رد: ديوان قصائد لشعراء المملكة العربية السعودية (متجدد)☘️☘️
 

سبعة أرقام وجفا
..
بيني وبينك سبعة ارقام وجفا
عندي بقايا جرح وعندك بقايا وفا
لاجزا الله هالدنيا خير
في كل لحظة طبع غير
ياللي جفاك طوّل
ترى المغيب اقبل
وما عاد به شي ٍ نخافه
لامن غدت كل المسافه بيني وبينك سبعة ارقام
سبعة ارقام وجفا
بيني وبينك كان شي ٍ يسمى حب
كنا بنقطع به درب ٍ طويل ٍ صعب
فيها الحسد والخوف
فيها العذول اللي يستمع بالشوووف
فيها الرجوع اصعب من النسيان
فيها الصديق اقسى من الانسان لامن جرح انسان
ياللي احبك غصب
الدرب ماله درب
وكل شي صرنا نخافه
دام انها كل المسافه .. بيني وبينك
سبعة ارقام وجفا
ياللي ضيعتي الوفا
اليوم ضيعني الوفا!
اقبلي مني الجفا .. واقبلي عمري اللي ضاع
وارضي لي ب الهم رفيق
ولا لمحتي مركبي في بحر حبك غريق ..
ابعدي .. لاتضعفي .. لا تمدي لي الشراع
ياللي قتلتي كل شي
ما ابغى منك الا شي
حققي لي اللي ابي واقبلي مني الوداع
ولاذكرتي ما مضى ... اكتبي سر الضيااع
سبعة ارقام .... ودفا
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

شبية الريح
..
شبية الريح
وش باقي من الآلام
والتجريح
وش باقي من الأحلام
وش باقي من الأوهام
غير اني .. الاقي في هجيرك فيّ
الاقي في ظلامك ضيّ
واوقد شمعتي في الريح
شبية الريح
اذا تسمح بغيب شوي
ابجمع همي الباقي
وادفن صبري الذابل في أوراقي
وبرجع لك اذا باقي بنفسك شي
شبية الريح
أنا مقدر أكدر صفوك العاصف
شبية الريح
أنا من لي سوى إحساسك الجارف
بقايا زيف أشواقي
سما أمطار أحداقي
شبية الريح وش باقي
ابي أعرف
متى تسكن رياحك
وابي أعرف
غرورك هو متى يطلق سراحك
وابي أعرف
متى تعصف
متى تعطف
متى تنزف جراحك
وابي أعرف
إذا باقي في بحرك موج اكسر فيه مجدافي
وابي أعرف
إذا باقي في همك هم ماشالته أكتافي
وابي أعرف
إذا باقي في هالدنيا حزن مامرني واستوطن أطرافي
وابي أعرف
إذا باقي من المعجز في هالدنيا
سوى العنقاء
والا الغول
والا خلك الوافي
بقايا زيف أشواقي
سما أمطار أحداقي
شبية الريح وش باقي؟!
سنيني يم
وقلبي المركب المتعب وانت الريح
مجاديفي عذاب وهم
وزادي الوجد والتبريح
وصبري صبر بحّارة
بغوا في اليم محّارة
غشاهم موج كان من الغضب أغضب
وكانوا للهلاك أقرب
لولا كثروا التسبيح
شبية الريح
حبيبي الأصدق الأكذب
عجزت اوصل شواطي طبعك الأعذب
تعبت أنطر في وسط العاصفة
قلب وشعور وعاطفة
تعبت أجمع ألم كل الموادع
في المواني وأحضن أطيافك
تعبت السهد في ليل الشوارع
والثواني تنطر انصافك
تعبت الظلم واجحافك
شبية الريح
أنا ودي أكدر صفوك العاصف
شبية الريح
أنا كني نسيت إحساسك الجارف
بقايا زيف أشواقي
سما أمطار أحداقي
شبية الريح
كيف أسألك: وش باقي؟
وأنا الباقي من إحساسي
ذرته الريح
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

يسعد صباحك
..
يسعد صباحك .. يا حبيبي
حالي طيب
كل شي مثل اللي كان
المدامع .. والمواجع ..
والأمان اللي اختفى لحظة غيابك
والليالي اللي مضت .. مثل الليالي اللي مضت
الهم عازف .. والدمع نازف ..
والعمر في غيبتك حاير وخايف
حتى جراحك وسط قلبي مثل ماهي
وفي شفاهي باقيٍ نفس الكلام اللي بقى .. آخر لقا
مثل منتَ يا حبيب الروح شايف
كل شي مثل اللي كان
وحالي طيب
يسعد صباحك .. يا حبيبي
هذا انت
كل ما ضاقتبي الدنيا تغيب ...
وكل ما ضاقتبك الدنيا تجيني
هذا انت
ان كساك الهم صرت أوفى حبيب
وان نساك الهم تتباهى ب أنيني
مثل منت .. دايم تجي ف وقتك حبيبي
بعد ما وقتك يروح
يا آخر دموعي وشجوني ..
وأول إحساسي جروح
ما بقالي من عذابي يا حبيبي .. الا انت
وهذا انت يا حبيب الروح شايف ..
كل شي مثل اللي كان
وحالي طيب
يسعد صباحك .. يا حبيبي
هذا ضي الصبح .. او هو بعض نورك؟!
هذا همس الورد .. او دافي شعورك؟!
منهو مثلك في غرورك؟!
جيت متأكد بسامح ..
راسم الطيبة ملامح
ماهو بدري!! ..
انت تدري
ما قتلني غيابك اكثر من حضورك
ايه كان العمر داكن ..
ايه كان الهم ساكن .. وقتي بعدك
بس أنا يا ضيّ عمري ..
كنت عودت الأماكن تألف بعادك وصدك
ياللي ما يرضيني ضعفك ..
ما ادري انثر فوق كتفك أغلى دمعي .. او أردك
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

قد الحروف
..
قد الحروف
قد الحروف اللي في اسامي العاشقين بحبك
قد الثواني
والدقايق والسنين،، بحبك
قد الهموم اللي في قلوب البشر
قد العيون اللي كحلها السهر
قد ما ليلي اشتكى من نار حبك،،،
قد ما ليلي حكى عن طول بعدك
ليه القمر غالي عليا؟؟
يمكن عشان في نوره وبعده في حاجه منك
ليه الشتاء،،، في قلبي حزين؟؟
يمكن عشان برضه بقساوته،،، في حاجه منك
ليه السحاب بعشق بياضه؟؟
يمكن عشان زي قلبي،،، في قربي منك
ليه المطر،، بيصعب عليا؟؟
يمكن عشان يشبه دموعي،،،، في بعدي عنك
ليه لما تبعد .... عن عنيا،، بخاف عليك،،، وبرضه منك
ليه لما اشوف في السماء نجوم كتير،،، منها بغير؟؟
يمكن عشان قد السماء وقد النجوم،،، بحبك
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

مذهله
..
مُذهلة ..!
ماهي بس قصة حسن ...
رغم ان الحسن فيها بحد ذاته .. مشكلة
مُذهلة ..
كل شي فيها طبيعي .. ومو طبيعي
أجمل من الأخيلة
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..
مُذهلة ..
تملأك بالأسئلة ..
هي ممكنة والا محال ..؟!
هي أمر واقع .. أو خيال؟!
هو سهلها صعب المنال ..؟
أو صعبها تستسهله!
مُذهلة ..
تملأك بالأسئلة ..
ليه كل معجز مر هذا الكون .. فيها له صلة؟؟
ليه كل شي فيها تظن انك تعرفه .. تجهله!؟
ليه كل لا معقول فيها ورغم هذا تعقله!؟
طيبها .. قسوة جفاها ..
ضحكها .. هيبة بكاها ..
روحها .. حدة ذكاها ..
تملأك بالأسئلة ..
مُذهلة ..
يا بدايات المحبة ..
يا نهايات الوله ..
كيف قلبي ما احبه؟
وانتي قلبك صار له!
يا أعذب من الأمنيات ..
يا عالم من الأغنيات ..
يا أجمل الشعر البديع ..
من آخره لين أوله ..
ما راودتك الاسئلة؟!
ليه عمري ما لقى لبرده دفى ..
الا دفاك ِ!
ليه قلبي ما بدقاته عزف لحد ٍ ..
سواك ِ!
ليه أنا عيني تشوف وماتشوف ..
الا بهاك ِ!
يا أجمل من الأخيلة ..
هذا جواب الأسئلة ..
كي تكوني من حنيني ..
وبس فيني .. ومو بدوني مُذهلة
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

