رد: ديوان شعراء السعودية في العصر الحديث (متجدد)☘️☘️
 

الشاعر زايد الرويس

https://diwandb.com/images/poets/por...om_oev1ba3.jpg
قصائد وأشعار الشاعر زايد الرويس أحد شعراء العصر الحديث من المملكة العربية السعودية | ديوان الشعر العربي
الشاعر زايد الرويس


بكالوريوس محاسبة مدير تحرير وكالة أنباء الشعر مدير تحرير ليالينا - سابقا معد صفحة الشعر في جريدة شمس - سابقاً معد ملف الشعر مجلة أصداف - سابقاً معد ملف الشعر في مجلة حياة الناس سابقاً لقاءات تلفزيونية وإذاعية وصحفية في مختلف وسائل الإعلام الخليجي.

رد: ديوان شعراء السعودية في العصر الحديث (متجدد)☘️☘️
 

قصيدة يادنيا من أنتي له
الشاعر: زايد الرويس زايد الرويس
#العصر الحديث
#المملكة العربية السعودية
0
2,133 مشاهدة

خلاص انصك بابك يا الرجا واليوم دور الياس

تعلّق بي طعونه والجمل لا طاح عزيّ له

تقول ان الصدر ماعاد عنده بالطعون احساس

ولو هو حس بطعون الزمن ما في يدي حيله

خلاص انكفت لابوها حياةٍ عزها بافلاس

قرار ويعتبر تصحيح لو هو منيّل بنيله

وداعاً للسكون وللهدوء ولعبة الهوجاس

وداعاًً للتفاصيل الممله والف تعليله

ابسلك درب من قبلي طريق وقد مشوه الناس

احد راضي واحد مجبر ويا دنيا من انتي له

عسى في راحتي راحه تساوي راحة المجلاس

وعسى ربي يعوضني بوادٍ فايضٍ سيله

تعبت من التعب واتعبت نفسي والتعب ينداس

يجي له يوم ويهاجر ويلقى من يغني له

ابترك كل حاجه دام في هالراس يسكن راس

والا ياليت درب الهم نلقى عنه تحويله

ثمان شهور والا اكثر بعد والباس فوق الباس

ثمان شهور من عمري قضت ما كنها ليله

هنا كانت طموحاتي قلم يرقى على القرطاس

هنا كانت معاناتي وحلمٍ صعب تأويله

هنا صبيت بعض جروح قلبي في بقايا كاس

تجرعته لأن الدمع ما يعرف مناديله

بديت استسخف اللي كان بعيوني ذهب والماس

لأن الفقر لو مرّه بيسكت ما ينادي له

خلاص انصك بابك يا الرجا واليوم دور الياس

تعلّق بي طعونه والجمل لا طاح عزي له

رد: ديوان شعراء السعودية في العصر الحديث (متجدد)☘️☘️
 

قصيدة كلي حلالك
الشاعر: زايد الرويس زايد الرويس
#العصر الحديث
#المملكة العربية السعودية
0
915 مشاهدة

كلي حلالك ايه كلي حلى لك

من نبض قلبي لارتعاشة يديني

من ايمن حدود الغرام لشمالك

من ايسر حدود البياض ليميني

خليني احيا واهتني من خلالك

قلبي يعيش بداخلك ما يبيني

يا معطيتني من جمالك جمالك

يا ماخذتني من بقايا حنيني

اعشق سكونك بسمتك إنفعالك

ضحكك زعلك غوايتك صدقيني

اني احبك في رضاك ووصالك

واني احبك في زعلك وأنيني

وانك سكنتي وسط قلبي لحالك

وانك لحالك وسط قلبي وعيني

أغار من لبسك سريرك ظلالك

ومن كل شي يكون بينك وبيني

لو تتركيني بس امر بخيالك

واخلي سنينك تعانق سنيني

يا روح زايد كل زايد حلالك

خليني بقلبك هنا واتركيني

رد: ديوان شعراء السعودية في العصر الحديث (متجدد)☘️☘️
 

قصيدة الطفل الصغير
الشاعر: زايد الرويس زايد الرويس
#العصر الحديث
#المملكة العربية السعودية
0
827 مشاهدة

