رد: فوق هام السحب ( الشعر الشعبي) على متن القوافي
 

المسا هذي تفاصيله وهذا لونه
‏التحف بشته علوّ الديره وطامنها

‏كل مامرّت نسايمه الشجر وغصونه
‏تبعث اللي في قيود الصبر من مكمنها

‏الهوى ماينعذل قلب المهاوي دونه
‏والقنوع ان ذاق لذّات الحياه ادمنها

.....

رد: فوق هام السحب ( الشعر الشعبي) على متن القوافي
 

‏زملوني عن غلاه وعن طيوفه
‏وعن هبوبه في ضلوعي لا أستهبّت

‏وأستروا قلبٍ تولته الحسوفه
‏لين راجت في عروقه ثم شبّت

‏الهوى ماله على العاشق مروفه
‏شف لياليه القديمه ويش خبّت

.....

رد: فوق هام السحب ( الشعر الشعبي) على متن القوافي
 

الله رفعنا في جميع المواجيب
والناس مايلحقهم الذم منا

ان جاء مجال الناس شرواهم الطيب
وان جاء مجال الطيب شرواه حنا

.....

رد: فوق هام السحب ( الشعر الشعبي) على متن القوافي
 

‏ماكنت أقصر فيك من كثر الإعجاب
‏يومك تساوي عندي الكون كله

‏كنت القريب وكلهم كانوا أغراب
‏حتى القمر لاغاب شفتك محلّه

‏خلاص لاترجع ترا خاطري طاب
‏الخاطر اللي كنت عايش بظله

‏رح واعتبرني واحدن أذنب وتاب
‏ماني بثوب تلبسه ثم تملّه

‏مايجتمع بالحب صادق وكذاب
‏رزقي على الله وأنت رزقك على الله

.....

رد: فوق هام السحب ( الشعر الشعبي) على متن القوافي
 

مع دورة الدنيا يقلون الأصحاب
‏واليا صفى الصافي تريح فؤادي

‏بقى بجنبي محزمي وقت الأنشاب
‏وبقى معي راع الوفاء والمبادي

.....

رد: فوق هام السحب ( الشعر الشعبي) على متن القوافي
 

‏لاطابت النفس العزيزه من انسان
‏ماعاد يسوى في نظرها ولا شي

‏تجوز عن رفقته لو كان ماكان
‏وتقفي كما يقفي عن الميت الحي

.....

رد: فوق هام السحب ( الشعر الشعبي) على متن القوافي
 

‏طرف الليل والذكرى القديمه هواها
‏يستفز السكوت ويستثير المساري

‏كل ماقلت بسلا من طواري غلاها
‏مرّني طيفها واقتاد معه الطواري

‏ان تغاضيت كبدي من يبرّد لظاها
‏وان تجاهلت من يقدر يرد اعتباري

‏كل ما اذكر ليالينا وذروة صفاها
‏كن جوفي عليه اتحدّ حدب الشباري

.....

رد: فوق هام السحب ( الشعر الشعبي) على متن القوافي
 

‏رميت وجهي على كتفك شوي وغفيت
‏والغفوة اللي ثواني فوق كتفك عُمر

‏لو إنك من أول الدنيا معي ماشكيت
‏مافاتنا نستحقّه بس ما الله أمر

‏لو مرّ عمري معك برد وسلام اكتفيت
‏هذا وجنبك ربيع العمر عيّا يمر

‏دامك معي لايهمّك لو ضحكت أو بكيت
‏كتفك لحاله يكفّي لين يقضي العمر

.....

رد: فوق هام السحب ( الشعر الشعبي) على متن القوافي
 

‏ودي ارد قلبي بالغزل ياغزاله
‏لايسوي سوات اللي يهمّل رفيقه

‏الهوى لذّته في طيشه وفي هباله
‏ولذّة اول شعور وربكة اول دقيقه

‏وجهٍ اللي يشوفه ينبهر من جماله
‏وطلةٍ تجعل الرجال يشرق بريقه

‏ودي امثل مثول المتهم للعداله
‏ماعلي دامني بين اليدين الرقيقه

‏العفو ياشبيه اللي جفل من ظلاله
‏نظرتي في التفاصيل الدقيقه دقيقه

‏انت حتى الذهب يزهاه جيدك لحاله
‏ويتلاشى على غيرك ويفقد بريقه

.....

