رد: ديوان شعراء السعودية في العصر الحديث (متجدد)☘️☘️
 

قصيدة تحت الرماد
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

اللي خذتْ قلبي ف يدها... وجلستْ في بيتها

البارحة.. هبّت على قلبي.. نسانيس وشذا

تحت الرماد..استيقظت جمرة وله.. ضميتها

بين الضلوع.. ومت من جوعي وضحكتها غذا

ف غيابها علّقت دمعاتي.. وهي.. يا ليتها

حنّت علي.. من التعب.. والهم.. وانواع الأذى

راحت.. ومعها راحت سنيني.. وانا ماجيتها

يعني!.. واذا راحت سنيني دون ضحكتها وإذا؟؟؟

باعيش واشعل شمعة الأحلام.. من كبريتها

يمكني اشرب صفوها.. لوّ ان هالدنيا قذى

وانا... لو اني من ثلاث سنين.... ما حبيتها

ما كنت دوم أسهر كذا.. ولا اكتب اشعاري كذا

رد: ديوان شعراء السعودية في العصر الحديث (متجدد)☘️☘️
 

قصيدة قولو لها تدخل شظايا
الشاعر: زايد الرويس زايد الرويس
#العصر الحديث
#المملكة العربية السعودية
0
104 مشاهدة

هبّت شمال وراعي الوجد ملهوف

تدفى يدينه لا تذكّر يديها

سهران كنه بالسهر صار مكلوف

تلعب به الضيقات منها إليها

العشق ناي وطاري البعد معزوف

واكبر مصيبة عندي شلون اجيها

عندي ظروف وعندها مثلي ظروف!

وتموت فيني كثر ما اموت فيها

ما كن لي سمعٍ ولا كن لي شوف

من يوم قفت والجفا محتويها

غيباتها عني سكاكين بالجوف

الله يسامحها ويرضى عليها

قولوا لها تدخل شظايا وبتشوف

وشلون زايد بالشعر مبتليها

قولوا لها معذور لا صار ملهوف

ويدفى إلى منه تذكر يديها

رد: ديوان شعراء السعودية في العصر الحديث (متجدد)☘️☘️
 

قصيدة بعير
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

حزين يا قلبي الليلة.. وحزنك كبير

تطري عليك الطواري من يمين ويسار

أشغلتني وانت ما تدري عن اللي يصير

مثل اقتصاد الدول توشك على الانهيار

ودك تعيش الحياة بدون موت الضمير!!

يا صعبها وانت عاجز تتخذ لك قرار

شف حولك الناس تلبس من ترفها حرير

وانته تضم التعب والهم والانكسار

يا قلب وش فيك ساكت؟ هاتها من الاخير!!

علمهم انك بدال الحلو تشرب مرار

الناس وش همها لا صرت عايش فقير؟

الناس تتبع غني المال لو هو....

ف عيونهم لو كبرت تكون دايم صغير

ما ينظرون لك غير بنظرة الاحتقار!

اللي ب عشرة ملايين اشترى له بعير!!

يصبح سواة الملك حشمة وعز ووقار

واللي سواتك يموت وما لقى له نصير

ليله م هو ليل لو كان النهار النهار

لا صار مانتب خوي إمير والا وزير

بتصير الاحلام في نظرتك لعبة قمار

رد: ديوان شعراء السعودية في العصر الحديث (متجدد)☘️☘️
 

قصيدة كأنك مطر متعلق فالسما ماطاح
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

الأرواح.. تقرا كل ما تكتب الأرواح

تحس ببعضها لا غفت.. تسهر.. وتسهر!

وانا اكتب غلاك الجاي ما اسأل عن اللي راح

من العمر يا اللي بك يكون الغرام أطهر

أحبك واعلقّ ضحكتك داخلي مصباح

لأن السنين اللي بدونك غدت!.. تقهر

كأنك مطر متعلقٍ فالسما ما طاح

كأني جفاف استشعر هطوله.. وأزهر!

من الغيم جيتي.. يا شذا عطرك الفواح

من الجوهر الأنقى إلى الأروع المظهر

تحت شفّتك.. لو شامتك.. فكّرت ترتاح

تعبها من اللي فوقها حسنها يجهر

شفايفك لو زايد شهدها عليها ساح

يجي لابتسام الثغر توقيعه الأمهر

وانا من عرفتك صرت بك عاشقٍ لمّاح

وأنا بك أكون الشاعر الأكثر الأشهر!

رد: ديوان شعراء السعودية في العصر الحديث (متجدد)☘️☘️
 

قصيدة تعريف الحياة
الشاعر: زايد الرويس زايد الرويس
#العصر الحديث
#المملكة العربية السعودية
0
103 مشاهدة

أكبر أكبر من جروحي طموحي ف الحياة

كل ما تنبت بي جروح يُثمر بي طموح

وش يصير إن صار للصمت من حولي جهات

تجتمع في شفة الوقت واسمعها تبوح؟!

أكثر الأشياء متحركة نحو الثبات

واعظم الأشياء تثبت وترفض لا تروح

شوف كيف الذكريات إن ذكرت الذكريات

شوف كيف الحب الاصدق يعيش بكل روح

فيه ناس تكون ف يدين بعض الناس أداة

وفيه ناس صدورها تكون ملجأ للجروح

شوف كيف الأغنياء ما تخلي لك فُتات

وشوف كيف الفقر يجعلك ما تصبح شحوح

من يمد يديه ويقول هاك تجيه هات

ومن تقنّع بالغموض يتجرّد بالوضوح

والحياة ان جيت للصدق.. تعريف الحياة:

ينولد بك جرح ويموت ما مات الطموح!

