|
رد: فوق هام السحب ( الشعر الشعبي) على متن القوافي
ربينا على طيب المعرفه وطيب الشور
وعلى المنهج الي يتفق معى مبادينا لا صار الهقاوي طيبه والصدور قبور لو انها تردى ظروفنا ماتردينا ولامنه لحقنا من ضعوف العباد قصور طلعنا على رجم التغاضي وصدينا ياطيب الروابع لا تخطرت لها معثور وياطيب العقول الي تميز تغاضينا ...... |
رد: فوق هام السحب ( الشعر الشعبي) على متن القوافي
لوشـان بك شان شانيته على شانك
ياشان شاني وشان الشان بك راضي كـلّـك سـكـنّـي وكـلّـي كـل سكـانـك لو بعض بعضك نزّح كلّي ترى فاضي يا روح في روح من روحك وريحانك طـافت بـك الـروح طـوّالي وعـرّاضي لك قلب في قـلب لاخـنـته ولاخانك لو فاضت الروح مافاضة بك انقاضي هـوّن عـلـيّ الــعـتـاب الـلـه لا هانـك ياحاضر الحاضرانت وماضي الماضي خذني بلا ذنب وٱطـويـني باحـضانك بالظلم تحيا الـعـدالة سيـدي القاضي ...... |
رد: فوق هام السحب ( الشعر الشعبي) على متن القوافي
المــرجلة ماهـــي بعلـم وشهـادة
والعلم يابن الناس له فضل معلوم المرجلــة لو صـــرت راعـــي ارادة والله عطـــاك ايمان واخلاق وعزوم والصـــدق والهمــة مـلاك القيـادة ان ما وصلت اليـــوم توصل بها يوم للنـــاس في كل المجــالات عـــادة واحــد جزاه الطيب واخــر له القوم احــد يهــدم في المــواقف عنــاده واحد عنــاده يجعل القــاعد يقــوم دنيـــاك يابــن ادم عــزوم وركـــادة ولا تقضيهـــا ســواليـــف وهمـــوم ...... |
رد: فوق هام السحب ( الشعر الشعبي) على متن القوافي
غلاته في خاطري مرسوم بالملّي
قام يتولّى ضميري والله الوالي بالناس متدنّي و بالناس متعلّي وقدره بقلبي رفيع ومنزله عالي افزّ مع نغمة الجوَّال لا ارسلّي وان غاب مع غيبته قفّلت جوّالي ...... |
رد: فوق هام السحب ( الشعر الشعبي) على متن القوافي
يا صوتك الي عليه الروح ملهوفه
ان جابه الخط له شكري و تقديري انا فدا وجهك اللي كل ما اشوفه اقول للضيق روح دور على غيري ...... |
رد: فوق هام السحب ( الشعر الشعبي) على متن القوافي
تغاضيت عن زلة رفيق و عتب غالين
وصبّرت قلبٍ سود الايام موجعته رميت العتب في سلة المهملات ايلين لحقني الخطا من واحدٍ ما توقعته ..... |
رد: فوق هام السحب ( الشعر الشعبي) على متن القوافي
يسعد مسـاء نـاسٍ عليـنا عزيزين
قبل اللسان القلـب سـاق التحيـه مكانهم عندي على الراس والعين وأحبهم في اللـه وبـ طيب نيــه |
رد: فوق هام السحب ( الشعر الشعبي) على متن القوافي
الناس ماهم بالصور والمظاهر
الناس بالافعال تحكم عليهم ناسٍ لهم طيبٍ بالامجاد ظاهر وناسٍ تضيق صدورهم لاتجيهم اللي طبايعهم مثل طبع ساهر أحذر ترجاهم وتشره عليهم عليك باللي مثل غال الجواهر اللي لهم وقفات والخير فيهم ...... |
رد: فوق هام السحب ( الشعر الشعبي) على متن القوافي
حذراك من دعوة المظلوم
اللي سرت وأنت في غفله وشلون تهنى بحلوا النوم تعطيه موعد وتخلف له خليته الهايم المهوم وتبكي على حاله الطفله تعيش في فعلك المشؤم وله خالق الكون ينصف له ...... |
رد: فوق هام السحب ( الشعر الشعبي) على متن القوافي
صبرك على الدنيا ولو كنت مهموم
كثر الزعل ما جاب للنفس راحه تزعل وترضى والقدر شي محتوم والعبد يلقى بالتوكل فلاحه والله كتب للخلق ما كان مقسوم ما ضاقت الدنيا وفيها مساحه سامح وبايح واترك*الحقد واللوم ...... |
