|
رد: رحلت يابدر ولم ترحل مآثرك
لا والذي سواك .. ماريد سلواك
خبر بها نفس.. تمنى قدرها كان التفرق .. يا دعج العين ..عناك انا الذي روحي.. عذابه صهرها والله لو ما اعيش روحي .. برجواك اجزم وكاد انه .. يهمك …خبرها لاطفي شعاع العمر.. لأغيب اضياك عميت عيوني ما يطولك …نظرها البدر |
رد: رحلت يابدر ولم ترحل مآثرك
يالله لاتقطع رجا كل مشتاق
يا رب الحلم يصبح حقيقه وانا ادري ان الوصل تاليه لفراق ولولا الامل ..ما تحمل النفس ضيقـه امس سرى في تالي الليل براق قلبي يفز لنوضته بتخفيقــه وسم بكور صادق الوبل دفاق لو شافه الظميان ..يبتل ريقه عله على دار الوفا .. دار الاشواق دار صفت لأهل القلوب الرقيقــه البدر |
رد: رحلت يابدر ولم ترحل مآثرك
ابا اتنفس دام لي بالنفس حق
ياللي قصيدي فيك من حر الانفاس والله يالولا عبرة الحبر الازرق دمع نثرته من عذابي بقرطاس لا قول احبك .. لين بدموعي اشرق وقبل الصديق يحس بي نايد الناس الى متى .. وصلك من العمر يسرق دونك ودون الوصل .. باب وحراس انا فـ جبيني الشمس تظمي ..وتعرق وانته بشوبا القيظ .. ري ونسناس البدر |
رد: رحلت يابدر ولم ترحل مآثرك
لا تجرحيني ..جرحك العام العام ما طالب
داوي بحنانك ما مضى ..واجرحيني ياللي حنانك نظرة بين الاهداب ردي علي بعض العزا ..ناظريني خافي على قلب يحبك اذا ذاب ذاب الهوى في خفقته ..والحنيني لولاك ما زار القمر ليل الاحباب ولا لوحت شمس المحبه جبيني ولولاك ..ما يلفي على الدار غياب ولا تبكي اللي فارق الدار عيني في غيبتك كل الملا عندي اغراب ما حد ابي قربه .. ولا حد يبيني لا يا غلا كل القرابه والاصحاب ضاع العدل في الناس لو ..تظلميني البدر |
رد: رحلت يابدر ولم ترحل مآثرك
سود العيون اللي انتثر وبلهنـه
رمح الشمال اللي طعن مهجـة الغيم شق السحاب وسالت الشمس منه ساعة غشاني دمعها كنـه الديم دب الـوجل في المهجـة المرجـهنـه وقمت اتذرى بالصـبر والتعازيم بعضي يبـوح الخـوف وبعضي يكـنه ناديتها واللي يغـيث المظاليم انك ولا غيـرك لقلبي مضنـه البدر |
رد: رحلت يابدر ولم ترحل مآثرك
( تالي نهار )
تالي نهار وعاتق الشمس مذبوح والوقت لو تدرين للوقت ذباح كن السما صوتً من الذعر مبحوح والليل خيلٍ سود للضي تجتاح وسحايبٍ فوق الشفق كنها قروح على جبينٍ ما شكى كثر ما طاح لاذت عصافير المسا في ذرا الدوح وتنفس سراج الوهن بين الألواح حبيبتي ضاق الفضى وين باروح وان رحت ظلم النفس للنفس ما راح مجروح ماهو هم لو قلت مجروح يالله عسى ما اصير في قلبك جراح تبسمي برقٍ على ثغرك يلوح بشد له مدام في العمر مـرواح غزيت وجه الصبح من غير مصلوح وانكفت دون الشمس هقوات ورماح البدر |
رد: رحلت يابدر ولم ترحل مآثرك
( تعبت اسافر)
تعبت أسافر في عروقي ومليت من جلدي اللي لو عصيته غصبني ياما تجاوزت الجسد واستقليت عن الألم .. لاشك جرحي غلبني أنا سجين الحال .. مهما تسليت وانا الطليق وكل شيٍٍ قضبني حريتي لاعل .. يا كود ياليت اما شفت حيٍٍ جاد لي ماسلبني وليت يا ليل التباريح وليت اما محاني الحزن والاكتبني كل السما في دفتري وان تجليت مثل الشموس .. غبار قبري حجبني لي صاحب وان ما تخلى تخليت لا بد ما نهدم .. ولا بد نبني البدر |
رد: رحلت يابدر ولم ترحل مآثرك
أنا ما أشير بالفرقا ..