رد: ديوان شعراء السعودية في العصر الحديث (متجدد)☘️☘️
 

قصيدة با علم عليك
الشاعر: زايد الرويس زايد الرويس
#العصر الحديث
#المملكة العربية السعودية
0
101 مشاهدة

إدخلي في حنايا الروح ثم اخرجي

وشوفي شلون قلبي يحتمي منك فيك

كل عرقٍ بنبضات الوله يلتجي

وآتساقط من اعلى هامتي في يديك

يعزف الشوق لحنٍ في غيابك شجي

وتكتب النوتة الأيام مني إليك

السهر ما رحمني بس! ويش ارتجي؟

واجمل ايام عمري كلها تفتديك

حسبي الله على طيفك يروح ويجي

كنه يقول: لو ترقد! باعلّم عليك!!

رد: ديوان شعراء السعودية في العصر الحديث (متجدد)☘️☘️
 

قصيدة ملامح غياب
الشاعر: زايد الرويس زايد الرويس
#العصر الحديث
#المملكة العربية السعودية
0
102 مشاهدة

غيّاب غنوا للغياب وخذوني

أمشي وادوّر عن ملامح ل غيّاب

على رصيف غيابهم علقوني

وانا اتلفّت فالدرايش والابواب

اسأل عليهم ليه ما كلموني

كانه جفا.. يا كثر ما فيني عتاب

وشلون شدّوا للغياب ونسوني

مشدود باحلامي ومنهار الاعصاب

وكانه زعل.. باسهر واسامر طعوني

متوحدٍ في غربتي دون الاصحاب

ألملم جراحي واداري ظنوني

والبّس احزاني من احزاني ثياب

واقول للي للغياب تركوني

عمر الزعل ما برّر غياب الاحباب!!

أما ارجعوا.. والا معاكم خذوني

تعبت ادوّر عن ملامح ل غيّاب!

رد: ديوان شعراء السعودية في العصر الحديث (متجدد)☘️☘️
 

قصيدة بسمة ذايبة
الشاعر: زايد الرويس زايد الرويس
#العصر الحديث
#المملكة العربية السعودية
0
101 مشاهدة

لا ينكسر صمتك على

شفّة غرامٍ هايبه

شفني وانا مت اولى

دمعات عيني رايبه

زعلان؟ طيب يا هلا

سرّ الظنون الخايبه

قدام يدرون الملا

بالمخطيه والصايبه

ف المر نكهه للحلى

ف الآه بسمه ذايبه

لا تنحرج مني ولا

تقول نفسك طايبه

يا هيك نسهر يا بلا

والليل عينه شايبه

وانا اوعدك لاكسر على

شفّتك شفّه هايبه

رد: ديوان شعراء السعودية في العصر الحديث (متجدد)☘️☘️
 

قصيدة ثروة وثورة
الشاعر: زايد الرويس زايد الرويس
#العصر الحديث
#المملكة العربية السعودية
0
101 مشاهدة

تفجرت من مسا البارح براكيني

والحزن عشٍ تهادى فيه عصفوره

الليل طفلٍ يغني في شراييني

يضج صوته كأنه وسط مقصوره

والصبح كهلٍ تعثّر ب اول سنيني

عصاه شمسٍ تطيح ليا انتهى دوره

والشارع الممتلي باخطاء عشريني

اقرى رصيفه ولا تغريني سطوره

من علم اللوحه وفرشة تلاويني

تستنطق الصمت وتفزز به شعوره

ويضج كل المكان بصرختي: ويني؟

وتمر الايام في ذكراي مذعوره

يا تاركتني غريبٍ في عناويني

الصبح مدري علامه ينكره نوره

من يوم قلتي بسافر شلتها عيني

وبروزت قلبي ووجهك صار له صوره

في كل نبضه أحس انك تناديني

وامد يدي لقلبي واقلع جذوره

كله علشان اشوفك منّي وفيني

واخلي الشوق يصعد مثل نافوره

وارتب المفردات وتكتب يديني

الحب ثروه متى ما صار به ثوره

البعد حاجز يوقف بينك وبيني

ابكسره واجعل الريضان ممطوره

غيبي وانا باكتبك داخل دواويني

واهديك عمري وكلٍ هو وميسوره

تطفي سما نجد لامنك تركتيني

وتنوّر الديره اللي فيك مغروره

واذا اتصلتي وقلتي وينك وويني

باقول جالس هنا جنبك يا سنيوره

ليتك عرفتي غيابك ويش يهديني

يهديني الشوق في غيبتك وحضوره

واسرق بعض ذكرياتٍ منك تكفيني

وعشٍ من الحزن توه طار عصفوره

رد: ديوان شعراء السعودية في العصر الحديث (متجدد)☘️☘️
 

قصيدة الموت في بعض المواقف شجاعة
الشاعر: زايد الرويس زايد الرويس
#العصر الحديث
#المملكة العربية السعودية
0
101 مشاهدة

يا دمعةٍ شحت ولا ودها تطيح

ما عاد عندي يا دموعي مناعه

وش عاد يعني لو يقولون ب يصيح

الدمع في بعض المواقف شجاعه

كسر الغصن ماهوب من قوة الريح

يمكن يكون ان السبب ف ارتفاعه

يا تاركتني للجفا والتباريح

قلبي معك أمنّت قلبي وداعه

لولا الصبر ذابت شموع المجاريح

ولا ف المحبه كنزٍ اسمه قناعه

والعاشق اللي كل ما ياقف يطيح

هذاك انا ما عاد عندي مناعه

رد: ديوان شعراء السعودية في العصر الحديث (متجدد)☘️☘️
 

قصيدة أحبابنا يا عين ماهم معانا
الشاعر: زايد الرويس زايد الرويس
#العصر الحديث
#المملكة العربية السعودية
0
100 مشاهدة