رد: فوق هام السحب ( الشعر الشعبي) على متن القوافي
من عز نفسه زاد رفعه وقيمه
لو ان رزقه مثل رزق اشقر الريش ياصاحبي ودروبنا مستقيمه لو فتّشت عنا نقاط التفاتيش مايرخص البندق ولا شداد ريمه الا الضعيف اللي يدوّر عراميش بعض النفوس تصد لو هي محيمه تقبل وهي ظمياء وتقفي معاطيش ...... |
رد: فوق هام السحب ( الشعر الشعبي) على متن القوافي
كل عام وانتي قصيده ما لحقها ملام
من اول العيد لين اخر حدود السنين كل عام وانتي حكاية كل ليله وعام لو يختصرْك الشعر والشاعر بكلمتين عليك من شاعرٍ غنّى لقلبك سلام لو ما حصلّ له سلامه بين شامه وعين لفّي من الغيم ثوب وزيدي الابتسام انا اوّل انسان يحضن غيمه ونجمتين ...... |
رد: فوق هام السحب ( الشعر الشعبي) على متن القوافي
باقي من الي خذيته قلب بين إصبعين
وإن قلت هاته من عيوني وتآمر أمر وإن قلتلي موقعي من عالم الحسن وين بعد الثلاثين كان الله عطاني عمر أقول مزيون وأشباهك ماهي بربعين أشباهك ثنين ياما شمس والا قمر ...... |
رد: فوق هام السحب ( الشعر الشعبي) على متن القوافي
ياعود موزٍ على النسناس غريافي
تشرق نجوم الثريا في بساتينه وليا مشيتي يتلك ثقل الاردافي والثوب قمتي على الساقين تضفينه ...... |
رد: فوق هام السحب ( الشعر الشعبي) على متن القوافي
ياحبيبي والمحبّه مواطنها القلوب
والقلوب اليا تصافت يزيد اشعافها والله ان حبّك سعاده وذنبٍ من الذنوب سكةٍ فيها الركايب يطول اوقافها مايتُوب القلب من حب خله مايتوب لو تتوب النّاس من حقها واعرافها ...... |
رد: فوق هام السحب ( الشعر الشعبي) على متن القوافي
ابي من عيونك نظرةٍ تلفت الانظار
عساها تداوي جرح من قوسك الباري وابي من كفوفك ضمة الأرض للأمطار لا صبّت مزونه صب والليل سمّاري وابي قطعة اللولو وأبي درة المحار وأبيك السماء والمزن والأرض وأبحاري هذي كلها عن جرح عينك وأبيها ثار أنا منجرح من سهم عينك وأبي ثاري ...... |
رد: فوق هام السحب ( الشعر الشعبي) على متن القوافي
يازاهي الكحل لك نظرات بتاعه
علمني الرمش والنظرات وش تعني ما دونك ودون سور القلب فراعه أطعن بحد العيون السود وأوجعني فدوتك خفاقي اللي عندك وداعه ما دام حبه على حبك يشجعني ..... |
رد: فوق هام السحب ( الشعر الشعبي) على متن القوافي
فكت البرقع عن الخشم والعين
من زود حر الجو ومن الرطوبه غروً عطاه الله من الملح والزين لا شافه التايب ماحسب ذنوبه وانا ترا شاعر .. وقلبي مليعين وفي حب زين الوصف ماقال توبه ...... |
رد: فوق هام السحب ( الشعر الشعبي) على متن القوافي
المحبه عزمها ماهوب معدوم الاراده
ما تعيش الا على وضح النقى يا اهل المبادي عادي انك تقتل الاحساس عاده في مهاده بس تجرح من يحبك بالجفى ماهوب عادي ايّه انادي كل غالي من غيابه و ابتعاده و الحقيقه لا شعور ولا حياه المن تنادي ...... |
رد: فوق هام السحب ( الشعر الشعبي) على متن القوافي
ياصاحبي مهما يميلن الاوضاع
الله كريم وكل صعب يحله نشوم شومة عز عن بعض الاطماع لاصار تلحق عزة النفس خله من عاش عمره للمخاليق تباع يشرب فناجيل الغبن والمذله ...... |
رد: فوق هام السحب ( الشعر الشعبي) على متن القوافي
ليتـك تجيني يـوم ضايــق وزعلان
