قصيدة اسولف لغيرها دايم
الشاعر: زايد الرويس زايد الرويس
#العصر الحديث
#المملكة العربية السعودية
0
123 مشاهدة

البارحة والهموم يشب بارودها

في مهجتي بين تنهيدي وتنهيدها

جرتني الذاكرة للشوك! وورودها

مالت لغيري بنظرتها وتسهيدها

يا بخلها هالسنين وقبل! يا جودها

أيام هي سيّدة قلبي وانا سيدها

غابت وانا ما حسبت حساب لصدودها

فجأة تهاوت سنيني وانكسر قيدها

ريانة العود يا وجدي على عودها

أسولف لغيرها دايم وانا ميدها

كانت تعشّمني الأفراح وخلودها

ويا ليت هند انجزتني في مواعيدها

ما للرسايل طريق وتاصل حدودها

ولا لي سوى ذكريات أرهقت ترديدها

عندي.. ولكن عجزت آصل لعنقودها

قريبها ما وصلته كيف ب بعيدها؟؟

أموت لو صافحتني بالغلا سودها

واعيش لو صافحت صدري بتنهيدها!

رد: ديوان شعراء السعودية في العصر الحديث (متجدد)☘️☘️
 

قصيدة حلم با الألوان
الشاعر: زايد الرويس زايد الرويس
#العصر الحديث
#المملكة العربية السعودية
0
119 مشاهدة

مانيب اعاني دامها ما تعاني

هالمترفه من حبها ينسى الاحزان

بنتٍ بريئه تستفز الثواني

في عقرب الساعه وهو فوق جدران

بنتٍ سوالفها تغيظ الأغاني

كلامها لا سولفت كنه الحان

لو تقدر تجيب المجرّه عشاني

كان القمر والشمس في كفي الآن

لا سولفت لي سولفت عن حناني

وعن حبها اللي كله جنان ب جنان

على أريكتها تعيش الأماني

تحلم بها لو تجلس بكل تحنان

وعن المخده فْراشها صار اناني

يغيظها وتغيظه ب شعر واوجان

الله عليها نومها شكل ثاني

الحلم لا نامت تشوفه بالالوان

والى صحت من نومها عاد ماني

قايل لكم خطواتها تشطب ازمان

تضحك وانا مدري ويضحك زماني

تميل يتمايل لها قلب وانسان

تضيق وادري بضيقها ويغشاني

ضيقه ولو ترضى رضا خاطري بان

أصلاً رضاها ينسكب في كياني

وتميل له في داخلي كل الاغصان

والى شعرت انه بلحظه رواني

اصب شعري في فناجيل الاوزان

واكتب على كف الزمن كيف اعاني

وهالمترفه تنسف من القلب الاحزان

رد: ديوان شعراء السعودية في العصر الحديث (متجدد)☘️☘️
 

قصيدة بديت انهار
الشاعر: زايد الرويس زايد الرويس
#العصر الحديث
#المملكة العربية السعودية
0
121 مشاهدة

انا الليلة حزين وخاطري مكسور

مسافاتي حنين وذكرياتي نار

تلفّت حولي العتمة ولا من نور

قناديل المسا مخنوقة الأنوار

أحس اني بديت اشعر بدون شعور

بأني دون ما اشعربي بديت انهار

أخافك تنكشف يا الطابق المستور

أخاف يبين حزني ويفضح الأسرار

حبيبي والسما جردا وعذر البور

غيومٍ لو تمر تشح بالأمطار!

