رد: ديوان شعراء السعودية في العصر الحديث (متجدد)☘️☘️
 

قصيدة أسأل جروحي
الشاعر: زايد الرويس زايد الرويس
#العصر الحديث
#المملكة العربية السعودية
0
117 مشاهدة

يا غايبة.. وانتي هنا في صدري

إشتقت لك ملّت تغيظ لساني

صبيّت في كاس الملامة عذري

قبل القصيد وقبل عزف الحاني

ماهو شعوري.. لا.. ولاهو شعري

هذا الذي ينساب في وجداني

يمكن يكون اللي بقى من عمري

سايل من عروقي بلون اكفاني

والا التعب مستيقظٍ بي بدري

مع صحوته من غفوته صحّاني

ياسي غلبني وانهزم بي صبري

ضايع ولا ادري كيف انا ب القاني

وانتي بعيدة والحزن مستشري

واتنفس غيابك بطعم احزاني

ماهو ب أمرك لا ولا هو ب امري

هذا الغياب اللي كسر جنحاني

اسأل عليك الليل واسأل فجري

واسأل جروحي.. غرفتي.. جدراني

ومن كثر شوقي واحتراقة جمري

تخيّلي.. حتى سألت اخواني!!

اسأل.. مع انك ساكنة في صدري!

لكن ش اسوي.. ما مسكت لساني!

رد: ديوان شعراء السعودية في العصر الحديث (متجدد)☘️☘️
 

قصيدة للصمت لذة
الشاعر: زايد الرويس زايد الرويس
#العصر الحديث
#المملكة العربية السعودية
0
117 مشاهدة

باب السهر يا ضيقة الصدر مفتوح

تمخطري.. ما حولك الا عيوني

للصمت لذة.. لا غدا للوله بوح

رغم ان صمتي ما يخفف طعوني

بي حزن شاعر وابتسامات مجروح

ولي دمعتينٍ لا سهيت ذرفوني

ما كن لي قلبٍ ولا كن بي روح

ما هوب ذا شكلي ولا هوب لوني

متوحدٍ في غربةٍ ترفض تروح

مستوطنتني كني احيا بدوني!

يا غايبة صوت التناهيد مبحوح

والا الصدى ما مل يجرح سكوني

لا صار باب الصدر للحزن مفتوح

مانيب لايم دمعتي..... يا عيوني!

رد: ديوان شعراء السعودية في العصر الحديث (متجدد)☘️☘️
 

قصيدة ما تبيني
الشاعر: زايد الرويس زايد الرويس
#العصر الحديث
#المملكة العربية السعودية
0
118 مشاهدة

الصباح المفعم بتنهيدتيني

برده يسولف وانا واقف مكاني

قبل ما يطري علي اقول ويني؟

شفت نفسي غارق بكومة أغاني

موعدٍ مهجور يجرح في سنيني

والجفا بردٍ تسلل للمحاني

يشتكي قلبي وتشكي منه عيني

وانتظر غلطة فرح تقلب كياني

صرت اغني مع عبادي ما تبيني

أو تبيني! بس غيّبها زماني

طفلة احلامي يضج بها حنيني

لو تجيني سولفت لي عن حناني

والصباح الغارق بتنهيدتيني

ينقلب برده دفا وشعور ثاني!

رد: ديوان شعراء السعودية في العصر الحديث (متجدد)☘️☘️
 

قصيدة ياللي تدور خير
الشاعر: زايد الرويس زايد الرويس
#العصر الحديث
#المملكة العربية السعودية
0
117 مشاهدة

صوت الرجا بارد ولاهوب مسموع

والياس خيّم فالخلايق وسنتر

واللي يبيها طوع ما جات له طوع

واللي تقدّم خطوته للورا در

صار الردى مابين الاقراب مزروع

الابن عم انذر ولا عمره اعذر

الاصل ضاع وباقي عقبه فروع

متفرده بالنفع وتدوّر الضر

دام الحيا منزوع فالخير منزوع

ياللي تدوّر خير جنّب عن الشرّ

كانك تبي مشروع! فالصمت مشروع

للصمت ناس وللسواليف مصدر

ورفيقك اللي ترتجي منه قرطوع

لو في يده ما اسقاك ويقول ما اقدر

أسهل عليك فهالزمن حبة الكوع

من وقفةٍ من قلب صاحبك تظهر

الفاعل المرفوع ماعاد مرفوع

من يوم صار الفعل مبني على الجر

رد: ديوان شعراء السعودية في العصر الحديث (متجدد)☘️☘️
 

قصيدة فستان عيدك
الشاعر: زايد الرويس زايد الرويس
#العصر الحديث
#المملكة العربية السعودية
0
116 مشاهدة

ثلاث ايام....والشعر يتهرّب......ما يبي... طاري

ولا ادري ليه.... يا عيدي....تخون الشاعر... الأفكار؟

مع ان الشعر..... هو بردي... ووردي.... شوكي.... وناري

مع انه.....لا....... بلاش اقولها....... وتبيّن الأسرار

ثلاث ايام..... وجروحي...... تسولف لي..... عن اخباري

تقول اني!!!.... تقول اني!!!..... تقول اني.... انا منهار!!!!!!!!!!!!

وانا وشلون ابنهار....... وغرامك.......يشعل افكاري

واشوفك....... تلمسين الغيم...... بكفوفك...... يصب امطار

واشوفك...... في نهار العيد...... طفله...... تنبش اسراري

تصبين الغلا..... في داخل عروقي......... عبير ازهار

رسايلك..... وتهانيك....... وغناويك....... أشعلت داري

وغابت وحشتي..... بطيوفك..... اللي.... جتني ب مشوار

تعايدني.... وتسرقني.... وتحمل عني..... اوزاري

واجيك بلهفتي..... طاير.... ولا اسأل.... بعدها... وش صار

أطالع.... قصتك..... فستان عيدك..... كتفه العاري!!!

واعشم نفسي.... ب حبة عنب.... واستغفل الزوار!!

