لا تسألوني=
لا تسألوني ليش اقول القوافي = هذا السؤال اللي مااحبه، ولا ابيه
يكمن ورى نظم القوافي خوافي = وراع الهوى ما كل موضوع يبديه
والحب موت احمر، وسم زعافي = ماله علاج ، ولا طبيب يداويه
يؤتي ثماره كل ما كان خافي = واذا انكشف للناس ضاعت معانيه
واصبح حديث أهل النفوس الضعافي = ما احد يخلي صورته دون تشويه
وتذبل زهوره قبل وقت القطافي = ولا يجني الا الهم، والغم راعيه
يصير خاين عهد لو كان وافي = والناس بالبهتان، والزور ترميه
يجردونه من ثياب العفافي = ويقال فيه و فيه شيء ما هو فيه
ويصدر بحقه حكم دون اعترافي = وتستأنف الجلسات من دون تنبيه
ومهما تظلم ما يشوف العوافي = قاضيه يطعن في نزاهة محاميه
قضيته مصدر نزاع، و خلافي = ماله حقوق، و لا حكومات تحميه
مثل الغريب اللي بوسط الفيافي = يسير في دربه على غير توجيه
او مثل بحار تعدى المرافئ = والموج الأزرق يرفعه، ثم يرخيه
هذي حقيقه ما عليها اختلافي = حادث مؤكد،، غير ممكن تلافيه
وين المحب اللي حموله خفافي = يقضي حياته في سعاده وترفيه؟
و يا هل ترى المهزوم له شوط إضافي= ؟ أكيد : لا ، ما فيه عاقل يقول : ايه
وارجع واكرر في نهاية مطافي = للي سألني : يوم اقول الشعر ليه؟
لا تسألوني ليش اقول القوافي = هذا السؤال اللي ما احبه ولا ابيه
سالم منصور السواط=
::::::::::::=
سمعت لي شعراً=
سمعت لي شعراً مكلـــف وضافي= استيسرتني وادهشتنـــــي قوافيه
من شاعراً صاغه بشكل احترافي= يعجب جماهيره ويطرب محبيـــــه
اتقول مرشـــــــد مسنداً للنصافي= آليا قصــــــــــد في ليلةً من لياليه
قــــــــــــاله بجواً شاعرياً وصافي=جواً علـــــــى بدع الطواريق يغريه
اختار من بنــــــك البيوت اللطافي= ابيات شعراً من سمعهـــــا تسليه
وصّف لنــا الموضوع وصفاً خرافي=في ذمتــــي مافيه وصفاً يضاهيه
يغرف من امحيط القصيد اغترافي=يومن كلاً ما قرب من شواطيه
لاجيت اجاري مفرداته بقــــــــافي= اشعر برهبة كلما جيت اجاريه
وانكان ماجاء الرد كافي وشــــافي=ما ودك الشاعر على الناس يلقيه
وأقول ياراعي البيوت الظـــــرافي= لعل ما تفقد وليفك وتبكيه
والحب اذا جاوز حديث الاشافي=اصبح كلاماً معظم الناس تحكيه
واللي له المحبوب كــــــاره وجافي= يصبر على جفوة وليفه وغاليه
وان شاف ضوء الحب خافت وطافي=يشعل شموعه في نهاره واماسيه
قدام خفّاقه يجيه ارتـــــجــــــافي=من هجر محبوباً فواده مهاويه
والصب لو يمشي على الشوك حافي=من شان مضنونه تحمّل مواطيه
والود من جانب فقط غير كــــــافي=ونهايته توصل لدوامة التيه
مثل الكتاب اللي بليا غـــــــــــلافي=تقرا بمتنه ما يعارض حواشيه
واللي بدا بالسعي قبل الطــــوافي=يصبر على تانيب شيخه ومفتيه
وآخر كلامي يالشجيع السنافي= اسلم ودمت ولك من الورد بوكيه
جندب المالكي=
::::::::::::=
جو القوافي=
جو القوافي صار صافي ودافي=تعالت أنغام الفرح في مغانيه
اقبل يزغرد في ثياب الزفافي=وبدون ما اشعر قلت: ياهيه، ياهيه!