وش اكتب والقصايد نار وضلوعي حطبها جلال

وريح الوقت هبّت والمشاعر مالها تالي

عليك الله يابو قلبٍ كبير تحقق الأمال

واشوفك لا انشغل بالي ويصبح ما انشغل بالي

تشرّفت بجنوني فيك وانت مجنّن العقال

ولا لي عنك يا الطفل الصغير المترف السالي

شبيهك فالسما ما يشبهك لو تشبهه فاحوال

ولايشبهك منه ألا انه اللي فالسما عالي

أحبك وان بغيت الصدق حبك فالحنايا سال

مثل سيلٍ جرى يحيي الهشيم الدمدم البالي

لو المح في عيونك يا عيوني ضحكة تختال

نسيت اللي جرالي واحتضنتك يا اعظم امالي

حسدت الخاتم اللي في يمينك واحسد السلسال

واحسدك في مرايتك ان لبست وجيت متعالي

محبة كل خلق الله لحال وحبك انت لحال

محبتهم مرار وحبك انت البلسم الحالي

ترى كثر اهتمامك في حبيبك عكسه الإهمال

وانا ما اقول مهملني ولا تتعمد اهمالي

ولكن حط في بالك ترى ما يذبح الرجال

سوى قل الوصال وغاليٍ ما سيّر لغالي

رد: ديوان شعراء السعودية في العصر الحديث (متجدد)☘️☘️
 

قصيدة فستان وردي
الشاعر: زايد الرويس زايد الرويس
#العصر الحديث
#المملكة العربية السعودية
0
1,153 مشاهدة

واعذابي كان مر الصيف ما شفتك وجيتك

يا بعد كل القلوب ويا بعد كل القرايب

أتنهد كل ما مريت صدفة عند بيتك

واتمنى الباب لا عديّت تفتحه الهبايب

واتخيل وقتها انك واقفة حوله فديتك

لابسة فستان وردي كسرته فيها مصايب

وابني افكاري على يا ليتني قدام ليتك

والأماني تنولد من دون صلب ولا ترايب

كثر ما تسقيني احلامي أحس اني ظميتك

وانتي تعرفين تأثير الظما عند الحبايب

أدري اني لو شربتك عشق مت ولا رويتك

لو على قبري بيديّنك تحطين النصايب

كان مالي منك غير الشوق والصبر احتريتك

قدر ما يولد طفل ويعيش لين يصير شايب

وان تبقى لي ضياعي فيك.. ضعتك واهتديتك

واختصرت حكايتي في صيف ما مرّه سحايب

والمصيبة كان مر الصيف ما شفتك وجيتك

يا بعد كل القلوب الا بعد كل القرايب

رد: ديوان شعراء السعودية في العصر الحديث (متجدد)☘️☘️
 

قصيدة اذكرك وانساني
الشاعر: زايد الرويس زايد الرويس
#العصر الحديث
#المملكة العربية السعودية
0
792 مشاهدة

أبجمع كل حزن الكون في ليلة عشان ابكيك

بكل الدمع واتشتت بضيقاتي.. ولا القاني!

أحس بوحدتي وسط الزحام ولا قدرت اجيك

أدوّر عن دفا حضنك ويدك وتكبر احزاني

حبيبي ضمني لو في خيالك ودي اغرق فيك

أنا المسجون وازعل لو نعس لحظات سجّاني

زمن عن صوتك وضحكتك واحساس الليالي ذيك

بعد ما غبت.. غابت فرحتي.. شف كيف حرماني

تخيّل يا حبيبي كل ما جاب السهر طاريك

أقوم ارتب الذكرى معك.. واذكرك وانساني!

واجمّع كل حزن الكون في لحظة.. واخاف ابكيك

وتدري بي وتبكي.. ثم اضيّعني ولا القاني!!

رد: ديوان شعراء السعودية في العصر الحديث (متجدد)☘️☘️
 

قصيدة قلة ادب
الشاعر: زايد الرويس زايد الرويس
#العصر الحديث
#المملكة العربية السعودية
0
709 مشاهدة

يا قلب زايد ما لك الا تستريح

ويش استفدت من التعب غير التعب؟؟

أشعلت شمعة كانوا الأصحاب ريح

ذبحك برد الوقت شحوا بالحطب

حاولت في وجه الليالي ما تطيح

مالوا عليك بحملهم ل اتفه سبب!!

تمشي لهم بالطيب وجروحك تصيح

يمشون لك بالعكس مع: قلة أدب!