وعلى خدك..... أبكتب بيت..... يسوى........ كل... أشعاري

بعدها.... ماعلي.... ان مات شاعر.... في رجاْ الافكار

رد: ديوان شعراء السعودية في العصر الحديث (متجدد)☘️☘️
 

قصيدة يا غيابك
الشاعر: زايد الرويس زايد الرويس
#العصر الحديث
#المملكة العربية السعودية
0
116 مشاهدة

يا غيابك..
سكة المجهول
خطوات ابتعادك
والوداع..
والكثير من الضياع
واسئلة..
من قبل تسألها
يحاصرك الجواب!:
انفتح باب الغياب.. ومن يردّه؟
انفتح باب الغياب.. ومن يردّك؟
رحت عني!
ويا كثر أشياء راحت معك..
عني..
ابتساماتي!
جنوني!!
انفعالي!
انشغالي!
دندنة قلبي على إيقاع صوتك
لهفتي لك كل ما طوّل سكوتك
رحت أنا عني!
ولا ادري وين رحت!
بسألك عني..
ولا ادري وين رحت؟؟؟؟؟
يا البعيد..
الأقرب الأقرب من اقرب شي فيني
يا القريب..
الأبعد الأبعد من حكاية حنيني
كنت ف يديني..
وضعت!
غبت عن عيني..
وضعت!
وبعدها ضاعت سنيني!
آآآآآآه يا ذكراك كل ما داعبتني..
أرعبتني!!

رد: ديوان شعراء السعودية في العصر الحديث (متجدد)☘️☘️
 

قصيدة يا فؤادي لا تسلني
الشاعر: زايد الرويس زايد الرويس
#العصر الحديث
#المملكة العربية السعودية
0
116 مشاهدة

يا فؤادي لا تسلني عن هوى السنيوره

قمة الحسن المثير البالغ ف تأثيره

يوم غبت وغابت الحلوة ماهي فزورة!

كلنا كنا نعاني بين جرح وغِيرة

سامح الله بعدها عني وهي معذورة!

وسامح الله قلبي اللي بالغ ب تقصيره

هي تعرف أن الغلا يصعد كما النافورة

وأنها عندي تساوي من سكن فالديرة

هي صحيح تغيب لكن ههنا محفورة

والغياب إن قالها ربي يفض السيرة

دامها في وسط قلبي شيدت مقصورة

وش عليها لو تجي نورة بجنب منيرة

وش عليها دام عمري بهجته وسروره

لا تهادى صوتها اللي مثل فعل......

ينقلب حالي وعقلي يستخف شعوره

وادري أني ضعت يا ربي عليك الخيرة!

رد: ديوان شعراء السعودية في العصر الحديث (متجدد)☘️☘️
 

قصيدة تصبح على خير
الشاعر: زايد الرويس زايد الرويس
#العصر الحديث
#المملكة العربية السعودية
0
116 مشاهدة

من وين ما هبت الليله على روحي باناديك

توقظ رضاك بمسافات المعاتب والمشاريه

من حقك تقول كل اللي تبيه وغصب اراضيك

هو فيه غيرك يزعلني على نفسي واراضيه!!

والله مالك علي الا الغرام ان مر طاريك

ويا كثر ما هو يمر ويا كثر ما جيت ساريه

والله ما قد حسدت انسان غير اللي حواليك

خل الخواتم وعقدٍ فوق صدرك غارقٍ تيه

وشلون اقول لك عن قلبٍ حيى بك ميتٍ فيك

يلعب به الوقت وانت ترجعه لاجمل موانيه

على هدبك وغضبك وضحكةٍ غنتْ فاشافيك

على عنبك وعتبك اللي كذا ربي محليّه

تصبح على خير وايّة خير جاني يوم اخليك

للبرد والوحده العميا وجرحٍ ما تدانيه

باسهر مع الدمع وانت ارقد ولا يشغلك غاليك

بيحط راسه على وسادة زعلك ولا يكفيّه!

رد: ديوان شعراء السعودية في العصر الحديث (متجدد)☘️☘️
 

قصيدة معجبك هالحال
الشاعر: زايد الرويس زايد الرويس
#العصر الحديث
#المملكة العربية السعودية
0
116 مشاهدة

معجبك هالحال؟؟ أنا ماهوب معجبني!

تغيب وآغيب وانسى انك بتنساني

واشوف الأحزان تاخذني وتكتبني

على الورق.. وانت في غيبتك تقراني

واحس حاجة كذا منّك تقرّبني

أضيع بك لين اشوف انك بتلقاني

يابو جروحي ترى هالصمت يشربني

بديت احس الحروف تموت ف لساني!!

الحزن فعلٍ على طول السهر مبني

ماضيه مُتعِب وب امره جفت اغصاني

زعلان؟ طيّب تعال اجلس وعاتبني

قلي وانا اقول: ماغيرك بوجداني

على العموم انت مهما كنت معجبني

مانيب ناسيك!... وإنس انك بتنساني!!

رد: ديوان شعراء السعودية في العصر الحديث (متجدد)☘️☘️
 

قصيدة من غير مطرود
الشاعر: زايد الرويس زايد الرويس
#العصر الحديث
#المملكة العربية السعودية
0
115 مشاهدة

بعد الثلاثين.. وظهور التجاعيد

والشيب يرسم خارطة قلب موصود

جيتي وكلك سحر وف نظرتك كيد

تبين تحيين اكثري.. واكثري عود

يا بنت طعم الفرحة ف ليلة العيد

والى انقضت ما عاد للفرح منشود

وانا لقيت العيد قبلك تراديد

أقطف ثمر لا مال للعين عنقود

واليوم.. قلبي ما يبي منك تأكيد

تفضلي يا بنت.. من غير مطرود!!

رد: ديوان شعراء السعودية في العصر الحديث (متجدد)☘️☘️
 

شهرك مبارك بس... وشلون اباصلك؟

وشلون ابى اصل وانتي اصلاً بعيدة

حتى الرسايل عاجزة لا تراسلك

حتى القصيدة ما طلعت ب قصيدة!

كان الأمل في عيني ارهف من السلك

واليوم دمّه نازفٍ من وريده

معقول يعني ما تطاوعك اناملك!

