|
رد: ديوان شعراء السعودية في العصر الحديث (متجدد)☘️☘️
قصيدة رحيق الذات
الشاعر: محمد بن عمار محمد بن عمار #العصر الحديث #المملكة العربية السعودية 0 76 مشاهدة توقظ هاجس أفكاري يذكّرني زمانٍ فات يصّورلي ليالٍ في الحقيقة كنت ناسيها جلست أراجع الذكرى على ماشفت من حسرات من أيام الطفولة عقلي الباطن يقاسيها أحاول أزرع البسمه،، بثغرٍ يلفظ الونات على آمالٍ بقلبي قد توفت مع أمانيها زرعتك في شفاهٍ ناشفه من قلة لبسمات لأجل تحيا عروقٍ ميتٍ إحساسها فيها دفنت آمالي بصدري بعد ماماتت بلحظات وواسيت المشاعر مرسلٍ فكري يعزيها أغالط نفسي بنفسي وأقول إن الأمل مامات ولي عشرين عامٍ صدمته مازلت أعانيها رسمتك واجهة مستقبلٍ إغتالته طعنات جحودك، والهجر خصلة، بطبعك ما أدانيها فرشتي الهم في جوفي وغطيتيه بالزفرات توسدتي الخفوق وخافي الونة صنعتيها وأشعلتي لهيب العد في وسط الحشا شمعات خذتي نورهن والنار في قلبي تركتيها بذرتك بالصدر زهرة تغذى من رحيق الذات وجففت الموارد بالعروق وصرت اراعيها أخذتي من خلاصة صحتي ماطاب من ميزات وتركتي لي جروحٍ غايره إحترت أداويها تناسيت الجروح وقلت أباأفتح للأمل صفحات ولكن سيرة الفرقا مع أفكاري تباريها لمحت النور في وجهك شعاعٍ غاشي النظرات ورمشٍ واقفٍ دون العيون السود حاميها شهقت وقلت لك عمري خذيه وهاتي العبرات أبا أبكي وألمح البسمات في الوجنة مواريها ولوإن الفرح ماقد تكرّم في العمر ساعات ولكن قلت أبا أصنع فرحةٍ لعيونك أهديها عزفتك باللحن موّال، وغنيتك مع الأبيات كتبت بحبر من دمي، قصيدة لك أغنيها ومن بحرك طويت شراعي وسلمّت للموجات تقاذف لين يرسي مركبي بأبعد شواطيها وأنا ماأملك دليل اللي تسوينه ولا إثبات سوى قلبٍ يحبك، والشهادة جاحدٍ فيها |
رد: ديوان شعراء السعودية في العصر الحديث (متجدد)☘️☘️
قصيدة نجاحي بعيد الإحتمال
الشاعر: محمد بن عمار محمد بن عمار #العصر الحديث #المملكة العربية السعودية 0 75 مشاهدة مدّ كفه وإنتزع، وردٍ بوجداني ذبل ذاويٍ بأسباب هجره صار بغصونه ذبال من ترعرع بالحشا وهو نموه ما اكتمل ماحدٍ في الخلق جاء كامل ولله الكمال والحشا ماعاد يستحمل، معاناة وعلل من طعون الوقت وصده باديٍ فيه إعتلال في سماء فكري سناء برقٍ بنوره إشتعل وجاوبت كل المشاعر وسط جوفي بإشتعال والمدامع إستثارت، نوّها، بي وإمتثل وشعبة أنفاسي بصدري أذعنت للإ متثال صرت مع طيفه سجينٍ وين ما حلّ ورحل علمّتني نظرة عيونه سبب شد الرحال بعد مانجمه توارى في سماء فكري وظلّ إنكسر عقبه شعاع الشمس وإمتد الظلال عاقت الذكرى لقانا والقدم له، ما وصل وقصرت حبال المودة وإنقطع جسر الوصال عقب وقتٍ راح إلى من غبت جاني أوسأل صار ما يسأل!عن أخباري مجرد لو سؤال كيف ذا؟ وأنا ضليعٍ في مداهيل الغزل أسمع إن الذيب تالي وقتنا صاده غزال ودام نور العين دّور، له على غيري بدل بأتركه! يلقا وأناغيره بألاقي لي بدال كل شخصٍ سلمّ أمره في حياته وإتكل قلعته!! دامه على غيره يريد الإتكال والقدم محفوظةٍ، في دربها مهما حبل لونصب فخه وحاول شربكتها في الحبال مهما هبّ الريح عمره ما يزحزح له جبل وما بكلٍ لو ثبت يرسي كما ترسي الجبال وأدري إن كلش على درب المحبة محتمل وإن نجاحي! ميّه بميّه، بعيد الاحتمال كلما أفتل حبل وصله، ردّ ينقض ما إنفتل إنقضى عمري وأنا وياه في نقض وفتال جففّ لبير الغلا، من عقب ما ثار الجدل وعرقل لوادي المشاعر من سبب طول الجدال وفاض جمٍّ بالنواظر، أحرق أنصاف المقل وسجّل بدمعي من الحسرة على خدي مقال وغاض منسوب العباير بالمحاجر وإختزل والهوى راعيه عينه، ماتجيد الإختزال ماهقيت إن شوف زينه للعواطف إبتذل ماشيٍ له مطمئن وما توقعت إبتذال شوفة المحبوب إلى من جاء زيارة ماختل واثقٍ بحساب خطواته ويمشي بإختيال يحسبون إنه ملاكٍ من سماء الدنيا نزل فارس قادم على الصهوة يدور للنزال كل يوم وناظري من صفحة الخد إكتحل هايم بشعل العيون اللي زهت بالإكتحال كاملٍ وصفه على ما فيه من حسنٍ ودّل جمّله رب الخلايق، حط به ذوق ودلال ماتعّود شيل حملٍ وأعتقد جسمه ثقل والاّ هذا واللي مثله! مايشيلون الثقال لوبغيت أضرب على أوصافه مع العالم مثل مالقيت بجملة المليون. في زينه مثال لا اعلن برأس المؤشر، معمل إعداد الجمل يرسل النوتة تترجم كل مفهوم الجمال وأطربت بألحانها الهاجوس والبال إحتفل ومن سحر نغماتها، عاشوا بجّو الإحتفال معتلي للنون خطٍ، مثل تقويس الهلل والسيوف صفوف وقدٍ شوفته، للعقل هال ونابيٍ نبّا ظهوره، شوفته للقلب تل شقق اللبّة، سوات الفقع بسفوح التلال مفترش في حوض بيره مااعتلا ظهرالجمل وإيتمايل بالتثني لانهض مثل الجمال وانتثرمجدوله اللي من على متنه خصل قلت أنا هذي سجايا اللي كريمين الخصال ودار حذا فه، وبدّ ل، ماظهر لي به خلل في توازن يقبل ويقفي، ولا فيه إختلال آتجمّد...!! لا تعداني، بوضعٍ مفتعل وآتراجع خطوتينٍ له، بنفس الإفتعال ولاسألت القلب وش به فالمحبة ماعتزل قال ما ظنيّت عندي نيّة للإعتزال |
رد: ديوان شعراء السعودية في العصر الحديث (متجدد)☘️☘️
قصيدة مفهوم الأذواق
الشاعر: محمد بن عمار محمد بن عمار #العصر الحديث #المملكة العربية السعودية 0 75 مشاهدة عنكم يانورالعين أنا ما تخليّت بس الظروف أحكامها بُعد وفراق لا تحسبين إني نسيت وتناسيت سكان، قلبٍ بين الأضلاع خفاق أنا قريبٍ، حولكم، ما تعديت يجذبني الداعي وأجي حيل مشتاق مشتاق أشوفك دون موعد وتوقيت أشفي غليلي مع تباشيرالإشراق مامر يومٍ في غيابك، تهنيت والحال من طول النوى مابعد فاق شربت منقوع الصبر، لين مليت ياناس، كأسه مرّ، ماهو بينذاق لا اظلم سواد الليل بالجوف حسيت شيءٍ على رمانة القلب، دقاق الله، من ليلٍ لحيّك، تعنيّت وأرجع وراس المال دمعات وشهاق أنا أشهد إني بحق نفسي تجنيّت وأضرمت نارٍ بالحشا تحرق إحراق والظاهر إني في معاييري أخطيت وتلخبطت في سلتي كل الأوراق والله لوهرجي،على واحدٍ ميت إن كان قام وضّمني حضن وعناق لشهلا العيون ودافي الكف ضميّت عشت الحياة بكل مفهوم الأذواق |
رد: ديوان شعراء السعودية في العصر الحديث (متجدد)☘️☘️
قصيدة لبّى عيونك
الشاعر: محمد بن عمار محمد بن عمار #العصر الحديث #المملكة العربية السعودية 0 73 مشاهدة ساعة ندهني قلت لبّى عيونك ولبّى عيون أمٍ سعت في مجيّك يا منهكٍ حالي، بزايد فنونك ماشفت أنا مع جملة البيض زيّك لون الزهر لوّن مفاتن غصونك مدري؟ قمر وإلا القمرهو سميّك أو القمر يغار من حسن لونك خذ إنعكاس النور من وهج ضيّك مابين غابات الرموش وجفونك أسبح في بحرالعين وأنعم بفيّك ولاثار بركان إبتسامة سنونك يرمي حمم شهد العسل نظم ريّك أسترخي بنشوة لماطر مزونك وأستوحي إلهامي برشّات ميّك لوتدري إني ما أقدرأحيا بدونك إن كان ما عذبّتني بجور،غيّك |
