|
رد: ديوان قصائد لشعراء المملكة العربية السعودية (متجدد)☘️☘️
ما لهذا الصبر أخر
ما لهذا الصبر أخر .. ما ل هذا البحر مينا .. وش بيدّي .. كل ما رفرف بقلبي حزن غنّيته .. كل ما راود عيوني مزن بكّيته .. وش بيدّي .. ما تخيّرت الكلام ولا تخيّرت السكوت .. ما تخيّرت الحياة .. بسّ يمكن .. أقدر أتخيّر أموت .. لا تمرّ بروحي إلاّ عابر وقلبي معاك .. لا تمرّ جروحي إلاّ من هناك .. من بعيد .. مثل طعم العيد .. خلّك أبعد من مسافات الطريق اللي مشيت .. خلّك أبعد .. ما بقى في دفتري وقت وحنين .. لو لمحت أنّي حزين .. لا تجيني .. خلّني منّي وفيني .. لا تجيني .. القلوب أوقات تغريها المواجع .. وأنت عارف .. ما بكت عيني فراقك يوم طريّت الرحيل .. كانت دموعي قصايد .. كانت جروحي قلايد .. كل جرح ألبّسه شعري ويفرح .. شوف كيف أحيان بعض الشعر يجرح .. رح بعيد .. ماني راجع .. القلوب أوقات تغريها المواجع .. رح بعيد .. رح بعيد .. نواف التركي |
رد: ديوان قصائد لشعراء المملكة العربية السعودية (متجدد)☘️☘️
وداعاً ..!!
كتبتك لين ماعاد الكلام أجمل .. وبقيت أجمل .. بقيت أطهر حقير بساحة ال والي .. بقيت الطامن العالي .. وداعاً .. مو لأنّي ما لقيت أحساس .. وداعاً .. لأن الناس ماهي الناس .. وداعاً لأني الأجمل .. وأذا مرّيت بشفاة الحديث وغنّت الذكرى .. أذا جابتني الصدفة .. بربّك شف لها صرفة .. وقلّ لليل ياعمّي خلاص أنسى .. وقلّ للفجر .. ترا جينا من اقصى العمر .. ندوّر للتعب مرسى .. ورحت ولا بكى صاحب .. ولا بنت أرخصت دمعة .. كذا يمشي الغريب بسكّة التيه الطويل ولا معاه أحباب .. كذا هي سيرة الغيّاب .. يا آخر ضحكةٍ مرّت ببال الدمع قبل أرحل أنا مغرور من يومي .. أنا من خلقتي أجمل .. أذا مرّة حكيت لعابرين الدرب .. إذا ليلة ضعفت وقلت .. فأنا فالغالب الأبعد .. عطيني قلبي أسرفتي وأنا ما عاد أبي أصبر .. صبرت أكثر من المعقول .. ضعفت أكثر من اللازم .. خلاص الحين ماعادت عيونك قبلة الأحلام .. تعبت أسهر .. أبي أرتاح .. ابي عيوني مثل كلّ العيون تنام .. كتبتك لين ماعاد الكلام أجمل .. وبقيت أجمل .. بقيت أطهر حقير بساحة ال والي .. بقيت الطامن العالي .. إلى النسيان يا الأحلام .. إلى الخذلان يا الأقلام .. إلى مالا نهاية سارت الأقدام .. وداعاً لأني الأجمل . نواف التركي |
رد: ديوان قصائد لشعراء المملكة العربية السعودية (متجدد)☘️☘️
الصدق جنّة ..!!