تدق رقم اللي فقد له فقيدة

يا اغلى البشر مانيب اعاتبك واسألك

لكن حزني أي كلمة تزيده

إشتقت لك.. واستغفر اللي له الملك

إشتقت لك.. ماهيب حاجة جديدة

بغيت ابارك لك ولا جا لي آصلك

وانتي قريبة بس.. فعلاً بعيدة

رد: ديوان شعراء السعودية في العصر الحديث (متجدد)☘️☘️
 

قصيدة دمعة حزين
الشاعر: زايد الرويس زايد الرويس
#العصر الحديث
#المملكة العربية السعودية
0
115 مشاهدة

باقي على القلب تنهيدة ودمعة حزين

ويهج بين الضلوع يدوّر اخبارها

ست الترف والشرف فيها الصباح المُبين

لا طارت طيور قلبي واخلت اوكارها

يوم تعبتْ قلت للضيقة: ورى ما تجين؟

عندي مكانك.. وحلّي عن سما دارها

ما ودي يطيح دمع ولا يسولف أنين

عنها وينبش خفاياها على اسرارها

حبيبتي لو تسيل من المدامع سنين

أهديت لك من سنيني باقة ازهارها

لكنه الوقت لو يقسى مصيره يلين

تركض لياليه ما تدري عن اوزارها

يفداك قلبٍ تبقى فيه دمعة حزين

والا التناهيد... يمكن جت لك اخبارها

رد: ديوان شعراء السعودية في العصر الحديث (متجدد)☘️☘️
 

قصيدة فتنة الريم
الشاعر: زايد الرويس زايد الرويس
#العصر الحديث
#المملكة العربية السعودية
0
115 مشاهدة

مال غصن الحكي بما لذ منها وطاب

فتنةٍ... تستفز الغيم قبل القلوب!

لا امتطت مهرة الأشواق فوق السحاب

تعسف الجامح اللي لا عشق ما يتوب!

تربك العقل لا من سولفت بارتياب

عن مشاعر غلا مستوطنة فالدروب

مشطت شعرها واستوغلت بي وغاب

كل حزنٍ مثل شمسٍ بوقت الغروب

ضحكها لا تهادت دعوةٍ تستجاب

فتنة الريم فيها ما تعرف العيوب!!

ما تشابه سواها بس مثل الضباب

يعمي العين عن غيره وصدقه كذوب!

قلت: يا مُجرمة واجرامك اشهى عقاب

يدخل الروح لو ماله ف روحي ذنوب

ساخنة قهوة احساسك وسكرّك ذاب!!

قبل مدري من اللي ذاب واللي يذوب!!!

غمّضت نصف عين وقلت ما لذ طاب!!

فرصتي! أستغل الغيم وسط القلوب

رد: ديوان شعراء السعودية في العصر الحديث (متجدد)☘️☘️
 

قصيدة بلاوي متلتلة
الشاعر: زايد الرويس زايد الرويس
#العصر الحديث
#المملكة العربية السعودية
0
111 مشاهدة

الليالي.. قناديل الظلام

تطفي الشوق.. لو ما نشعله!

قلت ابسهرك.. واثر الليل نام

في غيابك وتوّه ف اوله

أنت وين انت؟.. غايب كمّ عام!!

درب غيبتك اعرفه واجهله

قلت ادوّرك في صمت الكلام

واثر صمته بلاويْ متلتله

قمت!.... كنّي لمحتك ف الغمام!!

من جفافه كأنك تغسله

ويوم سال المطر قلت: ش علام

وجهك اطهر مطر ما سيّله؟

مال غصن وسمعت من الحمام:

فيه قلبٍ خلي من الوله!

وفيه قلبٍ جريحٍ مستهام

للإجابات دوّر أسئلة

ما حلى لي حلالي.. والحرام

دمعةٍ في قلوبٍ مُهملة

ما سقاها الغياب الا غرام

وما حصد من وراها سنبلة!

أسمع بحزن جايب لي سلام

واتنفسك.. واسمع مُذهِلة

وانت.. يا أنت.. غاطس فالظلام

تطفي الشوق فيّ... وتشعله

والصراحة وهي مسك الختام

مشكلة.. لو فقدتك! مشكلة!!

رد: ديوان شعراء السعودية في العصر الحديث (متجدد)☘️☘️
 

قصيدة كم
الشاعر: زايد الرويس زايد الرويس
#العصر الحديث
#المملكة العربية السعودية
0
111 مشاهدة

آه من كثر الوله والشوق وسط عروقي

وآه من كثر الجروح اللي هنا مخفيّه

ماني بطيب وقلبي ما تحمّل شوقي

راح قلبي مع حبيبٍ راح للشرقية

يوم سافر قلت خذني معْك يا معشوقي

ويش اسوّي والرياض بناسها ممليّة

أنت كل الناس يا شفي وغاية ذوقي

يا عساني فدوةٍ للشفة التحتيّة

من عرفتك والنخل ما ميّلته عذوقي

من لمحتك صارت الدنيا كذا وردية

مشكلة قلبي معك.. دايم تضيع حقوقي

ومشكلتك تغيّر الموضوع وبعفويّة

ما وصلتك وانت عندي يا سبايب عوقي

كيف اجل دام المسافة حول الاربع ميّة

أنت في وسط الخبر؟ لا والله ف معلوقي

يا البعيد اللي طيوفك ما تغيب شويّه

كل ما تطري علي ابدا واجر طروقي

لين ملّت من قصيديْ الساحة الشعبية

من بعد ما رحت والدم ارتبك ف عروقي

والرياض مظلّمة والنور ف الشرقية

رد: ديوان شعراء السعودية في العصر الحديث (متجدد)☘️☘️
 

قصيدة شيطنة اطفال
الشاعر: زايد الرويس زايد الرويس
#العصر الحديث
#المملكة العربية السعودية
0
109 مشاهدة

تعب هالرغبة اللي تحتويني والجروح ثقال

خذت مني سنين وذكرياتٍ مالها تأويل

سوى ان العشق: ترنيمة هدب في لحظتين وصال

سوى ان الحزن: مزنٍ كل ما طال البعاد يسيل

أنا ما قلت احبك غير احبك.. يا ضياع الحال

إذا عدت سنين وشفت وشلون الطريق بخيل

تعالي ناخذ الدنيا ب طيش وشيطنة أطفال

نمرجح كل امانينا.. نميّل حزننا ونميل

نغني لابتسامتنا ونقطف زهرها لامال

ندلل كل رغبة تستحق بوقتها التدليل

وانا لو قلت ابتوسد غلاك بلهجة الترحال

قريت الصمت ف شفاهك وقلت: الخيل ياهل الخيل

عساني في مرابعك اتمادى.. واختصر.. واغتال

مسافات الحنين ورغبةٍ ما تحتمل تأجيل

أنا ماجيت لك شاعر ولكن جيت لك رجال

أخذ منه العطش حقه.. وشافك في عيونه نيل!