رد: ديوان شعراء السعودية في العصر الحديث (متجدد)☘️☘️
قصيدة حالة وراثية
الشاعر: محمد بن عمار محمد بن عمار #العصر الحديث #المملكة العربية السعودية 0 71 مشاهدة على شط الهواجيس المثيرة في جدل مسموع تعّرض، مركب أفكاري، لهزاتٍ غراميّة وأصبح في محيط الفكر أرشيف الغلا مطبوع على شاشة عيوني ينعرض في صورةٍ حيّة وصارت بين عيني والوهم لأجل الصور مشروع يديره هاجسٍ مدعوم،، بأفكارٍ خيالية والى منيّ تقدّمت بطلب، مع عبرتي مشفوع تجي لي صورةٍ يطلع، بها لقطات وهميّة تذوب الصورة بعيني وتهلّ من العذاب دموع على صفحات خدّي، ترسم أبعادٍ، ثلاثيّة أشوف البُعد الأول عبرةٍ تستفتح الموضوع على رأس السطر تكتب عناوينٍ رئيسيّة تصوّر فرحةٍ ماتت غدر..! منها الأمل مقطوع وتشرح لي، تفا صيل العذاب، بكل عفوّية وثاني بُعد أحسّ الصدق لامس صوتها المسجوع لها فيني المشاعر تستجيب.! بشوق وحنّية على عذب الكلام اللي كأن الشّهد به منقوع وضوحه يشبه الألمّاس.! من زود الشفافيّة وثالث بُعد صّور قلبي اللي في الهوى موجوع وحدّ د لي،، عذابه بأربع أسباب أساسيّة فراق وهمّ وجرح وغمّ، كله في الحشا مجموع وقلبي ماطرى عنده!! على نسيانها، نيّة إلى منيّ نهيته صدّ عنها بالكثير إسبوع وإذا عاد وسألته؟ قال، ذي حالة وراثيّة حقيقة!! كل ممنوعٍ ولو طال الزمن متبوع ألا يانعنبو هالقلب!! أبد، ماشفت أنازيّة |
رد: ديوان شعراء السعودية في العصر الحديث (متجدد)☘️☘️
قصيدة الجبين المستدير
الشاعر: محمد بن عمار محمد بن عمار #العصر الحديث #المملكة العربية السعودية 0 70 مشاهدة قالت إنته ولد بن عمار قلت إيّه أناهوّا يابعد كل العذارا اللي بهالدنيا اهتوو ساريٍ حبك بدمّي يانسل آدم وحوّاء والمشاعر يالغلا ماقبلك انسان إحتوو شوفي حالي ياملاكي من غيابك ويش سوّى وشوفي عيوني من آثار السهر كيف استوو آآآآه يانار بصدري الحشا منها يكوّى من لهبها ذاب قلبي والسراجيف انكوو من جمالٍ لويشوفه القمر ماعاد ضوّى والكواكب في مدارات المجرة انضوو ماذبحني كود منقوضٍ على الردف ايتطوّى وخصلتينٍ من على ثنية حجاجك انطوو والجبين المستدير اللي كما برّاق نوّا لا كشح ضيّعت دربي، والتفاكيرانتوو وخصرك اللي مثل عود الخيزرانة ايتلوّى كسّرأرقابٍ تراعي لك بمشيك والتوو كلما حاولت في نفسي على بُعدك تقوّا ألقى قلبي والعوطف من فراقك ماقوو مطلبي يانورعيني لا تواجهنا تروّى لأجل عيني والمشاعرمن جمالك ماارتوو |
رد: ديوان شعراء السعودية في العصر الحديث (متجدد)☘️☘️
قصيدة القناعة كنز بايد
الشاعر: محمد بن عمار محمد بن عمار #العصر الحديث #المملكة العربية السعودية 0 70 مشاهدة القناعة كنز، بايد في يد الشخص الشحوح والصبر مفتاح نقمة مع عديمين الجلد الصراحة تبني ذات اللي يشيّد للصروح تدعم أركان وأساسات المباني في صلد من يدوّر عز نفسه والمعالي والطموح فحلهّا في ايديه ويقدر يدركه كانه ولد ومن يدور للمذلّة وين ما يبغى يروح دربها موجود ومن مثله، ألوفٍ في البلد لا يغرّه ما يشوفه لو بدأ له في وضوح ياما قبله من طغى، لاشك وين اللي خلد للنصيحة هالزمن ماعاد ذاك اللي نصوح راحوا أهل النصح وأصبح عهدهم مجدٍ تلد |
رد: ديوان شعراء السعودية في العصر الحديث (متجدد)☘️☘️
قصيدة لوحة الإحتضار
الشاعر: محمد بن عمار محمد بن عمار #العصر الحديث #المملكة العربية السعودية 0 70 مشاهدة مع شعاع الأمل إنشق صمت الغمام وسالت الشمس ترسم لوحة الإحتضار إنطفت ناري اللي مشعله بإضطرام شوقي الملتهب،، في حيرةٍ وإنتظار وإنقطع عقد فكري في عتيم الظلام لمّه الفجر،، وأعلن به طلوع النهار حرت مابين لوم النفس وهمس الغرام ما ملكت الشجاعة،، بإتخاذ القرار حبها وسط جسمي ساريٍ بإنتظام يحتضنها خفوقي، كلما الدم دار حل مبعوثها طيفٍ عليّ في المنام وسط لحظة ذهول، بنشوة الإنتصار يتهم قلبي اللي،، منهكٍ بالهيام وبالمقابل، يقدّم،، صيغة الإعتذار |
رد: ديوان شعراء السعودية في العصر الحديث (متجدد)☘️☘️
صيدة أبدع المنظوم
الشاعر: محمد بن عمار محمد بن عمار #العصر الحديث #المملكة العربية السعودية 0 68 مشاهدة قال بن عمار، من هرجٍ بداه أبدع المنظوم، من قلبٍ صويب من كلامٍ واحدٍ لي قد حكاه هاض مكنوني وأنا جرحي عطيب أبدي بإسم الله، وأرجيه برجاه من رجا المعبود عمره مايخيب حاملٍ الطير، في واسع فضاه وسامعٍ مشي النمل، مع الدبيب من شكا حاله، على ربه شكاه قابل الدعوات، من عبده قريب مابكلٍ، بيصيد، اللي رماه إحتمال الرمي، يخطي أو يصيب وما نزكيّ أحدٍ على الله فيَ خَطَاه ياما صاد الفخ من طيرٍ وذيب عشت حبٍ ماذكر في هالحياة وإثر مالي في الهوى حظ ونصيب مخاويٍ سرحان في رجمٍ رقاه أسحب الوناّت مالي من مجيب حبها في القلب مدري عن مداه من سببها شبت من قبل المشيب الهوى، من عقبها، ماله طراه والحياة، اللي بلاها، ماتطيب زولها يطري عليّ وسط الصلاة وصوتهاعن مسمعي عيّا يغيب وآعذاب اللي هواها قد رماه عايشٍ من بين، ربعه كالغريب نورها اللي مثل بدرٍ في دجاه أو كما برقٍ من أطراف الشعيب يجهر اللي مستخيلٍ من ضياه من نظرها قال ذا شيءٍ رهيب بلحظها اللي وصل حدّي منتهاه سهمه القتّال من نظرة يصيب والشعر منثور، زاهي في، بهاه ايتهلهل، سابحٍ مثل السبيب لو أعددّ،، ماحوى حسن الفتاة ماهقيت،، إن القوافي تستجيب بأكتفي باللي ذكرته من صفاه خايفٍ هرج العواذل في الحبيب مايطيب الجرح من شيءٍ دهاه ومايداويني، علاج ولاطبيب غير منهي، غاية القلب ومناه الدواء بإسلوبها، شيءٍ عجيب تسعف، القلب المولع من شقاه من هواها صايرٍ حالي صعيب ويستريح القلب من زايد عناه ويستريح البال من فكرٍ عصيب وآتهنّى بشوف معسول الشفاه وأشكر الله خالق الكون الرحيب |
رد: ديوان شعراء السعودية في العصر الحديث (متجدد)☘️☘️
قصيدة أطرش الزفة