يا كاعب
.
يا كاعب الطبع الفريد


ياللي في صدقك تكذبي
يا أقدم الكيد الجديد


كيد انسجن منه نبي
يا جاريه تملك عبيد


يا مقيّده تسبي سبي
القوه في ضعفك تبيد


وسلاحك الدمع اسكبي
ما يعجزك قاسي عنيد


الكهل يصبح بك صبي
ينصاد ويظن انه يصيد


ويصدقك هذا الغبي
ويظن انه الفذ الوحيد


ما يدري انك تلعبي
مسكين هالجاهل بليد


ظنك بوصله ترغبي
ان جاك اقفيتي بعيد


وان صد عنك تقربي
وان شفتي اخلاصه يزيد


في حيرتك تتقلبي
وان بان لك فجأة سعيد


من هالسعادة تغضبي
وان قلتي عني لاتحيد


وطاوعك تستغربي
وان قلتي فراقك أريد


وغاب عنك تندبي
ياطالب الراي السديد


يا حاير بطبع الظبي
أقرب من حبال الوريد


وابعد من المجد الأبي
وأوضح من أنوار ٍتقيد


واخفى من النملة دبي
الشك فيها والأكيد


وغموضها به تختبي
شف فعلها يحكي ويعيد


الغدر شيمة مذهبي
زادي النكد به استزيد


والمكر صافي مشربي
البعض ينصاني مجيد


والبعض يحبيلي حبي
ضعفي قوي وذلي عتيد


ياليت اعرف مأربي
شف فعلها برجل ٍشديد


تلقى طلبك ومطلبي
تعطيه بعض اللي يريد


وتاخذ جميع اللي تبي
أستثني من هذا القصيد


كل النساء بكوكبي
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

رسالة إلى حبيبته
.
إنه أمامي العاشق الأصدق..
في صمته المدوي..يبثني شكواه
إنه يحب..
وحبه في هذه الدنيا هو الأصدق..
إنه أمامي..
يالها من نظرة حزينه..
تحجب النهار تطل من عينيه..
يالها من وجنة في دمعته..
يقرأ في ملامحها الضياع..
كأنها بحار قد أمسي العوم..
ومن حوله تنهد الموج ولا يرى مرساه...
إنه أمامي..
ساءت في طباعه الطباع..
لايقبل اللوم..يبكي على ليلاه..
إنه أمامي..
يالها من قصة حزينة..
تطل من عينيه..
تطل من عينه تلك
سنينه العجاف والذكرى..
وتطل من عينه الأخرى
سنينه العجاف والذكرى..
وتلك التي أحبها سنين..
تلك التي رمت به في البحر..
ومع غيره..ركبت سفينة..
وتركت له المجذاف..للذكرى
أحمق..ياله من أحمق..
هذا الذي أمامي..العاشق الأصدق
لها هذه الرسالة..
لمن علمته الصبر والغضب..
لها لعلها تلقى من الإحساس مايكفي
لكي ترثي حاله..
لها لعلها تعلم..
أنه أدبرت أو أقبلت..
هالكٌ..هالكٌ لامحالة..
لمن علمته الصبر..
كتبت هذه الرسالة..
كتبتها..
ألقيتها..
في ماء هذا الغاضب الأزرق..
في البحر..
كتبتها كي أوقظ الأصدق
هذا الذي أمامي..
العاشق الأصدق..
كتبت في الرسالة..
تحياتي حبيبته..سلامي..
إنه أمامي..
له من المتاعب مايكفي لكي يُعشق
فاجرحيه به أو تريحها..
له روح أبت إلا على يديكِ..أو تزهق
فأقتليه بالرحيل أو تعالَي وأزهقيها..
لمن يحب..كتبت هذه الرسالة..
فعلت ماعلي..
كتبتها..
ألقيتها..
في ماء هذا الغاصب الأزرق..
في البحر..
كتبتها كي أوقظ الأصدق..
هذا الذي أمامي..
العاشق الأصدق..
يا صاحباً لا أعرفه
في الشاطىء الآخر..
لربما ستلقى ماكتبت..
لربما ستقرأ الرسالة..
إقرأ من الآخر..
إن كنت تعرف من يحب
خذها لها..
وقل لها إن الذي أمامي...لا لا
ياصاحباً لا أعرفه..مزق الرسالة
وأضحك على المأساة..
عرفت من أمامي..
إنها المرآة...!!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

أصدق ماكتبت
..
انتي .. تدرين من انتي؟!
تدرين انك لي غديتي كل شي
وانك غديتي شمس ليلي وفي الهجير الفيّ
وانك اصدق ماكتبت
وانك احزاني وفرحي .. لاضحكت اوانجرحت
وانك غديتي ياعذابي اغلى من حبك علي ّ
قبل أحبك .. يا ما كذّبني القصيد
وبعد حبك .. صار يكتبني القصيد
هو يوصفك بسمة وطرف
وأنا اعشقك في كل حرف
منك شكالي .. وصف حسنك اتعبه
وانا شكيتك .. وعشقي لحبك اعجبه
ومهما شكى ومهما وصف
انتي احلى ماكتبت .. انتي اصدق ماكتبت
وانتي احساسي وجرحي .. لاضحكت أو انجرحت
وانك غديتي يا عذابي اغلى من حبك عليّ
تدرين من انتي ..!!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

قالوا ترى
.
قالوا ترى مالك امل في قربها لو يوم
ابعد وجنّب دربها .. هذا هو المقسوم
قلت اتركوني واسكتوا .. خلو العتب واللوم
قدني غرقت في بحرها .. ولاعاد يفيد العوم
قالوا ترى في حبها ويل .. وأسى .. وهموم
قلت ان قتلني حبها .. حسبي تقول مرحوم
قالوا انسى ذكرها .. منتب بها ملزوم
قلت ابشروا ياعذلين .. بنسى لذيذ النوم
قالوا بتلقى غيرها .. واترك هواها اليوم
قلت العفو ياحسدين .. ما ابدل قمر بنجوم
قالوا لغيرك حبها .. قلت الجواب مفهوم
دام انها متهنيه .. وشلون اصير محروم
بقضي الليالي انتظر .. صابر على المقسوم
متعلق بطرف الأمل .. يمكن يجيني نوم
قالوا ترى مالك امل .. في حبها لويوم
ابعد وجنب دربها .. وهذا هو المقسوم
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

أحمد محمد سلامة
..
في زمن وهمي من الأزمان
كان ياما وياما كان ..
سلطنة وسلطان ..
وف يوم من الأيام ..
يتصفح السلطان جريدة ..
موضوع يسترعي اهتمامه ..
أحمد محمد سلامة ..
فرد من أفراد شعبه ..
يائس وأوضاعه صعبه ..
في الصبح يشتغل بواب ..
في مدرسة أطفال ..
وفي الليل يشتغل شيّال ..
عنده ثلاث عيال
فيهم مرض نادرعضال ..
ماله علاج إلا فبلدان بعيدة ..
كلفته ما يحتملها وفاقته أصلاً شديدة ..
انسدت الدنيا أمامه ..
وارتأى أن الطريقة الوحيدة ..
لفتح أبواب الأمل ..
انه يوجه ندا .. عبر الجريدة ..
لاهل الكرم .. واهل الشهامة
تبرق .. في عين سلطان البلاد غمامة ..
ويهطل الدمع من عينه ..
يمسح الدمع بكفوفه ..
ويخلع العمامة ..
ويرفع للسما راسه ..
ويقول ..
ياربي الفرد الصمد ..
سترك وعفوك ..
ألهتنا عن الناس ..
أمور الحكم والسياسة ..
ينادي سلطان البلد:
يا حاجب ..
استدعي معالي وزير السلطنة الأول .. رعد ..
يجي رعد .. ويبدي ولاَءه واحترامه ..
صاحب المجد والكرامة ..
سيدي السلطان أمرك ..
أي كرامة يا رعد .. أي كرامة
والمواطن في البلد .. ضايع مقامه ..
اتركك عن هالحكي .. واسمعني زين
هذي مليونين خذها ..
وصلها لمحمد سلامة
أحمد محمد سلامة
خذ الجريدة .. تلقى التفاصيل في الجريدة
لكن اسمع يا رعد .. ما أبي يدري أحد
أحذرك .. لا صحافه .. ولا جرايد
هذي لوجه الله أبيها ..
ويعلم الله .. من وراها ..
ما أبي مدح وقصايد ..
أرتجي عفو الكريم ..
في يوم بالأهوال زايد ..
سيدي السلطان خيرك .. في القديم وفي الجدايد
ربي يجزيك المثوبة .. ويعينك بوقت الشدايد
يخرج رعد .. ويستدعي وزير المال والأحوال ..
مرسال ..
يجي مرسال .. أمرك معالي وزير السلطنه الأول ..
تعال يا مرسال .. فوراً وفي الحال
خذ المليون هذا ..
وسلموه .. للمواطن أحمد محمد سلامه .. من سيدي السلطان
خذ الجريدة .. تلقى التفاصيل في الجريدة
مرسال .. لابد هذا يتم الآن .. فوراً وفي الحال
وبأقصى درجات السرية والكتمان ..
هذي أوامر سيّدي السلطان ..
يخرج مرسال .. ويستدعي كبير الحراّس
فراس .. يجي فراس
أمرك يا وزير المال والأحوال ..
فراس .. تعال
خذ هذي خمسمية ألف ..
سلموها .. للمواطن أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة
خذها الآن ..
فوراً وفي الحال سلمها .. وبأقصى درجات السرية والكتمان
هذي أوامر سيدنا السلطان ..
يخرج فراس .. ويستدعي النقيب ..
حبيب ..
يجي حبيب .. أمرك ياكبير الحراس
حبيب تعال ..
خذ هذي المية ألف ..
سلموها للمواطن .. أحمد محمد سلامه .. من سيدي السلطان
خذ الجريدة ..
تلقى التفاصيل في الجريدة ..
خذها الآن سلمها .. فوراً وفي الحال ..
وبأقصى درجات السرية والكتمان ..
هذي أوامر سيدنا السلطان ..
يخرج حبيب ..
ويستدعي مسئول المساكن
مازن ..
مازن .. تعال .. خذ الخمسين ألف هذي
سلموها للمواطن .. أحمد محمد سلامة .. من سيدي السلطان
خذ الجريدة .. تلقى التفاصيل في الجريدة
خذها الآن سلمها ..
وفوراً وفي الحال ..
وبأقصى درجات السرية والكتمان ..
هذي أوامر سيدنا السلطان ..
يخرج مازن .. ويستدعي رئيس الحي ..
اللي ساكن فيه أحمد ..
عبد الحي ..
يجي عبد الحي ..
عبد الحي تعال
خذ هالعشرين ألف
سلموها .. للمواطن أحمد سلامه
خذ الجريدة .. تلقى التفاصيل في الجريدة
خذها الآن .. وسلمها لأحمد سلامة
عبد الحي ..
أهم شي السرية والكتمان ..
هذي أوامر السلطان ..
يخرج عبد الحي ..
ويتوجه لمكتبه في الحي ..
ويستدعي مساعِدُه أمين ..
تعال ياأمين .. تعال .. شوف الجريدة
وخذ الألف هذي ..
سلمها لأحمد سلامه
ساكن هناك .. عمارة في آخر الشارع
جنب مدرسة الكرامة ..
الدور الرابع .. شقة ستة
وديها الآن .. وقل له ..
هذي من سيدنا السلطان ..
واسمع ياأمين ..
احرص على السرية والكتمان ..
هذي أوامر السلطان
أمين واقف ورا باب شقة
أحمد محمد سلامة ..
يدق الباب ..
صوت من خلف الباب ..
مين؟ ..
أنا أمين .. مساعد رئيس الحي ..
عبد الحي
يفتح الباب .. أهلين وسهلين ..
هذا بيت أحمد سلامه
نعم أنا أحمد سلامه
أحمد محمد سلامة؟ ..
أحمد محمد سلامه ..
ممكن إثبات
طبعاً أكيد
فعلاً أحمد محمد سلامة
سيدنا السلطان .. موضوعك استرعى اهتمامه
سيدنا بيسلم عليك
وحب يطمن عليك
وكلفنا ننقل لك رسالة:
سيدنا السلطان .. أدام الله أيامه
يتمنى للأطفال عندك ..
كل الشفا وكل السلامة
مبروك يا أحمد تستاهل ..
مع السلامة ..!
****
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