من يقول الصدق جنّة ..!! ماصدق .. جرّب تعيشه صحيح إنّ كان ودّك .. شوف كيف يهدّك .. وأنت ما قصّرت والله العظيم .. لك بصدري عمر ما تكذب عشاني .. كنت أناني .. كان مفروض أتْركك ترتاح منّي .. لاتغنّي .. أكذب .. أكذب .. حبّ ألعب طيش .. روح لأحضان الغواني .. للسواني .. وأشرب أشرب .. سوّ كل اللي نهيتك عنّه .. من يقول الصدق جنّة ..!! لا تغنّي .. ماذبحني غير صوتٍ أبعثه منّي ل منّي .. أسف أكثر من سنينك .. من تعبْك .. ومن حنينك .. وأكثر أكثر أسف .. كثر ما جرّيتك لشوك الطريق وتمشي .. كثر ما بللت رمشي .. كثر ما أهرب فيك من كل السنين الخضر لسنين الجفاف .. كثر ما نوّاف صادق مع نوّاف .. من يقول الصدق جنّة!! ما صدق .. رح هذاك الدرب وأصوات الغياب تنادي .. يا فؤادى لا تسل أين الهوى كان صرحا من خيال فهوى اسقنى واشرب على أطلاله وارو عنى طالما الدمع روى رح هذاك الدرب وأصوات الغياب تنادي .. مدّ روحك وتتلقفّك الأيادي .. وأنتبه في يوم تصدق .. أكذب أكذب .. وإنّ شعرت بذنب لا تحزن تذكّر .. أنّك أخر قلب يسقط .. وأنّ صدقك جمرك .. وإنّ كذبك خمرك .. أثمل أثمل غيب عن كل القناعات السخيفة عن اساطير الغرام والحكايات القديمة والوفاء والصدق وأطباع الكرام .. لأنّ هي الدنيا ماعادت مستقيمة لا تكون أنت الوحيد المستقيم هيم هيم .. كل وادي غيّ مرّه .. كل كذبة في طريقك أرتكبها .. سوّ كل اللي نهيتك عنّه .. من يقول الصدق جنّة!! ماصدق . نواف التركي |
رد: ديوان قصائد لشعراء المملكة العربية السعودية (متجدد)☘️☘️
قميص فرقا ..!!
https://poetsgate.com/img/divider_1.png أجمل اللي عرفت بهالحياة رحلو غيّبوا غيبة الضحكة بوقت العزا كنّ قلبي غريمٍ عن دياره جلو كل ما جاه علمٍ عن ضعنهم غزا أبذروني غلا حتى بلغت الغلو وأحصدوا دمعتي يوم المفارق جزا كان ودّك تطيح فطيحةٍ من علو أجمل الشعر شيٍ تكتبه من وزا ،،،، ياحادي العيس ليت العيس ما مدّت على وحى الصوت يوم يدوّه الساقي أسمع حنين الزمل وقلوبهم شدّت وأتلحّف الصبر غصب وتلفح أشواقي حسيت كنّي طلل ل: سنين قد عدّت ما هو بوقتي ولا تسمح لي أخلاقي أتبع لي أرواح يوم أقبل لها صدّت لو كان ما يستريح الدمع بأوراقي سلّمت للبعد يوم أقفيت ما قدّت قميص فرقاي من تستطعم عناقي بكره جفيته وعين البارحة سدّت عن كل حزنٍ جديد يراود أعماقي ياهيه ماعاد فيني قلب .. لاندّت ورود الأحلام قل ماعاد به باقي حمامة الروح لأعشاش الصدر ردّت وأبكسر جناحها لو تطري فراقي قصايد الوجد لا جابت ولا ودّت باهت غروبي وباهت مثله إشراقي الحين يا من ل: عينٍ كل ما لدّت كنّه تدوّر لوسواس الشعر راقي هذا هو الصدق وضعون الجفى مدّت عسى الغياب الطويل يموّت أشواقي نواف التركي |
رد: ديوان قصائد لشعراء المملكة العربية السعودية (متجدد)☘️☘️
تعال نغيب ..!!