ولا أحدك على المقعاد تخير في طريق الوصل .. والا درب هجراني حرام الوصل ما يجمع قلوبٍ عن هواها بعاد وبعض البعد لو عذب يجمع بين خلاني تحسب ان الهوى ضحكة دقايق عشتها في ميعاد إلى ما رحت تنساها وتنسَى الوعد وتنساني ألا يا صاحبي .. الرفقة ترى مَا هِى ثياب جداد تبدلها متى مليت وتلبس غيرها ثاني إلى ضاع الوفا .. مابه هوى بارجيه أنا .. ووداد ترى ذا الفرق .. بين أقرب قريب .. وبين عدواني تحاكيني بطرف لسان وهرجي من صميم فواد وتاقف من بعيد .. ويم درب الموت تنخاني البدر |
رد: رحلت يابدر ولم ترحل مآثرك
( تغريد )
ياللي خذا شعره من الطير تغريد ومن مدلهم الغيث صافيه لا جاد ومن كل روضٍ عله السيل ترديد ريح الزهر ومداعب الريح الأفناد ومن كل صبحٍ بدد الليل تبديد دفا الشعاع وفرحة النور لاباد جاني قصيدك مثل عقدٍ على جيد الجادل اللي كلها زين وعناد ما هي من اللي يدلهون المواعيد حشا ولا هي في الهوي صيد من صاد وتلفتت روحي لحسنا من الغيد واشتب في قلبي من الشوق وقاد ولمست قلبي لين كله تجاعيد شاب الهوى يا ليت ما فات ميعاد يا بو حمد ما عادلي في الهوى سيد وغيره فلا والله ما نقبل اسياد وين الذي وصله على العين تسهيد (ولا ودي اقطع درب لاماك برقاد يابوحمد وين وصلتنا التناهيد ضاع العمر ما بين قرطاس وامداد وانا احسب الشعر صعب المواريد ماهو غديرٍ ينضحه كل قصاد يوم امتلا هالجو حشو ومفاريد راع الجمل معذور لو كسر إشداد البدر |
رد: رحلت يابدر ولم ترحل مآثرك
( البدر )
تل قلبي .. تل طيرٍ على طلعٍ وكيد جود المقرود سبقه وعيا يطلقه يوم فاع اركى جناحه على قاسي الحديد وانكسر ريش النداوي ولا الله وفقه يكفخ القلب المشقي على الخل العنيد ما وفا بالعهد لا شك قلبي صدقه واهني اللي على الحول ينبت له جديد وش سواة اللي جناحين قلبه محرقه يا لطيف الروح وبحق خلاق العبيد اكرم المملوك بالوصل والا فاعتقه البدر |
رد: رحلت يابدر ولم ترحل مآثرك
( الهوى لو تمنى )
الهوى لو تمنى .. سلوته مستحيله واعذاب المعنى كان روحه عليله لا بغى الوصل منا من ضافي الجديله عود موزٍ .. تثنى وش رماني بسبيله سهم عينه رمنّى والرموش الطويله خبروا الزين عنّى لي نشد عن قتيله كل خلٍ .. تهنى في الهوى مع خليله فاتنا السعد حنا يوم نفسه بخيله البدر * |
رد: رحلت يابدر ولم ترحل مآثرك
( الوله )
يطري عليه الوله .. وأطري على باله يامرحبا لاضوى خلي على بابي هجيت حدب الضلوع ونوخ جماله لاجله بكت دمعتي ولأجله ضحك نابي وكل ما ضحك لي لمحت النور في آماله والى تجهم سترت السقم بثيابي وكل ما شكى من عنى همه وغرباله أقول لعل به جرحٍ من أسبابي طال الحكي ما لقيت الوصل بوصاله لاني حبيبه ولا هو أقرب اصحابي ناديت طاري المحبه مالنا وماله بالحيل أنا وانت ربع وكننا أغرابي يا زين كانك حزين .. فحالتي حاله بكفيك همك وأنا بصبر على مابي لو الشجر له نصيب فـ بارد ظلاله ماحرق القيض جفني وأنت فـ أهدابي البدر |