وتشوف كيف ابعد لروحك زعلها ماهو كما جيتك واناحيل زهقان زود بــرودك فــوق نفسي مللها ياصاحبي ارجـوك خليك فهمان واشعـر بحاسيسي وداوي عِللها ماهو تضل جماد ماكنك انسان وتكون اقرب من لروحي خذلها ...... |
رد: فوق هام السحب ( الشعر الشعبي) على متن القوافي
بيبان الابداع للعفوي تفك القفول
يقلط على الذايقه بـ اسمه وشعبيّته اكتب بعفويتك حتى تنال القبول الشخص ما له قبول الا بعفويّته ..... |
رد: فوق هام السحب ( الشعر الشعبي) على متن القوافي
بـديـت بالـلـي شـيـد الـكـون تشيـيـد
ابــدع بخـلـقـه ثـــم ســـن العـقـيـدة مـن بعـد هـذا ياخلـف عيـدك اسعيـد يالله لـعــل ايـــام عـمــرك اسـعـيـدة انـتـه ومـــن كـثّــر عـلــي التنـاشـيـد ارسـل لــك المـعـذار وأقــره وعـيـدة والله ما انقص في الحقيقة ولا ازيـد وقـع المعانـي واضحـات(ن) وأكيـدة ودي بشوفـتـكـم ولـيّــه بـهــا مــيــد لـكــن جـرحــي مـاتـوقـف صــديــدة كل(ن) شـرى لبسـه يبـا فرحـة العيـد مـــع الاقـــارب بالـثـيـاب الـجـديـدة هـــل الـهــلال وأقـنـفـت بالـزغـاريـد الـلـي لـشــوف اديـارهــا مستـعـيـدة واستركـبـوهـا صـامـلـيـن الأوالــيــد كــل(ن) يـقــول الله علـيـنـا يـعـيـدة العـيـد يجـمـع كــل ذخــر الاجـاويــد هــذا ولــد عـمــه والآخـــر حـفـيـدة وانـا ليـا جــا العـيـد جتـنـي لواهـيـد فـي وسـط قلبـي صاليـات الوقـيـدة مـاهـي بـكـر مـــرّت عـلـيـه تـراديــد عنـهـا نـيـام أهــل القـلـوب البـلـيـدة ما ودي اشكـي خايـف أمـن المناقيـد الـرجـل بـنـك(ن) مايـغـلـق رصـيــدة ولا ودي اتــرك فـرصــةٍ للحسـاسـيـد اللـي لـيـا سمـعـت كــلام(ن) تـزيـدة واحتـرت بيـن اصدورهـا والمـواريـد من كل جانب صـوب نفس(ن)عنيـدة وسـجـع الحـمـام ملحـنـه بالتـغـاريـد حــرك هجوس(ن)ساكـنـه بتـغـريـدة عـجـل يـبـا الـمـرواح بيـنـه مواعـيـد تـحـت جـنـاح اللـيـل والـكـل هـيــدة وخايـف مـن اللـي يدركـون البواريـد وألا مــن الشـيـهـان بـــأول هـديــدة كنّـه يقـول اليـا زعلـت اضـرب البيـد ورزقـك علـى رب(ن) تكـفـل عبـيـدة ان كـان ماحـولـك عيال(ن)صنـاديـد اكضـم علـى غيضـك وكـب اتعديـدة واصبـر علـى الشـدّات خـلـك بليهـيـد تـكـسـب مـنـاعـه لـلـيـال الـشـديــدة دنـيـا تقـلـب خـايـنـه ملـعـنـة سـيــد لــو انـهــا قـفّــت تجـيـلـك امـعـيـدة يانيـم شــف قــدام عيـنـك شواهـيـد بـصـر بعيـنـك وافـعـل الـلـي تـريـدة اللـي لهـم بالطـيـب منـهـج وتمجـيـد ماتوا ولا أحـد(ن) قـال والله فقيـدة راح النـظـر والـوجـه يـــم الهـرابـيـد صـاروا خيـار القـوم وأهمـه فسـيـدة ما بغاك يـادار(ن) بهـا الظلـم والكيـد يقـولـهـا الـلــي ذاق ظـلـمـه وكـيــدة ظـلـم الطـغـاه الحاقـديـن النـمـاريـد ســود النـوايـا والـنـفـوس الـمـريـدة تكاتـفـوا بالظـلـم والـهــم مقـاصـيـد ولا الناس من ظلـم البـري مستفيـدة قـول(ن) لجـدي قبـل لايـرزق اولـيـد نشـهـد انــه صــار بـيــت القـصـيـدة مايذبـح الرجـال ضـد(ن) مـن ابعيـد لمـوت وأن جـت ضدتـه مـن سنـيـدة أزمـي علـى وضـح النـقـا بالجراهـيـد مانـي ضعـيـف قـاصـر الـضـد قـيـدة مــن لا بغـانـي مــا بغيـتـه ولا أريـــد شوفـه ومــن عــادان مـانـي وديــدة ما والله ارضا في جلـوس