هنا العراق
..
هُنَا العراقْ ..
في كل ركنٍ ..
حُرةٌّ تُسْبَى ..
وطفلٌ مُقعَدٌ ..
ودمٌ يُراق ْ..
هُنَا العراقْ ..
في كل بيتٍ ..
والدٌ يبكي ..
وأمٌّ تشتكي ..
ضَيْمَ الفراقْ ..
هُنَا العراقْ ..
هُنَا الأرضُ التّي ..
أعداءُها اغْتَصَبوا ..
وقبلَهُمُ الرفاقْ ..
هُنَا الخيرُ العميمُ .. المستديم ُ ..
هُنَا الشعبُ الفقيرُ .. المستجيرُ ..
هُنَا الحضارةُ ..
والمنارةُ ..
والمهارةُ ..
والتطرُّفُ في الولاءِ ..
وفي النفاقْ ..
هُنَا الطغاةُ على مَدى الأيام سادوا ..
هُنَا الغزاة على مَدى التاريخ بادوا ..
اليوم عادوا .. عانِقوهم ..
بشِّروهم ..
هاهنا سيُقتَلون .. ويُخْنقون ..
من العِناق ..
هُنَا العراقْ ..
هُنَا الأمطارُ .. والأنهارُ ..
والأشعارُ ..
هُنَا الأفكارُ .. والأذكارُ .. والأقمارُ
هُنَا الكرامةُ .. والدناءة ُ .. والمودةُ ..
والتنافرُ ..والشقاقْ ..
هُنَا العراق ..
هُنَا الغناءْ .. هُنَا البكاءْ ..
وكربلاءْ ..
هُنَا الأحباب ْ .. هُنَا زريابْ ..
هُنَا السيّابْ ..
هُنَا الحجَّاج .. هُنَا هارون ..
ماأدراكَ ما هارون ..!
هُنَا المأمون .. هُنَا النوّاسُ .. من غيٍّ أَفَاقْ ..
هُنَا العراقْ ..
هُنَا البعث ُ .. هُنَا العَبثُ ..
هُنَا الأصنامْ .. هُنَا الأزلامْ ..
هُنَا صدّامْ .. هُنَا الأقدامْ ..
تدوسُ تِمثَال الزّعيمِ ..
بِلا اتفّاقْ ..
هُنَا العراقْ ..
هُنَا بداياتُ الحضاراتِ الأبيّة ..
هُنَا نهاياتُ الشعاراتِ الغبيّة ..
هُنَا الثرواتُ تنسى الأغلبيّة ..
هُنَا الضَّحِكَاتُ من شرَّ البليّة ..
هُنَا الجيوشُ لأيِّ معركةٍ تُسَاق ..
هُنَا جثمانُ أمتََّنا المجيدة ..
هُنَا دُفِنت مآثُرنا التليدة ..
هُنَا أمجادُ أمريكا الجديدة ..
هُنَا صار الخليجُ على الحديدة ..!
هُنَا ذابَت بلادٌ ..
ذات يومٍ ..
إسمها كان العراقْ ..
*****
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

رحل
..
رحل اشتاق لجراحه
رحل
اشتاق لجراحي ... رحل
يحق له طيبتي ماتحتمل
قليلة في وقت الهموم
ما كنت اعاتب أو ألوم
يحق له ما يحتمل .. هذا الملل
اسدلت أيامي لعناده
حبيته في قربه .. وبعاده
متعبه هذي السعادة
رحل اشتاق لجراحه
رحل
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

دخون
..
هو فيه مثلك .. ياللي الحسن ظلك
ليه العطر؟!
وانتي انفاسك دخون
وليه الكحل
وانتي ماغيرك عيون
وليه تفكيرك يكون
انك تكوني دايم اجمل
انتي اجمل
من جمالك
من دلالك
من خيالك
ياللي كل افراح قلبي والحزن
في المسافة بين فرقاك ووصالك
وليه يالقلب الحنون
تاخذك فيني الظنون
ضيعتي عدلك .. هو فيه مثلك ..؟!
انتي ماغيرك عيون
وانا احبك .. وانتي انفاسك دخون
ياللي احبك .. ليه احبك؟
او ليه ماحبك ..؟!
وانتي علّمتيني ان الحب كله اسئلة ما تنتهي
ليه ما احبك ..؟!
وانتي علّمتيني ان الحب لا غدا لمثلك .. ابد ماينتهي
ياللي علّمتك عذابي والهجر .. ليه ما احبك؟!
ياللي علّمتك تكوني ..في ضعف ضعفك .. اقوى مني
يا انتي ضحكاتك تغني .. وابتساماتك شعر
يا انتي ضحكاتك تغني .. وكل ما شفتك اصر
انك اجمل من جمالك .. من خيالك .. من دلالك
على حبك انا .. بقفل ابوابي
وبطيوفك انا.. بسقي اهدابي
يا انتي .. يا انتي احبابي
تصدقين .. تصدقين .. صدقي
قلبي لكي وحدك . .صدقي
ماقوى على بعدك دقايق .. بس دقايق
ياظلي .. يا داري
يا اجمل ..افكاري ..
تظلميني لوتقولي اني عاشق .. بس عاشق!!
ياللي وحدك تسمعي صمتي وكلامي
ياللي ضيك ..اتعب همومي وظلامي ..
صدقي اللي في قلبي لك ِ ..
اكبر من افكار القصايد والحكي
تصدقي انك اجمل في عيوني من جمالك من خيالك من دلالك
لا يالقلب الحنون
لا تاخذك فيني الظنون
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

البرواز
..
قلتيلي انسى
ومن يومها وانا كل ليلة .. قدامي البرواز
حبر العيون ودمع القلم .. في دفتري
وصورتك .. رغم الألم .. ورغم انها خذت من اطباعك كثير
وخانت البرواز .. اشوفها في خاطري
حبيبتي مابيدي حيلة
لاصرتي الصورة .. وعيوني البرواز
وشلون ابنسى
اتعبتي الصورة مشاوير
وتعبت انا بلقى لغدرك معاذير
وصورتك اللي سجنت بروازها طول السنين ..
كانت جسد وبروازها الروح
ويوم انزعت منها الجسد .. تجرّحت اطرافها
وبجروحها راحت لمين؟
لبروازها الثاني!!
مسكين .. بيسجنك ويبقى سجين
مسكين
تشبهلك اقداره .. خانته
وصورتك يجي يوم وتخونه
حبيبتي ..أو للأسف حبيبته
لاصرتي الصورة .. وجفونه البرواز
وشلون ينسى؟!
حبيبتي لجل انسى جرحك واستريح .. ببكي
وبعد البكى .. ببكي
وأكيد فيه لحظة بتجي .. وبيجف دمعي
وعندها صورتك اللي في عيوني
بتموت من ظلم العطش ..
بروازها بيصبح نعش
وبتمرني الدمعة الأخيرة ... تاخذ معاها صورتك وتطيح
وكني بالمسافة تطول مابين عيني .. ودمعتي .. وخدي
وكني بقلبي الحاير المسكين
نبضه يقول لا تودع الفرقى .. الدمع مايرقى
وعندها لانزلت الدمعة لمثواها الأخير
وفارقت وجهي
بغمض عيوني .. واكسر البرواز
وانسى
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

ما أظن
..
ما أظن الصبح .. يدري بالليالي وماأظن الليل يعنيه الصباح
وما أظن في يوم قد زارك خيالي وماأظنك حاسبٍ عمري اللى راح
ياقديم الظلم ما فارقت بالي ومافي بالك لي سوى هم وجراح
لو همومي تسعدك .. زد لا تبالي ولو معي اخطيت اطلبك السماح
تبعد دروبك اذا اقبل وصالي ولجلك دروبي يضيقبها البراح
رغم بعد البعد جرحك هو ظلالي كنك الرامي وفرقاك الرماح
يالغرام السجن والسجّان غالي والسجين يخاف إطلاق السراح
لو هو في الأوراق قدر الغصن عالي بتاخذ الاوراق اقدار الرياح
للكسر غصنك وانا يمضيبي حالي ولضمى اورقي خلق ربي قراح
بسبقك للصبح مليت الليالي واتركك في ليل ناسيه الصباح
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