رد: رحلت يابدر ولم ترحل مآثرك
( الوعد )
يا صـاحبـي طـالـت علـي المسـافـه كل ما نشـدتـك قلـت لـي الـدرب قـدام وعـدك مثـل بـاكـر أحبــه وأخـافـه ولا ينقضـي بـاكـر علـى طـول الأيـام ما اقـول ضـاع العمـر عنـدك حسـافـه انت الـدقـايـق عشتـها وانـت الاعـوام ودي ربـيـع العـمـر يـسبـق جفـافـه يا مسقـي العطشـان من كـاس الأوهـام كـانـك تعـاف الجـرح حنـا نـعـافـه وما سهـرت عيـوني تبـي عينـك تنـام ومـن لا ذكـر منـك جـميـل خـلافـه ما يملكه وعـد تـرى السـعـد قـدام البدر |
رد: رحلت يابدر ولم ترحل مآثرك
( الندم )
خل الندم .. يا مضيع الود يسقيك كاس الهوان .. وذل نفسٍ تمتك وخل الهوى يملا بعذابه لياليك مثلي .. وأنا ساهر جروحي بسبتك شْف ما بقى لك من غلا كود طاريك واتلى الذكر للي مضى من محبتك انا الذي بجروح روحي اداويك وبشفاي اجفف دمعةٍ فوق وجنتك كان الدلال .. وزينك اليوم مطغيك ترى الجفا كدّر على النفس لذتك وكأنك قصدت تذلني في تماديك روح المعزة عن ردى القصد ردتك ياصاحبيى .. ما بعت ودّي وأبا أعطيك غالي الوفا لو عاد ترجع مودتك البدر |
رد: رحلت يابدر ولم ترحل مآثرك
( اللوعة )
ياللي نسيت الزمن وقلوبنا تعده كم ليلةٍ غبت والهاجوس يلعب بي لا انت مع القلب يالغالي ولا ضده كله سوى راحتي والا تعب قلبي يسيل قلبي على الخدين .. وارده خبرت قلبٍ من اللوعات ينحبي وان قلت لا بد يبرد زادت الشده شقيت انا منك والشكوى على ربي يا من يغيب القمر لا من ظهر خده الزين زينك وانا كثر الوله ذنبي من عانق السيف لازم يجرحه خده ومن يعشق الجمر فيه النار تشتبي البدر |
رد: رحلت يابدر ولم ترحل مآثرك
( القاع والمسافة)
انا احبك مابها زيف وخداع رغم الذي نخفيه .. واللي نخافه أودعك .. ليت الألم لحظة اوداع إلى مضت .. ننسى الألم والحسافه وأفارقك.. لوالسفر .. يم وشراع وبعد الفراق .. اللي نوده نعافه لا صار مافي البعد راحه لملتاع بالله وش نفع التعب والكلافه من الجفا والصد .. يكفيني اذراع لا جف نهر الحبماتت اضفافه املي يدك رمل وترى هذي القاع ومدي النظر .. تدرين وش هي المسافه البدر |
رد: رحلت يابدر ولم ترحل مآثرك
( الغراب اللي نعق )
ليت ها العين ضاقت بالحدق قبل جدرانها بوجهك تضيق والله اني صحيت من الأرق راحلٍ لا مكان ولا طريق ما سمعت الغراب اللي نعق وين مثلي .. على مثله يفيق منزلي في الطويل الي شهق ومنزله قاعة الوادي السحيق قالو الحاقد بدمك شرق قلت ما أظنه لمدحي يطيق كنه الشوك في ثوبي علق يوذي الشوك ولا يقطع طريق كثر ما الريح تعبث بالورق وتوقد أغصانه الصفراء حريق وكثر ما شوه العج الشفق وقص من جيده عقود العقيق وكثر ما صابني وأخطا التفق لين ما أصحبت من خوفي طليق وكثر ما نز في كفوفي العرق من سلام على غير الصديق اتركيني على باقي عبق غيمة العطر من عمري العتيق البدر |
رد: رحلت يابدر ولم ترحل مآثرك
( الليل والوعد )
