رد: فوق هام السحب ( الشعر الشعبي) على متن القوافي
 

ليلٍ اطول من انه ينحسب بالثواني
ينتثر كل مامالت وفلت شعرها

رحلة العمر بس العمر ماكان فاني
رحلتي من معنقها لساحة نحرها

من لقى الجدي مادور سهيل اليماني
ومن لقى ليلةٍ تشفي غليله سهرها

كنت اعاني واحس ان القلاده تعاني
ليلة بلعن الشيطان لو ماحضرها

....

رد: فوق هام السحب ( الشعر الشعبي) على متن القوافي
 

تعالي كل ماطال الغياب الشوق لك يزداد
وتتعذّر من كْفوفي كفوف ولا عذرتيها

غريبه كيف جيتيني سلام ورحتي استبداد
محيتيني ودمعاتي ولا مرّه محيتيها

سراب الدرب موحش والليالي كنّها تنعاد
تمرين المدينه كنّك اللي ما سكنتيها

واسافرلك واخبّيلك عمر يا ضحكة الميلاد
واداعب مجمل ورود الحنين اللي قطفتيها

احبك كل ما سالت ملامه في طرف ميعاد
وش الديره قبل خطواتك اللي ما خطيتيها

....

رد: فوق هام السحب ( الشعر الشعبي) على متن القوافي
 

‏هلا وأسمى القصايد تنحني لك خود تلو الخود
هلا وأنتِ بدونك وش مصير الشعر وأمجاده

هلا في عنقك النايف هلا في الخادرات السود
هلا والك الولاء والسيف والفرسان والقاده

هلا في خصرك المايس هلا بك والثنا مردود
لخصرٍ لو طلب عوج المحاني جات منقاده

....

رد: فوق هام السحب ( الشعر الشعبي) على متن القوافي
 

مياسة القد في قدك يطول الكلام
على سبيل المثال وفي سبيل الحصر

يحسْب بقيراط مايحسب بكيلو جرام
ماينحني للهزيمه ينحني للنصر

ان مال لي ياسلام ولااعتدل ياسلام
يميل قلبي لو اكابر واثابر واصر

حاولت اسوي مثل يوسف عليه السلام
لكنك اجمل بواجد من عزيزة مصر

....

رد: فوق هام السحب ( الشعر الشعبي) على متن القوافي
 

مرحبا يا وجهك اللي يسرَّ الناظرين
والله انه حلو بزمام وبليَّا زمام

يوم اعاف النوم لأجل السهر لا تزعلين
من يحبَّ النور من شامتك حب الظلام

اضحكي لين ادري إنَّك وضحكاتك يقين
وامهليني عمر لين الله يجيب الكلام

....

رد: فوق هام السحب ( الشعر الشعبي) على متن القوافي
 

من يلوم اللي خذيتيه من دنيا الضياع
لين صار فـ قربك يْعيش واختارك قِدر

ومن يضيق بْه الصدر وانتي عيونك وساع
ياخذ مْن عيونك الواسعه وسعة صدر

والشجاع اللي يقولون فـ الهيّه شجاع
قدم رمشك يرفع ايديه وسلاحّه حدر

والبدر لا طل في حضرتك زاد الشعاع
فوقنا بدرٍ يشعشع وفي وجهك بدر

....

رد: فوق هام السحب ( الشعر الشعبي) على متن القوافي
 

‏ياراعي الكيف والفنجال والدله
تعال اقهويك من كيفي بفنجالي

بصب لك كيف والثاني رديف له
والثالث يساق من غالي ليا غالي

....

رد: فوق هام السحب ( الشعر الشعبي) على متن القوافي
 

يامترفه كلّ الكلام اللي على البال ارتجال
ماضاعت علومي ولكن يوم شفتك انهمر

في ذمّتك انتي قصيدة صافحت كفّ الخيال
ولّا قصيدة صادقه خلقت على هيئة بشر

يا غاية السائل ويا أعذب إجابات السؤال
تدرين بانّ الشعر في حضرة جنابك منتصر

....

رد: فوق هام السحب ( الشعر الشعبي) على متن القوافي
 

ماوقف ضدّك معاي الا ظلالي
يالعيون اللي خذت قلبي رهينه

ان قدرت اشوف قلبك ما يبالي
ما قدرت اودّعك و انتي حزينة

كيف اضحي بك للايام الخوالي
وانا رجفة مرتبك وانتي سكينة

في نحا عمرٍ هو اخر ما بقى لي
مستعدّ اعيش معك اللي تبينه

....

رد: فوق هام السحب ( الشعر الشعبي) على متن القوافي
 

تدلعي وأخذي القلب النزيه الغيور
يالفتنه اللي زمام الأمر في يدينها

اليا غشاك الكبر ولا غشاك الغرور
هذي من حقوقك اللي تستحقينها

....