الليالي شقى


فراج الكرشمي



البنادم غريب أطوار لو له جناح
يمكن إنه يدير الكون وإلا يزيد
كل ما أمسى نظم دنياه نظم السباح
وانفلت خيطها وأصبح ما هو مستفيد
لو عطى العقل وقت اللي على الجمر فاح
أدرك إن المدبِّر يفعل اللي يريد
الليالي شقى والعمر كله كفاح
والأماني سرابٍ يطّرد ما يفيد
عانق الغيم من عانق طيور الفلاح
ووالف العش من غنّى بخضر الجريد
يا كبار البخوت المعذرة والسماح
يا هل الرمح منصا المدح بيت القصيد
رحت في لازمي يا عيال عمي مراح
من تثاقل خطاه تقول فالرجل قيد
في ديارٍ هناك الظهر، فيها الصباح
سبعة أشهر سحاب وخمسة أشهر جليد
كلما شفت وبل الغيث سمَّى وطاح
قلت ليته عن أوروبا وأهلها بعيد
تأخذه شرق وتسوقه هبوب الرياح
لين يضفي على العارض وذاك الصعيد
والله إني هناك وخاطري ما استراح
كل شيء معي لكن كني وحيد
رحت من دون قلب القلب معكم مباح
كل يوم اتصل وأقول ويش الجديد
ألبس الصبر لبس الأوسمة والوشاح
واحتزم وابتسم وعظام صدري حديد
نعمة الصبر للإنسان مثل السلاح
يخَسَرها الشقي ويفوز فيها السعيد