رد: ديوان شعراء السعودية في العصر الحديث (متجدد)☘️☘️
 

قصيدة يبغى لها قعده
الشاعر: زايد الرويس زايد الرويس
#العصر الحديث
#المملكة العربية السعودية
0
109 مشاهدة

حبيبي يوم هبّ البرد وش علمك فركت يديك

تبي تدفى يدينك كان اتم الموعِد بوعده

بليلٍ من سهر وحكايتين وعاشقٍ يهديك

سحابٍ ما على برقه ملام ليا بكى رعده

لو اني ما كتبت من القصيد الا قصيدي فيك

يكفّي لجل اكون اللي ولا قبله ولا بعده

ترى شاعرك لا جفت بحور ومرّ به طاريك

يصير النابغه بقياس ذبيان وبني جعده

ابكتب بك غزل واكتب غزل واكتب غزل وارضيك

واقرّب مفرداتٍ من خيال الشعر مبتعده

احبك لعنبو قل المواصل وين بيوديك

كأنك في دمشق وكني اسكن من ورا صعده

انا داخل على الله لا تخليني عليك اشكيك

ترى عظامي من البرد وقليل الوصل مرتعده

رد: ديوان شعراء السعودية في العصر الحديث (متجدد)☘️☘️
 

قصيدة أفضل طريقة للحياة
الشاعر: زايد الرويس زايد الرويس
#العصر الحديث
#المملكة العربية السعودية
0
109 مشاهدة

لا صار ودك ف الزمان تعيش! وبراحة ضمير

سكّر عليك ابواب صمتك والتحف ثوب الغياب

مالك ومال الناس.. غب عنهم وتحيا ب خير

الناس لا شافوك مقفي كل واحد حدّ ناب

ما عاد تعرف صاحبك لو صاحبك باشياء كثير

يضحك بوجهك وان تقفاك الله الله بالحراب

يكبر صغير القوم ما يعرف وش حقوق الكبير

وش عاد ترجي منه اجل لا طالت سنينه وشاب

وقتٍ يروّع والسوالف مالها سرٍ وبير

مافيه داعي للعجب لا شفت نظرات ارتياب

شيٍ على لسانك يقوّل وانت يا غافل ضرير

كلمة تنزلك الثرى.. كلمة تعديك السحاب

من يمدحونك لا تصدقهم وخذها من خبير

كلامهم لو ظاهره رحمه مبطّن بالعذاب

أفضل طريقة للحياة اليوم.. وبراحة ضمير

سكّر عليك ابواب بيتك والتحف ثوب الغياب

رد: ديوان شعراء السعودية في العصر الحديث (متجدد)☘️☘️
 

قصيدة عشق ونعاس ومصايب
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

يا مساء البارح المجنون كان الصمت ذايب

نبرتك كانت بكل وضوح مبحوحه حزينه

والحزن ما يعرفه غير الحبايب والحبايب!

رغم كونه منتشر في كل حارات المدينه

لاتخبيّن الحزن صبيّه في صدري لهايب

أحرقيني بالدموع الساكنه والمستكينه!

أدري انك كل ما تبكين تتضايق سحايب

ويتهادى الحزن في صوتك مواويلٍ سجينه

عاشقك وان غاب صوته عنك ما قد كان غايب

يلمحك من وين ما رحتي وما راحت سنينه!

عاشقك لو ما قراك بحب تكتبه الهبايب

ويتبعثر كل مابه من وفاه ومن حنينه

يا بياضٍ! تلبسينه عشق ونعاس ومصايب!

يلبسك هذا البياض العشق لو ما تلبسينه!

