رد: اخترنا لكم
 

تمرني زلة رفيقي وأنا اشوف
واصد عنها عمد لجل الرفاقه

ياوقت قدملي من الناس معروف
ماعاد لي بمهبل الخلق فاقه

.....

رد: اخترنا لكم
 

جـامـل وسـامـح وإعـتبـر كـل زلـه
طبع آدمي موروث والعرق دساس

وإللي يقـول إبـعد عـن الناس قله
ماغيرهم في كوكب الأرض جلاس

حـاول تحـب النـاس ويـحـبك الله
والله إذا حـبك يحـبونـك الناس

.....

رد: اخترنا لكم
 

بيت ٍ قريته ماعرفت أسم راعيه
ألا ان راع ِ البيت خط الجزاله

يقول في بيته و قافه و ما فيه
بيت ٍيهيض المستمع من جماله

حقد البعيد يموت لا مات راعيه
وحقد القريب يورثه في عياله

في ذمتي انه صادقٍ في معانيـه
يقوله اللـي ضـيق الـوقت باله

.....

رد: اخترنا لكم
 

تضيع اكثر اوقاتي على شي مايسوى
والانسان مهما كان يحتاج للانسان

ابي اللي يعاوني على البر والتقوى
مابي اللي يعاوني على الاثم والعدوان

.....

رد: اخترنا لكم
 

عسانا لا نصانا اللي ما ريحه الزمن يرتاح
وعسانا ما نسوي طيب وانّا ننتظر ردّه

وعسانا لا تجملنا في احد مانذكر اللي راح
وعسانا مانقابل راعي المعروف بالصدّه

وعسانا لا حصل منا قصور بساعة الأفراح
ما يلقون العرب منا قصور بساعة الشدّه

آمين

رد: اخترنا لكم
 

لا تلّحق دورة الوقت مشروه ولوم
والله مانلحق للأيام طيب ولا جزا

علمتني دورة الوقت علم امن العلوم
العزاز بفضل ربي من العز اعززا

لابدالي لازمٍ جيت قضّاي اللزوم
واحدٍ نذخره في سلم والا فمغزا

اتحزّم به لاباروا رديين العزوم
نوم عين اللي منامه من الحاجر قزا

.....

رد: اخترنا لكم
 

كلمة نعم ماهيب تاتيك ببلاش
ولايجيبها التاجر بدفع البخاشيش

في غبةٍ ماهي تعين على الطاش
يبحر لها رجلن يحب المغابيش

.....

رد: اخترنا لكم
 

يا قلب من ربعك الوافين وش باقي
الناس تالي الزمن تتبع مصالحها

اصحابك اللي بلا عهد وميثاقي
حدد الاسامي على الجوال وامسحها

الا رفيق لفعل الطيب عشاقي
اللي ليا كبرت الدعوى يرجحها

فيه المدايح تهيم وهقوة الهاقي
ريف الجمايل ولا يحسب مرابحها

.....

رد: اخترنا لكم
 

يالله برزقٍ جميل يخلي الساعي
من كثر الانعام مايقدر يعددها

ويالله عسا سمعتي بالجود تنشاعي
والناس يالله تكفيني مقردها

روس المطاليق عندي غاية اطماعي
والا العلاقات فيها من نكابدها

احلم عليها بعين الصابر الواعي
النفس توجر على ماهي تجاهدها

آمين

رد: اخترنا لكم
 

لعل مابيني وبينه مواصيل
اللي على طرد الكلام ايتلهب

اليا عزمته وأنت عندك رياجيل
كنك اتحاضيلك سلاحً مزهب

البدراني