رجعت له مشتاق بعد انصرافي=استدرك الموضوع واضيف تنويه
للشاعر اللي لا انطلق ما يخافي=يطير، واسراب القوافي تباريه
وان قال : صفي لي، تصف اصطفافي=وتقول دون شروط : لبيه، لبيه
وليا حضر في المهرجان الثقافي=قامت جماهير المحافل تحييه
شعره يذكرني بعصر الرصافي=يوم الأدب يرفل بكامل تعافيه
جزل المعاني يكتشفها اكتشافي=ويلعب عليها باستثاره، وتمويه
كنه مهاجم في بطولة (فيافي)=يقودها نجم (البرازيل) (بيليه)
في السوق سهمه مثل سهم المصافي=يوم المؤشر كان واصل لعاليه
والحب فيروس القلوب الرهافي =والفطن يا جندب هو اللي يخبيه
وترى انكشافه ماهو اي انكشافي=والصب لو يخفيه ما عاد يمديه
تصبح علومه بين مثبت ونافي=و سهوم خلق الله تصيبه وتخطيه
في كل مجموعه مراسل صحافي=اما يجيب العلم ولا يوديه
ونهر المحبه يعتريه الجفافي=ترحل عصافيره وتجدب نواحيه
وتبدا كوابيس السنين العجافي=ترقص على جرح المولع و تدميه
يسهر وغيره تالي الليل غافي=ويحس بالغربه وهو بين أهاليه
ماله على صكات بقعا مكافي=كلاً مثل ما قيل : مافيه كافيه
الرابح اللي مهتني ومتعافي=تجنب أسباب الغرام و دواعيه
وخصص لنفسه وقت للاعتكافي=قبل الفجر ساجد لربه يناجيه
تم الكلام، و في ختامه تضافي=من كاتبه عذب التحيه لقاريه
سالم منصور السواط=
:::::::::::::=
يعــــــمير=
يعمير كيـف البــن ماهو بكافي=بن اليمن ماهوب نسكاف كافيه
قم قهوني وان جاء من الـــقوم لافي= دير الدلال وكل مطنوخ قهويه
وزيد القبس بين الثـــلاث الاثافي= والنجر دقه لــين الاحرار توحيه
منزلك لهل الطيب ريف ومضافي=والـناس دايم تــــتجه له وتـلفيه
لا تذبح الا من سمــان الخرافي= والــغالي افلـح من يبعه ويشريه
واكثر من الترحيب وادن الصحافي=واكرم ضيـوف آبوك واكرم عوانيه
وآليا ارتشفت امن الدلال ارتشافي= ودي علــــيك اردد القاف وامليه
رداً علــى ابياتاً عذاب ونضافي= من شاعراً شعره عن الناس مخفيه
مخفــي قصــيداً راقياً ما يعافي= اتقول بسـتاناً تدنت نواميه
فيه السفرجــل والعنب والجوافي = والــخوخ والرمان داير حواليه
والتوت مزروعاً بكـل الحوافي = يبغى الذي يقطف ثماره ويجنيه
لا خذت حوله جولةً والتــــفافي = ابهرني المنظر واطلت النظر فيه
شعراً تفوه به زعــيم القــــوافي= الشاعر اللي مالك الملك معطيه
مايبدع الا المحكمات الحصافي = وامتاز بسـلوبه وقـوة تحديه
وفي الهوى ماهوب مسرف اسرافي= والسر والكتـــــــمان عادة معاليه
حافظ وداده عن حكي كل هافي= ومحـــال يتفوه بـــسره ويفشيه
من شان لا تذهب جـــهوده جزافي= ثم يشمت الـعاذل ويفرح معاديه
ذكرني ابوقتاً مضالي وطافي =وقتاً تذوقنا مــراره وحـاليه
ايام كنت آقف واطيـــل الوقافي= راس العســـيراللي تعاوى ضواريه
اشكي غرام اموردات الــشفافي=المـــكثرات امن العتب والمــشاريه
احداهن اتلـفني هواها تــلافي = مزيونةً سلم الــهوى ما تدانيه
بنت المعاثير الغلاظ الجــلافي= اللي لعـــطران الشـــوارب مكاريه
لو هو حلال النهب والاختطافي =خطفـــتها واللــيل خاويت عاويه