رد: فوق هام السحب ( الشعر الشعبي) على متن القوافي
 

‏دام المساء يجمع على الود غاليين
‏يسعد مساء نبض المشاعر والاحساس

‏ويسعد مساء من يسكن القلب والعين
‏ويسعد مساء باقي المواليف والناس

.....

رد: فوق هام السحب ( الشعر الشعبي) على متن القوافي
 

عزوم الرجال تبين فالموقف الغصاب
‏وعن نفعة الضابط يبا ايسدّك الجندي

‏يمال الغنى يامجمل الربع والاجناب
‏ابو خنجرٍ تفعل وابو جبهةٍ تندي

.....

رد: فوق هام السحب ( الشعر الشعبي) على متن القوافي
 

‏لاتلوم اللي بعدكم غدت عشره ثمان
‏المحبه تسفه العاقل وتضحك عليه

‏هذا أنا لي أربع سنين أجي نفس المكان
‏يوم شفتك فيه صدفه وأحسبنك بتجيه

‏آه لو تدري عن اللي يحبك كان .. كان
‏ماتخليه يتضايق ولو عذرك وجيه

‏المكان اللي جمعنا وقف فيه الزمان
‏أنت جيته مرّه ورحت وأنا عشت فيه

.....

رد: فوق هام السحب ( الشعر الشعبي) على متن القوافي
 

القلوب يريبها طول الجفا والليل دوبه
‏يتهادى عطره الحسّاس وأحظى بإهتمامه

‏كل وجهٍ قد طويت اوراق ماضيه بصعوبه
‏تحمل الانسام بالغ شوقه ووافر سلامه

‏وين ابهرب والثواني واقفه شبه مغصوبه
‏عدني ياليل شرهاتك واعديك الملامة

‏الضمير الحي ماتسكن من اللهفة حروبه
‏تربكه حتى نسانيس الهواء مدري علامه

‏من ترك لي صورةٍ فالبال ماهيب محجوبة
‏يتشجر في زوايا القلب وده واحترامه

‏يدري إني كل ماتاخذني الخطوات صوبه
‏مستعد أرضي غرور الغرة اللي فوق شامه

‏يارهيف الحس كيف أصد والصدة عقوبة
‏وانت يغري عودك بميلة ويغري بإستقامة

‏لاتسيل الدمعة العذبة واسيل من العذوبة
‏الدموع تكبّل العشاق وتزيدك وسامة

‏أهيفٍ لو تبتسم تسلب من الرجال ثوبه
‏ابتسم واقول لك لله در الابتسامه

‏من تخيّر دربك المهجور عن باقي دروبه
‏لاقيٍ بعيونك الثنتين مضياف وكرامه

‏لاتلومه لو تشوف الصمت ذنبٍ من ذنوبه
‏وش يقول اللي يشوف إحساسه اكبر من كلامه

‏واحدٍ مهما تضيق بعينه الارض الرحوبه
‏مايبين في عيون الناس ضعفه وانهزامه

.....

رد: فوق هام السحب ( الشعر الشعبي) على متن القوافي
 

ألا يالله اني طالبك مع صباح الخير
‏أبا اليسر والتوفيق والفوز والجنه

‏أنا عبدك اللي مامعه بالامر تخيير
‏سوى خيرتك ياكامل الجود والمنه

.....

رد: فوق هام السحب ( الشعر الشعبي) على متن القوافي
 

‏أسولف مع الأوهام لكن بليا صوت
‏ولو أمي بتدري عن طواريّ مانامت

‏أنا من كثر ماخفت مما يسمى موت
‏أصلي صلاة الشكر لاشفتها قامت

.....

رد: فوق هام السحب ( الشعر الشعبي) على متن القوافي
 

اللي صنع ساهر بلا شك حرّيف
‏ساهر ضروري للأمن والسلامه

‏ياليت به ساهر لعوج السواليف
‏وتنزل على رقم المسولف غرامه

‏ونسلم من أهل الكذب والغش والزيف
‏ويحـسب على من هو تكلم كلامه

.....

رد: فوق هام السحب ( الشعر الشعبي) على متن القوافي
 

ماهو ضروري كل الاذواق تعجبك
‏بس احترامك ذوق غيرك ضروري

‏انظر وميّز واختر اللي يناسبك
‏بالسوق ياباني وصيني وكوري

.....

رد: فوق هام السحب ( الشعر الشعبي) على متن القوافي
 

ليتني لامن عرفت الطيّبين اجمعهم
‏لو على عود ازرق و فنجال خولانيّه

‏اربعه ودّي اشوف وجيهم واسمعهم
‏الكريم العارف المـنعور صافي النيّه

‏واربعه عيّت علاقتي لاتضبط معهم
‏الرّدي والنغل والبوّار والنفسيّه

.....