تو المنام.. الله يسامحك يا عين

بنسهر الليلة سوى وش ورانا؟؟

ما دام عنا الناس بالنوم غافين

بنلملم اطراف السهر في سمانا

يا عين هذا الدمع خليه بعدين

والا اذرفيه وبللي به مسانا

يا عين اكيد انك بحزني تحسين

دام الفرح يا عين راح ونسانا

الغايبين اللي خذوا قلبي سنين

راحوا بعييييييييد وزاد معهم ظمانا

يا عين ما فيه اي داعي تلومين

أحبابنا يا عين ماهم معانا

رد: ديوان شعراء السعودية في العصر الحديث (متجدد)☘️☘️
 

قصيدة بعض الدموع
الشاعر: زايد الرويس زايد الرويس
#العصر الحديث
#المملكة العربية السعودية
0
100 مشاهدة

طال الطريق وضاع باب المواصيل

وانكسرت الخطوه وماحدٍ لمحها

وتكسرت وسط الدروب القناديل

والبسمه الخجلى عذابي فضحها

ياغايبه بالله وين المراسيل؟

اللي تفرّح خافقي لا فتحها

الليل في بعدك ابد ماهو الليل

سود الليالي ماحدٍ قد مدحها

لاصرت جالس بين هم وغرابيل

وطيوف حزنٍ يعتريني شبحها

وشلون ابفرح وانتي ابعد من سهيل

على عيونٍ مات فيها فرحها

ليالي الماضي تحث المقابيل

وعظام شوقي كل حزنٍ لفحها

تبكي عيوني والبكا يقتل الحيل

وياليت عيني تسمع اللي نصحها

ما كل دمعه تنمسح بالمناديل

بعض الدموع تطيح ماحدٍ مسحها!!

رد: ديوان شعراء السعودية في العصر الحديث (متجدد)☘️☘️
 

قصيدة صباحات معتقه
الشاعر: زايد الرويس زايد الرويس
#العصر الحديث
#المملكة العربية السعودية
0
96 مشاهدة

وين انا عنك.. يا العذب.. والعذب الرقيق

دام مسراي يتمرجح.. على خيط الظلام

صارت السكه ب عيني.. مدينه من حريق

تلتهم كل المسارات... ب شفاه الكلام

والرياض.. الحلم.. والحلم.. ما يعتق طريق

لو عيوني تعتق الدمع... ضيقات.. وملام

آآآه تولد... وآآآه تدفن ب صدرٍ ما يضيق

وانت صوتك ينتشلني... من يدين الزحام

كم حسدت العقد صدرك.. وخاتم من عقيق

في يدك.. لو نامت الناس.. يسهر.. ما ينام

يا حبيبي وانت الابعد... والاقرب من شقيق

ضمني لك حلم... ب اهديك سربٍ من حمام

ودي اتعلّق ب صمتك... ويديّني تريق

ما تبلّل من حنيني... على اطراف الغمام

ليه ما اسكر في حضورك... ونفحاتك رحيق

يا المعتّق ب الصباحات... قدر عام

ما يساورني بك الا انت... لا بليّت... ريق

وصرت اشوفك تختصرني.... سواليف.. وغرام

بعدها.... ويني!!! ووين انت!! يا العذب الرقيق

نشعل اللحظات نشوه..... ونطفيها ظلام!!!!!!

رد: ديوان شعراء السعودية في العصر الحديث (متجدد)☘️☘️
 

قصيدة الرسايل كيف تاصل بلا ارقام
الشاعر: زايد الرويس زايد الرويس
#العصر الحديث
#المملكة العربية السعودية
0
100 مشاهدة

من ورى خشم الليالي والايام

عاش حبك لو جفاك يتكاثرك!

أنت حلمٍ ما يجيّبن الأحلام

مثل عطره يوم قلبي تعطّرك

فاح ريحك فالورق قبل الاقلام

وف يديني يوم طاريك صوّرك

تبتسم ذكراك واسهرك ما انام

عادتي لا من تذكرتك اسهرك

آه يا ما احلاك عامٍ ورى عام

وآآآه يا خوفي بعد عام لا اخسرك!

غابت اخبارك وانا قلبي حطام!!

كل ما طيفك عثى فيه! دوّرك!

الرسايل كيف تاصل بلا ارقام!!!

وكل من حولك نسوا قلب يذكرك!

نفذّوا يا حبيبي حكم الاعدام

في حبيبك وانت لو لام يعذرك

يدري انك عايشٍ حزن الايام

ويدري ان الوقت فيه يتكاثرك!

رد: ديوان شعراء السعودية في العصر الحديث (متجدد)☘️☘️
 

قصيدة أنا اقصد حبيبي
الشاعر: زايد الرويس زايد الرويس
#العصر الحديث
#المملكة العربية السعودية
0
100 مشاهدة

هيه يا الليل: ما شفت البعيد القريب؟

ما لمحته كذا صدفه.. بوسط الدروب؟

إيه.. انا اقصد حبيبي.. ليه؟ عندي حبيب!

غير من له رخصت عيون غير القلوب

غاب صوته وهو ماله عوايد يغيب

لو تركني شروق يمر قبل الغروب

آآآه من ضيقتي وآآهين مما يريب

صدر عاشق من انفاس المحبة يذوب

وش ورا دمعتي غير البكا والنحيب

إن سترها الظلام! الصبح ماهو كذوب!

ليته يمرني قدام صبري يشيب

ويدري اني كسيت الروح ثوب الشحوب

كل جرحٍ سوى غيبة حنانه يطيب

وكل ضحكة سوى ضحكة عيونه ذنوب!

ليه يا الليل ما جبت البعيد القريب

؟يومك تمد جنحانك بوسط الدروب

رد: ديوان شعراء السعودية في العصر الحديث (متجدد)☘️☘️
 

قصيدة ليل السهر
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

ليل السهر من جنونه تنبت أحلامي

على ارض مستقبلي واقطف تناهيدي

يا ضيقة الصدر وش دخلك ف ايامي؟

أنا كذا! كل يوم أعيش به عيدي

مبسوط بالحزن.. يمكن أعشق آلامي!