الله عليم .. إني مليك وأنا حر لأجل الهوى .. رضيت أنا بظلم سيدي من عادتي .. مالي جلاده على الضر واليوم أنا لرضاه باقطع وريدي لأجله غديت أستعذب العلقم المر وأضمد الجرح القديم بجديدي اللي فــ .. وعده لو طال الليل يقصر وكل لحظة تمضي .. فعمري تزيدي وسحابه للدمع لاغاب تمطر تسقي على شفاهي خزامي قصيدي *البدر |
رد: رحلت يابدر ولم ترحل مآثرك
( العمر أحبك )
لليل احبك مابقى في السما نور والى ضواني الليل .. للصبح أحبك واللحظة اللي كلها عند وغرور أشوف قبري بين عينك .. وقلبك في صدري سراجٍٍ حزينٍٍ .. ومكسور رغم المطر والريح .. شلته في دربك والله مابه غير لوعاتي قصور وخوفي عليك الله ربي وربك ما بي جهد ابني على صمتك جسور لا حيرتني أسباب سلمك وحربك العمر أحبك .. مابقى فيني شعور والى جفاني العمر .. وشلون أحبك البدر |
رد: رحلت يابدر ولم ترحل مآثرك
( العين مشتاقه )
يا عاذلي .. ما تشوف العين مشتاقة لولا الحيا جاوبتك بدمعها الصافي عطني جلد .. كان تنخاني على فراقه ودي الي من تركته ما أشبح خلافي لاح الجبين .. وجذبني نوض براقه حيثه ربيعي .. وورد الخد مصيافي والغصن لولا المطر ما أخضرت أوراقه يا كيف عشب الوسم يترك وينعافي البدر * |
رد: رحلت يابدر ولم ترحل مآثرك
( العشق والعتب )
السهر وقدةٍ تصلى الجروح والهوى ما بكت عين الجريح في الجمر دلةٍ صفرا تفوح وأنا قلبي على الشكوى شحيح اقشر العشق عشقٍ ما يبوح لين يفنا عتب أو يستريح اقضب الليل تكفى لايروح دام لي با الصدر عرقٍ يصيح باكر وادع وفراق ونزوح تطلع الشمس ونجومي تطيح البدر |
رد: رحلت يابدر ولم ترحل مآثرك
( الصاحب )
يا صاحبي .. والليالي سود يا صاحبي .. والزمن صافي اللي إلى احتجت له موجود واللي إلى من وعد يافي ما هو على المرجلة محدود تقول مكتوف بكتافي ما جور ياللي رقيت إسنود عرض الجبل .. وانيٍ حافي يوم الردى مسكنه فـ .. لحود مسكنك في راس مشرافي والله لوفي التحرص زود كان العمر ما نقص .. وافي وليت الرخا لا اجتمع والجود تقاسمه شهم .. وسنافي البدر |
رد: رحلت يابدر ولم ترحل مآثرك
( الطير )
واطيري اللي زودوا فيه الأثمان اشعل ظهر والصدر يجهر شعاعه لو له شبيه في الملى هو غزالان راجي عل زينه يزود بشـجاعــه خذته ولاني يا هل الطير ندمان من عادتي ما نيب اسوم البضاعه الى ركز في مجلسي طير حوران وتجمعوا عندي كثير الجماعه وشلته على كفي كثير الغثا هان عندي غدى للهم مثل المناعه لا صرت فيما تطلب النفس بلشان اترك طمان القاع وارقا برفاعه وباكر تصاريفه على عالي الشان من يضمن الدنيا ولو ربع ساعه البدر |
رد: رحلت يابدر ولم ترحل مآثرك
( السراب )
قال السراب وقلت ظامي لسـرابه قال الهلاك وقلت لعيون الاحباب يا لايمي في حب متـرف شـبابه الموت حق ولاتبـرق بالاسباب كانه ذبحني صـاحبي من عـذابه ماابي لدمي يا هل اللـوم طلاب الـجادل اللي فيه زيـن ومهابه يفز له قلبٍ .. وتخضع له أرقاب في حجر عينة لي غديـر وسحابه وفي وسط قلبي له تناهيت وعتاب إن قلت أحبه يكفي القلب مـابه وان قلت أنا مابيه ..باصير كذاب البدر |