علـى حيـد يرضـى بـه اللـي مـا علومـه سـديـدة هرجه كثيـر ولا هـو مضـوي(ن) فيـد ولـيـا لـقــا شـانـيـك يـأخــذ بـديــدة إهـانــة يـفــرح بـهــا كـــل رعــديــد ضحـكـة عــدوه لــو تبـكـي عضـيـده عـمـد يحفـونـه قــروم(ن) سـواعـيـد لان أتـصـقـر كـــن جـابــان صــيــده والهرج في المجلس مسار على السيد بـه أيتعاقـب مـن مشـاء غـار سـيـده للخبـل مـزح ولأشقـر الريـش تهـديـد هـــروج مـجـلـس والـنـوايـا بـعـيـدة والـحـر عـنــده للحـسـابـات تـسـديـد هـرجـه وقــار وكــل جـمـلـه مـفـيـده ياالله يا مخرج حليـب(ن) مـن الديـد يـا راهنـن مـوت الفتـى فــي وريــده عندك حقايـق قصـت(ن) لـي سواميـد لــي الـشـرف فيـهـا وهــي الـفـريـدة شـاهـد عـلـي ولــي ومسجـلـه قـيــد أطلـب جـزاهـا مـنـك ميـتـه شهـيـده الشاعر معوض سودان |
رد: فوق هام السحب ( الشعر الشعبي) على متن القوافي
اركـدي يالهمــوم وجـرهدي يالطمــوح
وانفضـي الضيـق عنك واشعليها أمـل زلزل الخوف تكسب من وراء الروح روح عيشــة الـــذل شينــة والمــراحل دول مــا يــرد المــانيــا كل وجــه صبــــوح ولا تجيـك السلامة من خبيث العمــل خــل قلبك جنــوبي يهتـويه الــوضوح وخـل صدرك شمـالي ما يحب العجل وخذ من الشـرق عزمك لا تعد الجروح وخذ من الغـرب عـادات المثل بالمثل واكسر الصمـت لو ما عاد غيرك يبـوح وان حكوا الغير يكفوا وانت خلك وسل وارفــع الــرأس وقت الجـد والا المزوح لا تــوطي جبينــك لو حصـل ما حصل ...... |
رد: فوق هام السحب ( الشعر الشعبي) على متن القوافي
مغنيتني عزة النفس عن كل معثور
وعن مكان مايليق بـ مقامي يوم اجيه لا اعتلى صوت النفاق وصدح صوت الفجور وبتدا ضحك المنافق وتطبيل السفيه صد قلبي صدة الطيب الي مايبور لين بار الوقت في سعيه وبارو ذويه ومكتفي عن مجلس مهرج ونقال زور برفقت اهل العرف والراي والعرض النزيه ...... |
رد: فوق هام السحب ( الشعر الشعبي) على متن القوافي
المحبه شي عادي والعداوه شي عادي
القلوب الها نظر واحساسها مثل المنبّه حب من ودك تحب وعاد من ودك تعادي بس عيب انك تشوّه سمعة اللي ما تحبه ...... |
رد: فوق هام السحب ( الشعر الشعبي) على متن القوافي
زود الغلا خلاني أعيش دنياك
تركت كل الناس لأجلك وجيتك من وين ما وجهت فى عيني القاك وان جيت أغمض عيني فيها لقيتك إحساسي ونبضي ترى ما تعداك القلب والوجدان والعين بيتك ..... |
رد: فوق هام السحب ( الشعر الشعبي) على متن القوافي
نصادم الايام و نطيح و نقوم
و نواجه الدنيا بـ صبر وجلادة سود الليال تزيدنا طيب وعزوم اليا تردى الوقت .. طبنا زيادة ماجد لفى الديحاني |
رد: فوق هام السحب ( الشعر الشعبي) على متن القوافي
لا حدٍ يقول ان المواجع تخصه
وهو الوحيد اللي شكى من عناها كلن وله في بنك الاوجاع حصه متشابهه لو يختلف محتواها وبقلب كل إنسان موجود قصه لو يزعم ابنسيانها مانساها ..... |
رد: فوق هام السحب ( الشعر الشعبي) على متن القوافي
مـا أبيـك تسألنـي علـى ايـش نـاوي
بالحيـل أنـا تعبـان والحالـه حالـه عنـدي كثيـر أوراق و مانـي بقـاوي أكتـب رسالـه لـك و أمحـي الرسالـه يـا مدعـي الاحسـاس فينـي بـلاوي غاليـك قلبـه طـاح منـه و شالـه معنـى العدالـه كـل شـي بالتسـاوي و أنـا أشهـد إنـّك مـا عرفـت العدالـه ...... |