قد في محبتها انجرفت انجرافي=حـــتى دنا موتي وبانــت مواريه
مرات قـــدامي ومرة خلافي =وبكل ســـكة تعــترضني دواهيه
وياما انذرف دمــعي عليها انذرافي= وابــكي ســواة اغليماً فاقد ابيه
عبر السنين الثايرات الصلافي =اللي تـــهد الـجدّر واحــيان تبنيه
تعصف عواصفها وتسفي السوافي= وفي البـــــحر قامت تزمجر عواتيه
ومن المواليف افتــــقدت المـــرافي= واللي هوته الـــنفس بين تجافيه
واللي يعــــاني من جراح التجافي= بيموت والجــــرح الذي فيه يشكيه
ماينوجد طبه بكل المــــشافي = (وبشمس) لو يبـــحث عنـه ما يلاقيه
عينه ترا وتشوف مـــالا يشافي= من فورة اعصـــابه وكثرة طواريه
ماينطفــي جمـره بماي المـــــطافي= وحتى المحيط الاطلسلي مايطفيه
والمهتوي تصبح عضــــامه نحافي=ويعاف كل اللـــي يريده ويبغيه
يلقى بدربه لفــةً وانــــعطافي=وتزيد روحــاته وتـكثر مساريه
عبر الدروب الضيقات القصــافي = اللي بها الرجـــال يلقى بلاويه
لوهو يكب الـــغي والاقترافي =نال الــذي يسعد فواده ويرضيه
هو ماعليه الا يقــــول الكفافي =والله هو اللي وقتها سوف يهديه
الوقت يمضي والليـــالي مقافي=والعــــمر يربح من تدارك تواليه
وازكى تحيــات القــلوب الولافي=تاصل لسالم في محله واراضيه
جندب المالكي=

(((لا ثقل حملي )))=
قال من سند وعدا على الحيد الطويل=الذي متراخي العزم يعجز يوصله
يعوي السرحان في قمته صبحاً وليل=ويتعالى للحيايا فحيح وصلصلة
ودي اقصد واتمثل على الوزن الثقيل=ندراً تحمل وتحوي معانيٍ موغلة
اتخير ما يناسب من بحور الخليل=وانتقي من بنك الابداع دره واجزله
جارياً يجري سواة المعين السلسبيل=اغترف لي غرفةً وارتشف من منهله
وابتكر من در الافكار منطوقاً جزيل=وادفن المعنى ومعناي اعسره وافتله
واتجنب كل قولاً ومنطوقاً هزيل=والهجوس لكل قولاً بديع موهلة
شاعرية شاعراً لا قصد يصهل صهيل= هندس الكلمة وجاب الجزال المذهلة
مفرداتٍ مثل ذوب العسل يوماً يسيل=عند نحالاً يباري خلايا منحله
فاعلاً فعلاً فعولاً مفاعلةً فعيل=فيعلاً مفعول تفعيلةً مستفعلة
لاعسى حظي يقف بي على باب البخيل=الذي بوجيه الاضياف بوبه مقفلة
جعل ما يصبح لمدعوجة الناظر حليل=جعل ما تبقى ولا ليلة في منزله
ياعسى تلقى من اهل الندا غيره بديل=الذي وقت الله الله يقولون ازهله
ماجداً في كل ميقاف له فعلاً جميل=يعجبك وقت الشدايد وعند المعظلة
لا ذكر للناس قالوا عنه نشمي واصيل=ذايعاً صيته وكل العرب ما تجهله
كل مستعصي وعند الاوادم مستحيل=لا نظر له قال يا مهونه يا مسهله
مثل هذا الشخص في عصرنا الحالي قليل=يشبه الكبريت الاحمر صعيب تحصله
مثل ابومنصور مشكاية الشهم النبيل=الذي دايم توشر عليه البوصلة
حاتمياً له على قمة العليا مقيل=متخذ له فوق رجم المراجل منزلة
ذالك الدكتور سالم معدل كل ميل=الذي في نهر الامداح راسٍ محمله
الكريم اللي لحماية الجالي سليل=كل جهداً في دروب المكارم يبذله
زي ابو منصور والله ما يوجد مثيل=وادري إن القول والهرج هذا يزعله
لا ثقل حملي لقيته معي واقف يشيل=ويتحمل حمل ما واحداً يتحمله