رد: رحلت يابدر ولم ترحل مآثرك
(انتي المزين)
شبي الونس واملي الهبايب بالاصوات وعدي ضواري وحشتي عن ضلوعي روحي خلا .. سكانها خوف وسكات وليلٍ ملا قلبي .. ظلامه يروعي ما هوب صدري .. ذي مداهيل الآهات وماهوب جفني .. ذي مقابر دموعي حبيبتي وان قلتها بعض الأوقات من عزتي .. ماهي ترى من خضوعي أهواك لي فوق الشواهيق رايات وعلى حصون الياس تزحف جموعي واهواك ورقاب المغلين محنات واننتي المزين تنتخيني فروعي واهواك مراتٍ .. واعاتبك مرات بالله .. لا تبكين بردي وجوعي إن طحت فـ اطوي الياس من حب الأموات هذا رحيلي عنك.. واتلى رجوعي البدر |
رد: رحلت يابدر ولم ترحل مآثرك
(اغفر لي الزله )
أبيك في كلمةٍ لو هي خطا تغفـر لي الزله وردتك ظاميٍ وان عز وصـلك بااقطع حبالي أحبك ذا ترى أول كلامي .. وآخره كله ولكن وش يضر اليـوم لو تدري عن احوالي وخذ ما جـاز لك من هالحكـي واللي تبي خلـه انا لا قلت ما في خاطري والله ما بالي ظلال العاشق جروحه ومن ما يتبعه ظله أمانة يا شعاع الشمس لا تغضب من ظلالي وتقـدر تطـوي الدرب البعيد وتقـدر تفـّله ولكن صعب تمنع في الهـوى صبري وترحالي وتقـدر تغمد السيـف الرهيف وتقـدر تسلّه ولكن عـند خلاّق البرية علم الأجالي متى عمرك سمعت بعاشق قد مات من غلّه هذاك الحاسد وراعي الهوى تتلفه الأمالي حبيبي من يعـزك في الهوى ما تقدر تذله ترى قربك يزيدك بالغلا وان عفتني غالي البدر |
رد: رحلت يابدر ولم ترحل مآثرك
((أنا النخيل ))
بين القلم وأصابعي والورق شوق عشرين حولٍ .. من كتبت القصايد من يوم بان القلب .. واخفيت بالموق دمع .. وغـدالي بالمحبه .. وعايد كتبت ما كني على الشعر مسبوق وقريت ماكن افـ قصيدي .. جدايد ونزفت لين اتعبت لا حصل اعروق وسهرت لين امست نجومي قلايد وصرت الليالي بين عاشق ومعشوق وصرت الوصل مابين حاضر وبايد أنا النخيل وشعري اظلال وعذوق وانا السحاب اللي على الناس جايد وفـ ليلةِ حسيت من جرحي اعقوق وقف النزيف وما بذي له عوايد صار الورق مابين مهمل ومشقوق وحار القلم ما بين ناقص و زايد من الشعر مليت ياحادي النوق و من الجروح اللي .. تمل الضمايد و من الحروف ونقصها مع هل السوق وكذب الحسود .. وهم راعي المكايد ومجاد لي في كل ساذج ومطروق وخوفي على غر المعاني الفرايد عشر السنين وعشر .. والجوف محروق ما غير أشب أطراف ليلي وقايد مانيب ادور من ورى نزفي احقوق و لا ابي من سهر عيني فوايد لو ما بقالي في الملا غير مخلوق لا من ذكر شعري .. جفته الوسايد كني بجبين الشمس .. والليل مفروق وكني بدمعٍ .. فوق خده نضايد افداه عمرى .. ماشكى صاحبه عوق لاشك ما في النفس لو قيل كايد البدر |
رد: رحلت يابدر ولم ترحل مآثرك
(( البتول ))