فقدتك واسأل الأبواب قبل السور

تمنيتك تجي تزرع مداي ازهار

ظميتك ما رشفت الا غياب وجور

وش اسوّي بعد غيبتك بالأنهار؟

حبيبي والليالي بالسنين تدور

تدور وكنها ترفض لنا تندار

حبيبي.. شفني الليلة كذا مكسور

ابتدفى ب طيفك بس وين النار؟؟؟

رد: ديوان شعراء السعودية في العصر الحديث (متجدد)☘️☘️
 

قصيدة عذب السجايا وعوده باول الكنه
الشاعر: زايد الرويس زايد الرويس
#العصر الحديث
#المملكة العربية السعودية
0
121 مشاهدة

عذب السجايا وعوده باول الكنّه يجيني

متى تزين السوالف واخذ علومه من الراس

والصيف روّح وجانا البرد واستيقظ حنيني

واشعلت شمع انتظاري في رجاه وقلت لاباس

يا اعذب من الما وجودك في سنيني هو سنيني

وشلون ابرواك وعروق الوصل من عام يبّاس

والوقت يركض بلا ساق وقدم ويطيح فيني

وانا اتعلّق على باب الرجا من خيفة الياس

كيف احتوي ضحكتي والشوق عيّا يحتويني

تفجرّت بي ينابيعه سهر واحلام واحساس

والدمعه اللي خذلها الصبر تستغفل يديني

مثل السجين يتحرى من عذابه نوم حرّاس

طال انتظاري وصبري طال واللهفة فعيني

والناس ما تسمع المجروح لا من قال يا ناس

وانت اكثر الناس في قلبي واعرف انك تبيني

تحتاجك الروح ويسولف غلاك ان هب نسناس

بعض العرب لو يجيني قلت ليته ما يجيني

ألا انت ودي تجيني واخذ علومك من الراس

رد: ديوان شعراء السعودية في العصر الحديث (متجدد)☘️☘️
 

قصيدة مانيب أنا
الشاعر: زايد الرويس زايد الرويس
#العصر الحديث
#المملكة العربية السعودية
0
120 مشاهدة

كل الأماكن وطن.. وعيونك المنفى

وانا غريبٍ لقى ف عيونك دياره

يا ساكن القلب خذني للوجع.. تكفى!

مادام ذنبي كبير... اكبر من اعذاره

قدامك الحال ما يظهر وما يخفى

مانيب انا.. واختصرها ف اقصر عباره

شوف الحزن داخلي.. والهم كيف اضفى

على حياتي شحوبٍ تهطل امطاره

البرد موحش.. دخيلك بس.. كيف ادفى

واعصاب جرحي من التأنيب منهاره

خايف تقول إن زايد ما وفى.. واقفى

وانت تعرفني وتعرف شوقي وناره

أدري مقصّر لأنك دايم الأوفى

لأنك انسان فعلاً صعب تكراره

تزعل! وتتعب.. تعاتب.. بس! ما تجفى

تغيب عني ودربي تظلم انواره

سألت عنك؟؟ ولقيت الحزن ما يغفى

كنه على سكتي وسكتك مشواره

ياللي عيونك وطن والكون ذا منفى

شاعرك ماعادت اشعاره هي اشعاره

الناس تقدر تزورك وانت فالمشفى

وحبيبك يموت باحزانه وبافكاره

رد: ديوان شعراء السعودية في العصر الحديث (متجدد)☘️☘️
 

قصيدة يا الغايبين ارجعوا
الشاعر: زايد الرويس زايد الرويس
#العصر الحديث
#المملكة العربية السعودية
0
118 مشاهدة

ليل السهر ذكريات وهم واحزان وصدى شعور

عاشق طواه الغياب وضاقت بروحه فضا الدار

أحباب غابوا وطال غيابهم ما عانق حضور

واحباب ملوا على باب انتظار يجيب الاخبار

يا الغايبين ارجعوا.. مل الظلام ينادي النور

ذبلت قصص عشق وحكايات حلم ويبست اعمار

يا الغايبين ارجعوا.. دمع الوله من قلب مكسور

وصار الجفاف يتمادى بعدكم وتشح الامطار

يا الغايبين ارجعوا.. تنبت دروب احلامنا زهور

وتعود الايام بالفرحة وننسى كل ما صار

يا الغايبين ارجعوا.. يكفي جروح وضيقة صدور

يا الغايبين ارجعوا.. يكفي خلاص اعصاب تنهار

ما عاده العمر يستحمل غياب وصرخة شعور

عاشق جمع ذكرياته واحرق ايامه بلا نار!!