منتديات قبائل شمران الرسمية - مزاحم الطيب على الطيب مطلوب

- المنقولات الأدبية (http://vb.shmran.net/forumdisplay.php?f=153)

- - مزاحم الطيب على الطيب مطلوب (http://vb.shmran.net/showthread.php?t=72564)

مزاحم الطيب على الطيب مطلوب

مزاحم الطيب على الطيب مطلوب
لكن في غير الطيب ما هوب طايب

لو طاب لك بعضه وفتحت لك دروب
بكره تجي في النار وانت السبايب

ما قدمت يمناك محصى ومكتوب
وقوم هبهب في مهب الهبايب

لا دين ولا مذهب ولا وزن محسوب
ليا حضر يحسب مع الناس غايب

لا تتبعه لو جاك بخلاق وسلوب
يزين لك الشر لو كان عايب

تجنبه خله ترى منت مغصوب
يا عل راسه تحت عوج النصايب

مجالسة عفنة ولا هوب مرغوب
اوقاته او حسناته راحت نهايب

يظن نفسه غالب لو كان مغلوب
مشاكله ما تنتهي والنشايب

يفز من نومه من الليل مرعوب
يظن جاه القوم فوق النجايب

لو تجلبه في السوق ما هوب مجلوب
جنب عنه خله مع كل خايب

وإن كان لك حقٍ مع الناس مسلوب
طالب بحقك حتى لو بالطلايب

محدن يلومك لا ولا يوم لو نوب
الحق حق وحنا مع كل صايب

دام الخطاء تشوف في صوب وفي صوب
يفرق ليا من صار صوب الحبايب

وليا نزل في منزله غير محبوب
تشوف من ردات فعله عجايب

عين الغضب تبدي لنا كل عذروب
لو كان راعيها عن الشين تايب

وعين الرضا ما شافت الشين وعيوب
لو عابها الجمهور ما هوب عايب

لو الخطا من فوق راسه ومكتوب
ما هو يشوفه في شبابه وشايب

العين عميا ما تشوفه ولا نوب
لو هو جبل يصبح على الصخر ذايب

وليا شطبته بالقلم صار مشطوب
مصايبه ما هيب تحسب مصايب

بنات فكره عارية لو لبس ثوب
لو سرها بالعفرته والغصايب

الفكر لا من صار في الراس معطوب
ما ينفعه لو يعصبه بالعصايب

يكيل بمكيالين والراس معصوب
في اللي يوده ما يشوف المعايب

ون شافها يشوفها صغير يادوب
يشوفها لو شافها في الحبايب

العدل بين اثنين في الحكم مطلوب
واجب ولو هو بين خصم وقرايب

يجرها من جمة البير بإسلوب
والفتنة اللي بينهم للذهايب

والطيب اللي يترك الذنب ويتوب
يكف عن زلاتها والمصايب

يكبح جماح النفس وابليس منكوب
يندم ليا من صرت للشر سايب

والخير ما يومٍ من العمر محجوب
الباب مفتوحٍ ليا جيت تايب

واصبر كما يصبر على الشدة ايوب
الصبر زينٍ لادهتك النوايب

يوسف بعد ما غاب عن عين يعقوب
جو له اخوانه راكبين الركايب

جو له ودمع العين ع الخد مسكوب
يصب وبله مثل وبل السحايب

من بعد ما نزلت به كروب وكروب
جاه الفرح وانساه كل النوايب

الوقت مهما جار وإنتابه خطوب
جتها هبوب وطيرتها الهبايب

الحزن كف النور عن عين يعقوب
يومه تجلى صار من بعد طايب

جاه البشير وقبل ما ياصل الثوب
يعقوب حس بريحته في الهبايب

لفح السموم إن حط في وجهك ندوب
بكره تسلب كلبوها سلايب

العسر بعده يسر ثم يسر مكتوب
ويحلها حلال عسر الصعايب

ياللي لنا في ساعة الضيق وكروب
يفكنا من حاميات اللهايب

اغفر لنا يارب سيات وذنوب
ياغافر الزلات جزل الوهايب

وختامها صلوا على خير محبوب
اللي بنور العلم والخير جايب

محمد عيد العتيبي