كـل أرضٍ تشيلك يـا ثـقيـل الحمــول وكل وقتٍ كريمٍ بالرضا والزعل وين مـارحت تلقى لك حبيب وعـذول وين ما كنت تلقى مثل ياسـك..أمل ياطـريق الترجي والوله والـنـحول والله إني مـشيـتـك... لـين حد الـثـمل مالقيت فوصولي لغـير قــبري وصول ولا عـرفت فـحياتي مثل عرفي الجهـل لا تظـن المـسافر مـن يسوق الـرحول مـن وقف دون حلمه عاجزٍ ما رحـل وما لمخلوق منجا في الحذر والجـفول مـا تـصيب السـهام ولا يـطـيـش الاجــل الـلـيـالي خـــــوات.. مــير مـنـهـي البـتــــول والحــوادث عـشــــايـر مـير ويــن الفـحـل ليلةٍ لـك .. وليله بـالفـــرح مــا تـطـــــــول ولـيـلـةٍ مـن شــهــدهــا ذب راس الــجبـــل أتذكّر في عين الشمس طفــلٍ خـجـــول شـالـتـه فــي هــدبــهــا وقـت لــين إشـتـعــل أعجب الناس وهجـــه بالجــدل والفـضــــول ما دروا عن (جمـــال الجـرح) لــين إنـدمــل والله اني كتـبـتـه في العطــش والذبـــــول لــين غــصــنــه تــعـــدل بـالــورق وإعـتــدل والله إنـي كــتـبـتـه لــــين قـــــــال الجـهــــــول والله إنـي كـتـبـتـه وانــتــشـى واحـتـفــل ما أتفه الشعر كانه هالحكي اللي نقول لا تـعـدى الــمــــديــح ولا تـعــدى الـغـزل إن لثمت الزهــــــور وصــــاحبتني الحقــــول مـاهقيت ان صافـي الشهـد عيب النحل مابقى في ضلـوعي كود ريـح مـعـمــــول وثــــوب شـاشٍ عـليه مــن النــدامـه وحــل ألـتـفـت للـطــــريــــق ومــا عـــبر مــنــه زول فـــي جـفــوني تـزاحم عبرتي والـوجــل طـلـت يالعـمر والا قــلــعـتـك لا تـطـــــــول طــاولــتـنــا الـلـيــالي بالـســــهــر والــمــــلـل إن تـعـبـنــــا نـــحـب ولا لــقــيــنــا قـبـــــــــول مـا تــسـر الامـــانـي .. ولا يـفيـد الـعــذل لكن .. الله كريم وكل همٍ يزول مـا على الله بعيد .. ولا جـفـاك الـمـحـل كـل أرضٍ تشيلك .. يـا ثـقيـل الحمــول وكل وقتٍ كريمٍ بالرضا والزعل البدر |
رد: رحلت يابدر ولم ترحل مآثرك
عن كل نجم ظهر بسدل أجفاني
لعل ما عيش حزني لحظة غروبه وعن كل خلٍِ طويل الصمت كفاني الصاحب اللي قليل الهرج عذروبه وعن كل ثوبٍ جديد باالبس أكفاني وأدله ولا ألقى رسايل هم في جيوبه أنا الجفا ليه أخاف الناس تجفاني وأنا الحبيب الذي من يعشق عيوبه راعي الوعد وأن صدق مرة ولاقاني يحتار بين السراب وقلب محبوبه يامن عذابه يشققني ويرفاني فرقاك غصب علي بالحيل مكتوبه خبرت نصف تعب من نصفه الثاني بعضي الرماد وبعضي نار مشبوبه البدر |
رد: رحلت يابدر ولم ترحل مآثرك
الله يحبك كثر ما شقّق البرق
سود الدياجي وانبت الغيث وارق والله يثيبك كثر ما بان من شرق نجمٍٍ وغاب فـ لجة الغرب شارق ياسدرةٍ في نجد يلقى بها الورْق للنوح غصن وللمعالي بيارق لك الشموخ لباس.. عاليك للعِرق وباقي النساء خرص الذهب والعشارق والله ما مثلك كتم آهة الحرق وما كن مسّك من لياليه حارق وقتٍ إلى منه كسر رمحه الزرق بالنار يودع في الحنايا مطارق ياهيه حوّل مثل ما تشتهي وإرق وإفطن لقبرك بين هاك المفارق الوقت يسرق باقي أعمارنا سرق ما نجتمع .. إلا وحنا نفارق ياعمتي بعض العزا يتعب الطرق ما ينكتب والحرف بالدمع غارق كل شكى لوعة لياليه والفرق في اللي يبي ما عند رب المشارق البدر اهداها الى صاحبة السمو الملكي الأميرة البندري بنت عبدالعزيز بن عبدالرحمن آل سعود |