لم تلده أمي ولكنه اصدق من خليل=بل هو الاخ الذي ما به احدن يعدله
اسأل الله الذي هو على خلقه وكيل=يجزيه عنا الجزاء الذي يتأمله
والدعاء لصبح بتعظيم يقفاه تهليل=تفتح ابواب السماء له وربي يقبله
واخر اقوالي وبعبارةً تشفي الغليل = زبدة المنطوق باقول كلمة مجملة
جعل ما اتعزوى ولا انخى نذل ولا ذليل=خايباً ودك برجلك تقوم وتركله
ماذكر بالطيب لا من رفيق ولا زميل=وبيطول الوقت ما جاء بعلم يجمله
والردي لو يملك بقيق وحقول الجبيل=ماعطا محتاج ولا تكفل برملة
لو توفى ما بتسمع على فقده عويل=لا من اقرابه ولا اضن حتى من هله
واتنشد عن سلفنا وهذاك الرعيل=إين هي تلك النماذج وتلك الامثلة
ذلك الجيل الذي يختلف عن كل جيل=عبر الايام الخوالي وتلك المرحلة
جندب المالكي=

((((يالله يامولاي ))))=
قال من صاغ التماثيل وتفنن واجاد =والجميع اثنوا على كل شعراً يبدعه
يالله يامولاي ياللي عليك الاعتماد=رب ياسامع دعاء الادمي وتضرعه
يالذي نزلت الاعراف والتوبة وصاد=ياملاذ العبد ياملتجاه ومفزعه
يالذي جودك لياجدت ما له من نفاد=ياللي ارزاقك على العالمين موزعة
سايلك ياخالقي ياكريم وياجواد=فرج الكربة وحقق لعبدك مطمعه
انت يامولاي بيديك تحقيق المراد=لا كتبت الرزق للعبد محدن يقطعه
وانت مدرار العطايا ومن جودك يجاد=ربي اجعل لي من الرزق بسط وتوسعة
واغنني يامالك الملك عن زيد وزياد=واستجيب لدعوة اللي قنوته تسمعه
كلما يممت جالاً بدا فيه أنسداد =والصدوف ابكل سكة لنا متموضعة
إن هقيت أهقا برجلاً عليه الاستناد=الذي نفسه بفعل الجمايل مولعة
بالمراجل والجمايل وفعل الطيب ساد=حاتمياً منبع اهل المكارم منبعه
إن عطاني مطلبي قلت ياطير الهداد=يالقطامي الذي وقت ينزع برقعه
والنعم والسبعة انعام وبطيبه يشاد=الذي باب الشكالات فاتح مصرعه
وإن تعذرني عذرته من اعماق الفواد=لن معذار ابيض الوجه ما يتصنعه
والردي ماني بهاقي منه علماً وكاد=مستحيل اهقا بذاك البخيل الامعة
لو بخيل الكف يملك بنوك الاقتصاد=مابذل كفه ولا اعطت يمينه منفعة
ذاك بنبيعه لياقام واكتظ المزاد=بيعةً لا هي مقالة ولا مسترجعة
والذي ماهو لتاريخ والده امتداد=مانقول الا عسى الله تعالى يقلعه
طالما إنه عن مماشيه متجنب وغاد=ودك إن الموت ياتي عليه ويشلعه
ماله الا الزجر مني وكل الانتقاد=لو تشنج من كلامي وطرطع طرطعة
واللهايب قالوا الناس تاليها الرماد=حكمةً كلاً يبصم عليها بصبعه
وين من وقت القسا والوزا طعام زاد=اطعم الجايع من الناس والسبع أشبعه
له مقراً وافدينه كما اعداد الجراد=يقصدونه من جميع الجهات الاربعة
والذي يشكي من الغبن ومن الاضطهاد=الذي من زايد الغبن تنساب ادمعه
يزبنه ويشوف وشلون اذا ركب الجياد=لمتطى سيفه وجهز رماحه وادرعه
ينصفه وقت الله الله ويمهد له مهاد=لين يامن في نهاره وليله يهجعه
ون بدا طرح القضايا فلا عنده حياد= لو كثير الناس تغضب وتتعارض معه
ون تفرس في محيميد وحمود وحماد=حينها تكشف وتسقط جميع الاقنعة
والذكي مهما تذاكى ولو حاول واراد=النصيحة لا يحاول يفكر يخدعه
يصعد النايف مجنب منازيل الوهاد= مطلعاً محدن من الناس يقدر يطلعه