وإن كان ودك تزيدي ضيقتك زيدي

يا سهل دنياي لو هي صعبة أرقامي

يا شح غيمي! ويا ما اوسعك يا بيدي

ويا حلو حزني إلى من صار متسامي

يشتاق للدمع يستانس لتنكيدي

كني غدير وكأنه من عمر ظامي

ولاعمري اخلفت مع حزني مواعيدي

والا السهر.. من جنوني تنبت احلامي

على نجومه.. وهي تقطف تناهيدي

رد: ديوان شعراء السعودية في العصر الحديث (متجدد)☘️☘️
 

قصيدة قبل لا أمشي
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

نويت اسلّم لك عيوني قبل لا امشي

يومين.. من بعدهن رجّع لي عيوني

ما ودي آشوف غيرك لا ارتفع رمشي

ياللي عيونك تلوّن بالفرح كوني

لوّ اني اقدر أخذتك معْي في عفشي

عشان ما تسهرين الليل من دوني

قلبك واعرفه يطيح من الوله مغشي

وقلبي واعرفه بدونك يشعل جنوني

مرات احسّه بكل اسرارنا يفشي

لا من لمست الغلا واشتدت طعوني

يا حبي اللي بياخذني على نعشي

من قبل اوادعك وشلونك ووش لوني؟

انا دموعي قبل لا اواااادعك تمشي

شفها تحدّر بيدّينك من عيوني!!!!

رد: ديوان شعراء السعودية في العصر الحديث (متجدد)☘️☘️
 

قصيدة تحضير الارواح
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

الليل عمره طال.. والشيب ما لاح

كأن ما للصبح هالليلة طموح!

أزرع أراضي ه السهر حزن.. وارتاح

واحصد من الذكرى تفاصيل مجروح

واعلق آمالي على شكل.. مصباح

وتهب ريح الياس.. والباب مفتوح:

للدمعة اللي ملحها بالأسى فاح

لو ذكرياتي بالوله دايم تفوح

يا موجعتني.. طاري البعد فضّاح

الصمت بعض احيان تنهيدة البوح

ياما خيالك مر في وسط الاقداح

أروى واحس ان العطش بلل الروح

تخيلي!!.. كن البشر صاروا اشباح

من يوم غبتي.. ما سوى طيفك يلوح

والشوق وش هو غير تحضير الارواح؟

أشتاق لك وطيوفك تمر... وتروووح

ما اقول قلبي من بعد غيبتك طاح

أقول قلبي صار مستودع جروح!

ولا اقول عمري من بعد غيبتك راح

أقول صار العمر بيديك مذبوح

رد: ديوان شعراء السعودية في العصر الحديث (متجدد)☘️☘️
 

قصيدة يا لابسين الأقنعة والقناعات
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

سر يا قلم.. والا بلا سر ويشيع!

لا للنفي.. ما دامت جروحي اثبات

البارحة... فليّت حزني.. مشاريع

يصب حزني كاس.. واقول له.. هات!

لين انفتح لي من جروحي مواضيع

قفلتها.. قفلتها.. بس! هيهات

يا مشتري طعنات قلبي وش تبيع؟

حدود ما املك حلم مجروح وابيات

واصحابي اللي قابلوني ب توديع

سافرت.. ما قالوا لروحي سلامات

طاحوا.. قبل لا يرتفع ذنب ويضيع

طُهر السوالف بابتعاد المسافات

أعلنتها فرقا.. من الريع للريع!

يا لابسين الأقنعة! والقناعات!!

رد: ديوان شعراء السعودية في العصر الحديث (متجدد)☘️☘️
 

قصيدة خطوط المشاه
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

تهزع ليلي البارح عن احلام وفجر مخذول

على شرفة صباحه ذكرياتٍ ميتة تنهال

يساوره القلق ويغمض ايامه عن المعقول

ويرسم مستحيله في جبين الواقع الدجال

وانا امشي في طريق المشكلة ما المح رصيف حلول

ولا به للمشاه خطوط تمشيها سوى الترحال

حبيبي وانت فجرت الغياب ف دفترٍ مذهول

عجز يستوعب غيابك وموت العشق والآمال

وش اكتب وانت ما خليت حرفٍ ما بكى مغسول

بدمعٍ فيه من لون المطر وحكاية الأطفال

وش اكتب والقصايد خارطة جرح ووله مشلول

عجز ياصلك وانكسرت شموسه واستطال ظلال

حبيبي وانت تاخذني بدون يدين للمجهول

وش المستقبل إن ما شفت شعرك ثايرٍ ميّال

وش ايامي بدونك وانت كل العمر عرض وطول

وانا عمري بدونك ذكرياتٍ ميتة تنهال!

رد: ديوان شعراء السعودية في العصر الحديث (متجدد)☘️☘️
 

قصيدة أنصحك تكسر الجوال
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

أرسل رسالة.. على الجوال

لا صار مانتب... محاكيني

ترى الرسالة بربع ريال

جملة.. قصيرة...تكفيّني

إفتح من القائمة... إرسال

وارسل.. وهي لازم تجيني

لو بس جملتك.. كيف الحال

أدري ان.... ما انته ب ناسيني

يا صاحبي... والقلوب اطفال

وأدناة حاجة.... تسليني

من كثر ما الهم جال وصال

في قلبي.. استمطرت عيني

وانت تعرف ضيقة الرجّال

وتعرف وش كثر تعنيني!