لجل أوصلك
..
َبفارق فراقك وبخنق ..عبرتي واجرّح اضمادي واسافرلك ..معك
بشد للماضي واقدم ساعتي واعاند اعنادي واقودك واتبعك
بجامل احزاني واجافي فرحتي واعادي خلاني واحبك واخدعك
بصير انا طبعك وأنتي طيبتي وبيحزنك ضحكي .. وهلّي بمدمعك
بسامر دموعي واعزّي ضحكتي وبهدي انا ضلالي .. ضلال ٍ ياسعك
بلبس انا ذلك .. وقيسي عزتي وبتصيري ذنوبي وخيري بيطبعك
بحارب في ضعفي وافر في قوتي وإلى رضختيلي لموتي بدفعك
ولجل اللقاء برحل وتمضي رحلتي وإلى حصل شوفك بكون مودعك
اببعد واوصلك وبسبق خطوتي وبنثرك فيني وانسى اجمعك
بضم أنا هجرك في قربك وحدتي وتدلك عيوني وقلبي مضيّعك
واذا اضلمت دنياي بطفي شمعتي واذا كثر زادي بجوع وبشبعك
شردتي رقادي وسمعتي نضرتي وغمضت أنا عيوني لجل ما اسمعك
صرخت في سكوتي ولمستي صرختي وقربتي وجهك لي لجل ما اصفعك
عند الحزن تثقل خطاكي دنيتي وعند الفرح قالت خطاكي مسرعك
قصيدتي يكفي .. غبية كذبتي حبيبتي آسف بخونك .. بس معك
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

وش تبين
..
وش تبين؟!
تجرحي؟! ..
افرحي .. مابقى مني أنا غير الجراح
وش تبين؟!
تعذبي؟! ..
ابشري .. الفرح من دنيني ولىَ وراح
والحين سويتي كل اللي تبين ..
اتركيني دمعة في خد الجراح،،،
الثواني عمر .. والفرقا دهر
والحقيقة كذب .. والدنيا حذر
حبك انتي شمس .. ناسيها الغروب
بالحيل تحرقني .. ولا منها هروب
وش تبين؟! .. اشكي!؟
والا تبين ابكي!؟
ياللي الملل طبعك،،
طبعك نسى همي،،
كانك تبين الكل يدري بقسوتك
عليّ أنا سمي
بَعاهدك أني أقول انك قتلتيني
واكتبت على صدر السما ..
أصدق قصيدة حزن
واني كثر عشقي لكِ ..كنتي تجافيني
وان شككوا في ضعفي فيك وفي قسوتك
كونك جرحتيني
أبوعدك أني .. أسقي العِدا دمي
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

مردخاي
..
سمعتوا قصة مردخاي ..؟!
من زمان قالوا لخوكم مردخاي
مردخاي هذا زمانك جاي
شفت هالخوان قاتلهم .. خذ أرضهم .. اهدم منازل بعضهم .. وشردهم
غيّر معالم ارضهم . .واطمس ملامحهم ..فرّقهم وتصير سيّدهم!!
وامسك بتلمودك ودينك .. وبعّثر مبادئهم
وبعد ماتزرع بذور الحقد فيما بينهم .. وتحصد مشاعرهم
قد ماتقدر حيّد اكبرهم .. رد له كامل حقوقه
واعزف على اوتار فرقتهم
واضرب أغناهم ب افقرهم
حاربهم بهم .. واشعل معاركهم
وبعد مايستنزفوا قوة بعض ..
خذ مابقى منهم .. وفاوضهم
فاوضهم على الفتات ..
واذا عطوك حق الفتات .. رجّع لهم ربعه
وسالمهم
هذي قصة مردخاي سيد الزمان الجاي
عاجبكم؟!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

مجلس رجال
..
مجلس رجال
على اليسار مقلّط .. وعلى اليمين صالة
ضيوف جالسين
قهوجي يلم الفناجين
وينطر اخر ضيف منهم يهز فنجاله
ضيف يقبل من بعيد
يقوم صاحب المجلس طلال لستقباله
شخص جالس على اليمين يهمس لجاره:
هذا احمد اللي جاي بس ماهو لحاله
من معه؟
يبدولي اطفاله
ويدخل احمد معه ثلاث اطفال
وعند باب الصالة يستقبله طلال
السلام عليكم
الكل يوقف
هلا والله مرحبا عليكم السلام .. حي الله احمد هلا وسهلا .. تفضل .. كيف الحال؟
هلا طلال ..اعرّفك على عيالي .. ابني صابر عمره ثمان سنين .. لاتستحي سلّم ياصابر
بنتي هالة .. ست سنين .. سلم ياثامر على الجماعة .. وش هذا اللي في يدك؟؟
اه .. سجايري والولاعة
عبدالمعين يطالع الساعة .. ويهمس لجاره
كيف يجيب اطفاله؟! .. محد منا معه اطفاله .. ليش يجيب اطفاله
ويجلس احمد ويجلس حوله عياله
طلال يقول:
ما شاء الله .. ياحليلهم .. الله يحفظهم ويحرسهم ويحميهم
ماشاء الله يا صابر: ايش هالثوب الجديد
احمد يقول وملىء وجهه ابتسامة
هذا صابر موهوب في التقليد قوم ياصابر قلّد اصالة
والا تدري وري عمك كيف يركض سامي الجابر
ينطلق صابر لخارج المجلس .. يرجع معه كورة يشوتها .. تنزل من السقف ثمان لمبات مكسورة
احمد يقول وملىء وجهه ابتسامة
شاطر ياصابر ... شفت ياطلال شقاوة هالعيال
طلال يتمتم:
ياحليلهم .. الله يحفظهم ويحرسهم ويحميهم
تعالي ياهالة سمعيهم ووريهم اغنية ورقصة الخيالة
لا تستحي يا بنت مافيه احد غريب هذا عمك طلال وهذا عمك مثيب
وهذا عمك عبدالمعين وهذا ..... لا مؤاخذة انت مين؟
انا عبدالكريم
عبدالكريم .. تخيّل يا اخي ماعرفتك لانك يمكن ملتحي .... لاتستحي يابنت لاتستحي ..
تدري طلال هالة نجحت بامتياز
صوت مدوي ينفجر
اه ياثامر ما اشطنك .. كسّرت القزاز
احمد يقول وملىء وجهه ابتسامة
شفت ياطلال شقاوة هالعيال
طلال يتمتم:
ياحليلهم ..الله يحفظهم ويحرسهم .....؟؟؟؟!!!!
وش كنت اقول ايوا طلال كنت اقول هالة نجحت بامتياز اعطيتها البارح فلوس
وقلت لها ياهالة ايش ما تبغي اشتري
طلال يقول
مبروك .. مبروك .. ايش تبغي تصيري لما تكبري
هالة تتفل على طلال .. وتقول:
ايش دخل ابوك
احمد يقول وملىء وجهه ابتسامة
شفت ياطلال شقاوة هالعيال
طلال يتمتم:
ياحليلهم .. الله يحفظهم .....................؟؟!!!
تعال ياثامر .. عد لعمك من واحد الى العشرة
ثامر يبتدي يعد
واحد ..اثنين .. ثلاثة .. سبعة
احمد يقول وملىء وجهه ابتسامة
دايم يعد .. ولما يوصل اربعة يلخّبط
يالله ياثامر من جديد
يبدا ثامر من جديد
واحد .. اثنين .. ثلاثة .. سبعة
شاطر يا ثامر شفتوا كيف لخبط
ينفتح باب المقلّط ويدخل النادل شايل دخون
والصالة في حالة جنون
احمد يصفق .. صابر وثامر يرقصون
طلال يقوم
العشاء .. تفضلوا ..الله يحيكم
احمد يقول
يالله يا اولاد الله يحميكم .. اتعشوا اول .. بعدين سووا اللي تبون
يركض الاولاد قبل الضيوف .. وللمقلط يدخلون
صابر ياخذ برتقالة .. يرميها على النادل .. تطيح المدخنة والدخون
ثامر هناك .. يكسر بياله .. ويرمي شظاياه على اللي ياكلون
هالة ترمي على طلال صينية ... وتاخذ علبة مياه غازية
تخضها .. تخضها .. تخضها .....
وترقص رقصة الخيالة .. وتفتح العلبة
احمد يقول وملىء وجهه ابتسامة
ايوه ... هذي رقصة الخيالة
والضيوف في ثياب من المياه الغازية يرفلون
مجلس رجال
على اليسار مقلط .. وعلى اليمين صالة
كل شي فيها ماهو على حاله
قزاز مكسور .. سجادة محروقة .. غترة مشقوقة
صينية هناك مرمية ...
ضيوف مبللين بمياة غازية
على وجه عبدالمعين جرح قطعي . .ومهلبيّة
نادل مصاب بحروق من الدرجة الاولى .... وجروح سطحية
كورة ... لمبات مكسورة
يضهر احمد من المقلط وملىء وجهه ابتسامة
اكرمك الله يا طلال..شايف شقاوة هالعيال
اقول طلال .. اشكر ام العيال نورة .. العشاء كان رائع .. ماقصرت مشكورة
عشاكم ياجماعة بعد اسبوع عندي ... لازم تشوفو ولدي الصغير؟!!
اخر العنقود .. منصور .. عمره ثمان شهور .. شيطاني يعقد ..اظن له معي صورة
شوف يا طلال هالصورة .. لاتغرك نظرته .. ترى والله ذكي مره
ما يضحك ولا يبكي لما يبدا اخوه ثامر يعد
طلال صامت ما يرد
وترتسم على وجهة احمد علامة استفهام ويتساءل في داخله
طلال كن وجهه متغير ..اكيد احد من هالضيوف زعله
مسكين طلال .. دايم في حاله مايخلوه .. زين جبت العيال سلوه
ويخرج احمد من الصالة .. فخور بعياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صالة
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