وإن دعي للحرب وقت التحدي والعناد=ولم البندق وزهب ذخيرة مدفعه
يدحم القوم الاشداء ويحصدهم حصاد=لين تتفرقع صفوف الاعادي فرقعة
ون بدا منهم معاند معه للصاد ضاد=لو تصل حربه معاهم لمية موقعة
ون دعو للسلم ذو حلم وايضاً ذو رشاد=لا بغى راعي الفتن كل زيراً ينقعه
سيرته تذكر ويرووونها في كل ناد= واغلب العالم على حب شخصه مجمعة
واخر القاف المطوّل والابيات الجداد=ياعسى تصبح لكل الذوايق ممتعة
ودي ارمي يوم رمي العرب ماهو ركاد= رميةً تودع صلاب الحصى متصدعة
المطالب دون تحقيقها خرط القتاد = عند من عزمه عن الفعل الامثل يمنعه
ومن تهنى في قصيّر تلعوز في جماد=والمقيم اليوم بكرة يغادر موقعه
والظُلم ما كل ساري تلكدها استفاد=والبحر ما كل سبّاح يقدر يشرعه
والجراح الغايرة ما يضمدها ضماد =والمسكن ما يداوي الجراح الموجعة
قالها اللي ياتي الصبح ماذاق الرقاد=الخطوب المدلهمات أقضت مضجعه
الذي صارت حياته سواداً في سواد=ضدته شهب الحوادث وقامت تقمعه
دارساً علم الرواية واصول الاعتقاد=واعتنى بالفقه حتى وعى مستقنعه
والتراجم والسير والملاحم والجهاد =والتفاسير الذي وزعتها المطبعة
ثم صل الله على خير مبعوثاً وهاد =الذي كانت حليمة له اعظم مرضعة
جندب المالكي=

بيوتاً على المشراف=
يقول البشيري يوم عدّا على المطلاع=وصاغ البيوت اللي من الراس بادعها
انا ودّي أسند على مصدر الابداع =بيوتاً على المشراف غنيت مطلعها
بيوتاً جديدة حبكها يطرب الاسماع=وتعجب بها طوال اللحى يوم تسمعها
تمنيت يعرضها التلفزون والمذياع=ودور الصحافة تعتمدها مطابعها
على شان يكشف كل تحليل واستطلاع =مدى فاعلية نخبة الذايقة معها
بيوتاً مسندها على سيد الامتاع =فصيح الفرايد والشوارد ومصنعها
أخي حظرة الدكتور سالم طويل الباع=محيط الندا بنك الجزالة ومرجعها
كريماً حكيماً صيرمياً طويل ذراع=من اشراف قوماً منبع الطيب منبعها
عليه اثنوا اهل الساس والباس بالاجماع=وصاحب يميناً مقدر احصي صنايعها
كبير العطايا لا مقتر ولا مّناع=ولا قام يكنز في الدراهم ويجمعها
ليا شانت الاحوال وتردت الاوضاع=يحل الامور اللي تروّع وقايعها
يجهز لها حلاً وبالغصب له تنصاع=وبالراي والحكمة يقوم ويسنعها
من اللابة اللي في الميادين ما ترتاع=ومنها الاعادي كاثراتٍ مصارعها
واصاحيب صيتاً بين كل القبايل شاع=وأهل مكرماتٍ سامياتٍ دوافعها
شغاميم قوماً دورهم للخوي مرباع=زحول الرجال اللي عظيماً تواضعها
وياخوي ابومنصور قلي وش الاسناع=في احداث دنياً شيبتنا فواجعها
عواثيرها في كل الاقطار والاصقاع =تتالت على العالم وأقضت مضاجعها
سنيناً بيدها الرمح والسوط والمركاع=ونار الكوارث كل يوماً تولعها
تناوشك بالبندق وتقشعك بالمقلاع=وترميك بكلاش والمصايب ومدفعها
وفيروس كورونا تخطى مدن وبقاع =بطش بالخليقة كلبوها وروعها
تفشى في العالم ومحدث هلع وصداع =وشوف المدن وشلون خليت شوارعها
ولا عاد به شاري ولاعاد به بياع =وبعض المتاجر خالية من بضايعها
وكلاً لزم بيته وخايف من المطلاع =يخاف الاصابة يوم كلاً توقعها