الشاعر: محمد بن عمار محمد بن عمار #العصر الحديث #المملكة العربية السعودية 0 69 مشاهدة هلا باللي حمولي منه في درب الغرام ثقال سلامٍ ماقدرنا من غلاته نختصر نصفه تحياتي مع الأشواق مافيهن حكي وجدال حملها طايرالورقا حسب عنوانه ووصفه ترانا ندعج من الهيل للضيفان صفر دلال ونورالعين سابقنا بكرم أخلاقه، ولطفه هلابه ياهلابه عد مامزن الغمامه سال نتّوج مجلسه وسط الخفوق بعالي الشُرفه عزيزٍ مارأت عيني لحسنه في العرب أمثال عقب شوفه وبن عمار نومه ماهنا طرفّه عليه الله أكبر صابني من غيبته سلاّل جميع أطراف جسمي خاملاتٍ صابها رجفه عيونه ناعساتٍ من سحرهن يشعلن إشعال وصافي الشهد ينزف بالثنايا داخل الشفه وخصرٍ مثل غصنٍ كل ماهب الهوى به مال وجديلٍ يرفعه ليمن بغى يجلس على كفه إلى منّه كشف خده لنور البدر صار هلال توارى البدر من خلف السحايب حشمة وعفّه متى مامّر من عندي يزلزل داخلي زلزال وأغيب امن الوعي وأصيركنيٍ أطرش الزّفه أنا لولاي أخاف اللة لأعلّق صورته تمثال أناجيها بنصف الليل إلى من صرت بالغرفه ولكن خايفٍ من قول بن عمار حاله مال وهم ماشافوا اللي صار ومايدرون عن ظرفه صفالي مدةٍ قلت الهوى ماعاد به عذال وصرنا بالسوالف،، لاهرجنا نرفع الكلفه تهنيت بوداده،، يوم قلبي،، للغلا ميّال ولكن عقب هاللي صار، عفته مالي بعرفه تمادى في عناده والجفاء ماشفت له حلاّل وحالي أصبحت للناس عقب الستر منكشفه ألاياوبل قلبي كان مالي في الهوى مدهال وأنا ماني نكوف وما أداني راعي النكفه أنا فعلا هويته والغلا في مهجتي مازال ولكن هنت قلبي، يتركه رغمٍ على أنفه بعد ماعافني عفته ولالي به على أية حال أ نا وش لي بخلٍ طايبٍ من عشرتي شفّه |
رد: ديوان شعراء السعودية في العصر الحديث (متجدد)☘️☘️
قصيدة الموااادع
الشاعر: محمد بن عمار محمد بن عمار #العصر الحديث #المملكة العربية السعودية 0 70 مشاهدة يوم الموادع، لج بالفكر لجّاج قامت تحشرج، عبرتي مع ونيني الكبد فاحت في الحشا توهج اوهاج والدمع هلّ وباح خافي الكنيني على غريرٍ في البلد، ما بعد داج عمره ثمان وخمس واربع سنيني ياحمس قلبي حمس بنٍ على صاج من فوق جمرالرمث له محرقيني القلب في جوف الحشا يرهج ارهاج وسط الصدرسوات طيرٍ سجيني ماجت بي الدنيا وكعب الرجل ماج من عقب ما قفوّا بمضنون عيني جرح المفارق في الحشا ماله علاج الله على فرقاء، عشيري يعيني والله، لولا المنقدية، والإحراج لأصيح بأعلى الصوت للحاضريني وأقول أنا صكيّت، بابي بمزلاج وطويت صفحات الشقاء والحنيني أفرش لمن يشريني الأرض ديباج ومن باعني بعته ولو هو ضنيني لو كان مدرج في سجل الغلا ادراج بأرشيف قلبي ماخذٍ، صفحتيني ماكل من هو، مدّ، كفّه، بمحتاج وما كل، محتاجٍ، يمد، اليديني وماكل من يارد، على البير هدّاج وماكل من هو صاد، جاب السميني ولا تامن الدنيا، على كل، منهاج لو هي صفت لك يوم، باكر تشيني وترى الدهر مثل البحر كلما هاج يغرق مراكب.!وأهلها،، غافليني |
رد: ديوان شعراء السعودية في العصر الحديث (متجدد)☘️☘️
قصيدة ملمس الديباج والمخملي
الشاعر: محمد بن عمار محمد بن عمار #العصر الحديث #المملكة العربية السعودية 0 70 مشاهدة هليّ المطر يا سحايب هاجسي المبرقه من مزنة الفكر نوٍ بارقه مشعلي يسيل وادي القريحة والشعر يسبقه يحيي منابت قصيدٍ روضها ممحلي معذور راعي الهوى من صاحبٍ علقه أقفا ولا عاد جاء ينشد ولا يسألي من قد تعلقّ فؤاده في الشقا وأعتقه إذا ابتلى في محبة جادل الهلهلي ما صابني غيررمح الشوف والبحلقة مركوز بالصدرجوفي منه يغلي غلي لأبو جديلٍ على الأمتان يوم أطلقه سا فين سابح على الأرداف ومجدلي شق الثغر فتحته، ما تدخل الملعقه وبين الشفايف بريق اللولو المذهلي والخد في صفحته معالمٍ مشرقه وامطوّق الجيد بأنواع الذهب والحلي العين مدعوجةٍ في كحلها، مغرقه من يوم شفته وحالي منه متبهذلي قمت آتوجد وكفٍ فوق كف أصفقه ساعة رماني بسهم الناظر الأكحلي وشوفة بريمٍ زما به، مثل راس فشقه في روضة الصدر لا هايف ولا ممتلي قال أنت قلبك خضر، لا بد ما نحرقه ما دام درب الهوى والعشق به يجهلي ردّيت عجلٍ وقلت القلب فيه شفقه لاشك من شو فتك، الفكر، متبلبلي إلاّ أنت يا روح روحي، ليش هالنعفقه ما تترك الجم للعطشان به ينهلي صافحني، بكفه اللي له بياض ورقه في باطنه ملمس الديباج والمخملي فيه النعومة، حريرٍ داخل الشرنقة مع الخجل صار بالألوان، يتشكلي من طب، في بحر عينه لو ركب زورقه يغرق ولو كان سبّاحٍ ويتمشكلي يا لايمي في وليف الروح، ماأنت بثقه ليتك تخليك، في حالك وتتجملي بعض العرب يتعبك بأموره المزهقة والبعض يسمع سلامك له، ويتجاهلي يا عنك راعي الحسد يبان من منطقه مهما تشدّق بلحن القول وتمهزلي وش مكسب اللي سعى للناس بالتفرقة ما خاف من واحدٍ فوق الملأ معتلي يالله عسى من سعى دمّه يخلط اعرقه يبلاه والي السماء ويطيح متحرولي لو تاصل ايديه قلبي في حشاي اسرقه الحقد، والكره شيءٍ فيه متأصلي راعي الهوى لا طرى له هاجسٍ صدّقه يون وصدره من الزفرات متخلخلي يسهر وهو سارحٍ فكره مع اللي عشقه نومه على الكوع من ضيقة ويتململي شباب والشيب خضّب في الصبا مفرقه وهموم قلبه بجوفه نارها تصطلي ياحظ من هو فؤاده في الهوى ما أقلقه ينام ليله وقلبه، في المحبة خلي ماهو بمثلي لهيب الشوق به مرهقه في حب راعي العيون اللي معه مبتلي كم مرةٍ قلت أبا أفرى الجيب وأشققه وأطوّح الصوت وأنخا عزوتي مع هلي وأصك باب الهوى عن كل من يطرقه وانعم بنومي وهمي عقبهم ينجلي |
رد: ديوان شعراء السعودية في العصر الحديث (متجدد)☘️☘️
قصيدة شهيد المحبة
الشاعر: محمد بن عمار محمد بن عمار #العصر الحديث #المملكة العربية السعودية 0 69 مشاهدة ضاعت أيام عمري والهنا والسعادة راح كله قهرماشفت يومٍ سعيد كلما قلت أبا انسى زاد همي زيادة وإن تعالجت جرحي من عذابي يزيد قولوا لصاحبي وش مكسبه من عناده من عرفته وطبعه ما تغيّرعنيد لاتقرّبت عنده زاد عني بعاده كيف أنا أقرب ونورالعين يبعد بعيد وإنشدوا عاذلي ويش الذي إستفاده العذل ماخبرنا صاحبه يستفيد وأنت ياظالمي، عطني دليل وإفادة هات برهانك وأثبت لنا مايفيد لوقتيل الهوى والحب موته شهاده كان أنا أول قتيلٍ في المحبة شهيد أفتخروآتشرّف يوم أحقق مراده دام قرّر يماشيني على ما أريد لو، وريدي قلم، والقلب دمه مداده مايوفيّه مدحي جعل عمره مديد |
رد: ديوان شعراء السعودية في العصر الحديث (متجدد)☘️☘️
قصيدة بنت رسلان
الشاعر: محمد بن عمار محمد بن عمار #العصر الحديث #المملكة العربية السعودية 0 69 مشاهدة تقهويت الهجوس مهيّله من فكري المشغول تزعفرها الهموم الزايدة شوقٍ على الغالي طرت لي بنت رسلان اللي تشبه طلعة المجمول وتخيّلت إني في كف الحبيبة صرت فنجالي أداعب ورد تينٍ ينزفن، الشهد والمعسول بثغرٍ يشبه الخاتم، مرصّع، بالكريستالي عليها الله اكبر صار حالي في الشقاء معلول طوال الليل راسي فوق كفي ساهر لحالي تمكّن بي هواها في خفوقي ساري المفعول ولا أحدٍ بالعذاراء قبلها قد جت على بالي وجودي وجد من عميت عيونه والقد م مشلول على فرقا الولايف نار شوقه تشعل اشعالي على اللي لامشت قرن الشعر من خلفها مجدول تهصّر، مثل غصنٍ، كلماهب الهوى مالي متى ماسال شلا له على عرض المتن مفلول يجضّ القلب، وأدقّ الصدر حسرة على الخالي وأضيّع دربي اللي ماشيٍ به والعقل مذهول نهاري راح، داخل حيّهم، بأقفاي واقبالي ونظرات اللواحظ، تغضي بسيفٍ لها مسلول ولا يخطي هدفهن، في صميم القلب يغتالي أنا من طالعتني، تهت معها، بغّبة المجهول رمتني، في بحورٍ مالهن أول، ولا تالي مع العالم بجسمي، صرت لاحيٍّ ولا مقتول وجرحٍ ينولد من جرح، زاد الهم، غربالي شهادة، والشها دة، كل إنسا نٍ بها مسئول غلاها، لو يزول العمر.! ما ظنيّت، ينزالي |
