منتديات قبائل شمران الرسمية - يالله ياللي تسجد الخلق لرضاه

- المنقولات الأدبية (http://vb.shmran.net/forumdisplay.php?f=153)

- - يالله ياللي تسجد الخلق لرضاه (http://vb.shmran.net/showthread.php?t=72780)

يالله ياللي تسجد الخلق لرضاه

يالله ياللي تسجد الخلق لرضاه
ياوامر (ن) خلقه على حج بيته

تفرج لمن سده على الناس ماابداه
راضي على مقسومك اللي عطيته

من شي يسل الحال والجسم يبراه
والناس ما يشفونه أن ماشفيته

قلت آه واجرحاه من علتى آه
وان حملوني حمل غي (ن ) قويته

قالوا سفه بالحال ويش اللي اغواه
قلت آه ويش المنكر اللي وطيته

قالوا جهلت وبان علمك ولمناه
قلت آه علمي ياملا ماكميته

قالوا طلبنا لك من الله معافاه
قلت آه وحدته وعفوه رجيته

قالوا هله واحباب عينه نصحناه
قلت آه هذا وارد (ن) مابغيته

قالوا ندور لك من البيض حلياه
قلت أه لو غيره بكفى رميته

قالوا نشاش العود مالك بلاماه
قلت آه عود الموز بيدي لويته

قالوا تزوج كود تدله وتنساه
قلت آه لو خذت اربع (ن) مانسيته

قالوا من اقصى الناس وين انت وياه
قلت آه ماأنسى يوم جاني وجيته

قالوا نشوفه عند هذا وهذاه
قلت آه عمره ماعقب حجر بيته

قالوا عليل وناقل داه برداه
قلت آه باقرابي وروحي فديته

قالوا نشير ولا نفع ماحكيناه
قلت آه هراج النمايم عصيته

قالوا كثر شيبك وقلبك بعمياه
قلت آه لو قلبي غرير نهيته

مطاوع (ن) قلبي بعجفاه وقداه
والي عطى منهاج درب عطيته

ياناس خلوا كل وادي ومجراه
قلتوا كثير وقولكم مالقيته

الشاعر : عبدالله بن سبيل