أنا انصحك.. تكسر الجوال

والا.... بسرعة تحاكيني

رد: ديوان شعراء السعودية في العصر الحديث (متجدد)☘️☘️
 

قصيدة حاجات
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

فيه حاجات ما نقدر نسويها

مالنا غير نجلس ونتحراها

أجمل ايامنا تسكن وننفيها

وكل ما نكبر شوي نتناساها

بين الايام حاضرها وماضيها

جمرةٍ خايف امشي واتوطاها

وخايف آكحّل الأحلام واعميها

لا انتهت بي وانا توي بمبداها

والليالي لو تسولف مآسيها

شفت الاحزان تركض في شفاياها

ياحبيبي.. حبيبك راح ب يديها

ما بقى له سوى جملة تهجّاها

فيه حاجات لو نقدر نسويها

كان ما نجلس كذا ونتحراها

رد: ديوان شعراء السعودية في العصر الحديث (متجدد)☘️☘️
 

قصيدة قبل الزيارة
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

ليل السهر ينزف وجع من وريده

وانا اعسف احزاني وله وامتطيها

اسبوع وجروحي قديمة جديدة

اسبوع والتفكير منها إليها

اللي غلاها دون ما اشعر تزيده

أحبها.. واشتاقها.. وارتجيها

هي راس مال الحب واجمل رصيده

من دونها الدنيا ب اهلها مابيها

من حسنها ماحدٍ يبيها بعيده

من حسنها كن المرض هام فيها

يا اللي لكم معها علاقة وطيدة

قبل الزيارة دام ما اقدر أجيها

أخذوا لها بوكيه ورد وقصيدة

وقولوا لها اني دايم اسأل عليها

رد: ديوان شعراء السعودية في العصر الحديث (متجدد)☘️☘️
 

قصيدة يضيع الشارع بصمتي
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

مسا التنهيد واحساس الغياب ونكهة الحرمان

مساءٍ ما يليق الا... بدمعٍ.. فالعيون يبين

تمادى الليل بجراحه وشكلّني بدون الوان

حضنت الحزن في قلبي وصافحته بدون يدين

حبيبي كلما هبّت رياح الشوق فالوجدان

أسيّل ذكريات ايام عاشت فالخيال سنين

واحس انك تجي وتمرني من سكة النسيان

وانا ازرع لهفتي بك فالدروب بنشوة التخمين

يضيع الشارع بصمتي وخطواتي بلا عنوان

أدور عن رصيفٍ ينتشل من صدري السكين!

طعني هالغياب وما نزفت الا وله واشجان

قصم ظهر الفرح قشة غيابٍ ما انتهى للحين!

رد: ديوان شعراء السعودية في العصر الحديث (متجدد)☘️☘️
 

قصيدة الجهات الخمس
الشاعر: زايد الرويس زايد الرويس
#العصر الحديث
#المملكة العربية السعودية
0
99 مشاهدة

تهب الريح من كل الجهات الخمس في صدري

واحس غصون قلبي يوم مالت وانكسر غصنين

ياليت الدمع ما طاح وسرق من دفتري حبري

وخلاني على دربٍ طويل آمرّر الرجلين

غريب وما شعر في غربتي غير انت يا شعري

منافي يا دروبي والوطن في ظهري السكين

سهرت ويا صباحٍ مُر مَر وما جلب فجري

عجزت القاني من البارح المظلم إلين الحين

ركضت وما دريت ان الطريق اللي ورا ظهري

نسيت ارجع وانا قدام لا ارجع ب اكسر الثنتين

مآسي يا أمآسي ليتني حسيّت من بدري

وانا حسيّت لكن ضيّعتني نشوة التخمين

بعد ما استسهلتني كل دمعه ودها تجري

بعد ما طاح قنديل وطفى شمع ونسيت سنين

عرفت ان السهر لا طال بعض احيان ما يغري

وذكرت اني ثلاث سنين أو أكثر بدون يدين

تعبت وليتني قدام اطيح من التعب أزري

ولا اصبح عرضةٍ للوم والتقريع والتأبين!!

ملكت امري ولكن فالحقيقه ما ملكت امري

ولالي منه غير اغلى طموح وضحكة النسرين

ابصبر علّها تُفرج واذا ما فادني صبري

ب اقول اني صبرت وما قدرت اقطفك يا احلى تين

واذا هبّت علي الريح ب افتح للهوى صدري

بسيطه كانها غصنين!! يعني لا انكسر غصنين!!!!!؟؟؟

رد: ديوان شعراء السعودية في العصر الحديث (متجدد)☘️☘️
 

قصيدة تنطفي نجمه
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

يستريح الليل ما مل المسافر

ويتهادى الصبح والسكه حزينه

في عيون الناس ما للذنب غافر!

لا توارى العشق ف اسوار المدينه

يا ل هذا الظلم لا من صار سافر

تنطفي نجمه! وتذبل ياسمينه

كن هذا الصدق صار اليوم كافر

كن الاحلام اصبحت فينا سجينه

سيف الاحزان ان تمادى صار ظافر

والسعاده في مواقفنا رهينه

ما بقى بي غير كرهي للتنافر

واحترامي لي وتشتيت الضغينه

وان لحظت ان التمادي صار وافر

قلت يا هذا البحر دوك السفينه

وش يهم الليل لا مل المسافر

للصباح عيون والعزه ثمينه

رد: ديوان شعراء السعودية في العصر الحديث (متجدد)☘️☘️
 

قصيدة أحد ينام وحط راسه
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

يا صاحبي والعشق يحتاج هِمّه

والقلب مُبحر واشتياقي شراعه

هالليل بعض احيان يا ثقل دمه

لا بعثر المشتاق جمر التياعه

أحدٍ ينام وحط قلبه ف كمّه

واحدٍ سهر والعشق يلوي ذراعه

مرفوع هذا العشق من دون ضمّة

مكسور هذا القلب ماله مناعه

غيبتك: تهميش الامور المُهمة

وضيقة تمر البال في كل ساعة

يا وردي اللي ما تمكنت اشمّه

يفداك قلبٍ غيبتك هي ضياعه!