رد: ديوان شعراء السعودية في العصر الحديث (متجدد)☘️☘️
قصيدة يوم العيد الوطني
الشاعر: محمد بن عمار محمد بن عمار #العصر الحديث #المملكة العربية السعودية 0 68 مشاهدة يوم كلٍ قام، في عيد الوطن يمدح دياره طاب لي، أمدح دياري، وآتمثّل بالقصيد دارنا اللي في سماها مرتفع رمزالحضارة راية التوحيد يغني، شوفها،عن كل عيد شيخنا عبد العزيز اللي بنى صرح الأمارة وحّد أطراف الجزيرة، رغم كل أنفٍ عنيد قصة التوحيد وما فيها من افنون ومهارة أصبحت جزء من التاريخ، والمجد التليد ملحمة تأسيس والعالم بها، زاد إنبهاره خاضها خمسين عامٍ لان له صلب الحديد حدد الإسلام دستور البلد وأرسى مساره مستمدٍ من كتاب الله، لها الحكم، الأكيد وأصبح التعليم، منهاجه جديرٍ بالإشارة يحتوي التاريخٍ نبراسٍ لماضينا المجيد فيه درسٍ عن قناعة فارسٍ أبدى إقتداره بقوة إلأيمان والإصرار، حصّل ما يريد وفيه عبرة إن مفعول الصبر يعطي ثماره لا تحلى صاحبه، بالحلم، والرأي السديد ومن قرأالتاريخ لازم يأخذ بعين إعتباره منهج التوحيدأساسٍ في بناءالعهد الجديد نجد ياديرة هلي يبشر خصيمك بالخسارة عهد منا، شايلينه، لك إلى يوم الوعيد |
رد: ديوان شعراء السعودية في العصر الحديث (متجدد)☘️☘️
قصيدة الأشقر المقضوض
قصيدة الأشقر المقضوض الشاعر: محمد بن عمار محمد بن عمار #العصر الحديث #المملكة العربية السعودية 0 68 مشاهدة سرح بي هاجسي من يوم شفت الأشقر المقضوض على الأمتان شلالٍ تهلهل عقب ماقضّه عذلت النفس وطرفي مجبره أمشي وهو مغضوض وأنا لولا الحياء والعيب عنه الطرف مااغضّه عثرت وطحت من سبّة جمالٍ هالني مخضوض وقلبي من قبل ما ألقاه ماقد صار به خضّه على كوعي هوى جسمي وأصبح هيكلٍ مرضوض عجب من هالجسم في طيحته ويش الذي رضّه ومع هاللي حصل كله طلع كعب الرجل مفضوض ومن شدّة وقوعي ركبتي والكف منفضّه يخاف من الحبل منهو تلوّع بالحنش معضوض تمادى بقل حرصه في طريقة والحنش عضّه وأصبح كل مايلمح خيالٍ فزّ له مجضوض مثل فزّة مريضٍ عن يد الكاوي من الجضّه يجوز إنه على هالفعل من عذ النا محضوض وإذا ماخاب ظني واحدٍ من ربعنا حضّه * |
رد: ديوان شعراء السعودية في العصر الحديث (متجدد)☘️☘️
قصيدة مفهوم الغرام
قصيدة مفهوم الغرام الشاعر: محمد بن عمار محمد بن عمار #العصر الحديث #المملكة العربية السعودية 0 66 مشاهدة ناقشته أسباب الفشل لحبٍ تداعى، ما اكتمل متمسك بآخر آمل وحاولت، قدر المستطاع إني أبّرر، موقفي باللي حصليّ، وأكشفي وابصم على ذا واحلفي من غير تزوير وخداع لوكل من جاء واقطفا وردٍ لغيره، بالخفاء ما عاد في الدنيا وفاء والعرف بين الناس ضاع ظل الشجر مهما يطيب ما للورق حظ ونصيب الشمس تصلاه بلهيب تحرق غصونه بالشعاع ضمّيت طيفٍ لويدوم طرنا سوى فوق ونحوم بين الكواكب والنجوم وفي بحره أفل الشراع كوده عن أطباعه يجوز ويترك تواريخ الدروز أيلول وتشرين وتموز وفعلٍ مثل فعل الرعاع من شوقه اللي اعتلا عرش المشاعر وأشعلا قلبٍ به الحب امتلأ وغطى مساحاتٍ مشاع خففت عن قلبي مدام العلم ما وصل السنام وأدركت مفهوم الغرام إنه، مصالح، وإنتفاع جاير غرامه بالوريد جورٍ على صدري يزيد والله لو قلبي حديد يمديه من هالجور ماع كلما بدأ، مثل القمر مقبل يداعب في الشعر لولا إحتياطي والحذر إن كان عقلي منه، فاع ولا منه أغضى بالهدب نورالسماء عني إحتجب وأظلم نهاري من سبب نظرات لعيونٍ وساع أبااحتسي شهد الرضاب صافي شفاياه العذاب نزف الثنايا يوم ذاب توشك حياتي بالوداع رمت الطويلة ماخذيت من الأماني ماابتغيت الله من رجمٍ رقيت ولا كسبت إلا الضياع شفت المكاب روالجحود وتجاهلٍ فاق الحدود رغم المساعي والجهود ماانحل موضوع النزاع طبعاأنا مالي مجال أدخل متاهات، وجدال وأصير رهن الاعتقال من فعل، كفي واليراع لا شك هذا، مولجي عليه أسيّر، وأعرجي لين المسائل تفرجي وأقدر على، نزع القناع |
رد: ديوان شعراء السعودية في العصر الحديث (متجدد)☘️☘️
قصيدة إسمك وعنوانك بجوالي
الشاعر: محمد بن عمار محمد بن عمار #العصر الحديث #المملكة العربية السعودية 0 66 مشاهدة ياحظ من وقته صفاله يوم مع من يحبه داله وسالي ماهوبمثلي دايما محروم مشقي حياته أول وتالي محدٍ ترى من الغلط معصوم يومك تعذبني على الخالي حبك سرق مني لذيذ النوم طول الليالي ساهر لحالي ماهان شخصك دايماً محشوم قدرك مقامه عالي وغالي من يوم ما طاوعت لأهل اللوم في مشيهم والقيل والقالي وطعنتني من خنجرٍ مسموم وأنا الغدر ما جاء على بالي صارالوفاء من شيمتك معدوم وتحطّمت من فعلك آمالي معادني في عشرتك ملزوم من وسط قلبي مركزك زالي أتلفت أنا تذكارك المزعوم وإسمك وعنوانك، بجوالي دام إنقطع من بيننا المقسوم أبا أتركك وأروح في فالي |
رد: ديوان شعراء السعودية في العصر الحديث (متجدد)☘️☘️
قصيدة ملاك الحسن
الشاعر: محمد بن عمار محمد بن عمار #العصر الحديث #المملكة العربية السعودية 0 65 مشاهدة ويل من هو ضامته دنياه، في عزّ الشباب ماتهنا في العمر لو ساعةٍ يدله ويطرب راح عمري ماهناني طعم زادي والشراب وماصفا وقتي ولايوم أستطيع آكل وأشرب عقب ما العين أوترت قوس المنايا والنشاب أطلقت سهم اللواحظ، مشعلٍ بالقلب كهرب طحت أنا في موقفي من حيرتي والإضطراب آتالّم، وآتأمّل، في صوابي منه وأعجب مثل طير بكف طفلٍ شايف أنواع العذاب ذايقٍ الموت حسره والطفل لاهي ويلعب لا الطفل له عقل يدرك إن في تركه ثواب ولاجناح الطير مبسوطٍ يرفرف به ويهرب مع شبيه الريم كم لي أشتكي طول الغياب عقب ماقفّا وأنا روحي لحوض الموت تسحب صار حبه مع مرور الوقت أوهام وسراب من بعد ماكان مشهورٍ به الأمثال تضرب ياملاك الحسن يابدرٍ توارى في السحاب نوّر أيامي بنورك قبل نور العين يذهب كلما هجرك تزايد،، زادني البعد إكتئاب ماخبرنا أحدٍ على فرقا حبيبه نال مكسب |
رد: ديوان شعراء السعودية في العصر الحديث (متجدد)☘️☘️
قصيدة اقول معصي