رد: فوق هام السحب ( الشعر الشعبي) على متن القوافي
ياليت عنـدي قلـــب ماعنـده احساس
من شان اطنـش من جرحنــــي غروره واتجاهـل اللـي شاف حاله من الناس واصـد وجهـــي واقهــــره في حضوره بس انخلق لي قلـــب طيب وحساس فيه الوفــاء والطيــب ساكــن شعوره مااحب اجـرح من جرحني من الناس ولا احب اعاتب مـــن وصلني قصوره ..... |
رد: فوق هام السحب ( الشعر الشعبي) على متن القوافي
لو طلبت الروح خذ روحــي هديه
وان طلبت القلب خذ قلبي فداك انت اغلا مـن معـــــي بين البريه مامعــي مخلوق يتساهــل غلاك قلتها لك والقسـم من طيب نيه من شعور انسان ميت في هواك ولو تحب اكتـب على هذا وصيه مستعد اوصـــي لهم كلي فداك ...... |
رد: فوق هام السحب ( الشعر الشعبي) على متن القوافي
يا زين عقلي في هـوئ حبك سقط
وصار حبك نبـــــض قلبي والسكون كلمـة أحـبــــــك قلتها لـك باالغلط لأن حـبــــــك صـار باالنسبه جنون لو بس تحذف للجنون نقطه فقط يمكــــن تغير قلبك القاسـي حنون شجون لا تحذف من الشين النقط بتحط اشـواقـي لقربك فـي سجون ...... |
رد: فوق هام السحب ( الشعر الشعبي) على متن القوافي
سولفي . مثل المطر . لحظة هطوله
كل حرفآ . منك .. بأنفاسك . عْطر سلهمي بنظرات . عينك . ياخجوله لونظرة .. الغيم .... ينزلك .. مطر في جبينك شمس عمري .يافصوله وفي خدودك .. يامساء ليلي قمر ...... |
رد: فوق هام السحب ( الشعر الشعبي) على متن القوافي
اكذب عليك ان قلت لاهي وناسيك
الشاهـــــــد الله مانسيتك دقيقــــه كل المشاعــر لجل عينك ب اياديك هذا الصحيــح ان كان تبغا الحقيقة يانادر بوصفـــك عسـى الله يحميك ويجـــــود وصلك لو ب أيت طريقة ...... |
رد: فوق هام السحب ( الشعر الشعبي) على متن القوافي
الطيب مثل النايفات الشواهيق
ماهو بضاعه من بغاها شراها والمرجله من عند ربي توافيق ماكل من دوّر عليها لقاها ..... |
رد: فوق هام السحب ( الشعر الشعبي) على متن القوافي
الله من جفن عن النوم محروم
وقلب رجف بين الضلوع النحايف حاولت انام ولا تهيآ لي النـــوم النوم والهاجوس ماهم ولايـــف ما تستريح العين والبال مهـموم ولا يستقر الحال والقلب خـــايف غديت مثل الي بالاعدام محكـوم مامات ... لكنه من العمر عايف ..... |
رد: فوق هام السحب ( الشعر الشعبي) على متن القوافي
يا مرحبا باللـي يـدور حضـــوري
يا مرحبا مليـار مــن داخـل الروح ناسـن تواجدهـم يداوي كسـوري بلسم مداوي كل ضايق ومجروح غاليين في قلبي وغايه ســروري شمعه حياتي قربهم راحه الروح ملزوم انا في قربهم شي ضروري اصبح تواجدهم بالاعماق مطروح بقلمي |
رد: فوق هام السحب ( الشعر الشعبي) على متن القوافي
خدروك من الوجع وهم نسو ما خدروني
ليتهم يدرون وش فرق المريض من المرافق ㅤㅤ مثل ما عودتني للكايدات ارخي متوني هاك عافيتي و جب مواجعك وانا موافق ..... |
رد: فوق هام السحب ( الشعر الشعبي) على متن القوافي
عن الحياة الضحك ماهوب مقياس
كم ليلةٍ ضاق الضحوك وسراها نحكم على الشخصية اللي مع الناس مانعرف الشخصية اللي وراها ..... |
| الساعة الآن 03:34 AM. |
Powered by vBulletin® Version 3.8.7
Copyright ©2000 - 2025, vBulletin Solutions, Inc. Trans by
جميع الحقوق محفوظة لـ منتديات شمران الرسمية