تعبت
..
تعبت أنزف جراحي حبر وأدور للألم أسباب
لجل أكتب شعر يحكي بعض أصغر معاناتي
قفلت من الأسى بابي وسجنت الكون خلف الباب
وعصتني دمعةٍ فيها سؤال لكل اجاباتي
ملل أخبار حسّادي أحد صادق وأحد كذاب
وأحد ما طال تجريحي وأحد عايش لزلاتي
أنا شاعر رغم أنف الحسد والحقد والأحباب
وانا ياحاسدي المسكين بعيد العيب عن ذاتي
أنا ما زادني شعري ولا زادتني الألقاب
تجي دنياي أو تدبر عزيز ف كل حالاتي
أنا فرحي لمِن حولي وأيامي فدى الأصحاب
قصيدي بلسم المجروح ونبض الناس أبياتي
كسرني قلبي المكسور نادت دمعي الأهداب
تعبت أركض ولا أوصل ولاتوصلني غاياتي
أبي ذل ٍ يغطي الأرض لك يا رب يا وهّاب
وابي أحيا جبيني فوق ما تملكني رغباتي
من الدنيا أنا مابي سوى عفو العلي التواب
ويحسن خاتمة فعلي ويغفر لي ضلالاتي
أبملا العمر بالتوبة ونوح وهود والأحزاب
متى كانت سنيني عمر انا عمري في ركعاتي
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

سفير الحزن
..
غريب ..
ماقلتلك ..
من هو ..؟
تبي تعرف ..
هو اللي .. لو خذلك الحب
وبان الشوق ..
في عينيك ..
وعجزت إنك ..،،
تداري حزنك وهمك ..
واختفت ..
من ليلتك ..،،
كل الأماني ..
وماشفت الصبر كافي ..
تلاقي دمعتك عنده ..
يعيش أحزانك بصوته ..
ويغني جرحك الخافي ..
ولو تبغى الشجن عنده ..
ولو تبغى الفرح ..؟
قليل من الحزن عنده ..
ولو ناديت
وعذبك بعض النداء ..
بصوته عنك ينادي ..
عرفته؟!
سفير الحزن في الدنيا ..!!
عبادي ....
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

بهو فندق
..
بهو فندق .. بلد غربي .. في فصل الصيف
على ميعاد أو صدفة .. جمع أجناس مختلفة
ولا فيهم أحد وافق .. أحد ثاني على تعريف للمنطق
بهو فندق .. فيه الناس مكتظة
فخامة تكسي الجَنبات
نادل يحمل الطلبات .. على أواني من فضة
هنا تجّار .. يحكوا أسهم وسندات
هنا سمسار .. هنا شاعر .. هنا بنيات
هنا فلكي .. هنا لاعب كره بارع
هنا فنان .. هنا متعهد السهرات
هنا يحكوا عن الأوضة .. هنا يحكوا عن الموضة
هنا يحكوا عن السادات
وبركن ٍ ماهو للصفوة .. بجنب الباب
كرسيين .. حوار يدور بين اثنين حيل أصحاب
ملامحهم تودي يم شرق أوسط
وهيئتهم وحالتهم .. بسيطة أو بعد أبسط
شفّ سايح من اليابان .. يداعب آلة التصوير
يغازل آلة التصوير
سايح هذا يا غلبان؟
هذا السايح البارح .. كانت صورته تحكي
في صدر الصفحة الأولى
يقولوا خامس أغنى شخص في العالم
وأظن أنه .. وربي وحده العالم
جمع هالمال والثروة .. من استيراد أو تصدير
نسى الكاميرا على الكرسي
لا يا شيخ .. مثل هاذولا .. ما ينسوا
صدّقني نسى الكاميرا على الكرسي
لا والله .. رجع خذها
ظنك وينهو رايح؟
أكيد يزور له متحف
سخيف .. وهوايته أسخف
شفه مستني يمّ الباب
وش ينتظر؟
أظنه ينتظر تكسي
أقول عدنان: فاخر حيل هالفنجان
خذ شايك قبل يبرد
أقول أحمد: هذاك هناك .. هو منهو؟
أي واحد؟
هذاك اللي معه واجد
تخطرف أنت أو عميان
هذاك فلان
هذاك اللي كلامه منتهى الحكمة
وجوده مثل غيث السحب
هذاك اللي لأجله ترخص أيامك
وتقضي النحب
هذاك اللي يهينك وانت تتلقى
إهاناته بصدر ٍ رحب
هذاك اللي شعورك نحوه مبيّن
مزيج من الولا والحب
هذاك اللي اذا لاقدّر الله راح
يغطي حزنك الدنيا
وتهمس .. راح ابن ال ...........!!
كذا يا أحمد ..؟
شايفني أنا منافق ..؟
انا مسمح ولا أوافق
تظن اني بقلب أسود .. كذا يا أحمد؟
لا تزعل أنا آسف .. أنا آسف
ترى الدعوة سوالف
شف هذا خفيّف دم .. ويعطونه
يعطونه ..؟
يعطونه
ويرجع باكر لهذا .. يقطّع ذاك
ويشرشح أصله وفصله .. بخفة دم
ويعطونه؟
يعطونه
ويرجع بالأخير .. ضاحك على هذا وعلى هذا
أقول أحمد: ظنك هو رصيده كم ..؟
دقيقة صمت .. فرضها جيّت النادل
يشيل الشاي
ويقول ان العصير اللي يبونه لحظتين وجاي
شفّ الشاعر
هاذيك الحلوه تضحك له
أي واحد ..؟
شفه واقف .. يوقع دفتر لطفله
تخيّل ياخي يقولوا
بإنه يشتري شعره من الشاعر
اللي الشاعر المشهور يكتب له
يا حظه .. وسيم ومشهور
ياليتني أكون مثله
قوم نتصور معه
نقوم نتصور معه؟
ما باقي سوى هذي
نكبّر راس هالمغرور
خفيّف انت .. وغبي أحمد
ودايم فيك هالعلة
أقول عدنان .. ترى صاير طويل لسان
أحمد ياخي لا تزعل .. ترانا اخوان
تعوّذ بس من الشيطان
وانا آسف .. وترى الدعوة سوالف
فخمه حيل هالكيسان
اشرب .. لا تزوّدها
ترى يبيّن عليك تعبان
شف مو هذي صاحبتك؟
هلا والله .. إلا والله صاحبتي
تدري ..؟ تموت هي فيني
يا رجال .. خليني
خادعتك .. تراها والله خادعتك
أقول أحمد: عشان انسرقت فلوسك من زبيدة
صرت تشوف كل وحدة .. هي زبيدة
يا عدنان .. خادعتك
أنا قصدي لمصلحتك
شفها تكلم الرجّال
أي رجّال! .. اخوها ذاك
يا عدنان .. خادعتك
أقولك ماتبي غيري
يا عدنان .. طع شوري
مشاعرها .. وهم .. كذبة
أحمد .. احترم نفسك
أفا عدنان .. تمد يدك علي
وهذي السبّه
صفعه دوّت بركن ٍ
قريبٍ من هل الصفوة
عِراك في بهو فندق
جمع أجناس مختلفة
مافيهم أحد وافق أحد ثاني
على تعريف للمنطق
خارج صالة الفندق .. شرطيّين
يقودوا بالحديد اثنين
ملامحهم تودي .. يم شرق أوسط
وهيئتهم .. بسيطة أو بعد أبسط
كانوا أصحاب
في داخل بهو فندق .. بلد غربي
في فصل الصيف
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

السفينة
..
ماقد سمعتوا عن سفينة في بحر
والبحر موج متلاطم .. والخطر فيه متعاظم
ماسلم منّه احد .. ماترك شي ٍ ابد
كودالسفينة وحدها
ماهزها موج البحر .. وان هزها
امسك بها ربانها
وابعد عن حماها الخطر .. بدينها وقرآنها
ماقد سمعتوا عن سفينة .. قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا من بنى هذي السفينة .. وكيف؟؟
كانت غبار .. كانت جروح متناثره في كل صوب
ورغم الجروح جمّع شظاياها بيده
بامر العزيز
وافنى العمر ليل ونهار .. وارخص لها قلبٍ وروح
عبدالعزيز
عبدالعزيز اللي بنى هذي السفينة
اتعبت منه الدروب .. واشتكت منه الحروب
بالسيف ارسى شراعها
وبالحب قوى حبالها
ومن يومها .. رغم السنين .. تمضي السفينة في دربها
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها
ماقد سمعتوا عن اهل هذي السفينة
عن كرم اهل السفينة .. عن وفاء اهل السفينة
وماقد سمعتوا عن قهر حسادها
وكيف انها للي نواها بالغدر ماتمهله
تجعله ذر ٍ هشيم مايمهله طوفانها
ماقد سمعتوا عن سفينة
ارفعت قدر البحر
ماقد سمعتوا عن سفينة
قويةٍ دايم عظيمة
بحرها هو الحياة والسفينة هي بلدنا
والفهد ربانها
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

تسلم عيوني
..
ياطيب حظي كان انا حلم دنياك ياللي تقول اني أمانك وخوفك
تحبني؟ ..أدري حكالي محيّاك رعشة يدينك وارتباكة حروفك
ياللي الوفا هو بعض أصغر مزاياك حملي ثقيل ووافياتٍ كتوفك
تشيل همي دوم كنّي أنا اياك صارت ظروفي مو ظروفي ..ظروفك
إن جيت ابحكي عن بهاك وسجاياك كيف اوفي أخلاقك وباهر وصوفك
وان جيت الاقي لك خطايا خطاياك أطيب قلوب الخلق ساكن بجوفك
وشلون ما احبك وهذي سواياك؟! وشلون ما أهديك عمري فكفوفك؟!
ياقلب قلبي وش حياتي بلياك؟! تسلم عيوني دامها هي تشوفك
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