الشاعر: محمد بن عمار محمد بن عمار #العصر الحديث #المملكة العربية السعودية 0 65 مشاهدة كل شيءٍ زاد عن حدّه، يعوّد ينقصي وكل نقصٍ مرجعه ذلٍ وخسرانٍ مبين الهوى والحب ما ينجاب ضربٍ بالعصي والمحبة سرها والشوق في صدري دفين والمشاعر لاحداها الشوق قامت ترقصي تنعش القلب المعذّب من عنا فرقا الضنين ياجماعة كل شخصٍ في ظروفه أبخصي ما يقارن راعي البال الخلي، مع الحزين لوحكى لي حاسدٍ مغرض أبا اقول معصي ما تأثرّ فكري، بواهي التفاهات المهين في زمانٍ افتقدنا اللي، بفعله مخلصي لطاعة الرحمن، والاّ في حقوق الوالدين ول، ياحظٍ علي عقبه، تراجع وانكصي ما تجمّل بي مثل باقي حظوظ المسلمين يشهد اللي عالمٍ، كل السراير وايحصي ما جنوه الخلق من أفعالهم زينٍ وشين ما تماديت بكلامي له ولا قلت خرصي وما تواعدنا بسرٍ لا، ولاني، له خدين أمسك المفرص الى من تاح لي ولا احرصي وآتحزمّ بالصبر لحد مالفرصة تحين والهوى مابه وكيلٍ، للبشر ولا وصي كل شخصٍ يمشي بكيفه على علمٍ يقين يا شطيط الرآي من طبع الحياة اتنغصّي ماحدٍ جت له على طوعه بكل العالمين الحذر ماهوب ينفع والدعاء مرجم حصي نوبةٍ رجمة تصيب ونوب تخطي رجمتين حمرقاني اللون عوّد في صرامه مشيصي باسقاته طلعهن، والدوم فيهن، مستبين ماوطاه اللي وطا غيره بوقت مخمصي عايشٍ في سجّة الدنيا، وربعٍ مدبرين لويشوف الخافق اللي يشتكي منه اقفصي أتلف انصاف الحنايا، بالتزفر والونين ايتناما الشوق له، دامه عن دياري قصي وآتوجّد، وآتمنيّ، وآعسى ربي يعين طاويٍ حالي النوا من هامتي لين اخمصي مبتدي من دون الأخدع *واصلٍ حد الوتين* وكل من ياطاالخباره، لازم إنه يقرصي وسطها يلقى الحيايا، والعقارب مختبين ياما صيادٍ توهم،، إن فخه يقنصي وضاع منه الطير والفخ، ورجع صفراليدين |
رد: ديوان شعراء السعودية في العصر الحديث (متجدد)☘️☘️
قصيدة التناضح العكسي
الشاعر: محمد بن عمار محمد بن عمار #العصر الحديث #المملكة العربية السعودية 0 65 مشاهدة عذابي والجفء طوّل يزود، بدافع حسّيعلى كثرالهموم اللي تجسّد واقعي لجراح وصرت بقيدي مكبّل أواجه تهمة الحبسيعلى شان إهتمامي بالحبيب اللي هجرني وراح غرامه للحشا إحتلّ غدى له منصب وكرسيومن زود الغلا حبه، لساحة خافقي إجتاح وزهرة حبه الأوّل غرسها في الصدرغرسيعلى روض الحشاء تنثر،عبيروعنبرٍ فيّاح عقب فرقه ماأتحمّل أصفّق خمسٍ بخمسيوأدق الصدر بإيديني وأقول إن الهوى فضّاح وأصبح حبناالأمثل تناضح، بيننا عكسيمناسيب الغلا من صاحبي فيها التمادي لاح أنافي بحره مبهذل وعيّا، مركبي يرسيتقاذفني به الأمواج، وشدة عاتي الأرياح عن غيابه بديت أسأل وأعاتب نفسي بنفسيولا كنت أعتقد في الحب يقتلني بغير سلاح غلاه وكل ما يفعل وطبعٍ صار به، يقسيقتلني، والقتل للي تشهّد، مسلمٍ، مابّاح وصرت بوضعي أتأمل وطول الليل ما أمسيهني اللي مريح البال، قلبه دالهٍ مرتاح |
رد: ديوان شعراء السعودية في العصر الحديث (متجدد)☘️☘️
قصيدة غارس الورد
الشاعر: محمد بن عمار محمد بن عمار #العصر الحديث #المملكة العربية السعودية 0 65 مشاهدة يالله إنك تعين القلب، من طول ياسه مااهتنيت بمنامي، والعرب يرقدونه راحت أيام عمري في الشقاء والتعاسة آآآه ياوقتي اللي، ذقت منه المهونة ضاع مستقبلي وأتركت باقي الدراسة وانحرمت النعيم اللي الملأ يذكرونه من صغرسنيّ وحالي، يزود انتكاسه مكسبي ضيقة الخاطر وكثرت حزونه أشرب الصبر وأملأ، للمقابيل كاسه وأحسب الناس مثلي كأسهم يشربونه ياقمر، وين نورك ليلي أطول غلاسه غاب عني وأنا بالدرب ما امشي بدونه غارس الورد يجني مانبت من غراسه وزارع الشوك مايجني ثمرمن غصونه راعي الخير له بالخير بخص وفراسة وراعي الشر علمه بيّنٍ في عيونه من مشى طيب تلقى الطيب منبع أساسه والرديّ، لو يجامل، يخلفنّه ظنونه |
رد: ديوان شعراء السعودية في العصر الحديث (متجدد)☘️☘️
قصيدة سلام الله
الشاعر: محمد بن عمار محمد بن عمار #العصر الحديث #المملكة العربية السعودية 0 65 مشاهدة سلام الله على منهو تهيّض لأجله الطاروق بديت بإسم ربٍ واحدٍ ما خاب طلآّبه أبا ابدع ماتيسر من نظيف الهرج والمنطوق لخلٍ ما يعرف الذم، وماقد مر مع بابه طواريقي ابا انظمها على المربوع وهذا شيء في طرق الشعر متبوع واذا ما يعجبه،، بنغيّر، الموضوع وبأكتب وش حصل للصاحب الغالي سبايب ماجرالي كلمةٍ من واحدٍ مطفوق تفارقنا انا والزين، وكله صار بأ سبابه عسى الله يبتليه بعارضٍ مكتوب له من فوق كسير الساق وليله يسهره من غيبة أحبابه أنا رجّال، مالي في الحكي راده ولاراعي الحسد في حلقي قلاده عجب!!كيف القتيل ايزور جلاّده على طرياً طرت يالصاحب الغالي طرالي ماطرى من يوم شفت اللي بوسط السوق غزالٍ، تفتن العشاق وكلٍ نالت إعجابه تهصّر في طريقي والشعر من خلفها مطلوق ورد فٍ يطوي الملبوس إلا قامت تثنى به أنا من شفتها في حالتي مربوك وقلبي صايرٍ في حبها مشبوك طريح الغي قلبه، دايمٍ منهوك يعاني من فراق الصاحب الغالي ألا يابري حالي يوم مرّت ماشيه برفوق تهزّع مثل غصنٍ في ذرى الفيّه بمشرابه تعدت وإنتلت قلبي من أقصى الجوف والمعلوق بنتلٍ مثل نتل الضاري لصيده بمخلابه ألا ياليت، مامرت، تثنّى، لي طوت حبل الرجاء مع كل آمالي عليها، زايدٍ همي،، وغربالي بعد ماذكّرتني الصاحب الغالي حدرت رشاي في بيرالغلا من شان أذوقه ذوق وخاب الظن يوم اني جذبت الدلو ماجابه عليها الله أكبر صوّبتني بقدها الممشوق أنا حذرٍ ولكن، القدر أسرع بمضرابه أنا مالي، ومال الحب، ودروبه طريقٍ من مشاه يبان عذروبه يوهّق كل منهو، يجهل اسلوبه ويغرق في غرام الصاحب الغالي عقب يوم أبعدت عني وقلبي والعقل مسروق صفت عشري ثمان وماهقيت البنت نهّابه تجلّت قدرة الخلاّق متقن صنعة المخلوق على كبدي قدمها كل خطوة يغرس كعابه ذبحني قدّها الميّاس، وفنونه ولحظٍ به سهوم الموت مدفونه حياتي لأجلهاوالروح مرهونه وكلي فدوةٍ للصاحب الغالي أنا مانيب الأول أدري إني في الهوى مسبوق وكل اللي جرالي، ماجرى لأحدٍ ولاصابه ومنهو قد سبقنا في الهوى مختوم له ملصوق يفيد ان الهوى ملكه ولاأحدٍ يحسب حسابه أظن لوهو سبق مليون في العشاق وذابوا من هيام الحب، والأشواق نهايات اللقاء،، لابد فيه، فراق ولوعاشوا دهر، يالصاحب الغالي |
رد: ديوان شعراء السعودية في العصر الحديث (متجدد)☘️☘️
قصيدة موت اإحساس
الشاعر: محمد بن عمار محمد بن عمار #العصر الحديث #المملكة العربية السعودية 0 64 مشاهدة مات الإحساس فيني وأنتي سبة وفاته أنتي اللي جنيتي الذنب ماهو بأنا أنتي اللي سبب موت الضمير وفناته وأنتي اللي سبب همي وكل العنا أنتي اللي قتلتي الحب بأول حياته وإرتضيتي له الإعدام ودرب الفنا مارحمتي خفوقٍ زايدٍ به شتاته إختصرتي السنين بهدم كل البناء إلحقي مابقي قبل الأوان وفواته قبل تذبذل ورود طاب منها الجنا قلبك اللي أسرني غارقٍ في سباته ورغم هذا فلا لي عن غرامك غِنى مااستمع هرج للعاذل ولا أقبل وشاته أنتي الحب الأول والأمل والمُنى وأنت ياعاذلي في الزين تجهل صفاته ناعس الطرف قربه من عيوني هَنا أبيض اللولو المنظوم داخل شفاته وفي جبينه بروقٍ لاح منها سنا أعرفه من طريقة مشيته في عباته ليّن العود،، إلى منّه مشى إنثنا ايتمايل كما الغصن الخضر في نباته لاانهصرجضّ قلبي ومنه موتي دنا لوزعل أورضا، حبه لقلبي غناته السعادة لعمره والشقاء لي، أنا |