حضورك ما يخلّي للغياب حضور .. ولا أنتْ تعرف وش جابك .. ولاني آخر أحبابك .. كأنّك طفل .. وكأني لعبةٍ مليت منها بس .. يجي غيرك بياخذها وتغليها .. وإلا من راح .. ترميها .. رخيصة عندك الأرواح .. وأنا ماغير قلبٍ كان .. حديثٍ حيّ ماقدرت تصيده بندق النسيان .. تعال نغيب ..!! كثر ما كان لحضورك طعم ثاني .. كثر ما ضحكتك تغري .. كثر ما كنت بك أجمل .. كثر ما كنت بي الأجمل .. كثر ما أذكرك وأنساني .. وتنساني .. وخذلاني .. كثر ما كنت بك أغرق .. أبيك تغيب ..!! وإذا مرّيت ب أحبابك .. تذكّر .. كانوا أحبابك .. ووقّف عند طعم ال كان .. كذا تعرف .. بأنّك فعل ماضي .. كذا تعرف بأنّ اليوم ماهو أمس .. وإنّك كنت .. وإنّ ال كان .. حديثٍ حيّ ما قدرت تصيده بندق النسيان .. نواف التركي |
رد: ديوان قصائد لشعراء المملكة العربية السعودية (متجدد)☘️☘️
حالة شعر , حانة شعر ..!!
https://poetsgate.com/img/divider_1.png أرواحنا الثرثارة ملّت حديث الماضي يا سيّدة هالحارة تستغربين إعراضي ? إنتي كما النوّاره وأنا أمحلنّ فياضي الحين أنا ياجارة قانع معاي وراضي العزلة المختارة ولا الحضور الفاضي الشعر حاله وأنا عايش ب هالحاله والناس قفرٍ تحرّى طيحة الصيّب واللي بيوته تبختر فيه مختاله ينام عنها مثل ماقال أبو الطيّب واللي على البال ما مرّيت في باله الحين لو هو قريّب ماهو قريّب مابين تدويرةٍ وإقفاي وإقباله وظنون مرّه تصيب ومرّه تخيّب هيّلت لي ضحكةٍ بالدمع ميّاله وقهويت عين الرفيق بحالي الطيّب موت الأجاويد لا منّه غدت عاله وأنا لو أنّه شعور أحسّه يعيّب رح قل لبكرة يجي رجلي وخيّاله ماني من المقبلات السمر متهيّب يبحث خفاي الزمان ولا تهيّاله وأشيّبه مثل ما في راسي مشيّب والأدمي كان ما شابهته أقواله أحسن له عن الحضور الباهت يغيّب نواف التركي |
رد: ديوان قصائد لشعراء المملكة العربية السعودية (متجدد)☘️☘️
أغنّي لك ؟
أنا محتاج لي ليلٍ طويل وضحكةٍ عذرى ..!! وروحٍ كلّ ما رفّ الحنين بداخلي تقرى ..!! بقى بالله أحد يقرى الحديث ب روح؟ ولا واحد من الأحباب .. قدر يتوغّل بروح الكلام المزدحم بالصمت .. لذلك كان لا بدّ الكلام يموت .. وأنا شاعر .. متى مات الكلام بدفتره بيموت .. ولا أبغى أمرّ مرور العابرين الممتلين بسخف .. ولا أبغى أكون للنسيان .. أنا أخترت الطريق الصعب .. وأنا عارف من أوّل ما تخيّرت الطريق إنّ التعب أكثر .. وقدرت أمشي وأعدّي عمر من عمري .. كأني أهرب من الوقت .. تجين إن ضقت أغنّي لك .. أنا صوتي يجي مثل المطر لا ضقت .. وأغني لك .. دخيل عيونك أن هبّ الحنين شلون؟ أقول أشتقت؟ أقول أنّي فقدتك عمر؟ أقولّ أنّ المفارق جمر؟ أغنّي لك؟ ياليت أقدر .. أنا يا جنّة الدنيا تعدّاني كثير الوقت .. كثير أشتقت .. ولا جيتك .. ولا أقدر أجي مثلي مثل غيري .. ولا أقدر أجي مثلي .. أنا للأمس ولبكرة .. ولا عمري قدرت أحضر عشان اليوم .. وأحبّك بيني وبيني .. وأحبّك أكثر من اللي ببالك مرّ .. وبكرة بعد ما يقطف خريفي أجمل أوراقي .. بعد ما أكفّن الدفتر .. بتدرين أنّك أجمل ما كتبته للزمان الجاي .. وتبقين بثغر طفلة تردد صوتي اللي مات .. كثير الحكي لكنّ الكلام يغصّ بعيون الدموع ويلتجي للصمت .. لذلك كان لا بدّ الكلام يموت .. وأنا شاعر .. متى مات الكلام بدفتره بيموت .. نواف التركي |
رد: ديوان قصائد لشعراء المملكة العربية السعودية (متجدد)☘️☘️
تعال أمطر
تعال أمطر .. يبس غصن الكلام المورق الأخضر .. ولا ساقي .. ولا غيمة يبللّ ضحكها أرواقي .. سنين وشاعرك يقطف عناقيد الكلام العذب .. ولاغايب قدر يرجع .. ياليت العمر.. شريط أقدر أعيده كل ما غايب بذر نبتة غلاه بداخلي وأقفى .. عشان من أوّله أجفى .. عشان أرتاح من هذا الحنين اللي تغافلني وجاب أقصاي .. تعال أمطر .. عشان يكون للدنيا طعم ثاني .. عشان أذكرك وأنساني .. عشاني كان باقي لي بقلبك شي .. عشاني مو عشان الشعر .. مدد يا سيّد أوجاعي .. كذا ماعادت الدنيا تساوي شيّ .. كذا ما أحسّ بأنّي حيّ .. أنا محتاج لك حتى لو أنّك جرح .. تعال الليلة أكثر من كذا وأكثر .. تعال أمطر تعال امطر تعال أبيك اليوم خل بكرة لبكرة طيّر حمام النوم لو كنت بي مكره خلّ الكلام يحوم وأقنص لك الفكرة تعال وشوف وشلون أبعث الميّت من الأحساس من قبره .. تعال أنفخ لك بروح الشعر ما يطرب الأوراح .. أنا ياسيدّي ربّ الكلام الموجع المرتاح .. تعال أمطر .. يبس غصن الكلام المورق الأخضر ذبلت بغيبتك يا ساقي أحزاني حسبت أنّي على هذا الغياب أقدر وقلت أسلّمك لكفوف نسياني وكان الدرب موحش والحنين أكثر وكنت بكل درب أروح تلقاني وكانت كل رغبة داخلي تصغر .. وكنت أكبر.. ووحدك داخلي تكبر .. أخيراً والحديث الموجع أحياناً هو الأحساس .. أمانة خلّني بك غير كل الناس .. ورح مسموح .. لا ترجع .. ولا يورق بعدك أحساس .. ولا تمطر .. هي الذكرى وحدها القادرة تبعث حياة بداخلي وأكتب .. وأحسّ أني مثل هالناس .. وأحسّ أنّ لجروحي قلب .. وأروح أكبر .. مثل كل الشجر لما يتساقط في خريف العمر .. أنا ياسيّد أوجاعي بديت أسقط .. نواف التركي |
رد: ديوان قصائد لشعراء المملكة العربية السعودية (متجدد)☘️☘️
حكاوي
https://poetsgate.com/img/divider_1.png كلّ ممكن زهدته في رجا المستحيل قلت آباطول نجمة ما حدٍ طالها يقنع القلّ من عزمه بروحه قليل الحرار إتضايق من ردى حالها لا تململ ترا بال المفارٍق طويل والليالي عجافٍ يا وسع بالها علّمتني على طول المدى والرحيل أضحك إنّ شالت الأحزان موّالها حسبي الله على وقتي ونعم الوكيل ظلّ يستدرج الأحلام وأغتالها مابقى تمر لو هزيّت عذق النخيل إقطفتها السنين وماتت آمالها ملّت العيس حاديها يحطّ ويشيل ودّها تستريح وترمي أثقالها وجد حالي وأنا حالي بليّا نحيل وجد من محتمي