والحبايب كان ما عاشوا بدنياهم حبايب

يختفي التاريخ والأيام وتموت المدينه

رد: ديوان شعراء السعودية في العصر الحديث (متجدد)☘️☘️
 

قصيدة لا تعودها
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

تمون يا الدمع لكن لا تعوّدها

ما ودّي انك تجدّد لعبة احزاني

أشين من الدمعه بعيني ترددها

لاهيب طاحت ولا الاحزان تنساني

فقدت غالين... دمعه ليش ما افقدها؟

ما منهم اللي بكيفه يوم خلاني

لو انه بكيف قلبي كان اعاندها

واردّها بس مشكلتي تحداني

وان كان طاحت.. مصيبه.. كيف ابجحدها

وخواتها كل وحده ما تحراني

أفواج وافواج لين اروح في يدها

وتمرّني ذكرياتٍ غصنها داني

تشب فيني جروحٍ غاب موقدها

وتخلّي الحزن يبحر لين يلقاني

ارجع واراجع مواقف صعب اعددها

معهم ومنهم لهم واسأل عن اوطاني

والقاني المنتحي عنها وما ابعدها

اوطاني اللي نست واحد من اخواني

يا دمع تكفى طلبتك لا تعوّدها

يكفيني الحزن... دوّر واحدٍ ثاني

رد: ديوان شعراء السعودية في العصر الحديث (متجدد)☘️☘️
 

قصيدة مترفة
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

مترفة!!
ما عليها الا!! يجيها!
ما تبيه.. وتشتهيه..
تدخل الغرفة وهي ترفل بما طال! وقصر!
من قوام.. ومن حرير
وتتجه لاقرب أريكه..
وقبل تجلس!
ومن قبل يرتد إليها طرفها!
فنجان قهوتها يجيها..
بكل ما به من سخونة!
يشتهيها! وتشتهيه!
وما عليه الا يجيها!!
ومو مهم من يشرب الثاني!
ولكن الأهم إنه تشبّث في يديها
قدر ما كانت تبيه وهو يبيها..
وقبل ما يُشبع فضوله..
من شفايفها!
تغيّر رأيها..
وتتجه لأقرب أريكة..
تسكن ب قرب السرير..
وتستريح!
وتستريح!!!
مُترفة..
تعشوشب الأحلام ف يديها..
وهي تحتار..
وش تختار تلبس؟
ووش يناسب جوّها الليلة من الأحلام؟
وتغمّض!!
.. عشان توّقف الحيرة!
وعشان توّقف الغيرة!
وتبدا تمرر يديها..
والقميص اللي يتشبّث في يديها
يمسي الليلة عليها!!
بكل ما به من جنون
ومن إثارة!
وأيهم أكثر إثارة!
الإجابة تختلف طبعاً!
حسب نوع الإنارة!!!
مُترفة..
تصحى على آخر حلم داعبها
وما أرضى ترفها!
وقبل تفتح عينها
تشبك يديها..
كنّها تدوّر عليها!!
وتبدأ تخمّن..
وش لبست البارحة؟
أو.. وش ما لبست؟
وينتهي التخمين عادة..
ب نصف عين!
والقميص!!
يعرف أي غلطة اقترفها!
وليه ما أرضى ترفها؟؟
مُترفة......
هو فيه أحد يرضي ترفها!!

رد: ديوان شعراء السعودية في العصر الحديث (متجدد)☘️☘️
 

قصيدة شفة غياب
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

الشعر درب وبرد حرب ورحابه

ضيق ووجع واحباب واقراب واسراب

لو ما اكتبه يكفي أحس بعذابه

يكفي أشوف الصدق ف عيون مرتاب

له لذةٍ لا فارقته الرتابه

له طعنةٍ مثل الجفا بين الاحباب

يمطر سما تخضّر منه السحابه

ينزل مثل دمع العزا بين الاقراب

أعنّ له واحنّ له لا انتشى به

عطر اليدين وكحل من بين الاهداب

ياشعر وحكايتك فيها غرابه

تعيش الاسما فيك وتموت الالقاب

وانا باعيشك حلم واقراك غابه

واغازلك في شوق بشويش ينساب

واقول للي غاب قبل الإجابه

الحب ما يولد على شفة غياب

تعال واجمع ذكرياتٍ تشابه

والا انثر ايامي سهر ليل وعتاب

قل للوفا قل الوفا ما يجابه

الشوق غابه والجفا فاس حطاب

مل انتظاري واحتضاري بقى به

طلتك عند الباب والا ورى الباب

خذ ما بقى بي لجل اقول انتهى به

والا اترك المنصاب ويموت منصاب

الجرح له ذكرى تعيش بصلابه

وان ذاب شمع الوجد فالحب ما ذاب

الدمع لعيون الخفوق انتسابه

لاطاح مرقاب الغلا فوق الارقاب

ولمّت من قبل الغياب العصابه

وجتني على غرّه ودوّرت الاسباب

لقيت في بعض الجروح الكآبه

الى التقينا حالنا حال الاغراب

والا الشعر مافيه غير الرحابه

لو الوجع يمشي على قلبي اسراب

رد: ديوان شعراء السعودية في العصر الحديث (متجدد)☘️☘️
 

قصيدة حكاية ظل
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

تطاردني..... ولا تدري عن دروبي

ترافقني....... ولو طولت مشواري

أحس انك انا!....منزوع من ثوبي

لو انك ما تحس.... بضيقة اسفاري

سمارك.... كنه يوريني عيوبي

إلى منه تسلل.... داخل افكاري

تطول اوقات... كنك حسرة ذنوبي

وتقصر.... مثل فرحة جالها طاري

وانا امشي.. فيك اشوف حكاية شحوبي

والى مني وقفت.... المح بك اسراري

لو تشاركني.... ف زادي ومشروبي

حلفت انك صديق... ويسكن ف داري

أخافك..... لا خطر فالبال محبوبي!

تشاركني غلاه.... وتحمل أوزاري!

من سنين الطفولة.... دوبك ودوبي

محبة كُره تجمعنا.... وانا داري

لو انك.. تقدر تخلي لي دروبي

بتتركني.... لضيقاتي ومشواري!

رد: ديوان شعراء السعودية في العصر الحديث (متجدد)☘️☘️
 

قصيدة ياخساره
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

وين غبتي
والمسافات الطويله
تبتدي بك
والظلام
لعنة الليل الطويل وكلمتين
ليه رحتي؟؟؟
ما لمحتي
كيف طاحت دمعتين
ونبتت بعدك هموم
وابتديت ارسم جراحي
واتعلّم
كيف تصبح وحدتي
منّي وفيني
وكيف اصير
العاشق اللي ما يبيني
لا رحلتي
وابتعدتي عن عيوني
واصبحت دنياك دوني
واصبحت دنياي دوني
واختفيت
عن عيون الناس
في لهفة حضورك
وارتشافك من شفايفك ل عطورك
والزمن يكذب علينا
والليالي
مالها مرسى ومينا
كل ما راحت نروح
وكل ما جتنا:
جروح
وابتدينا
نحترق أكثر وأكثر
يا خساره
يا خساره
يا خ س ا ر ه
ليه غبتي

رد: ديوان شعراء السعودية في العصر الحديث (متجدد)☘️☘️
 

قصيدة لا صار خلك عسل
الشاعر: زايد الرويس زايد الرويس
#العصر الحديث
#المملكة العربية السعودية
0
108 مشاهدة

خيرك على القلب سابق وانت سابقني

على المحبه وروحي منك منتلّه

شرّعت لك باب قلبي لجل تسرقني

لا والله الا عشان القلب تحتلّه

جيتك بقلبي رضا بالحب طوّقني

اطوه على كيف كيفك وارجع وفلّه

مابيك تزعل علي والا تفارقني

إن كان زليت عادي طوّف الزله

كلك على بعضك برقتّك مغرقني

وان ضاع قلبي! يدلك زين وتدلّه

والله كنك على نفسي تفرّقني

لا غاب صوتك وانا اتحراه في حلّه

لا غاب عني أحس بشي يحرقني

شيٍ يخلي دموع العين منهلّه

مافيه حاجه بهالعالم تضايقني

مثل انتظار اتصالك دقه وجلّه

يا مالك القلب من قال لك تعتقني

خلك بقربي مابيك تفارقه لله

لو هو بكيفي تمنيتك تعلّقني

في وسط غرفتك لاجل احساسي تبلّه

لكني اخشى كثير الحب يرهقني

لا صار خلك عسل لا تلحسه كله!