بانثر لك احساس الوله وانت لمّه

مادامك تعرف الغلا واندفاعه

ما ينتهي هذا التعب.. له تتمّه

مادام فيني للغرام استطاعه

والمشكلة والكارثة والمطمّة

قلب الشجاع ليا خذلته الشجاعة!!

رد: ديوان شعراء السعودية في العصر الحديث (متجدد)☘️☘️
 

قصيدة نظرة عيون دارين
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

يا اللي جروحك باقية مثل ذكراك

مشاعري لك تلتهب بين نارين

بين اشتياقي لك وتفسير جفواك

ابكي عليك بعين واحضنك في عين

أزعل عليك احيان واقول أب اسلاك

ألعب على نفسي وانا خابرك وين!

في وسط قلبي وين ما رحتي القاك

غيم وقمر ونجوم.. عطر وبساتين

وانا لو اقدر قلت لك باقدر انساك

ولنفترض بانساك! معقول تنسين!!

ف غيابك التنهيد ينبِت بي اشواك

غابات شوك استنبتت بي من سنين

تنهيدتي لا من تذكرت فرقاك

مثل الحزن في نظرة عيون دارين

رد: ديوان شعراء السعودية في العصر الحديث (متجدد)☘️☘️
 

قصيدة يااللي غيابك طال
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

البارحة رددت ما اطولك يا ليل

على الذي ما مل ينزف طعونه

غنيت من عشقي وحزني مواويل

وقلبي على ضيقاتي اسدل جفونه

يا اللي غيابك طال.. ما عاد بي حيل

على السهر.. شكله.. وطعمه.. ولونه

مع ان حبك ساقني للبهاذيل

لكن عجزت احيا دقيقة بدونه

الناس تبذر لجل تجني محاصيل

وعاشقك يجني دمعته من عيونه

تعبت امني خاطري بالمواصيل

والوقت كشّر قدم وجهي سنونه

أسهر واردد بس.. ما اطولك يا ليل

على الذي يسهر يلملم طعونه!!

رد: ديوان شعراء السعودية في العصر الحديث (متجدد)☘️☘️
 

قصيدة ممنوعة اللمس
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

ليل السهر قاسي وصمته كوابيس

يسهر معي حزني الى مطلع الشمس

والعشق دمعٍ نام خلف الكواليس

منديله الكتمان واصابعه خمس

والذكريات معلّقه ف الفوانيس

تغتالها الضجّه وتحيا على الهمس

كل النوافذ ب الستاير محابيس

والريح ماتت من غبا اليوم والأمس

ليه القلم يغفى ب حضن القراطيس

دام الوله بُنٍ فهم لهجة الحمس

الى متى نكبح جماح الأحاسيس

وانتي قريبه بس ممنوعة اللمس

خليني اتشرّب جنون النواعيس

لا غرّد النوّار في ضحكتك رمس

هذا السهر قاسي وصمته كوابيس

خليك قربي ننتظر مطلع الشمس

رد: ديوان شعراء السعودية في العصر الحديث (متجدد)☘️☘️
 

قصيدة حليب العصافير
الشاعر: زايد الرويس زايد الرويس
#العصر الحديث
#المملكة العربية السعودية
0
98 مشاهدة

يسعد مسا حزن العيون المساهير
الناعسات بكل شوق وحرارة
اللي تضيع بها جميع التعابير
ويضيع شاعرها وينسى وقاره
لأنها اروع من جميع الأساطير
أسطورة متشبّعة بالحضارة
أشوفها غير البنات الغنادير
لو نوف تبكي والقهر حظ ساره
ضحكاتها.. تنهيدها.. كلها غير
فيها الأنوثة كاملة وب جداره
تامر على قلبي.. تدلل.. وش يصير؟
أميرةٍ متحكمة في الأمارة
حتى ولو تطلب حليب العصافير
تشرّ وانا قلبي رهين الإشارة
تطول والا يقصرنّ المشاوير
عيبٍ على قلبي يسوق اعتذاره
أرجع لها باللي تبي دون تأخير
واسرق لها غيمة ونجم ب مداره
واقول يا ست المحبة مسا الخير
هذا طلبك بكل نوره ونارهوانا يكفيّني بدون أي تفكيرلا من حضنتيني بشوق وحرارة

رد: ديوان شعراء السعودية في العصر الحديث (متجدد)☘️☘️
 

قصيدة ثلاثة اهداف
الشاعر: زايد الرويس زايد الرويس
#العصر الحديث
#المملكة العربية السعودية
0
97 مشاهدة

مانيب طيّب.. عليّ خلاف

حالي من الشوق مبريّه

ماحدٍ سمعني ولاحدٍ شاف

دمعات وآهات مخفيّه

من سبة اللي حلاها ناف

فوق النجوم وسطع ضيّه

في حبها الصادق الشفاف

أخذت لي روحه وجيّه

ورتني الظلم والإنصاف

تقسى عليّه بحنيّه

صيفاً يجيني هواها جاف

والموت فالمربعانيّة

أكتب بها القاف عقب القاف

واحلى قصايد رومنسيّه

واقول ياقلبي الخوّاف

رجال وآموت ف بنيّه!!

ويرد قلبي بلاش اجحاف

هالبنت ماهي طبيعية

جابت ف قلبك ثلاث اهداف

وفازت سواة السعوديّة

رد: ديوان شعراء السعودية في العصر الحديث (متجدد)☘️☘️
 

قصيدة حزني معيّد
الشاعر: زايد الرويس زايد الرويس
#العصر الحديث
#المملكة العربية السعودية
0
97 مشاهدة

هالعيد مر وما للافراح طاري

تكتبني همومي وتقرا جروحي

بين الغياب وغصته واحتضاري

حزني معيّد في دهاليز روحي

عجزت لا القاني وانا ف انتظاري

متوّسدٍ ذكراي اغنّي طموحي

يا اللي غيابك جمر شف كيف ناري

تقول للدمعات ف العين: فوحي!