له كلمةٍ قالها يومّ دنّ الشمال وهبّت الريح هيل لين روحي بغت تقضي على جالها إيييه ياللي مثل قلب الزمان البخيل جادك الدمع وعيوني وغربالها غصنك اللي مع أنفاس الحكاوي يميل ماترك عدله إلاّ ميّل أحمالها شاعرك مؤمن إنّ الوصل ماله سبيل لكنّ الروح ماهو راضي إذلالها كان في حاله وفاله وطبعه ثقيل لكن الناس تكذب ماهي بفالها كان ممكن أكون وكنت مالي مثيل تشبه الناس بعض وواجد أمثالها لو لصوتي مع العالم شبيه وبديل كان خلّيت الأنفس تلبس أسمالها نواف التركي |
رد: ديوان قصائد لشعراء المملكة العربية السعودية (متجدد)☘️☘️
طواريق
https://poetsgate.com/img/divider_1.png سولفوا لي عن الحبّ وعرفت وجهلت كنت محتاج أعيش بنفسي التجربة كنت خايف على نفسي كثير إن غفلت قلت أبختار لحظة مؤمنة وأقربه لين جيتي من عيون الكلام وقبلت قلبك اللي قبل ما أعرفه ما أستغربه لو بقيتي مثل ما أنتي رضيت وزعلت بيني وبيني أعيش الهوى وأشربه كنتي أجمل بعيني من كثير وجعلت ضحكتك قبلة وصوتك غناء أطربه ذنبي إنّي فرحت بجيّتك وأحتفلت كان مفروض حبل الوصل عنك أكربه قلت أبختار وأخترتك غلط وأنخذلت كنت أبيك الحياة وصرتي التجربة علّمت ضحكات الزمان تهجرني وقرّبت لدموع الليال المناديل أخطيت لكن ما أبيك تعذرني طعم العفو علقم قلوب الرجاجيل ما طحت يومٍ العدوّ يعثرني أنا أنعثرت بهقوة البنّ والهيل والله ماقدر الزمان وقدرني اللي غرسها بين حدبٍ مناحيل جبرت كسره لين سلم وكسرني لكن بسيطة والليالي مقابيل ما الله على بعض الأوادم جبرني لكن هقاوي والهقاوي غرابيل قلبٍ لو أبطي بالغياب أنتظرني وقلبٍ يقطّع في حبال المواصيل أحيان حاجات الزمان تعسرني وأحيان أكمّل نقص وأزوّد الكيل وأعزّ لي قومٍ مناه تحقرني وأردّ دون وجيههم غارة الخيل واللي حضرت لضيقته ما حضرني ماني وراه مدوّر القال والقيل كانه لقى له زلّة وما سترني فأنا أستره عن قرقعات الفناجيل والله لو أنّ الصبر أنا ماصبرني لكن تروح بعون ربّي تساهيل عذرت وقتي يوم ضاق وزفرني ماظلّ به حيلٍ ولا ظلّ بي حيل غنّيت يومٍ القصيد أعتبرني حاديه عن رمضا الحنين المواويل واليوم كنّي حبّه اللي نثرني للريح وأفواه المقادير والليل مدري من اللي يوم أغيب أفتكرني الفقد صار أغلبه كذبة وتمثيل لكنّي أعرف واحدٍ ما ذكرني وأنا أحسبه لاطحت بحمولي يشيل كنّه لساعة موت قلبه ذخرني أختار وقت تميل الأيام ويميل لا يحسب أنّه يوم يقفي كسرني خسرت الأثمن منه ماقلت ياويل قلبي وياكثر الزمان أختبرني قبله وطفّيت السهر والقناديل مبطي وأنا أكرب ضيقتي وأختصرني واليوم فاض بما حوى صدري الكيل حادي الوجد وإن ضاقت عيون المدى خلّ صدرك مثل صدر الشمال أجودي لاتموت الأماني والأغاني سدى ما للأحلام بقلوب الأوادم ودي شوفني كلّ ما أهتزّ الحنين وبدا ينزح النوم ويزور السهر مرقدي آتململ وأروح لما طرالي فدى وآتذكّر وأنا جرح