رد: فوق هام السحب ( الشعر الشعبي) على متن القوافي
 

من منطلق كل ٍ تحكمه ظرووفه
‏ياللي جهلت الناس رايح على وين

‏ماكل رجالٍ يشابه وصووفه
‏كم واحد ٍ فعله يجمل وهو شين

‏مثل اللذي سواد عينه نشوفه
‏وإليا نشدنا الناس قالوا حمر عين

.....

رد: فوق هام السحب ( الشعر الشعبي) على متن القوافي
 

‏عليك باللي يلحق القول بافعال
‏والا الردي خله وجنّب مساره

‏أنا اشهد انه ماكذب واحدٍ قال
‏من لايعدك ربح عده خساره

.....

رد: فوق هام السحب ( الشعر الشعبي) على متن القوافي
 

‏على اني من اللي يعشق الصبر والإلحاح
‏لكن الليالي ماتبي صبر وفتوه

‏ياكم حاجةٍ صديت عنها عشان ارتاح
‏مهوب اي حاجة لازم تصير بالقوه

.....

رد: فوق هام السحب ( الشعر الشعبي) على متن القوافي
 

‏تسيّرني مقاديري على القسوة
‏مع إني ماقسيت إلا على أحلامي

‏عسى مابيني وبين الفرح فجوة
‏عسى ماينتهي صبري وأنا ضامي

‏.....

رد: فوق هام السحب ( الشعر الشعبي) على متن القوافي
 

لاتذل النفس دايم وترضى بالنزول
‏ولا يجي منّك رخامه وتحريض وريا

‏مستحيل تحصل العز وتنال القبول
‏وانت ماعندك كرامه ولا عندك حيا

.....

رد: فوق هام السحب ( الشعر الشعبي) على متن القوافي
 

ترى الحكي صوب القلوب المصّده
‏مثل المطر فوق السحال المجفاه

‏ومن لايعدك في الزمن لاتعدّه
‏جعله ذلوف مقيط واللي تقفاه

.....

رد: فوق هام السحب ( الشعر الشعبي) على متن القوافي
 

عساي ما اثقل على قلب مخلوق
‏ولا اسوي مايسبب عتابه

‏انا احب الذوق وادور الذوق
‏عند التعامل والحكي والكتابه

.....

رد: فوق هام السحب ( الشعر الشعبي) على متن القوافي
 

‏كانك تعرف الأدب والذوق والذايقه
‏أعرف طريق السنع وأصحى وخلك ذكي

‏عليك بالطيّبه والكلمه اللايقه
‏العرف ماله مدى والفعل غير الحكي

.....

رد: فوق هام السحب ( الشعر الشعبي) على متن القوافي
 

‏دام الزمن ياصاحبي يمشي سريع
وش لي بتفتيش الصدور الخافيه

يامنوتي محدٍ بهالدنيا يضيع
غير المبادي والقلوب الوافيه

.....

رد: فوق هام السحب ( الشعر الشعبي) على متن القوافي
 

‏قال من شاف الحياة وعافها في ظرف ساعه
‏منحيٍ وجهه ذعاذيع الهوى والليل بادي

‏يدري إن الناس والأيام مافيها طماعه
‏شابعين من المجامل والتكبر والتمادي

‏من هداه الله وشاف النور ماملّ إتباعه
‏علم اللي راح عمره هايمٍ في كل وادي

.....

رد: فوق هام السحب ( الشعر الشعبي) على متن القوافي
 

‏للصدور اقفال وابوابها مخرج هروب
‏توخذ بعين اعتبار المشاعر والعبر

‏ودي اعرضه صفق النسايم والهبوب
‏لين يبرا جرحي ولين كسري ينجبر

‏اعتذر لحلامي اللي ماتوصلها الدروب
‏واعتذر من كل حاجه تبي مني عذر

‏لمتى والحظ زاهد ومنظوره شحوب
‏لاهو بطيب مجاني ولا طايل شبر

‏اخذني من كل حاجه على الصدر الرحوب
‏ومد لي يمناك واضحك يابو وجه سفر

‏مابقى لي غيرك اليوم يالريم اللعوب
‏لا استزاد الوقت ضدي ترا عندك خبر

‏من كثر ما اخشى الموادع وتفريق القلوب
‏ودي ان صبر المهادي على صبري صبر

‏كل يوم اودع الشمس في وقت الغروب
‏احسب انها كل يوم تحول في قبر

.....