كنت احسب ان العيد ياخذ ب ثاري

من غيبتك.. لكن هدم لي صروحي

كنت الضحيّة والدليل انكساري

يوم انشنق حلمي بصمته وبوحي

لو العزا عنك العزا يا دماري

ما عاد باقي غير ياصلك نوحي

هالعيد مر وما لضحكتك طاري

وانا ابتساماتي تداري جروحي!!

رد: ديوان شعراء السعودية في العصر الحديث (متجدد)☘️☘️
 

قصيدة ارتباك وضياع
الشاعر: زايد الرويس زايد الرويس
#العصر الحديث
#المملكة العربية السعودية
0
96 مشاهدة

ارتباك وضياع واسئله موغله

ارتفاعٍ يؤدي للسقوط الاخير

التفاصيل كانت للأسف مذهله

والمعاني توصلّنا لنفس المصير

الأنوثه لها تفسير صعب اجهله

فيه ريح الخزام وفيه ريح العبير

كان بامكانها قلبي كذا تدخله

وبعد ما تدخله اصبح لديها أسير

بس كان الغرور وكانت المشكله

والغرور ان تمكن صار أمرٍ خطير

يا ضياع الاماني يا ضياع الوله

علموّها تراني بأي لحظه اطير

كل كوكب بهذا الكون سهل اوصله

وكل كوكب الاقي فيه بدرٍ منير

من طلبني حناني مستحيل اخذله

دام جسمي يشيل اليوم قلبٍ كبير

والقصايد معانيها لها تكمله

ما تركت النهر منشان رشفة غدير

لي وجودي ولي اسمٍ كبير احمله

ما يضيع ببساطه باستقالة وزير

اعرف الشعر دايم اصعبه اسهله

وخذت جزل الفرزدق مع عذوبة جرير

بس قولوا لها لاتكمل المهزله

كل شيٍ تبيه اليوم لازم يصير

ارتباك وضياع واسئله موغله

وارتفاعٍ يؤدي للسقوط الاخير

رد: ديوان شعراء السعودية في العصر الحديث (متجدد)☘️☘️
 

قصيدة مترين
الشاعر: زايد الرويس زايد الرويس
#العصر الحديث
#المملكة العربية السعودية
0
96 مشاهدة

ما يبلش العاشق بروحهأ

لا ليا اشتاق شوقٍ شين

وانتي هنا القلب وطموحهأ

عيش لك وارتجيك تجين

مانتب على البعد مسموحه

لو المسافة فقط.. مترين

أكتبك وارسمك في لوحه

ألوانها دمعتين وعين

واقراك ونات مبحوحه

ونيتها من ثلاث سنين

يا اجمل من الحلم وصروحه

واغلى من عيوني الثنتين

حكايتي معك مفضوحه

لو اخفي العشق معك يبين

ومادام ترفه ومملوحه

ومن راسك اليا قدمك الزين

شهادتي فيك مجروحه

ماهوب جرحٍ ولا جرحين

والعاشق اللي يبى روحه

يمشي معك وين ما تمشين!

رد: ديوان شعراء السعودية في العصر الحديث (متجدد)☘️☘️
 

قصيدة تالي الليل
الشاعر: زايد الرويس زايد الرويس
#العصر الحديث
#المملكة العربية السعودية
0
95 مشاهدة