قالت أحبك
..
قالت احبك
واحضنتي ثم ٍ قالت من انت؟؟
وضحكت .. ثم ٍ بكت
ثم ٍ حكت .. ثم ٍ سكتت
ثم ٍ قالت لي من انت!!
اللي جرى .. ماهو غريب
الزمن فعله .. عجيب
نسّاها اسمي ..
نسّاها حبي ..
نسّاها دمعي ..
في يوم انا ..
في احضانها طفل وحبيب!!
ياهي جرحتني .. يوم نكرتني
حاولت اداري عبرتي .. بس ماقويت
خانتي دموعي .. وبكيت
وبعدت عنها واتبعتني وامسكت يدي
واحضنتي ومسحت دمعتي من فوق خدي
رجعت البسمه لشفاي
نسيت انا همّي وشقاي
صرخت للدرب الطويل
لا مانستني .. مستحيل
الزمن او اي شي ..
يقدر يقسيها علي
يقدر ينسيها هواي
وفجاءه سكتت
ثم ٍ ضحكت
ثم ٍ قالت لي من انت؟
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

اسأل الأعمى
..
اسأل الأعمي .. ان كان في نومه يشوف
ليه يصحى؟!
واسأل اللي ما درت عنه الهموم
اللي درى ان العمر محدود
وان الفرح مهما اختفي .. موجود
اسأله ليه ينوم؟
وان جاوبوك اسألني ليه حنّا افترقنا
يا صاحبي مابه سبب لفراقنا
غير اننا جينا بزمن ماهو زمنا
ياصاحبي مابه سبب لفراقنا
غير اننا في حبنا عشنا الصدق
وفي وقتنا وشهو الصدق
في وقتنا لجل اللقاء تكذب
ولجل تاصل ماتبي تكذب
ياصاحبي خذها من جرحي نصيحه
كانك تبي تاصل؟ اكذب .. اكذب .. اكذب
الصدق في وقتنا اصبح فضيحه
في وقتنا دايم تهيم في شي ماتعرف مداه
دايم تهيم فلي بعد عن سكتك
واللي زهد في محبتك
واللي ف يدك ومتحمل جروحك معك
ما يهمك تنساه
ولو تقتله ما يؤلمك وبقدامك تاطاء على دماه
يا صاحبي وقتنا في اوله ضيّعنا أولى القبلتين
وفي آخرة الله اعلم وش بيبقي
في وقتنا صار الغدر شي ٍ عظيم
والوفا ماظنتي ان كان بتدور بتلقى
يا صاحبي في وقتنا أطول مسافة ممكنه
تمشيها بين النقطتين
الخط المستقيم
يا صاحبي في وقتنا وقت الألم
من يسمعك مهما حكيت
من ينصفك مهما شكيت
منهو اللي ما يضحك إذا ذلتك دنياك وبكيت
يا صاحبي في وقتنا
ما للمشاعر ناس
يا صاحبي في وقتنا لبعض القلوب إحساس
يا صاحبي في وقتنا وقت الكلام
وقل الفعل .. لامات احد وانتقل لعلى رفيق
من طيبنا نحزن عليه
نصلي عليه
ناصل معه للمقبرة
وفي المقبرة غير الدعاء وقولت الله يرحمه
مابه كلام .. وندفنه .. ولا دفناه نبكي
بدون دموع أو بدموع
المهم بعد ما نبكي نتركه ونروح
وتلقانا نقول مسكين يا فلان مسكين
من دنيتك وش اللي خذيت؟
وبعد باب المقبرة بشبرين
واقل من الدقيقة لامن دخل فينا الزحام
من طيبنا نضحك ونسمع أغنية
لجل نتسلى في الطريق بين المقبرة والبيت
يا ربي سبحانك ياللي تجير من العذاب
قلوبنا وش صابها؟
في وقت غدا بين الحياة والموت
وبين البكاء والضحك
شبرين ودقيقه وباب
ويدننا اللي قد حثت في وجه ميتنا التراب
هي نفسها اللى بعد شبرين واقل من الدقيقة
اختارت شريط وحطته لجل تقتل طول المسافة
بين المقبرة والبيت
يا صاحبي في وقتنا احسن كثير
من بعضنا
في المقبره على الاقل ميت وندري
المشكلة متنا وإلى الحين ماندري
يا صاحبي في وقتنا ضاع احترام الموت
في وقتنا حكينا ما أكثره
وللأسف كل الحكي من غير صوت
وان كان به فم ٍ صدق
واسمحوا يحكي بصوت .. ما نسمعه
ياصاحبي قدامنا كان اختيارين
يا نجاري وقتنا ونكذب ونخدع نفسنا
يا نفترق .. لان الفراق في وقتنا
هو الصدق .. افترقنا
يا صاحبي كانك تشك في أسباب الفراق
دور لك اعمي وإذا صحى اسأله
ان كان في نومه يشوف ليه صحي
وليه افترقنا؟؟؟؟؟
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

صدق أولا تصدق
..
صدّق أو لا تصدّق
كل ما تباعدت المسافة بين الرغيف والجوع
تلقى الفرح أصدق
صدّق أو لا تصدّق
لامن غدت كل المشاكل جوع الصغار وسقفٍ يداريهم قبل يصحى النهار
تلقى الشعور أعمق
صدّق أو لا تصدّق
كل ما انقفل درب انفتحت أبواب
صدّق أو لا تصدّق
لو فيه احد طيّب .. للطيبة أسباب
صدّق أو لا تصدّق
قليل من يعفي ويسامح .. كثير وده ينتقم
بس ينتظرله وقت سانح
صدّق أو لا تصدّق
القناعة كنز يفنى
ولو كل من ياخذ قنع .. وكل من ياكل شبع
كان الفرح غطى شوارعنا
صدّق أو لا تصدّق
كل النهايات البداية .. وأحلى البدايات النهاية
وكلنا رغم القساوة الظاهرة .. نبكي قدّام المراية
صدّق أو لا تصدّق
به مطوّل لحيته .. والثوب يلمس ركبته
وما قرا في الشهر آية
صدّق .. ان الشعر صدقه .. اعذبه
ودي احكيلك حكاية وقبلها ابغى لسؤالي اجوبة
المال هذا هو وسيلة والا غاية؟!
لو ماهو غاية .. ليه الحروب؟ .. ليه السلام اللي تمناه الشعوب؟
ليه الحسد يملى القلوب؟
وليه الفقير المُعدم الكادح .. بهجته تملى الملاح
لامن لقى ذاك الثري يعطي هاذيك المطربة مليون
وهذا الثري لامن سرى من حفلته .. وقفت سيارته عند الإشارة
وجاه شايب يطلبه .. الهم عاثي في وقاره
دق ب اصابع مُتعبه .. على الشبّاك
قال: انا يا سدي مديون .. وانت الكريم
يحكون عنك في الجرايد .. وتقال في جودك قصايد
ويُقال انك للأرامل واليتامى عون
ما ابغى منك الا حاجة .. لبس الشتا لجل العيال
الله يسدد لك خطاك .. اعطني مما عطاك
واعتدل راعي الملايين الكثير في جلسته
وعقد حجاجه ثم قال:
ألا ما اثقلك واغباك .. ليه يا اخي ما تشتغل
انت كسول .. ومستغل
وطلّع من المحفظة فكّه .. رماها وقفل الشبّاك
ابغى لسؤالي اجوبة ...
ليه البر والتقوى .. مليان في جرايدنا؟!
وليه هموم هالشارع؟! .. بعيده عن قصايدنا؟!
ليه الفساد .. ليه الكساد؟!
وليه الحروب؟! .. وليه الحسد مالي القلوب؟!
وشهو الجواب؟!
اتمنى انه مايكون المال هذا هو وسيلة ماهو غاية
هذي الكلمة النبيلة .. اخترعها أغنيا
لجل مسكين ٍ شقى .. يرضى بقليلة
وصدّق انت او لا تصدّق
ماني الشخص المثالي .. كل مافي الأمر اني شاعر ٍ ماهو يبالي
كان صار اللي اقوله علقم ٍ او صار حالي
كل مافي الأمر اني استريح .. لا مشابي مركبي عكس اتجاه الريح
وما ابرّي من الخطى نفسي ..
واللي اجاهربه مثل همسي
صدّق اني ماني الشخص المثالي
كل مافي الأمر اني اجمع احساس الحواري وسط صدري
وانقل الواقع لشعري
كل مافي الامر اني شاعر ٍ مطرود من جنة خيالي
صدّق اني ما قصدت اني اكون
صوت للي مايبون
صدّق اني ماني الشخص المثالي
والا تدري لا تصدّق
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

سيّد جروحي
..
سيد جروحي شمس عمري وظلي البعد طوّل والخطأ منك واضح
اذا غرورك يمنعك تعتذر لي تعال جنبي وابتسم لي واسامح
تدري احبك لكن الموت ذلّي ادوس انا قلبي لو الشوق جامح
الله عطاك الحظ واصبحت خلّي والله عطانياك طاغى ملامح
سألتني يا ياسميني وفُلي ياكيف يشفى الورد .. والشوك جارح
مثل العيون اللي لها كل كلي زايد حلاها لكن الدمع مالح
وش تنتظر يكفي دلال وتغلي الوقت ماهو للوصل دوم سانح
مادمت ترحالك ومادمت حلي ان صرت انا خسران ماصرت رابح
لا تعطي الفرصة لعذالنا اللي لكل ماهو يهدم الحب طامح
مالك صبر عني ومالي تسلي والوقت خيل صوب الآجال رامح
سيد جروحي شمس عمري وظلي الحب بعد وقرب .. مخطي وصافح
اذا غرورك يمنعك تعتذرلي لا تعتذرلي قول اسمي واسامح
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