رد: رحلت يابدر ولم ترحل مآثرك
يازين مافي العيون نعاس
والقلب مشغول بهمومه اما معي نطرد الهوجاس والا لك النوم وحلومه هذي نجوم السما .. جلاس وعيبٍ على العاشق القومه لاجل الهوى عذبونا الناس ومن بيح السد ما الومه انفاسنا ماغدت انفاس من حرها دوم مكتومه البدر |
رد: رحلت يابدر ولم ترحل مآثرك
أنشد البحار على سر الحنين
عن قصيد البحر .. وجروح السفين عن حبال الشوق تظمأ للشطوط عن حروق الملح في شفاه السنين ما عرفت الغوص في اليم المخيف ولا رهنت العمر في الدر الثمين جيت أنا من نجد .. في قلبي الرياض وفي عروقي التهم .. والبيت الأمين في كفوفي تصرم نخيل الحسا ومن ذواري الرمل غادي لي جبين جيتكم .. والعشق يطرحني سؤال هو صحيح الشط له صدر ويدين عانقتني بيوتكم .. وأنا بعيد ما عبرت الجسر .. ما شفت القطين ياهوى البحرين مريت الديار عابرٍ والقلب باللهفة ضنين لين حطت بي رحالي في هواك البدر |
رد: رحلت يابدر ولم ترحل مآثرك
يا اجمل الحزن .. لدموعك سلام
من حبيبٍ ... بقى منه الكلام وين انا منك .. غربني الزمان وخانني النور ... وابعدني الظلام لو بعزيك ... سالت دمعتي تدري الدمع في حبك ... حرام لو بواسيك ... مايكفي الهوى ولو أبي ... عذر مايكفي الغرام أعطنى من عذابك يا البعيد صرخةٍ ... تجعل ظلوعي حطام آه ...لو في يدي أبكي معاك قطرةٍ مادرى عنها الغمام ماابخل الوقت ... يحرمني البكا وانت لجلك حرمني الإبتسام يا اطهر الحزن ... لو كان القصيد يكشف الغم عن بدر التمام لكتب الشمس شعرٍ في سناك وامحي إمن السما...عج وكتام ياعسي البدر نوره مايغيب عن حبيبٍ بقي منه الكلام ** البدر |
رد: رحلت يابدر ولم ترحل مآثرك
تل قلبي .. تل طيرٍ على طلعٍ وكيد
جود المقرود سبقه وعيا يطلقه يوم فاع اركى جناحه على قاسي الحديد وانكسر ريش النداوي ولا الله وفقه يكفخ القلب المشقي على الخل العنيد ما وفا بالعهد لا شك قلبي صدقه واهني اللي على الحول ينبت له جديد وش سواة اللي جناحين قلبه محرقه يا لطيف الروح وبحق خلاق العبيد اكرم المملوك بالوصل والا فاعتقه البدر |
رد: رحلت يابدر ولم ترحل مآثرك
قالوا حروفي عمي وعيونك بروق
مافي قصيدي جنح ليلٍ وبارق قلت الذي له داخل ضلوعي حروق أقرب من اللي في سما الناس شارق غيري يشوفك وأجود الشعر مطروق وأنا أحسـّك وأصدق الحب فارق ياللي عيونك دم وعيونك عروق ولهاث قلبٍ فـي نواعسك غارق أقول أحبك يخرج البحر صندوق تبرالغزاة وكنز سود البيارق وأقول أحبك صدرالايام مشقوق عن وجه غرناطه وعن مهر طارق وأقول أحبك والله إني من الشوق ألقا طيوفك في جميع المفارق كتبت لك قلبٍ من القلب مسروق ولا طاب لي وصفٍ من الوصف سارق البدر |
رد: رحلت يابدر ولم ترحل مآثرك
وغيبي ياشمس اللي ضيها لغيري..