رد: ديوان شعراء السعودية في العصر الحديث (متجدد)☘️☘️
 

قصيدة صوت المسا
الشاعر: زايد الرويس زايد الرويس
#العصر الحديث
#المملكة العربية السعودية
0
107 مشاهدة

صوت المسا ترنيمتين وأغاني

ليلٍ تسابق خطوتينه ظنوني

نفضت عن حزنه عظيم امتناني

للدمعتين اللي تبعثر سكوني

أخذتني مني وانا في مكاني

وضيّعتني وانا مغمّض عيوني

حاولت ادورني ف زحمة زماني

عجزت لا القاني ف قمة جنوني

أحاول احيا لحظتي بشكل ثاني

والقى طعوني مثل ماهي.. طعوني!

والقى المسا ترنيمتين وأغاني

ودمعٍ تسابق خطوتينه ظنوني

رد: ديوان شعراء السعودية في العصر الحديث (متجدد)☘️☘️
 

قصيدة الله لا يهينك
الشاعر: زايد الرويس زايد الرويس
#العصر الحديث
#المملكة العربية السعودية
0
107 مشاهدة

يا زمن خلّها بيني وبينك

دمعةٍ كل ما امسحها تعود

دام قلبي معلّق في يدينك

وش بلى الصمت فشفاتك يسود

كلمةٍ منك ما تجرح سنينك

لا تعاهد وتخلف فالعهود

دامك السجن واحساسي سجينك

شوف كيف اتعبتني هالقيود

كل حلمٍ دفنته بك يدينك

من صحاري جفافك للورود

ما طلبتك تخليني بعينك

دون نقصك مابي منّك تزود

يا زمن والقساوه غير لينك

وش بلى البيض صارن فيك سود

ماانت محتاج لاحزانٍ تعينك

قسوتك ذي ما تبغى شهود

خلني بس والله لا يهينك

اتوّحد بكيفي فالوجود

ومن سألني وقال: شفيك وينك؟

قلت: محسود بعيون الحسود

وحدتي دين وانت تسد دينك

ورغم هذا ترى ما انت محدود

تصخي بشينك وما اشوف زينك

كن ما بيننا ذبحة جدود

خلّها يا زمن بيني وبينك

دمعةٍ كل ما طاحت تعود!

رد: ديوان شعراء السعودية في العصر الحديث (متجدد)☘️☘️
 

قصيدة هذا ما تسمى طريقة
الشاعر: زايد الرويس زايد الرويس
#العصر الحديث
#المملكة العربية السعودية
0
107 مشاهدة

جالس من اليوم اتحرى اتصالك

واراقب الساعة دقيقة دقيقة

مشغول بالي: ب ايش مشغول بالك

عن قلبي اللي تشتعل به حريقة

عقب الغياب ابسألك: كيف حالك؟

اسبوع كامل مر ما كنت اطيقه

من يوم رحتي لين جيتي ب فالك

وانا ادفن احلامي بوجه الحقيقة

عبرت حزني والسهر من خلالك

مع كل مشرق شمس يبدا بضيقة

شوفي حبيبك واسعديه بوصالك

ترى الصبر ما كل عاشق يطيقه

وشلون اببدا رجعتك في جدالك

وانا جروحي في غيابك طليقة

وبراحتك.. ما عندي الا حلالك

لو ان هذي ما تسمى طريقة

جالس من اليوم اتحرى اتصالك

واقول يمكن تتصل هالدقيقة!!

رد: ديوان شعراء السعودية في العصر الحديث (متجدد)☘️☘️
 

قصيدة شاطي الدمام
الشاعر: زايد الرويس زايد الرويس
#العصر الحديث
#المملكة العربية السعودية
0
107 مشاهدة

شاطي الدمام والأمواج والسحر الخرافي

والقمر لا من رسم فالبحر لوحة شاعرية

بينهم قلت اغسل احلامي بتنهيدة قوافي

قبل اعرف ان الشعر تنهيدة الروح الخفيّة

القلم أصبع! ورمل البحر دفتر لاعترافي

وبين مد وجزر تغرق روح وتضيع ابجدية

يا بحر.. ما جيت ادور بك سوالف عن جفافي

جيت افتش عن جروحٍ مالها روحة وجيّة

ناضج الجرح يتمادى كنه يدوّر قطافي

وانت يا غايب قطفت الروح بغصونٍ ندية

يا حبيبي وانت ملح البحر واحضانك مرافي

ودي اغرق بك ولا ودي أحد يمسك يديّه!!