تغفر لهم زلاتهم تدمح تبيح

يستهدفونك بالملام وبالعتب

تضيق فيك وكونهم عنّك فسيح

وشلون تتعجب ولله العجب

مهما تجمّل صورتك تبقى قبيح

ف عيونهم تبقى الغريب عن العرب

جهّالهم لاقصى جروحك تستبيح

وصمتك يسمونه بنظرتهم شغب

يا قلب طاوعني وريّح واستريح

بعض العرب مالك وراه الا التعب

رد: ديوان شعراء السعودية في العصر الحديث (متجدد)☘️☘️
 

قصيدة احضنيني
الشاعر: زايد الرويس زايد الرويس
#العصر الحديث
#المملكة العربية السعودية
0
705 مشاهدة

أرجوك عن كثر المواجع خذيني

قبل اتناثر من سما الحزن اغاني

من كثر ما حزني غدا محتويني

بديت احس اني بحزني أناني

أحيان اشك اني كذا مبتليني

واحيان اقول ان الزمان ابتلاني

لولاك جنبي كان ضاقت بعيني

ياللي وجودك من هدايا زماني

كم قلت لك لا من ضعفت احضنيني

بك قوتي لا ضاق فيني مكاني

إن كان ما زانت بقربك سنيني

وانتي بعيدة ما تزين الثواني

رد: ديوان شعراء السعودية في العصر الحديث (متجدد)☘️☘️
 

قصيدة الفيصليه والمملكه والوليد بن طلال
الشاعر: زايد الرويس زايد الرويس
#العصر الحديث
#المملكة العربية السعودية
0
682 مشاهدة

لوّ ان عندي مثل ما عند الوليد بن طلال

شريت برج الفيصليه لجل اغيظ المملكه

ماهو على شان الجنيه ولا على شان الريال

لكن على بالي طرى شيٍ تمنيت ادركه

غروٍ غريرٍ غرّره زينه ومطغيه الدلال

لا شاف له شيٍ يبيه ف ظرف لحظه يملكه

اللي سواته وبسهوله يملك قلوب الرجال

اليا لمح له درب في قلب الرياجيل سلكه

هذا وانا ما شفت منه الا التمنّع بالوصال

كفي من الحسرات لا مني تذكرت افركه

يحبني وادري بحبه مير ما جالي مجال

أجلس معه جلسه وهذا الوقت ما فيه بركه

يطري علي مع السهر واخذ ثلاث اربع ليال

تقول كن العين ظبي وحضرة الليل شركه

صوته ليا جاني ظما يسقيني الميّ الزلال

وساعة غيابه تدخل عيوني ونومي معركه

شفايفه جمرٍ وانا شاعر سريع الاشتعال

الله شغلني به وغيري ما شغله الا كبكه!!

لبّا عيونه والشعر لا حط شال وشال شال

إن طوّله وان قصرّه وان سعوّده وان أمركه

ولبّا النحيل اللي تحمّل شيلة حمولٍ ثقال

ولبّا الثقال اللي ولو وقّف يجي فيه حركه

إليا قفل جواله اظلم كل ما حولي ومال

فكري لتيار العذاب وكل طاروق مسكه

واصبحت اهوجس ما تقول الا الوليد بن طلال

مع اني افقر شخص عايش في حدود المملكه

رد: ديوان شعراء السعودية في العصر الحديث (متجدد)☘️☘️
 

قصيدة الجادل
الشاعر: زايد الرويس زايد الرويس
#العصر الحديث
#المملكة العربية السعودية
0
661 مشاهدة

الجادل اللي عن النظرات مصيونه

لامن مشت كنها تمشي بوجداني

انقى من الغيم لو هي ماخذه لونه

تصب فرحي وتشرب عني احزاني

تنحب والحب يا صعبه ويا هونه

جيته برغبه وادور عنه سلواني

اسهل من الحلم لوهي نفس مضمونه

اصعب من الواقع اللي شح ما اعطاني

مانيب اقول انها بالوصف مزيونه

لكن عن البيض فيها شيٍ اعماااااني

لو شافها قيس ليلى عقّل جنونه

ثم قال تكفوووون حبّوها علشاني

منها تعلمت كيف الحب وفنونه

عرفت وشلون اضيع وبعدها القاني!

تغيب عني وقلبي تنزف طعونه

واذا رجعت قلت لايمكن تناساني

قصيده بغيرها ماهيب موزونه

لانها القاف والمعنى وأوزاني

تعيش دايم بقلبٍ كثرت شجونه

ترويني الحب ثم تعود ترواني

لو وصلها شح بنت الناس مصيونه

تمشي واقول انها تمشي بوجداني