حتى وردني تالي الليل جوال

وانا على شاهي وبسكوت ديمة

الرقم بايخ لكن الصوت قتال

كنه مثل صوت المذيعة حليمة

قالت مساء الخير يا طيّب الفال

قلت ارحبي ترحيبةٍ مستديمة

بالعود والصفري ودلة وفنجال

واجبك يا بنت الأصول الكريمة

وردت بضحكة ثم قالت وش الحال؟

قلت اشهد إن الحال عقبك سقيمة

قالت وهي تضحك بعد مثل الأطفال

وانا بعد كني بدونك يتيمة

من يوم قالتها تزلزلت زلزال

من فجعتي كني مسوي جريمة

قلت ارفعي صوتك ترى مابه ارسال

كذاب لكنّ المصيبة عظيمة

قالت أقول اسمع ترى هرجنا طال

ممكن تصاحبني تراني وسيمة

واسمي الحقيقي أول حروفه الدال

لكن يسمّوني البنات الزعيمة

صحيح أحب الفخفخة واعشق المال

لكن تراني طاهرة مستقيمة

ما عندي امغازل ولا لعب يهّال

ما عندي إلا في الشرف والحشيمة

بس الصراحة قلبي لشوفتك مال

واصبحت وحدك جالسٍ في صميمه

فكّر بعقلك واترك القيل والقال

واحذر تطيع اهل العقول العقيمة

وارسل علي الحين خمسمية ريال

أشحن بها جوال أختي غنيمة

أو طقم غالي فيه خاتم وسلسال

أروح به في عرس ولاّ عزيمة

قلت الحقيقة مانيب رجل أعمال

ولاني بتاجر والموارد عديمة

أنا الصراحة شبه عطّال بطّال

وعلاقتي بالفقر جداً حميمة

والراتب الله يرحم الحال ما زال

محدود والمصروف ربي عليمه

والدين بالآلاف والبنك شغّالي

اكل فلوسي بالربا والظليمة

والسوق طايح والغلا ضيّق البال

والموت والله صاير اكبر غنيمة

قالت تحمّل بس والحمل ينشال

خلك شديد الباس صلب العزيمة

ياخي تصرّف جعلك اتصير نشّال

أهم شي إن النوايا سليمة

لابد تفهمني على كل الأحوال

ما دمت من أهل العقول الفهيمة

قلت إيه والله فاهم اللي على البال

لكن ترى هذي علينا قديمةيا بنت هذا صاير اليوم موالللي تبي تلعب على ابن اللئيمة

يا بنت ما تدرين كم فيه محتال

يلعب على الحبلين وانتي غشيمة

يا بنت كم من جاهلة دمعها سال

من عقب ما جات العواقب وخيمة

والبنت لا اقتفى عرضها بيد الأنذال

والله ما يبقى لها أي قيمة

قالت تبي ولاّ فخلّك على جال

مهوب ناقصني نصايح حكيمة

عز الله إنك للأسف منت رجّال

وانك قليل الذوق ما فيك شيمة

يا لعنبو اللي ما يسطّرك بنعال

حتى يعلمك الغزل يا بهيمة

قالت تفو وصكّت الخط في الحال

مدري تفو هي مدح ولاّ شتيمة

رد: ديوان شعراء السعودية في العصر الحديث (متجدد)☘️☘️
 

قصيدة شموخ المملكه
الشاعر: زايد الرويس زايد الرويس
#العصر الحديث
#المملكة العربية السعودية
0
94 مشاهدة

تكفون خلوني ب هالليله اذوب

مثل ابتسامات الفرح بين الاحباب

باغني الفرحه هجيني ومسحوب

مادام حزني عن مدى ناظري غاب

كاس الفرح في ليلتي ذي مشروب

رشفه ورى رشفه وخلّصت الاكواب

حبيتي يا شمس ما تعرف غروب

شعاعك اشرق بي ولو دونك ابواب

فرحتك خلت حزني يصير مقلوب

حمام حزني سافر اسراب واسراب

أنتي شموخ المملكه ذوق واسلوب

وانتي بيوتي والعرب عني اغراب

هديتي لك قلب يسوى له قلوب

قلبٍ علشانه يموتون الاحباب

رد: ديوان شعراء السعودية في العصر الحديث (متجدد)☘️☘️
 

قصيدة السويدي والعليّا
الشاعر: زايد الرويس زايد الرويس
#العصر الحديث
#المملكة العربية السعودية
0
95 مشاهدة

كنت خايف ينتثر حزني عليك ولا تلمّه

واثر حزنك لمّني كلّي وخلاني كذيّا

واقف فوق السهر.. والحزن يمدحني.. واذمّه!

لعنبو هالحزن.. ساقه فالسهر ضدي حميّا!

وانت بردك برد.. ماهمّه دفاك اللي تضمّه

والا انا بردي مواجع يوم جمرك ما تهيّا

أنت عمرك شفت لك عاشق يشيل بوسط دمّه

شي من حزنه وضيقاته وصبرٍ عنه عيّا!

كل حلمٍ صار حملٍ شايله وازريت اتمّه!

وانت ملحٍ ينتثر في داخل ضلوعي هنيّا

كل ما سولف غيابك عنك جبت اكبر مطمّه

كنّي اللي عن هجير الشمس بالشمس يتفيّا!

لو تعوّد بس!!.. شفت من الغلا كيفه وكمّه

قلب يِنبِت ورد ما بين السويدي والعليّا!

رد: ديوان شعراء السعودية في العصر الحديث (متجدد)☘️☘️
 

قصيدة اخر مسامير نعشي
الشاعر: زايد الرويس زايد الرويس
#العصر الحديث
#المملكة العربية السعودية
0
95 مشاهدة

الصمت دق اخر مسامير نعشي

والا غيابك.. طعنتين البداية

تاقف عليك ايام عمري وتمشي

قبل ارمي سنيني بدونك ورايه

ياللي مكانك بين عيني ورمشي

محتاج لك فبدايتي والنهاية

أذكرك واقف واتنبهك مغشي

وارجع على جرحي وحزنه ونايه

كم قلت لك ضايق ومنكوب عفشي

لا الأرض أرضي لا ولا ذي سمايه

الذكريات تمارس بحزن نبشي

وانا اندهك عن طول صمتك: كفايه

صمتك يدق اخر مسامير نعشي

والا غيابك.. طعنتين البداية

رد: ديوان شعراء السعودية في العصر الحديث (متجدد)☘️☘️
 

قصيدة ظلم الشبابيك
الشاعر: زايد الرويس زايد الرويس
#العصر الحديث
#المملكة العربية السعودية
0
94 مشاهدة

يا صبح قبل اقراك جيت آتهجاك

واكتبك واكتبني معك وانكتب فيك

لعيون لا لقلوب ما تلحق اقصاك

لقلوب لا لعيون بالدمع تبكيك

شمسك قهر شمسك سهر لين تجفاك

شمسك مواجع بارتباكة خطاويك

الظل ما علّق يدينه بشبّاك

وشعاع شمسك ميتٍ فوق اراضيك

للسالفه ريقٍ نشف يوم ناداك

وللجرح صرخه ما تعدت حراويك

ولحكايتي تنهيدتي وانت ما جاك

غير القليل من اكثري بس يكفيك

عن رهبتي جت رغبتي عكس الادراك

ولوحدتي ياسي وظلم الشبابيك

والغيبه اللي أيقظت كل الاشواك

وغفى عليها الورد بالحال تنبيك

يا غايبه لو عانقك دمع ذكراك

فانا معانقني من العام طاريك

قلبي يسولف بك وعيني تحراك

وعطرك على يمناي كم له يناديك

إن غاب صوتك! صورتك بين الافلاك

بروزتها مابين هذي وهذيك

توجّسيني خوف قدام لا اظماك

وخلي غلاي بكل الاحوال يسقيك

واخذيني اقرب من مخدتك واغطاك

واعطيني اللي كل ما احتجتي اعطيك

واذا رويتيني غلا قولي اهواك

توك معي توي معك حب يمديك

العيد ما للعيد فرحه بلياك

عيدي معك عودي لماضي لياليك

خليني اقرا فرحتك واتهجاك

واكتبك واكتبني معك وانكتب فيك