رد: ديوان شعراء السعودية في العصر الحديث (متجدد)☘️☘️
 

قصيدة رصاصة الرحمه
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

رصاصة الرحمه اطلقها وخلك شجاع

إضغط زناد الجفا والهجر لو تستطيع

إرحل وسافر عن عيوني بليا وداع

واترك جروحي تغنّي للزهر والربيع

مليت من صمت حزني والطعون الوساع

مليت من حزن صمتي والسكون المريع

ماني موادعك لكني باشيل المتاع

لين اعرف انك توصلت لقرارٍ سريع

يا مرتكي بين ذيك الحدب وامرك مطاع

تعبت ركابي وحبك ضاع مع كل ريع

كنت انت وحدك هنيا كنت وبلا نزاع

تستمطر الشوق واللهفه وتمطر جميع

كنت انت وحدك ولكن كل ما كان ضاع

وانا بعد كنت وحدي لين شفتك تبيع

ما كنت اصدّق ولكن يوم طاح القناع

ماعاد للدمع تأثيره وشكله فظيع

إرحل مع الليل قبل الصبح يرسل شعاع

وانا باوادع جروحك قبل طيفك يضيع

وش فيك واقف وانا خابرك قلبك شجاع

إضغط زناد الجفا والهجر لو تستطيع

رد: ديوان شعراء السعودية في العصر الحديث (متجدد)☘️☘️
 

قصيدة الله يخليك
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

يا ذا الغريب اللي جروحك منافيك

مالك وطن يستوعب أحلام دنياك

عمرك تسرّب من سنينه لياليك

وما عاد تدري وين؟ أو كيف وداك؟

من واقعك.. أحلام قلبك تصحيّك

على السواد اللي من سنين صحّاك

كنك تقول لحزنك: الله يخليك

شف لك أحد غيري وانا اوعدك ما انساك

في وحدتك ما غير حزنك يسليك

مواجعك تكتبك والحزن يقراك

ما بينك وبينك أغانيك تغنيك

لو الفرح ما عمره ف يوم غنّاك

وحيد تشعلك الدقايق وتطفيك

منسي.. تدوّر في عيونك خطاياك

إحساسك إنك! صرت ما عدت تعنيك

يجعلك ما تحرص إذا ضعت تلقاك

مرات.. رشدك للضلالة يوديك

مرات غيّك هو طريقك للإدراك

ياسك: أملك إنك تحقق أمانيك

أملك: ياسك ف ابتسامة محيّاك

حتى ولو ضحكتك لحظة تداريك

ما للشقي غير الشقاء أرض وأفلاك

ويا شينها لا صارت أرضك منافيك

غريب في أرضك وناسك ودنياك

رد: ديوان شعراء السعودية في العصر الحديث (متجدد)☘️☘️
 

قصيدة كاس الما
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

من الآخر.. باجيب الحزن واكتب كيف خلاني

مجرّد روح يسكنها الجفاف وتسكن الظلما!

حبيبي وانت عمرٍ قبل اعيشه تاهت الواني

ولوّنت الحياة بضحكتك قبل اشربك واظما

حبيبي وين غبت؟ وليه غبت؟ وليه يا جاني

تضيّعني من يدين الغلا يا الغادر الأسمى!!

يداهمني سؤالٍ كل ما مرّتني احزاني

وانا المح في عيوني ضحكتك حتى ف كاس الما!!

نساني؟ ما نساني؟؟ احتمال انه تناساني

!وانا مالي سواه ولو تحاصرني كثير اسما!!

رحل! إلا عن عيوني وتفكيري ووجداني

ورحلت بكل مافيني وقلت استوطن الظلما!!!

رد: ديوان شعراء السعودية في العصر الحديث (متجدد)☘️☘️
 

قصيدة طفلة نجديه
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

تدرين يا حلوتي ويش اخر امالي

لا صارت ايامنا تركض رماديه

لحظة لقا تجمع الغالي مع الغالي

وتكون بالفعل لحظه غير عاديه

اما خطفت لك نجمٍ فالسما عالي

والا زرعتك غمامة حسن ورديه

وانا حبيبك وابقهر كل عذالي

لا شافوا ان القمر يختال فيديه

تأكدي وقتها لو ينشغل بالي

فيك انشغاله وتفكيره بجديه

وشلون يقدر يخلط المر والحالي

وتصير سجاته لشفتك مهديه

يا اعذب من الما وش اللي حطم اغلالي

غير ابتسامتك مع نظرات جديه

والله ما يرخص الأول مع التالي

الا غلا طفلةٍ ترفه ونجديه

رد: ديوان شعراء السعودية في العصر الحديث (متجدد)☘️☘️
 

قصيدة فرحة حزين
الشاعر: زايد الرويس زايد الرويس
#العصر الحديث
#المملكة العربية السعودية
0
106 مشاهدة

يا نكهة الصبح طل الصبح بانفاسه

وانا اتنفس غيابك ويتنفسني

غريب.. فيني بلد يبكي على ناسه

ويطيح دمعه على اسواره ويحرسني

يصبني بعض هذا الحزن في كاسه

يسكر على ضيقتي كنّه يوّنسني

يرمقني بعين حرص إن مرّه نعاسه

يخاف من فرحةٍ تغلط! وتلمسني

والصبر حطّاب.. لكن.. منكسر فاسه

واحلامي ان جيت اوّقفها... تجلّسني

وينك؟.. بدا الخوف يقرع حولي اجراسه

والحيرة ف دربها المجهول تغرسني

محتاج لك.. ليت للضيقات كرّاسه

كان اكتب الضيقة اللي دوم تخرسني

والعشق اشوفه كثر ما تمطر اتعاسه

أحسه اكثر على قربك يكرّسني

وانا اعشقك يا ولادة حلمي وياسه

وابيك لو لحظة بقربك تحسسني

من كثر ما اشوف قلبي يابسٍ راسه

على غرامك أشك انه تلبّسني

وافكر اني أقص القلب ب احساسه

من خوفي انه على حبك ينافسني!

رد: ديوان شعراء السعودية في العصر الحديث (متجدد)☘️☘️
 

قصيدة كثير من السهر
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

كثير من السهر يعني كثير من الوله والشوق

وانا كل ما سهرتك صاح جرحي يا مسهرّني

ورا هذا السهر تنهيدتين وخافقٍ محروق

وانا ما اتصوّر انك يا حبيبي ما تصوّرني

أنا يا حضرة السارق! إذا تتذكّر!.. المسروق

أنا اللي ضعت في عتم السنين السود ادوّرني!

غيابك طال واللي منتظرك بغيبتك مخنوق

أحس ان الفرح يرفض بدونك لا يعبّرني

يا ليت العمر كله ضحكتين وعاشق ومعشوق

عشان اطيّر انفاس الغلا مدري تطيّرني

أحبك.. آآآآه لو مطرود قلبي فالهوى ملحوق!!

أو ان اللي كسرني مر في باله يجبّرني!!