رد: ديوان شعراء السعودية في العصر الحديث (متجدد)☘️☘️
قصيدة مفهوم المعاني
الشاعر: محمد بن عمار محمد بن عمار #العصر الحديث #المملكة العربية السعودية 0 63 مشاهدة آآآآه ياسعدي وهنايه من بعد هالصبر كلّه عادت أيام السعادة تبتسم لي والأماني أشرقت أنوار عمري وعوّد الماضي لحلّه خلّد التاريخ يومٍ ماتكرر في زماني الزمن وقّف يسجل ماجرى داخل سجلّه خمس ساعاتٍ مضت لي كنها جملة ثواني ساعة مصافح كفوف اللي عيوني ما تملّه لحظةٍ فيها انولدت بكل مفهوم المعاني من عقب عشرين عامٍ الخواطر مسفهلّه حالتي يعلم بها ربٍ على الفرقا حداني فزّ قلبي يوم شفته! وإنتثر دمعي أهلّه وقلت انا الغالي ذكرني من عقب ماهو نساني وقبلها يصعب عليّ إني أزوره في محلّه رغم قربه من عيوني وقرب صوته من أذاني لاوصلت الحي أضيّع! كن بيته ما أدلّه تختلف في عيني أوصاف الشوارع والمباني وإن سمعته أرتبش ياعل عمري فدوةٍ لهّ وما بكفي طاح مني! وحارت الرجل بمكاني |
رد: ديوان شعراء السعودية في العصر الحديث (متجدد)☘️☘️
قصيدة ربوع الغرام
الشاعر: محمد بن عمار محمد بن عمار #العصر الحديث #المملكة العربية السعودية 0 64 مشاهدة ربوع الغرام كنت أنا له كما الشمعة بوسط الظلام أحترق لأجل أنوّر له طريق الحياة تاهت أحلام حبي في ربوع الغرام وماتت الإ بتسامة بين ذيك الشفاه وين ذاك الغلا واللين وعذب الكلام ووين ذيك اللباقة جعل عمري فداه كيف أنا أعيش حبٍ ما حواه انسجام ومركبه ما رسابي فوق شط النجاة دام عهدٍ مضى، ما بيننا بالهيام ضاع من هامش الذكرى وفكره نساه عقب ماكان، حبٍ معتلي، للغمام إنكسر به جناح الشوق وتاه بسماه مع شبيه، الغزال بخفته والقوام دام قلبه نسى من هو ابتلا في هواه غاب زوله وطيفه ما تركني أنام وهاتف الشوق يشغلني وأنا في الصلاة آرتجّي وآتحرّى، كل عامٍ، وعام والصبر، واصلٍ بي، حدّه ومنتهاه كل ما امر مع حيّه مرور الكرام هلّ دمعي ووقفت، كلمتي في اللهاة وسال دمع المناشي معلنٍ السلام رافع الغيمة البيضاء ومبدي رضاه وفي نهاية رواية حبنا، والختام كل واحد مشا، في دربه اللي إبتغاه |
رد: ديوان شعراء السعودية في العصر الحديث (متجدد)☘️☘️
قصيدة العيون الإنتهازية
الشاعر: محمد بن عمار محمد بن عمار #العصر الحديث #المملكة العربية السعودية 0 63 مشاهدة وفاي أكبرمن أحلامٍ تعدى حدّها التوصيف ومناي أبعد من أهداف العيون الإنتهازية محيط الصدروتقويس الضلوع ومنحنى التجويف مساحة للغلا أشمل، بصورة إعتبارية أبرمج نخبة أفكاري بلاحشوٍ ولاتحريف وتتبعني فلول القاف، لعيون الهواوية أهيم بهاجسي بأحداق نظراتٍ بها تكليف وأزوربفكري الأعماق، في فترة قياسية على شط اللواحظ نظرتي ترسي قبال السِّيف وأتوه برعشة الأهداب، ليمن طالعت فيّه وكهرومغنطة حبي شعاعٍ، مرّعبرالطيف تجسّد، موجة إرساله مشاعر إزدواجية يضيق الكون وقلبي صايرٍ منصة التّشريف بها سحرالغرام، يبث موجات،ٍ ثنائية يبث الذبذبة، شوقٍ حواها الود بالتغليف بأحاسيس الغلا من صافي الإخلاص مروية |
رد: ديوان شعراء السعودية في العصر الحديث (متجدد)☘️☘️
قصيدة فخ الهوى
الشاعر: محمد بن عمار محمد بن عمار #العصر الحديث #المملكة العربية السعودية 0 63 مشاهدة الله أكبر على وقتي وتنكيدة ماصفا ساعةٍ أرتاح، في رقادي ضيقةٍ جددت بالفكر تعقيدة والمواجع تزوّد جسمي اجهادي أنهك القلب همٍ طال تخليده وآتصبّر وأشوف الصبر مافادي حالي اللي كسرني زاد تكبيده بالخساير وصارت شيئ معتادي بأول الأمر، أنا ماخذت تهديده يوم لمّح لي، بهجران وعنادي منوة الروح قلبي ليته ايعيده كيف يرضى، يصادر مني فوادي كان يرضيه سلب القلب وتجريده شوق حبٍ لشوفه صار وقادي منهو..! اللي يقدم قلبه بإيده فدوة اللي، له الخفاّق منقادي وش يفيده عذابي، يومه ايزيده دام يسمع لصوتي له وأنا، أنادي ظني اللي خذلني، فيه، تأييده وآتذمر، وخوفي، صار يزدادي إنشدوا عاذلي وش هي مقاصيده يوم حرّمت أنا شربي مع الزادي قلت أبا اهنيّ، المحبوب في عيده يمكن العيد هذا، غير الأعيادي جبت فخ الهوى من شأن با أصيده صرت انا اللي بفخ الريم منصادي به حلا لو بغيت أشرع، بتعديده ما هقيت،، إنها توفيه الأعدادي وماثناني، عن أوصافه وتفنيده إلا خوفي تصيبه، عين حسادي له ثليلٍ على الأمتان تجعيده والعطر دهن عود، ونفحة الكادي منتهض، بأسفل الحيزوم تخديده فيه شارات، من بلوّن منطادي والعنب مستميلٍ في عناقيده من عروشٍ زمت في روس الأنهادي والشفايف، تزيد الوضع تصعيده رسمة الخط الأحمر لونها هادي إن تكلمّ، سبى عقلي بتغريده وإن تبسّم، أسرني غاية مرادي لملهم الطير، تسبيحه وتحميده رافعٍ فوق خلقه سبعٍ شدادي بأشتكي من ظلم خليّ بتعويده كلما اسعى لقربه، زاد في بعادي |
رد: ديوان شعراء السعودية في العصر الحديث (متجدد)☘️☘️
قصيدة كل عصر له رجال ودولة
الشاعر: محمد بن عمار محمد بن عمار #العصر الحديث #المملكة العربية السعودية 0 62 مشاهدة يا ملاكٍ عصف بي يوم بان وتجلىّ مثل الإعصار خذني في الميادين جولة من يماري البصر ساعة دنا ثم تدلىّ غاب قوسين أو أدنى بسرعة وصوله هو بشر؟؟ لا أظنهّ فوق وصفه تعلا والا نيزك ترنحّ، في غياهب أفوله حلحل الحال حل الله عظامه وحل وسط حوضه من الوركين لاسفل رجولة يوم ميّلت يم الجم أبا اشرب وأبلّ ريقي اللي نشف من عقب ما شفت زوله قال عدّي قراحٍ، سلسبيلٍ محلىّ خلف حصنٍ حصينٍ ما يطال بسهوله ما بكلٍ، حدر دلوه، تمكن وعلّ وما بكلٍ، سرى ليله، بيشعب ذلوله الله أكبر على جور الدهر لا تولىّ غافلٍ في العمر، ذلّه، ونوّخ رحوله في عموم الخلايق صاحبٍ لي تخلىّ عقب وقتٍ مضا، لا شافني فزّ طوله الصديق الصدوق إن جيت رحّب وهلا وإن تأخرت يبعث لي منادب رسوله كل من جاء يذمه، قلت حاشا وكلا صادق الوعد، هرجه ما ينافي فعوله صد عني،، وهو في خافقي إستحلّ وغير هالعلم، ما عندي كلامٍ أقوله قال يا سيّدي، كلٍ بوقته، تسلىّ وكل عصرٍ وعهده، له رجالٍ ودولة لا نساك الرفيق، اللي بظلمك تبلا فالهجر بينكم لا طال، تصعب حلوله قلت والله هرجك، يالغلا ما يملا شوف نوّ الهوى والشوق بادي هطوله دام قلبك حنونٍ وش حدا بك، تغلا وإلا هذا امتحان اللي، تقرر قبوله |
رد: ديوان شعراء السعودية في العصر الحديث (متجدد)☘️☘️
قصيدة نايض البرق