المفارق ندي صبحه اللي توضّى من كفوف الندى ليله اللي مثل طيبة هله سرمدي دنّة النجر صوت الفجر بُعد الردى ريحة الهيل قلبٍ للسهر محتدي ماني أوّل غريبٍ من حنينه بدى مرقب الليل يسجع بالغنا ويحدي لو تشتّت بأرض الله بليّا جدى لو تضيق الدروب بضيقتي وتعدي لو غدوا ربعي الأدنين همّ العدا ما تكاثرت فزعاتي ومدّت يدي صاحبي صاحبي ياصاحبي ماهدى قلبي اللي تحنّ ضلوعه لمولدي صرت وحدي ينادمني حديث الصدى صار مالي عدوّ إلاّ الزمان الردي كلّ ذنبٍ قدرت أستغفره ما عدا ضحكةٍ ينبلج عنّابها ببردي جارة القلب وبيوت الوصال حددا قبل ما تقنب الفرقى وأهيم وحدي عقبها ماعرفت ألقى لقلبي هدى بعدها ما بذلت لوصل بنت جهدي صاحبي صاحبي ياصاحبي ماغدى من بطهر الشمال ونجمته يهتدي المدى ضاق والحادي جفاه الحدى والنهايات مكتوبة قبل نبتدي جعل يومي قبل يومك وعمرك طويل لو علي ما حسبت لخلق ربي حساب مير أجامل عشان رضاك وأصبر وأشيل وآتعامى وأضحّك ناب وأقطم بناب كم تلحفت لي غيضٍ بصبرٍ جميل وكم تحمّلت لي ضيقٍ شطير النصاب وكم عشانك رفعت اللي مقامه هزيل وكم تهيزلت لي قومٍ عزيزة جناب كم تمايلت لي عدل وتعيدلت ميل وكم تصاوبت مخطي وإختطيت الصواب وكم تقاربت لي ناسِ غلاهم قليل وكم تباعدت عن ناسِ لقلبي قراب دامك بخير ياحلو التعب والحصيل ودام راضي ف ياحلو الشقى والعذاب يايبه والجواعا يرجمون النخيل عالمٍ ما يسدّ حلوقها إلاّ التراب يشبحون القريّب وأشبح المستحيل والليالي طويلة بال والصبر شاب ماني أضيق بالطفسة وأناحي هبيل القوافل تسير وينبحنّ الكلاب والقصايد بعضها مثل وقع الصقيل كل ما أصكّ باب يشرّع الهم باب وأنت ياللي ورى حدب الحنايا نزيل لك شهر وأنت مابين المجي والذهاب لا تمرجح على ميهاف قلبٍ ثقيل هذي أوّل محطّات الجفى والغياب رح عسى الله يسهل لك طريق الرحيل وأذخر الدمع لا مسّك حنينك زهاب ودّي أبكيك لكنّي بهذي بخيل لو عليك إمترزّم بالعيون السحاب سقت ركبي وجنّبت الحيا والمخيل أتتبّع طواريق العطش والسراب درهمي ياركاب الفقد درهام ليل وأقطعي وادي الوحشة لروس الهضاب ياعسى شجرة النسيان ظلٍ ظليل دعوة توافق أوقات الدعا يستجاب .قالوا الشعر يفقد لذّته لا كثر قلت قولوا لمن يحسب لهذي حساب بكره نعرف من يبقى لصوته أثر من كتب للحضور ومن كتب للغياب ينفع الأرض دمع الغيمة إليا أنتثر لكن الناس مغرومة بطرد السراب كلّ من طاح قلنا له جواد وعثر لين غزّ الخطا رمحه بعين الصواب درهموا في ميادين الشعر والنثر قلّت الخيل شدّوا بالسروج الكلاب كل معنى جميل بهالحياة أندثر النفوس إستراحت للتعب والعتاب شوفني كلّ ما أهتزّ الحنين وخثر وجدي أفتح لمغلوق المشاريه باب صاحبي ياكثر ما أعتب عليك وكثر ما غزلت لجروحك من شعوري ثياب نواف التركي |
| الساعة الآن 12:33 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لـ منتديات شمران الرسمية