رد: اخترنا لكم
 

ليا شانت وجيه الليالي وقلّ الراي
وخلايا الدماغ من التفاكير مضطربه

عط الراي عمرك لا تشاور به الحكاي
لو ان الطواري سربةٍ من بعد سربه

فلا تزتمل وتقول ماجت على مشهاي
فرجها ليا ضاعت على فارج الكربه

ترى شرهة البندق على وقفة الرماي
مثل شرهة الفارس على زرقة الحربه

.....

رد: اخترنا لكم
 

ساترين وجيهنا بالعوايد والسلوم
ومن خِلقنا ماطلعنا على يدين احد

ننطح كبار المواجيب ونسد اللزوم
ومانعرف الا هلا وارحب وهل من بعد

حتى مع قل الفوايد ومع كثر الرسوم
النواجد مسفهله واهل باس وجهد

ماتضيق الا على اللاش وعيال الرخوم
وان حدتنا شهب الايام سقناها جلد

.....

رد: اخترنا لكم
 

الليل توّه راح منه النصيفه
وأنا من التفكير والضيق زاهق

والغالي اللي كل ما مر طيفه
قامت دموعي عن بعضها تفاهق

راح وترك لي ذكرياتً خفيفه
اليا طرت في خاطري قمت أشاهق

أثر المُحب اللي يفارق وليفه
يصير عقله مثل عقل المراهق

.....

رد: اخترنا لكم
 

بالثقة والعزم والعقل أتحلا
عارفٍ وش مستواي ووين حدي

ماني مغرم بالجديل اللي تدلا
أنا مغرم بالنعارة والتحدي

أكتب أبيات الغزل لأجل أتسلا
والا أنا ذا الخربطة ماهيب عندي

.....

رد: اخترنا لكم
 

احضر ومثلي صهيله يسبق قدومه
واغيب لكن تجيب الكسب غيباتي

لو ان مالي جناح ونفس ملزومه
ماكان تفخر مواكيري بهداتي

خلقت فالراس عز وفالنسم زومه
وتدنيقة الراس ماهي من خياراتي

من كثر ما ابوي علمني على القومه
نسيت كثر المطيح وقوّ وقعاتي

.....

رد: اخترنا لكم
 

ياعيونٍ .. في أنتباهتها تغاضي
مرّي المتضايق وخليه الأرحب

وأشغليني لي ثلاث شهور فاضي
وّدي أرجع من جديد أحب وأنحب

.....

رد: اخترنا لكم
 

امي وليفة خاطري نور عيني
حتى وهي قربي لها احن واشتاق

كل مااضيق بها الزمن تحتويني
يارب تشرح صدرها كل ماضاق

.....

رد: اخترنا لكم
 

‏ياهيه ياللي تنقل القال والقيل
‏وتحطني في موقفٍ ما حصلي

‏بيني وبينك دعوةٍ تالي الليل
‏اخذ بها حقي وانا في محلي

.....

رد: اخترنا لكم
 

يا آخر الليل عطني العلم من بدري
ويش انت ناوي ترجع لي من الذكرى

إن كانها حزن فـانا ممتلي صدري
وإن كانها خير يمكن ضيقتي تبرى

.....

رد: اخترنا لكم
 

الحب غفوه نوم في جفن سهران
سحابه الاشواق والوصل ديمه

والبعد جرح انسان في داخل انسان
تبطي وسومه بالحنايا مقيمه

.....