الشاعر: محمد بن عمار محمد بن عمار #العصر الحديث #المملكة العربية السعودية 0 61 مشاهدة ياهلا بالذي نوّه يطرّز سمايا ظللتنا غيومه والمطر به نضيح مرحباً عد ماأبرق من جميع النحايا يم خلي بوادر نور سيفه يليح نايض البرق أخيله فوق سبت العلايا والمراويح تسبح في الشمال الفسيح يوم ناديت قافي جت خيوله عرايا أقبلت تصطفق صوبي وتجمح جميح مذعناتٍ لمدحه صايراتٍ سبايا تضوي بطوعي وتسرح بأمري سريح صاحبي جامعٍ الزين وكل المزايا كاملاتٍ وصوفه مايبي له مديح صبت الشمس نورٍ في الثغر والثنايا والشعاع انصهرمن فوق خده يسيح وحمرة الورد في الوجنة بلون الشفايا والشعرمن على الامتان يسبح سبيح كلما اشرّ، بعينه مرخيٍ الغطايا جض قلبي ولولا العيب والله لا اصيح صارحبه بدمي، مختلط بالخلايا حرّم الدم ربي، كيف؟ هو يستبيح تهت عقبه وحيلي ما بقابه بقايا كلما قمت رجلي، تنثني بي طريح إنتخيت وفزع لي من حشام الطنايا قالوا أبشربعزك لوهي روسٍ تطيح قلت والله مالي ثار ولالي قضايا كل مابي غزالٍ من صوابه جريح لي شهورٍ واناانشد عنه بين القرايا لالقيته ولا احد جاب علمٍ صريح |
رد: ديوان شعراء السعودية في العصر الحديث (متجدد)☘️☘️
قصيدة كأس المشاعر
الشاعر: محمد بن عمار محمد بن عمار #العصر الحديث #المملكة العربية السعودية 0 60 مشاهدة آآه يا قلبي وش اللي صار فيك وصار فيني ما بقالك حظ باللي في غرامك ترتجيه القوافي عاندتني، والغلا، مشعل حنيني زود شوقٍ للحبايب في خفوقي محتويه الحبيبة طبعها قاسي، وعيّا لا يليني والوفاء، والحب فيها طبع، قلبي مرتضيه الغلا له في معاليق الحشا، سرٍ دفيني ذكرياته في حياتي، مالها وصف وشبيه قلت أنا مفتون فتنة!! فيك ربي مبتليني قالت اللي فيك فينا، وما شكيته نشتكيه قلت أنا شاري وفادي من بحبه مفتد يني ق الت وحنّا كذ لك،، من فدانا نفتد يه قلت أنا داخل على الله فكيّ قيدي إتركيني قالت وقلبٍ يحبك ويش أسوي بس فيه قلت أنا قلبك نسي عهد المحبة من سنيني قالت لساني يقوله، وإلا قلبي، مانسيه قلت أنا وش مقصدك من هالعذاب تعذبيني قالت إسكت لاتكلم! هرج ماصخ مانبيه قلت أنا والله ماآبي، شوفة اللي ما يبيني قالت الظاهر بديناا.؟ الغلط، لاتبتديه قلت يابنت الحلال الوقت من عمري ثميني قالت إحسب كم يكلّف وقت عمرك وأشتريه أشتريه بدم قلبي، وأحفظه في موق عيني وأسّكبه كأسٍ لحبك،، المشاعر ترتويه قلت عمري..! مايقّدّ ر بالثمن، للطيبيني بس أنا، مهديه رمزٍ للي قلبي مهتويه قالت عيوني وما املك، فدوة اللي مهتويني الحبيب اللي غرامي، في حياته مبتليه وأرخص بحالي ومالي وكل عمري له رهيني قلت أناال..! وطالعتني واغمزت قالت لي إيه |
رد: ديوان شعراء السعودية في العصر الحديث (متجدد)☘️☘️
قصيدة شعاع الغروب
الشاعر: محمد بن عمار محمد بن عمار #العصر الحديث #المملكة العربية السعودية 0 56 مشاهدة ريم ياللي تثنى مع شعاع الغروب تنسج خيوطها ساعة حلول الظلام حاكت أكفان قلبٍ في هواها يذوب أعلنت إحتضاره، نظرةٍ وإبتسام من جمالٍ تلامس به شغاف القلوب يردي العاشق اللي ضالعٍ بالهيام قلت أنا وش مرامك يالغزال اللعوب قال أنت الذي لي فيك شفّ ومرام إشتعل وسط صدري مثل نار الشبوب تصهر الجوف وذابت من لهبها العظام ياشقا الروح حسنك للمشاعر نهوب ينهب العقل لحظة غفلته، بإقتحام مابكلٍ ولو راقت، لعيني تنوب الغلا منغرس في القلب غرس السهام وماهقيت إن قلبي عقب هذا يتوب كلما أنهاه قال، الحب ماهو حرام ومن يقول الغلا مبني بساسٍ وطوب جاهلٍ في مواجيب الهوى والغرام أو يقول إن قلبٍ مهتويك امغصوب أشهد إنه غشيمٍ من سلايل غشام آآه ياوقتي اللي، في مهب الهبوب طار مثل الحلوم اللي تجي بالمنام دام حظي رماني وسط هاك الدروب غير دربك، بيلحقني عتاب وملام كل هرجٍ أقوله لك عليّ محسوب وعن محاسن وصوفك، قاصرٍ الكلام كامله بالمحاسن،، ما حوتك العيوب خصك الله بكل الزين، دون الأنام ومن يظن إبتعادي عن طريقك هروب فالحقيقة،، عقب هذا عليه السلام وكان هالماء إذا أصبح وسط كاسه يروب فالحكي بيفيد أهل العقول السقام |
رد: ديوان شعراء السعودية في العصر الحديث (متجدد)☘️☘️
قصيدة المايس المهصور
الشاعر: محمد بن عمار محمد بن عمار #العصر الحديث #المملكة العربية السعودية 0 56 مشاهدة تلاعب هواها ** ماشيه في دلع وسفور توسط قدمها الكبد ** بالكعب مغزوزة شقيت بغلاها ** مستعيذٍ من المدحور على نابيٍ مرتد ** والنهد مركوزة أساير رضاها ** وآتحاشا من المحذور وصبري تعدى الحد ** والحال مهزوزة فتني بهاها ** وإرتضيت الشقا والجور على ما حواه، القد ** والخد مغموزه تباهي بحلاها ** مآخذه من بنات الحور لها ناظرٍ لا، لد ** تكويني قزوزة خذتني وراها ** وأغرقتني بسبع بحور مابين الجزر والمد ** الأقدام مغروزة أحلق معاها ** هايمٍ في فرح وسرور لأجل في هواها أسعد ** والنفس معزوزة جروحي دواها ** نازف الضاحك المعصور مذاق العسل وأبرد ** لشفاه ممزوزة وعيني مناها ** شوفة المايس المهصور وثمانٍ سناها أوقد ** بالثغر مكنوزه وحالي براها ** أشقرٍ في الهوى منثور مع شارةٍ في الخد ** بالخال مرموزة تعفف حياها ** واستحى من طلوع النور وقبل الشروق أبعد ** كالخيل ملزوزة وأبعد مداها ** صار عنه القدم مقصور وروحي مابين اليد ** والكف محجوزة وفي منتهاها ** قصة العاشق المغمور حياته بنار الصد ** والهجر مدزوزة |
رد: ديوان شعراء السعودية في العصر الحديث (متجدد)☘️☘️
قصيدة راسي يافهد شابي
الشاعر: محمد بن عمار محمد بن عمار #العصر الحديث #المملكة العربية السعودية 0 56 مشاهدة لا وآعذاب الذي خله على باله يطري بليا مواعيدٍ ولا أسبابي تعبت شكوى الغرام وزود غرباله راسي من أسباب خلي يا فهد شابي مسكين قلبٍ شديد الشوق يبراله يسوقه لشوفة الخلة والأ صحابي ما طاع ينسى حبيب الروح بلحاله وإن قلت أنا قد نسيته صرت كذابي خلٍ حسينٍ إلى من هل بإ قباله فلقة قمر، في جبينه زين الأسلابي ومهلهلٍ فوق رمش العين شلآله الى وقف! واصلٍ له روس الأكعابي أنا اشهد إن الهوى يازين مدخاله نشوة فرح شوفة المحبوب تنسابي وما ألوم نفسٍ لشوف الزين ميّاله من لامني قلت ذا حاسد ومغتابي يا ما بكيت، ونظيري هل هماله وتغرّ قت وجنتي، وابتلت ثيابي ويا ما إلى من فقدته، زرت منزاله ويا ما تعنىّ، وزار البيت بغيابي ما عاد شفته ولا احدٍ جاب مرساله ولا لقيت الذي يوصل له كتابي حتى الثرى يشتكي من كثر ترحاله وصم الحجر والشجروجذورالأعشابي لا هب نسناس، في ليلٍ ومقياله شايل معه، من بقايا ريح الأحبابي قلت الحبيّب، ذكرني وبرّ بوصاله شدّه حنين الوفاء وعن هجرنا تابي |
رد: ديوان شعراء السعودية في العصر الحديث (متجدد)☘️☘️
قصيدة نور السوارة