هذا الوطن
..
لله ربي جزيل الحمد والمنّه العادل القادر المتكبّر الرحمن
اللي عطى في كتابه رزقه وأمنه لبلاد مكّه وطيبه أطهر الأوطان
سبحانه أرسل رسول لإنسه وجنّه باليسر والمغفره والرفق والإحسان
ماكان فظٍ غليظ القلب لو إنه من حوله انفض جَمْع وزُعْزِع الإيمان
يالله صلّي على احمد ما هَمَت مِزْنه وما هَلّت دموع طفل وما تُلي قرآن
خُلقه عظيم ف كتابك قلت ذا عنّه رحيم فينا رؤوف اكرَم بَشَر قد كان
ياحافظ كتاب ربّك دارس السنّه البِر واضح وضوح الإثم والعدوان
عَلِّم كثير المجادَل تابعٍ ظنّه لا روس حنّا غدينا وْلا هم الأفغان
لبلادك المسلمين نفوس ممتنّه لبلادك الكافرين اتمنّوا الخذلان
للإسئله في الشوارع شَنّه ورَنّه وش وصّل الناس ذولا فوهة البركان
وشلون ينهي حياته في صُغُر سِنّه؟ وشلون هذي المراحل توصَل الإنسان؟
إن كان ماهو فراغٍ.. يأس يمكنّه ماهي حكاية تديّن.. ما لهذا شان
أو هي حكاية فوارق دنيا منجَنّه دكتور عاطل.. ويُثرى لاعب وفنان
أو هي حكاية عدوٍّ زاد في زَنّه لين المسامع تعبّت كره .. واستهجان
أو هي حكاية شفايف في الخفا دَرْنَه تلْعن صنيع الأيادي.. تبوس في الكتمان
هذا الوطن ياما رمينا همّنا بحضنه يستاهل أنه يفتدى بالروح والأبدان
هذا الوطن هو روح فهد وماحوى جفنه هوقلب عبدالله ونبضه هو وله سلطان
عيال أخو نورة ذراه ودرعه وحصنه هم سدرة المُلك وأهل المملكة أغصان
هذا الوطن شعبه من ملوكه وهم منّه متماسكين بصف واحد مثلما البنيان
هذا الوطن أكرم بلاد الأرض لكنه يبقى هلاك للمعتدى والباغي الخوان
لا مايهزّه حقد حاقد زاد في زنّه حافظه رب المشرقين الواحد المنان
هنّ الوطن برجال أمّنه يا فهد هنّه يستاهلون المجد كله صفوة الشجعان
المؤمنين الذايدين بروحهم عنّه أفعالهم مايحتويها نوط أو نيشان
ياللي تكفّر كثير الخلق.. بك جِنّه كل هالخلايق مضلّه؟.. وش معك برهان؟!
كل هالأمم في جهنّم..كافره عَفْنَه؟ وانت الذي مسك دمّك ضامن الرضوان..؟!
جنّه بعرض السما والأرض مِنْضَمْنَه هي حِكر لك مع رِفاقك زمرة الأعوان؟!
يالله إقطع ذيول الشر والفتنه ورُدّ كيد الأعادي فْنَحْرهم خسران
واكفِ البلاد التقيّه شرذمَه.. حِفنه ساروا بدرب الضَلال ولبّوا الشيطان
فجِّر ودمِّر بلادك .. تدخل الجنّه أفتى بهذا مشايخ آخر الأزمان!!!!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

سيّد القادة

https://poetsgate.com/img/divider_1.png
..

عشرين عام

والكون احداثٍ جسام والكون يبدي الاحترام

لاهل السعودية الكرام

في ظل قايدهم فهد

عشرين عام

لولا فضل رب الأنام ثم خادم البيت الحرام

فهد الامام ابن الامام كان البلد غير البلد

عشرين عام

مليكنا الشهم الهمام ارضخ هوايلها العظام

وكفى المشقة والكَبَد

عشرين عام

خلّى عواصفها غمام ونيرانها برد وسلام

وبدّل شقاها بالسعد

عشرين عام

ماشافت بلادي ظلام كيد العدا اصبح حطام

حماها ربي من الحسد

عشرين عام

انجاز فاق ألفين عام علم وبنا ورفعة مقام

ياربي تبقى للأبد

يافهدنا عاشقينك شايلينك في نواظرنا لإنك

مخلص النية رفيع النفس مؤمن

مرخص الغالي لشعبك طيب اليمنى محنك

شايلٍ هم الوطن في وسط قلبك

مبتغي مرضاة ربك

به نجيت وفي رجاه احسنت ضنك

يابلادي دام خيرك ودام طيبك ودمتي في عز ورغد

يابلادي دام مجدك ودام سعدك في ذرى الغالي فهد

رعاك الله ياخادم بيوت الله وبانيها

كل أرضٍ بها مسجد تقول الأرض سجادة

رعاك الله لبلادك لأمة انت راعيها

لشعبٍ شالك في قلبه وعدك ثالث أعياده

تجي في المسلمين كروب عظيمه من يداويها

يداويها الكريم الشهم ملكنا فهد كالعادة

شمل خيره جميع الأرض اقصاها ودانيها

ملك افنى بعطاه الجود خلقه الله لعباده

تخيّر أشرف الألقاب تسامى عن تباهيها

تسمى بخادم البيتين وهو سيّد على السادة

طويل العمر وغالي الأمر ذرى الأمة وحاميها

شديد الضر ساقي المر للباغي على بلاده

ملاذ الجار .. رد ديار مغصوبة لاهاليها

طفى الفتنة وأخمدها وحرر شعب وقيادها

هقت فيه الكويت الخير وماخيب هقاويها

نخته ولا انتخى كحيلان تجيه الأرض منقاده

عطايا الضافي الوافي نبي نلقى تواليها

نعددها ولاقلنا قضت نلقى به زيادة

عطاه الله من فضله خصال مانلاقيها

سوى فاطيب ملوك الأرض فهدنا سيّد القادة


عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

أجهلك

https://poetsgate.com/img/divider_1.png
.

أجهلك .. ولي سنين اتخيلك

اتمثلك في كل طيف .. والقاك في قسمات ضيف

كل المشاعر له تقول .. حنّا هلك

أجهلك .. ولي سنين اتخيلك

القاك في بعض الوجيه .. ويمرني طيفك واجيه

يا باكر اللي اجهله .. ارقتني الأسئلة

وابطى العمر يستعجلك ..

أجهلك .. ولي سنين اتخيلك

بالعيوب وبالمزايا .. بالألم

لامن هجرتي يجتاحبي ضلوع وحنايا

اتخيل شكوكك وظنك .. اتخيل التقصير منك

حتى الجفا اتخيله .. وكيف انا باتحمله .. واتحملك

أجهلك .. ولي سنين اتخيلك

وجهك اللي قد حبسته داخلي في غمضة عيوني

واللي ياما قد رسمته .. من عبث طيشي وجنوني

وجهك اللي دوم يظهر لما ألقى نشوة الفكرة الجديدة داهمتني

لما القى انكساراتي قصيدة واكتبتني

وجهك اللي دوم يظهر في اعاصيري وسكوني

في الجبال الشاهقة في أجمل خيالي

في السفوح الخافقة بين نبضي وانفعالي

وجهك اللي قد نحته في عظامي والجوارح

وجهك اللي قد حفظته وبتفاصيل الملاح

بالنهار في بسمته .. بالضيا اللي في ورودة

بالعبوس في غضبته .. بالتضاريس وحدوده

من جنوحه في البها .. لين اقصى نقطة في كاسر جماله

للعذوبة .. من شروق النور في ضيه

للشعر في غروبه

من شطوط الكحل في عيونك لنحرك

من بياض الثلج في خدك لجمر ٍ قاد في ثغرك

وجهك اللي ما ابد يوم لمحته .. او عرفته

لي سنين اتخيله .. واتخيلك

ياللي كلي بك معرفة .. واجهلك

ما اصعبك .. كيف الاقيك

ما اسهلك .. لو الاقيك

ياللي دوم اتخيلك

مملكة حسن الزمن

وأنا الملك


عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

آه يا فيصل
..
إِدْلِهمّي ياليالي خابرينك تاخذي من الطيّبين ..الطيّبين
واهدي يادنيا بقايا خيّرينك للديار اللي تجازي المحسنين
مير حنّا يا إلهي عابدينك ندري ان الموت هو حق ويقين
مؤمنين بحكمتك مستغفرينك بك على كل المصايب نستعين
مات فيصل .. ياقلوب الله يعينك الفجيعه مذهله يا مسلمين
آه يا فيصل.. يقول مفارقينك: لو يردّك دمع أو حتى أنين
كان هزّ الأرض رَجْع مودّعينك وكان سالت نجد بالدمع الحزين
التّعازي تنتخي..يا صَبْر وينك والذهول ف وجه أحبابك سجين
ماهو بس أهلك وربعك ناعيينك الدول والناس عُرْب وأعجمين
اليتامى يا أبوهم فاقدينك يسألون: الطيّب المحبوب وين؟
كم مريض ٍ قد لقى مَدّة يدينك العلاج وقبلك أهله يائسين
تخفي عن يسراك ما أعطت يمينك ومن كثر ما اعطت ولو أخفت يبين
آه يافيصل شكَت منّك سنينك ماقِوَت طيبك ولا انتَ تِسْتَكين
شاكرينك يا إلهي وحامدينك وندري إنّا لك إلهي راجعين
ما تِشَا قَدَّرت آمنّا بدينك خاضعين لما حكمت وراضيين
يا عظيم الباس يالله سائلينك إجزي فيصل بالرِضا فوزٍ مبين
واعفُ عنه يا إلهي راجيينك تكتبه يالله من أهل اليمين
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