ضحاياه بالالاف واللي نشر وانذاع=يثير المخاوف وارعب الناس وافزعها
وحتى المساجد لا مصلي ولا من داع=سجاجيدها تبكي على فقد ركعها
والاسواق والبورصة وصل وضعها للقاع=وبعض الدول قامت تقفل مصانعها
وحتى المصارف والبنوك الغت الايداع=من المحتمل تسحب وتنهب ودايعها
وكل المطارات اوقفت رحلة الاقلاع=تعين مطارات المدن كيف شلوعها
وكل المصالح والمرافق وكل قطاع=جعلها توقف وانذرت من يراجعها
ولا عاد به جبهة ولا معركة ونزاع=جميع الخصوم اليـوم وقف تنازعها
وحتى التي ترضع تحاشا من الارضاع=ولا يستطيع أحدن يوصف توجعها
نتيجة لفيروساً تخطى قرى وقلاع =ولا زال وجموع المخاليق فرقعها
أضنه مصنّع في غرف معمل الاشعاع=تجارب خباثاً منزع الخبث منزعها
فلا غير قول الحسبنة بعد الاسترجاع=عسى الله هذا الغمة عن الخلق يرفعها
وياخوي ابومنصور عاين هل الاطماع =هوامير مالاً تخدع الناس بخدعها
تحايل ولا تابت من اسلوبها الخدّاع =ولا يستطيع احدن من الناس يردعها
يبيعون من كل الاصانيف والانواع =بساليب خبثاً يقترفها موزعها
واحب المعاني حيل واستمتع استمتاع=ولا احب تحريف الجمّل عن مواضعها
لكّن الرموز في المعاني لها وضاع=يضعها حكيماً مفرداته يطوعها
ورش المطر لو ما وصل نبتةً الزرّاع=تموت ثمرتها لو سقاها مزارعها
وتلك القطيفة لو يودونها الرقّاع=فلا يستطيع بخيط الابرة يرقعها
واذا سال منتوج العسل وانسكب وانماع=خلايا النحل لازم تلوسع لواسعها
حقيقة ولا ادري وش ورى رمعة الرماع=وبعض المسايل يعجز الشخص يرمعها
اشاهد نفوساً مسرعة للنكوص اسراع=تحالف مع الباغي وطبّع مطبعها
مشاهد دراما جيروها بكل إقناع =تناقل منصات التواصل مقاطعها
بساليب مكراً واكبت نغمة الايقاع=تبي تغوي العالم وتفسد شرايعها
حواديث وقتاً حيّرّت كل عقلاً واع=تشيب صغاراً تو ترضع مراضعها
وما يعتلج في داخل الصدر والاضلاع=محدد تلسكوب الفراسة تموضعها
وياخوي ابومنصور سويت لي مقراع=فرايد بيوتاً قمت أغني واروجعها
على النايف اللي قمته هبها الذعذاع =عسيراً هضابه متعباتٍ مطالعها
لحيث إن قلبي من لهود المفارق ماع=من الترفة اللي قد ذبحني تدلعها
ليا سولفت لي عالجت قلبي الملتاع=وتشفى جروحاً لا يع الهجر لا يعها
مليحة وصايف حلوة السمت والاطباع=يشعشع بهاها من تحت خام برقعها
تغلغل غلاها داخل الخافق المولاع=ومبطي على عرش الجوانح تربعها
سراب المخاوف دونها صايراً لماع=كتايب جيوشاً مستفزاً صميدعها
ولا للمعارك غير منهو جري وشجاع=ليا واجه الاخصام فرّق تجمعها
بياديه بتاراً لروس العدا قطّاع =يشلوع بها عضود المعادين واضلعها
وتلقى الضواري من لحوم الخصوم شبّاع=وتشبع طيوراً مازع الجوع مازعها
لكنّا بوقتاً طوّع أهل السطّر تطواع=ولا زال عكفان الشواريب يقمعها
سلبها العزيمة وأخضع أهل العزوم اخضاع=وسالت دماياً يلعق الطير ناقعها
جحافل رجالاً مستعدة وجيش دفاع=وقلعة حماية مستحيلاً تصدعها
وريح النفل والورد والشيح والنعناع = نهاية محاريف القصيدة ومطلعها
صلاةً على المعصوم والصحب والاتباع = عداد أمةً قامت تسبح بصابعها
جندب المالكي=