رد: فوق هام السحب ( الشعر الشعبي) على متن القوافي
 

قديش تخدعني المظاهـر ولا اتـوب
ماكنهامـرّت عـلـيّ التجـاريـب

كم واحدٍ يعطينـي الهـرج مقلـوب
وانا إعتبرته من خيـار الأصاحيـب

الفرق بين الناس في عقول وقلـوب
واسرارهم يعلم بهـا عالـم الغيـب

العين ماتكشف لك اللي ورى الثوب
كلٍ يظن ويخطـي الظـن ويصيـب

اللي يودّك مايـرى فيـك عـذروب
واللي شناك يحـط فيـك العذاريـب

إن كان ولينك من العقـل موهـوب
لاتستمـع لمروّجـيـن الأكـاذيـب

كم من حديثٍ قـد لقينـاه مكـذوب
على النبي اللي منزّه عـن العيـب

العبد فـي دنيـاه غالـب ومغلـوب
والعمر جـاري والليالـي دواليـب

يجمع مع الأيـام حسنـات وذنـوب
والستر ظافـي والعِبَـر بالعواقيـب

إصبر على الدنيا ترى الصبر مطلوب
وإستخدم الحكمه وحسـن الأساليـب

وإحذر تلجّ عواك في كـل عرقـوب
محدٍ بقايـل وش مسرّيـك ياذيـب

ولايعتريك الهـم والـرزق مكتـوب
مضمون لك مافيـه شـكٍ ولاريـب

كثر الطمع يدفعك راضي ومغصـوب
للبخل والعزلـه وتـرك المواجيـب

والنفس لاتارد على كـل مشـروب
حتى تورّدهـا لصافـي المشاريـب

لاتندفع معهـا ورى كـل محبـوب
وتعلقك في حبـال الآمـال وتخيـب

الناس قالوا كـل ممنـوع مرغـوب
والعاقل اللي يشغل النفـس بالطيـب

وإلياإمتطيت من الجهل كل مركـوب
ضاعت سنين العمر من غير ترتيب

إن كان ماتحسب ترى العمر محسوب
في كل يومٍ تطلع الشمـس وتغيـب

ولابد تطلع فيـك ميـزات وعيـوب
واقبح عيوب الرجل عيبٍ على شيب


عبدالله الطلحي

رد: فوق هام السحب ( الشعر الشعبي) على متن القوافي
 

عند الفرج ماياخذ الضيق ساعه
دنيا تضيق وفزعة الله سريعه

اجاهد الدنيا بعزم وشجاعه
ما الين لو ضاقت فجوج الوسيعه

عمّا يهين النفس عندي مناعه
الله خلقها في ضميري طبيعه

لو لازمي يقضيه بعض الجماعه
الله ولا بعض الرجال ونفيعه


فلاح بن مبرد

رد: فوق هام السحب ( الشعر الشعبي) على متن القوافي
 

ياكثر الكلام اللي يدف الصدر بيديه
يبا الانصراف وعوج الاضلاع مانعته

بلشنا فـ ابو وجهين مدري ثلاث وجيه
وسمحنا من الفلم الطويل ومتَابعته

يخيب الامل في واحدٍ كنت هاقي فيه
ويطيب الامل في واحدٍ ماتوقعته


سفر بريك

رد: فوق هام السحب ( الشعر الشعبي) على متن القوافي
 

يقولون لاضاقت عليك الوسيعة غن
وانا اقول لاضاقت عليك اتجه لله

لياضاق صدرك مايداويه شعر وفن
يداويه ذكر اللي بيديه الفرج كله

....

رد: فوق هام السحب ( الشعر الشعبي) على متن القوافي
 

اليا طلبتك حاجتي قلت بعدين
وبعدين عيا يومها لايتهيا

ان كان ماهي ساعة تقضي الدين
ماني على بعدين عايش كذيا


خالد الحصني

رد: فوق هام السحب ( الشعر الشعبي) على متن القوافي
 

من رضى يرخي مقامه للعرب ياويله
كل يوم معرّضينه هجمةٍ مرتده

راس أبو قلب(ن) فضيخ تقول راس تريله
إن زعل وإلا رضى كل(ن) ما غير يكدّه

لاتصير اللي يقولون العرب ياحليله
خلّك السيف الحديد اللي يروّع حدّه


عناد الشيباني

رد: فوق هام السحب ( الشعر الشعبي) على متن القوافي
 

اكثر مايضايق خاطري نشدة الملقوف
ليا شاف فيني من ظروف الزمن خله

عساني ليا زليت مازل عند ضعوف
عسى زلتي قدام من يدمح الزله

....

رد: فوق هام السحب ( الشعر الشعبي) على متن القوافي
 

كم قست سود الليالي على روس الرجال
الظروف تمر والنار تسعر جوفها

جعل من هو يجحد الكفو لاجاله مجال
تاخذه صكات بقعا بروس سيوفها

جمل الله وجه منصى كريمين السبال
مدهل المحتاج والناس وقت ظروفها


طلال ابن جسار

رد: فوق هام السحب ( الشعر الشعبي) على متن القوافي
 

يالله تقديني لدرب الصالحين
اللي مافيهم لا نفاق ولا ريا

وانا فوجهك من وجيه الكارهين
ومْن الرخوم ومن قليلين الحيا

م

رد: فوق هام السحب ( الشعر الشعبي) على متن القوافي
 

صباح الورد يافال السعد مني صباح الخير
صباح النور ياوجه الصباح ونور تسبيحه

صباح الفل والكادي صباح النبت والتزهير
صباح المسك والعنبر صباحه لانتثر ريحه

....