رد: فوق هام السحب ( الشعر الشعبي) على متن القوافي
 

سلامي عليك ورحمة الله وكيف الحال
‏يابو ضحكةٍ ماهي مع الناس منتشره

‏معك راح عمري قو صمله وطولة بال
‏وعلى درب وصلك جبت عشره على عشره

‏لو انك معي مابين غيبه وبين وصال
‏تهاون غيابك لين ماهانت العشره

‏وحدود الكرامه ماتساوم وانا رجال
‏اليا اقفيت عنك وانت غافل فلا تشره

.....

رد: فوق هام السحب ( الشعر الشعبي) على متن القوافي
 

انت وينك عن مساء الأشواق قلي
كيف عايش ياجميل الروح دوني

في غيابك ياحبيب الروح من لي
انت اجمل من سكن داخل عيوني

.....

رد: فوق هام السحب ( الشعر الشعبي) على متن القوافي
 

‏لك الوفاء والشوق بالشعر مرسول
‏ولك الورود أشكال من كل نوعي

‏بيني وبينك بحر وجبال وسهول
‏وروحك قريبه في حنايا ضلوعي

.....

رد: فوق هام السحب ( الشعر الشعبي) على متن القوافي
 

‏بعض الصدف لو تجمع الحي بالحي
‏مثل الحزن عمره مارد المصيبه

‏يؤسفني ان باقي من الواجد شوي
‏ويعرف كلٍ وش يخبي نصيبه

‏إن لم تعد هقواتنا مثل ماهي
‏عدنا كما كنا غريب وغريبة

.....

رد: فوق هام السحب ( الشعر الشعبي) على متن القوافي
 

‏ضيقةً في خاطري عقدها حبله جويد
‏ماتفرج لين ياخذ بي الجيب انهوٓه

‏في سنع بدوٍ تناحوا بمضنوني بعيد
‏دونهم للجيب روحة ومسرى واضحوه

.....

رد: فوق هام السحب ( الشعر الشعبي) على متن القوافي
 

‏لنا مشاريه وعلينا مشاريه
‏ولا كل رجالٍ عليه انتشره

‏نشره على الطيب لاغير مباديه
‏والا الردي شرهاتنا ماتمره

.....

رد: فوق هام السحب ( الشعر الشعبي) على متن القوافي
 

‏الوقت يكشف لك الاصحاب بالمرّه
‏لو كان صبرك على الايام فولاذي

‏اللي ماهو معك في الحلوه وفي المرّه
‏لاعاد ترجيه في هاذيك وفي هاذي

.....

رد: فوق هام السحب ( الشعر الشعبي) على متن القوافي
 

يالله بنور مثل وضاح الصباح
‏اللي يشق الليل الاظلم لاصعد

‏وحظ يبادر بالسعادة والنجاح
‏ويوم يبشر بالغنايم والسعد

.....

رد: فوق هام السحب ( الشعر الشعبي) على متن القوافي
 

عن المجامل وكسب الناس ورضاها
‏رضا ضميري على نفسي مكفيني

‏العمر يسلب من الدنيا مزاياها
‏ورغباتي تقل كل مازادت سنيني

‏أشياء ياكثرها كنت اتمناها
‏والحين ماعاد تسوى شي في عيني

.....

رد: فوق هام السحب ( الشعر الشعبي) على متن القوافي
 

‏يابرد الشتاء خل الحنين القديم يموت
‏امانه معك لاتبعث الشوق من قبره

‏انا من كثر ماني بمتضايق ومكبوت
‏لو يقول احد وش فيك غصتني العبره

‏اذا الناس تحتاج اكسجين وشراب وقوت
‏انا احتاج جبرة خاطرٍ مالقى جبره

.....

رد: فوق هام السحب ( الشعر الشعبي) على متن القوافي
 

‏اقلطي يامرحبا والليل توه بادي
‏لايروح الليل دام انتي وانا من دونه

‏باللسان وبالعيون وبالمشاعر نادي
‏اسمع مناداك قبل الناس لايوحونه

‏من سمع صوتك ولا جاوبك هذا غادي
‏ودك الله يحرمه سمعه وضحك سنونه

‏هايمٍ في عينك وصوتك وضارب وادي
‏واديٍ من هام فيه الله يكون بعونه

.....