رد: ديوان شعراء السعودية في العصر الحديث (متجدد)☘️☘️
 

قصيدة المعقول واللا معقول
الشاعر: زايد الرويس زايد الرويس
#العصر الحديث
#المملكة العربية السعودية
0
104 مشاهدة

بعد ما رفعت اقلام السكون وجفّت أوراقه

تطايح من ظلام الوقت ليلة نور مسروقه

تعبت من التعب من بابه المفتوح للطاقه

مشيت بخطوتينٍ لاحقه في درب ملحوقه

أبشعل شمعتين وباترك الهقوات منساقه

مع ان اخر هقاوي ضحكتي بالحزن مشنوقه

أبكتب فيك يا حزني قصيدٍ لاح برّاقه

وابمطر من عذابي دمعةٍ ماهيب مفهوقه

كذا يا وقت تهديني من سنين الألم باقه

وتتركني لنخل جروحي اللي مالت عذوقه

وانا يا وقت مالي فيك لا قدره ولا طاقه

ولااحدٍ في حياته جت حياته له على ذوقه

اشوف الناس من حولي على السجّات سباقه

واشوف اني لحالي في طريقٍ تاهت وفوقه

بديت استوعب المعقول واغرس حرف فاعماقه

علشان ابتساماتي تجي ماهيب مخنوقه

أبرحل عنك يا دنياٍ تشد الفرح بوثاقه

أبرحل لاي سكه تنتشل قلبي من عروقه

كفن أبيض وتنهيده ودمعة حزن حرّاقه

تكفي في زمن فيه اللحى بالذل محلوقه

رد: ديوان شعراء السعودية في العصر الحديث (متجدد)☘️☘️
 

قصيدة الجاني والمتهم
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

يا حضرة الليل.. يا جاني واناالمتهّم

ضيعت عمري وانا مانيب ناقص ضياع

ضاعت سنيني.. وهي ضاعت! وهذا الأهم

مُر الموادع وامرّ البعد دون الوداع!

يا غربة اللي شكى حزنه ولا احدٍ فهم

يا ضيقة المنتظر لا صار دمعه متاع

يا حسرة اللي يفل العمر سبحة وهم

يرجي سراب السنين ولحظتين اجتماع

حبيبتي لو نزعت من الحنايا سهم

آلاف غيره تنازعني بليا نزاع

حبيبتي.. من هو الجاني؟ من المتهم؟

من ضيّع الثاني وشكّل فصول الضياع؟

رد: ديوان شعراء السعودية في العصر الحديث (متجدد)☘️☘️
 

قصيدة جنيف
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

مدّي كفوفك وصل

يا غايبه عني

مدّي طيوفك شوق

خليني اتنفس!

خليني اتحسّس

ملامحك.. واقراك

ف كتاب عشقي لك

ميّت من اول فصل!

فقدتك واختنقت بغيبتك بانفاس من حولي

تعالي قبل اموت من الوله والشوق ف غيابك!

فقدتك آآآآآه يا هي فوق متني تصرخ حمولي

تعالي والمحيني... من سنه! ميت على بابك!يا رب صبّرني

صيف وغياب احباب!

والحزن يعبرني

ب اسباب وبلا اسباب

مُتعب.. تعب هالصيف

جوّ الرياض يهد!

باالله قولي لي

ش اخبار جو جنيف؟

مستانسه والا؟؟

جو الرياض ارحم!!

متى تجين.. الشوق سوّى سواياه

وانا هنا مزروع ف ايامي السودكل الوجيه اشباح

لو تلتفت يمّي

في غيبتك يرتاح

في نبضتي همّي

محتاج اسولف لك

عنّي.. عن احزاني

محتاج اسولف بك

لحكاية احزاني

محتاج لك كلك

صمت وحنين وبوح

تعالي... ودّي اتظلل... بفيّة غصنك... الريّان

باموت من الظما... يرضيك اموت من الظما.. يرضيك؟؟

رد: ديوان شعراء السعودية في العصر الحديث (متجدد)☘️☘️
 

قصيدة قبل الحفلة
الشاعر: زايد الرويس زايد الرويس
#العصر الحديث
#المملكة العربية السعودية
0
105 مشاهدة

جننيهم لا دخلتي بينهم في غفلة

وكل عينٍ طالعت بك غمّضت مبهورة

والله انك لا دخلتي تبتدين الحفلة

تتعب قلوب البنات وتحترق مقهورة

حسنك اللي يلزم العالم تجي تاقف له

من شعرك الين ساقك فتنتك مصهورة

وكان خصرك مال طير المذهلة رفرف له

رقصتك لازم تكون ببسمتك ممهورة

أنثري جوري دلالك كنّك اكبر طفلة

واستحي لا من غديتي بينهم مشهورة

ما حدٍ بعدك بيرقص دام رقصك قفله

للحفل والحسن دايم ما يُمل ظهوره

جننيهم لا انسحبتي بينهم في غفلة

وكل عينٍ طالعت بك فتحت مبهورة

رد: ديوان شعراء السعودية في العصر الحديث (متجدد)☘️☘️
 

قصيدة عايش وسط بيتك
الشاعر: زايد الرويس زايد الرويس
#العصر الحديث
#المملكة العربية السعودية
0
104 مشاهدة

حبيبة قلبي المغرم.. فديتك

نده قلبك على قلبي.. وجيتك

لقيتك حلم لوّن لي حياتي

كأني كنت ادوّرك ولقيتك

كتبتيني ب دفتر أمنياتك

وانا في مورق أحلامي قريتك

جنونك صمتك أحلامك فضولك

هدوءك اشتعالك لا ظميتك

حنانك عطرك المسكوب فيني

رحيق احساس وردك لا انتشيتك

فضاءك عالمك سحرك خيالك

كأني معك عايش وسط بيتك

أحبك.. إيه أحبك!.. ليه أحبك؟

لأني كثر ما اعطيتك.. خذيتك

أغني بك صباحات المحبة

واضمك ف ابتسامك لا غفيتك

وانا مشكلتي إن قلتي: أحبك

أضيع! وما أقول الا فديتك