الشاعر: محمد بن عمار محمد بن عمار #العصر الحديث #المملكة العربية السعودية 0 55 مشاهدة ما أحدٍ على هالمستديرة تمشّى ولا رأت عيني مثل زولها قط بياضها،، غيمٍ مخيله تنشّا والكحل عمره داخل العين ماانحّط ومجدولها، ما يندهن أو يرشّا شعره حريرٍ ينتثرما يمشّط طراة جسمٍ والعظم فيه هشّا ليمن مشت، من الليونة تعفّط في كفها نور السوارة تغشّا عيني وصار الجو عندي منقّط إلا طرت لي هاج فكري ووشّا وقامت عفاريتٍ بوجهي تنطّط أذكر إذا قالت تفضل تعشّا من غير تكليفٍ عشاها يقلّط يوم إنها تضحك بوجهٍ يبشّا والخد، من زايد حياها امبشّط قدرعليها وطشّت الحب طشّا عذولنا اللي عقب ضعفه تنشّط وصارت حقيقة سرّنا اللي تفشّى مقلب ولا أحدٍ فيه غيري تورّط |
رد: ديوان شعراء السعودية في العصر الحديث (متجدد)☘️☘️
قصيدة سواليف الغزل
الشاعر: محمد بن عمار محمد بن عمار #العصر الحديث #المملكة العربية السعودية 0 55 مشاهدة ألا ياليت قلبك، قدّر اللي، صار وظروفي وحسّ بقلبي، اللي من فراقك منكوي بالنار طريحٍ من عنا فرقاك للحسرات والخوفي أقاسي عقبك الحرمان وطول الهجر والأعذار وصار الدمع من عيني نزوله شيء مألوفي وإلى مني سألته رد يسألني عن اللي صار دخلتي بيتي اللي من حنايا الصدر مسقوفي قدرتي تستحلينه!! برغم إن البيوت أسرار سكنتي جرحي النازف أسى.! ياليتك تشوفي نزيفه من صميم القلب يرسل دمه المدرار تمكّن بي هواك، اللي تمركز وسط سرجوفي دلالٍ له بفكري مع سواليف الغزل، تذكار توطنتيّ العذاب جروح، تسكن في خفا جوفي بعد ماعانت الوجدان لأجلك كثرة الأسفار أسافرمع مشاعر طيفك الهيمان وأطوفي وأحّلق مع أثيرالشوق وأسبح في فضاء الأفكار رماني الحب في دربٍ من الأخطار محفوفي وتعبت وزادت آلامي وطال الحلم والمشوار وعايشت الألم شعرٍ نظمته قاف معسوفي وتهت بزحمة أبياته وهمت بوادي الأشعار تغنتّ لك، مواويل القصايد، لحن معزوفي ويكفيكي فخر.! إنهّ كتبها ولد بن عمار |
رد: ديوان شعراء السعودية في العصر الحديث (متجدد)☘️☘️
قصيدة عشراء الركاب
الشاعر: محمد بن عمار محمد بن عمار #العصر الحديث #المملكة العربية السعودية 0 53 مشاهدة أشتكي لله من جور مابي من صواب ساهرٍ الليل وكل الخلايق هاجعين ماذبحني كود من فرّعت لي عند باب عنق ريمٍ عقلها مااستوى توّه رعين تشّر بكفٍ زها براحته لون الخضاب توّهتني عقب ماسلهمت فيني بعين مستديرٍ خصرها كنها عشراء الركاب عاذها الله من عيون الحسد والطامعين الردايف لا مشت خلفها تطوي الثياب وتينتين بلبة الصدر، توهن طالعين قدّها الميّاس ممشوق والمشي بحساب والشعرقرنه على متنها عرض إصبعين مثل غصنٍ يانعٍ،الثمر بأعلاه طاب شفتها وإنشّل فكري عسى ربي يعين يالله إنك تلعن إبليس يفرح بالخراب بعثرت عقلي براسي وساويس اللّعين قلت وأنا استغفرالله! منتي من تراب أنتي حورٍ عين، وإلا ملاكٍ ترتعين آآآه ياقلب العنا مطلبك أصبح سراب درب شايك والعشاشيق وسطه ضايعين ياعيوني،، لا تراعين تلعات الرقاب كلما شفتي الغنادير، قمتي تدمعين شاب راسي من هواهن وأنا توي شباب ليمتى من شوفهن ترتضين وتقنعين عندربي، جنة، ونار، ورحمة، وعذاب نسأله عفوه، لنا، والخلايق أجمعين |
رد: ديوان شعراء السعودية في العصر الحديث (متجدد)☘️☘️
قصيدة القلب والنفس خضراء
الشاعر: محمد بن عمار محمد بن عمار #العصر الحديث #المملكة العربية السعودية 0 51 مشاهدة ياويل من هو، صابه السهم غدرا لا صار، من نظرة غريرٍ ومزيون وأصبح بوسط القلب، يسهج ويفرى شيءٍ به العشاق، دايم، يموتون باح الكنين اللي له الصدر وكرا وضاع الكلام، اللي من العقل موزون عيّت طعوني، داخل الجوف تبرى وعيّت عيوني، من عذابي يبيتون أسهر ورب البيت عن حالي أدرى مع الهجوس اللي لها الفكر مشطون كيفي دلال، وحمسة البن شقراء تجلى العماس اللي به الراس مشحون أنادم الفنجال، في ضّي، قمراء مع الجهام، إلى تخّطت، على الهون وأسّج إلى مرت، بفكري تخطرا مشاعري، لاجت على البال، يبكون إلى أقبلت مثل الوضيحي تمدرا بشعل العيون، اللي بها الموت مدفون تنسف جديلٍ، ذوّب القلب وأغرى ظلالها اللي، بجنبها وقف مفتون وقامت تثنى لي، بردفٍ وخصرا وبيض الثنايا، اللي كما الدرّ مكنون ما قد رأت عيني، مع الناس عذراء في قدها، والحسن والشكل واللون ولا طاب لك، وقتك، بإنسٍ وسمرا ترى، مقابيل الليالي،، يدورون إغنم، مدام القلب والنفس خضراء واللي بعلم الغيب، ماهو بمضمون |
رد: ديوان شعراء السعودية في العصر الحديث (متجدد)☘️☘️
قصيدة نار الهجر
الشاعر: محمد بن عمار محمد بن عمار #العصر الحديث #المملكة العربية السعودية 0 51 مشاهدة قال من هو إنكوى بنار الهجر والخطايا كن قلبي يقلّب فوق حامي الصفيح أشكي الحال،، للمعبود، جزل العطايا وأسهر الليل والمجمول نومه مريح راعي الطرف الأكحل فيه سهم المنايا مكرمه،، دام قلبه، بالعطايا شحيح دار فكري، ونوّخ، هاجسي للمطايا وعشت ذكراه، ممشوق القوم المليح صاحبي مالكٍ الحسن، بأعلى المزايا كاملٍ في وصوفه،، مايبي له مديح صبّت الشمس نورٍ في الثغر والثنايا والشعاع إ نصهر، من فوق خده يسيح حمرة الورد في الوجنة بلون الشفايا والشعرمن على الامتان، يسبح سبيح كلما اشرّ، بعينه مرخيٍ، الغطايا جض قلبي، ولولا العيب والله لااصيح لأجل حبّه،، بدمي، مختلط بالخلايا حرّم الدم،، ربي كيف هو، مستبيح لويطاوعني المملوح،، زين الحلايا يحفظ السرّ،، وقلبه،، بالغلا ما يبيح لا يقّلب مواجع،، طعنته في حشايا راعي الغيّ..! يقنع، بالذي له، يتيح كان أبا أكتب تنازل له عليّ بوصايا في حياتي وإلا منّي، دخلت الضريح |
رد: ديوان شعراء السعودية في العصر الحديث (متجدد)☘️☘️
قصيدة أنا ياناس من قدي
الشاعر: محمد بن عمار محمد بن عمار #العصر الحديث #المملكة العربية السعودية 0 47 مشاهدة الشمس بيني وبينه قسّمت نصفين في خدّه النوروحرّ النار في كبدي النور يوضي بجبينه صافي الخدين والنارتلهب بقلبٍ ذاب من وجدي سبحان ربٍ مكمّل ناعس الطرفين ماهو بمن كوكب أهل الأرض ينعدّي فيه الدلع واللباقه،، داعج العينين زايد، دلاله تعدّى الوصف والحدّي عوده رقيقٍ وحاويه الطراء واللين غضيض وردٍ بجال الظّل ممتدّي الماء إلى صب خطرٍ يجرح الكفّين من رقةٍ في كفوف إيديه والجلدي أخاف عند المصافح وإلتقاء اليدّين يذوب كفّه،، إذا ضمّيته،، بيدّي إلى إصطدم حد رمشه بالكحل في العين يقدح كما البرق ليمن سلهم ولدّي أناحَسَب رغبته يااهل الغرام رهين من شوفته،، يالرّبع مالي أنا بدّي لاصرت مبلي تحمّل شوك ورد الزّين إن كان لابد لك من شمّة الوردي ومادام مافيه مثله، في البشر إثنين لاصار ملكي أنا، ياناس من قدّي |
| الساعة الآن 07:46 PM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لـ منتديات شمران الرسمية