أستاهلك
..
ابسألك .. هو أنا استاهلك؟!
استاهل الدمع اللي جرّح وجنتك؟
استاهل اني اعشقك؟
ابسألك عن حالنا .. انتي وانا
ياللي احس .. انك انا
حالنا ما هو غريب
انّا نكون متأكدين ان الفراق ما هو بعيد
بالرغم من جرح السنين
عشقنا دايم يزين
ماهو غريب .. اني لو مرة في همي
نسيت وبكلمة جرحتك
قبل ما تتألمين .. اللي ينزف هو دمي
ابسألك ماهو غريب .. استاهلك
ابسألك لو قلت لك ان الحنان اللي في قلبك
ينبت من الصخر الزهر ..
وان النهار اللي في خدودك يخلي النسمة عطر ..
وان العذاب اللي في عيونك يعلّم الناس الشعر ..
ولو قلتلك اني احبك اكثر من هموم البشر
وكثر الجفا وكثر السهر ... لو قلت لك
وانك اقرب من عيوني للنظر
كل الذي اقدر اقوله
واللي ما اقدر اقوله
استاهلك .. حبيبتي؟!
وباجاوبك .. للأسف ما به احد يستاهلك
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

البحر
.
على مدى الأيام .. كان البحر بالنسبة لي
هو البحر
رمل .. أمواج .. صخر
كان البحر بالنسبة لي بس البحر
وعلى مدى الأيام ماقد لمس فيني المشاعر
الا ذاك اليوم .. يوم انك معي
يومها كان الوداع
وكان البحر دفتر والموج بيت من شعر
وبيتٍ ورى بيت .. وموجه ورى موجه
تكتب قصيدة حبنا
وتمحي الجراح بجراح
ومثل الفرح في دنيتي كان الفجر
عمره قصير .. وبكل حب اهدا نسيمه وراح
وتشرق الشمس .. لجل الخلايق كلها تقرا
قصيدة حبنا
ويومها ماكان للشمس اي نور
وبعض السبب كان الوداع
وباقي السبب انتي خذيتي .. من سماها النور
ولجل الصدق .. يومها كنتي انتي الشمس
وكان البحر عينك .. وادموعك امواج الشعر
وخدك الدفتر
آه يا اللقى ماخذت من طبع البحر
ما للبحر آخر
آه يالفراق .. ماخذت من ذوق الفجر
يمرنا عابر
وآه يالعيون اللى انا منها عرفت
ان البحر دفتر وان القصيد امواج
وإن الغرام شاعر
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

أخطيت
تقول أنامدري وش إحساسك..ومدري وش تضنيني؟؟أنا الصادق في عينك كنت وصرت الكاذب الخوان،،،،أنا أخطيت ماأنكر ولا فيه عذريكفيني
سوى إني أحبك حيييييل وإني دائماً إنسان
أنا أدري بمدى جرحك وأدري الحظ جافيني!!! يطول الوقت ماأخطي وإذاأخطيت....كل شي يبان
أناشفت الزهرمايل وضنيته يناديني!! قطفته يوم ضميته لقيته للأسف ذبلان
عرفت إنك زهرعمري وعرفت إنك بساتيني،،،وغيرك قيض مايروي سراب يشقي العطشان أنالوماحصل ماكان..وشوإللي يدريني بأنك ماسواك إنتي سكنتي القلب والوجدان؟؟؟؟أنا آسف على أعذاري عجزت ألقى عذرفيني
يليق بغلطتي فحقك ويرجع كل شي كان....
،،أحبك،،كثرأخطائي وأدري إنك تحبيني ..وأدري لوتفارقنا فلا نقدرعلى النسيان
إذاتقوى على فراقي وبعدي عنك....خليني!!!!
أنامليت من دورالكرامه ولعبة الغفران!!
قليل العمرياأللي أنتي دموعك ماتساويني.. حرام إنه يضيع فراق...
هي من قلها الأحزان؟؟؟
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

نحمد الله سلم الفهد وشفاه
..
نحمد الرحمن الفرد الإله فالق الإصباح رب العالمين
نحمد اللي قد تبارك في علاه يجزي بالإحسان كل المحسنين
نحمد الله سلّم الفهد وشفاه خادم البيتين ذخر المسلمين
نحمد الرحمن من فضله عطاه السخا والطيب والعزم المكين
الإمام اللي عرفنا مبتداه شاد صرح العلم بالله مستعين
والإمام اللي عرفنا مبتغاه خدمة الاسلام وبلاده تزين
عنده الحكمة ألا منهو سواه هاجت الأيام جوله مسرعين
الزعيم اللي إلى اشتدت نصاه من جميع اجناس عرب واعجمين
الزعيم اللي به اعلينا الجباه ديرته عدا بها عمر السنين
والزعيم اللي سكن واسكن غلاه في قلوب الشعب ولشعبه أمين
وزّع القرآن والقاصي قراه وسّع البيتين للي زايرين
انصره يالله ماقامت صلاة وما سعى ساعي وطاف الطايفين
واجعل الجنات ياربي جزاه مع عبادك فوق اصحاب اليمين
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

يا عذبة الخد
..
يا عذبة الخد ياللي اشتاك الصد
اليوم عيدك ..
لا .. انتي عيد اليوم
ياللي عذابي فيك اكثر من سنينك
تصدقي اني في عيدك مادري وش اهديك
اتعبني الأرق باهديك شي مثلك
قالوا لي ورد واتعبني الأرق
قالوا اكيد أرق شي الورد
قلت الاكيد ان انتي أرق
في حل وحيد ..
لو تسمحي لي فيه ..
اهديك انا للورد
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

مليت
..
قالت لي مليت .. ودي بحد غيرك
جمّع جروحك .. لمّلم مشاويرك
واذا قضى صبرك .. جّرب صبر غيرك
لو اشغلك وعذبك طيفي .. ابكي
واذا بكيت اكتب بدمعك شعر .. اشكي لمراسيلك
وبوعدك اذا صرخ جرحك ونادى .. دمعتي تنزل عليك
بضحك على ايامي معك .. واخذ على غدري عهد مايخلص لغيرك
اعذرني .. مليت
ماتبيني .. ملّت الصدق المشاعر ..
يانور ايامي وسنيني اللي مضت
يالظلام اللي بيديني ..
مابقى فيني بقايا اتركيني
سل الحزن لغدرك خناجر .. ومالقاني فيني
وجرحي نادى .. يامحاجر الدمع مايكفيني
ضاعت بداياتي .. بقيت نهاياتي .. واسأل اجاباتي ..
هو أنا اخطيت؟!
هو بقى في اللي بيجي ياليت ..؟
ماتت اجاباتي
قالتلي .. مليت
يا اكثر جروحي الاخيرة ..
لو عرفتي اليوم قلبي ودعك
يا آخر جروحي الكثيرة ..
ماعرفتي اليوم ما عاد اذكرك
وما اذكر من اللي مضى .. الا غرامك والفراق
وبعض اللقاء والإشتياق ..
وكل الاحاسيس الصغيرة ..
يابرد عمري ويا هجيره .. تخطين لو يخطر في بالك
انك في بالي كل دقيقة ..
وانك خيالي والحقيقة
واني احبك مهما كنتي ..
يابرد عمري وزمهريرة
ان كان قلتي اني فقدتك .. ماصدقتي
وان كان قلتي مانسيتك .. ماصدقتي
لو عرفتي مااذكر من اللي مضالي الا انتي
وما اذكر من اللي مضى الا انتي
وما اذكر الا اني بكيت
وفي ليلة مافيها وفاء .. قلتيلي مليت
يا انتي اخر أولي ..
لاتصدقي اني نسيت!!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

شهر
..
ياللي تحبيني شهر ..
ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ماقد خطر في خاطرك .. ان السنة اثنعشر شهر؟!
وقتي معك نصفه هموم
ونصفه الباقي اسى .. ولو طبعك القاسي نسى
وبالصدفة جاء مرة صباح .. وكلمة منك فرحتني
لابد ما همس الجراح .. تسمعيني في المسا
ولو تعتب جروحي عليك .. وتشتكي منك إليك
بترجعي تحبي شهر .. ثم ٍ تجافيني شهر
ثم ٍ تحنيلي شهر .. وتفكري كيف الرجوع كذا شهر
وترجعيلي في شهر ..
ولا يجي في خاطرك ان السنة اثنعشر شهر
اعذريني لو اقول .. حبك نسى معنى الفرح
اعذريني لو اقول .. وشلون يذكرنا الفرح؟!
مادام اذا كنتي قريبه .. كل تفكيري يكون ..
بُعدك متى؟! .. وإلى بعتي ابلا سبب
الاكيد بترجعي .. بس الأكيد هذا متى؟!
ولو تعب مني الصبر .. وملّ من صبري العذول
وقلت ياناس اسألوها .. الحب هو كله هجر؟!
ردك يجيني في شهر ..
قالوا تقول:
ماينتظر .. بس يشتكي!
يصبر عليّ .. ترى السنة اثنعشر شهر؟!
عبد الرحمن بن مساعد

رد: ديوان قصائد لشعراء المملكة العربية السعودية (متجدد)☘️☘️
 

الوداع
..
الا يا قلب نبضي ..
يا سما دمي ووجداني
فمان اللي عطاكي كل طهر الأرض ..
أنا ماشي ..
هذا كان اخر مانطق قلبي ..
وأول نبض في لساني
وتلاشى النطق ..
وعصر حزن الوداع اللي حضر قلبك دموع ..
بكت ادفى دموع الخلق ..
وسرى في داخلي برد الخشوع
وغير العطر ودموعك وجرحي من وداعك ..
مابقالي ..
استعفر اللي صورك مما طرالي
طرالي يادفى عمري..
وياترحالي وحلي
ارشف دمعك الطاهر .. واغسلبه واصلي
واحمد ربي اللي بك حباني
الا يا ام اجمل من سكن قلبي
ويا داري وعنواني
فمان اللي عطاكي كل طهر الأرض ..
أنا ماشي ..
عبد الرحمن بن مساعد