اه .. لو تعرفي وش كثر انا احبك.. لو كنتي تدري بي ياعيونها السود.. مابه احد موجود.. غيري انا الموعود جرحي.. وتعذيبي.. ياحلوتي ضاع الوعد.. وباكر بعد... مري على دروب الجراح.. وتلقين احد غيري... البدر |
رد: رحلت يابدر ولم ترحل مآثرك
كيف أبا أروي حنيني .. بالظما
يا ممنى حياتي .. بالسحاب وين غيث المحبه .. ما هما اجدبت بالحشا أرض العذاب واشتكت من تجافيك السما كيف ترضى عليّ .. طول الغياب وانت حبك جرى مجرى الدما يا حبيبي ذوى قلبي وذاب من عذابــه وبيح ما كما وعل عينٍ .. رضت فيك العتاب البدر |
رد: رحلت يابدر ولم ترحل مآثرك
ادري ان الوقت يذهب ما يعود
اربعينٍ فارقتني يالعنود ماطر الايام من غيم الزمان ما يبل الريق لو مهما يجود كم شربته صافيٍ بارد قراح ما دريت ان الظما سر الوجود كل شمسٍ تلمس اشجار العمر تحرق الاوراق وتجف الفنود وكل ريحٍ تدفع شراع العمر ينقطع به حبل ويميل العمود اربعين مرت وتوني صغير انتظر لعل تصدق لي الوعود والغريب اني على هذا مغبوط ادري اني بخير لا شفت الحسود الزمن يا بنيتي كله زوال ما تخلد كود لحظات السجود البدر |
رد: ديوان الأمير بدر بن عبدالمحسن
من يطعن السيف ابـ حشاه ..
ويجرح السيف .. من يضرب السيف ابدماه .. ويقطع السيف .. السيف .. المعدن البارد .. نصل الشتا الحاد .. له تحت جلدي .. طريق ٍ ضيق ٍ بارد .. وله صرختين اجداد .. حبيبتي .. يا نبتة الدم .. السيف .. إما قتلتي اعناد .. والا قتلتي هم .. ومضة شعاع ٍ خاطفه .. السيف .. الصمت قبل العاصفه .. الألم .. لا فارق اللحم .. العظم .. كم .. لحظة ٍ .. يا انتي إنطحنتي خايفة .. من موعدك .. قبل الوعد .. ورديتها .. قلت ارجعي .. وكم صرخة ٍ .. ياللي ان جرحتي .. توجعي .. ولو انجرحتي توجعي .. اطلقتها بعد العد .. وشقت ضلوع العاطفة .. من يطعن السيف ابحشاه حبيبتي ومن يضرب السيف ابدماه .. ويقطع السيف .. وقفت وضلوعي ( الصفاه ) اغطي عيون الأمل .. ابغترة الحزن .. واركعه .. كان الجفا .. سيف ٍ يسيل .. في لحظة قصاص .. وكانت عيوني تودعه .. تشتاق .. للموت .. الخلاص .. يا نبتة الدم .. السيف .. مره قتلني عناد .. ومره قتلني هم .. البدر |
رد: ديوان الأمير بدر بن عبدالمحسن
ومرت سنه .. على فراقك
على صوتك .. واشواقك غريب كيف االزمن يرحل واحلام العمر .. تذبل .. سنه مرت .. وانا أول .. حبيبٍ يوقد الشمعه لجرحه في يوم ميلاده هلا .. بالحب .. واعياده وكل عامٍ .. وجرحي بخير مشيت دروبنا .. خطاوي قلوبنا ومريت الوعد .. وعدنا العام ماكان الوعد .. ولا الأيام .. هي الايام وما ادري ليه هالشارع .. نسوه الناس ومتى هالمقعد الخالي .. يجوه الناس حبيبي .. ليه فـ غيابك .. يغيبوا الناس حبيبي .. ايه والله حبيبي .. ايه والله نساني العمر.. لو انساه نساني الفرح .. لو انساه احبه .. ما ظهر نجم .. ونبت عشب .. وسرى براق أحبه .. لا زمن يشقي جروحي .. لا جفا .. وفراق أنا هذا الهوى كله .. وقلبي آخر العشاق .. البدر |
| الساعة الآن 08:48 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لـ منتديات شمران الرسمية