قصيدة عطيه بن حمدان العامري - بعض المشاعر
 

قلت :


بعض المشاعر خلّها في مَهَدْهَا ..
لا تَكْبَر ، وتكبر هقاويك ، وتموت ..


ليت الأماني ما وفت في وعدها ..
ما كان يعلى فوق صوتي ولا صوت ..


جرّبتها وانكرت شيٍ بَعَدهـا ..
تجريب رجلٍ للمهمات منعوت ..


كفّت عن اللي يسعد البال ، يدها ..
والحبل للي يتعس البال ، مفلوت ..


والصاحب اللي كل كلمة جردها ..
سِمٍ على جرح المشاريه منكوت ..


ان جاته علوم المراجل نقدها ..
وان غبت يلقى في عذاريبنا قوت ..


ألقى العوض عن شامها في نِجَدها
في ديرةٍ يسعد بها كل مكبوت ..


ما تصخي شيوخ العوامر ولَدها ..
اللي يجيب العلم ما فاته الفوت ..


ليتي مع التهمان وانزل بلدها ..
ولا حجازي بين خثعم وباشوت ..


يا ملّ عينٍ مبتليهـا سهـدهـا ..
من واقع الأمة تِقِل شافت الموت ..


فـ الشام مسلم ، ليلته ما رقدها ..
كل امنياته خبز بايت ، و مازوت ..


جالوت جرّد أمتي من سعدها ..
والنادر اللي يفعل افعال طالوت ..


تحلم ، مع الإسلام تلقىٰ رغدها ..
معقول صارت جنة احلامها خبوت ؟؟


شفت الجراح اللي تزايد عددها ؟
ينزف لها قلبي مواويل وبيوت ..


من يمشي دروب المراجل حمدها ..
حتى يواري زوله - ان مات - تابوت ..


والا الردي لا من بغاها .. فقدها ..
يِنزِله في قاع النقايص براشوت ..


وسلامتكم ،


عطيه بن حمدان العامري


السبت 17 / 03 / 1435 هـ

رد: قصيدة عطيه بن حمدان العامري - بعض المشاعر
 

قصيدة رائعة صح الله لسان قايلها

رد: قصيدة عطيه بن حمدان العامري - بعض المشاعر
 

رد: قصيدة عطيه بن حمدان العامري - بعض المشاعر
 

قصيدة رائعه
شكرا ابوراكان على الطرح

رد: قصيدة عطيه بن حمدان العامري - بعض المشاعر