رد: فوق هام السحب ( الشعر الشعبي) على متن القوافي
 

أحـبه محبت من تولـع بحـب الـذود
تدابك خطاويها على صوت صاحبها

وأحـبه محبت شايبن لأخر العنقـود
تمكن غـلا بنـته في قلبه ويلاعبها

وأحبه محبت من ذبحها غلات العود
تلبي على زوله وعلى حس شايبها


سعد الشليّه
‎

رد: فوق هام السحب ( الشعر الشعبي) على متن القوافي
 

صدور الرجال اللي غدت للهموم قبور
تجرّا على الصعبات والهم ناقلته

قبول السّعد في وجيه اهلها يزيد النور
ليا جاهم اللي سود الايام خاذلته

تقول انهم ناسٍ يعيشون دون شعور
لا نسيوا مشاكلهم علشان مشكلته

وغياب الخوي اللي خذا له ثمان شهور
تجاهلت تاثيره وانا ما تجاهلته


نايف

رد: فوق هام السحب ( الشعر الشعبي) على متن القوافي
 

ترى صدورنا مهيب قطعة من الصمان
يجيها الـمطر ويروح فيها ولاحـاجة

نمرر خطأ من بـاب تـقـديـر للاخـوان
ونشوف النوايا تالي الوقت منعاجة

الاصحاب شانو والزمن يارفيقي شان
تشوف الرجل يصبرعلى الغبن واحراجه

ووقت الزعل مانحسب فلان والافلان
ندوس الردي بالرجل ونوقف ازعاجه


بندر بن خربوش

رد: فوق هام السحب ( الشعر الشعبي) على متن القوافي
 

لا تـقولـون الـزمن مهـوب طيّـب
الزمن طيّـب لكن النـفس طـابت

والله ان الراس من وقتـي مشيّب
الشوارب واللحى يا اخوك شابت

الدروب الـمرهقـة صـارت قـريّب
والـظـنـون بـكل خلـق الله خـابت

كلما هفهف على صـدري هبـيّـب
قلت نفسي من طروق الود تـابت


بندر بن خربوش

رد: فوق هام السحب ( الشعر الشعبي) على متن القوافي
 

عزي لحال اللي تعلق بالاوهام
يبغى الخلاص ولالقى له طريقة

يهرب من الواقع وتتعبه الاحلام
حجم الألم بالحلم مثل الحقيقة

مهما يجيك من المآسي والآلام
حاول تجود في الحبال الوثيقة

واعلم ترى ربٍ هدانا للإسـلام
ماهو مكلفـنا بمالا نطيقه


عبدالله الطلحي

رد: فوق هام السحب ( الشعر الشعبي) على متن القوافي
 

ي ذئب ياللي غرك الكبر والطيش
ماينفعك باسك وقو القطاعه

حاول تواضع واترك الكبر وتعيش
وتقول لهل الطيب سمعن وطاعه


زايد بن محيا

رد: فوق هام السحب ( الشعر الشعبي) على متن القوافي
 

ريحضميرك وأترك القيل والقال
وأبعد عن اسباب المشاكل وترتاح

ماأنته بمكلوف بتعديل الاحوال
ومالله خلقك لمخطي الناس مصلاح

بعض المشاكل تااكل لحال والمال
دوامة من طاح في بطنها راح

أنصح مادام النصح يلقى له إقبال
وأبعد مادام الناس ماتقبل أنصاح


جري بن عبيد

رد: فوق هام السحب ( الشعر الشعبي) على متن القوافي
 

الفجر يسأل عن صفوف المصلّين
يـَ مقاطعين الفجر ليش القطاعه

إلى متىَ يا غافي القلب والعين
ما كنّ عندك للصلاه استطاعه

لو قيل لك موتك بعد يوم يومين
ما ظنّي بتغفي ولو ربع ساعه

بتصلّي يا مسلم أو بتنتظر لين
تموت وتصّلي عليك الجماعه


ابو فهد

رد: فوق هام السحب ( الشعر الشعبي) على متن القوافي
 

احتاج لك يا نبض كلّ الشرايين
مسكين قلبٍ ما يشوفك غناته

انت الحياه اللي فقدها الكثيرين
من صدّ عنّك وش يبي في حياته


ابو فهد

رد: فوق هام السحب ( الشعر الشعبي) على متن القوافي
 

ياخوي نفسك لا تبيّن زعلها
لا جتك زلّه من رفيقٍ قريّب

هاذي هي الدنيا وهاذولا اهلها
راس الولد منهم تشوفه مشيّب

لـ قراب لو تخطي عليك احتملها
العفو مهما كلّف الأمر طيّب

والله يحاسب كل نفس بعملها
لا تنشغل مع كل ناقص وخيّب


ابو فهد