منتديات قبائل شمران الرسمية - سلام الله على ظلم الفـراق وقسّـوة الايام

سلام الله على ظلم الفـراق وقسّـوة الايام
عسى ربي يسهلّ لك طريقك وتحيـا وتدوم

رح ووجهك بياضه من بياض الصبح ماينـلام
وانا من مدّة ايدين البخت يرضينـي المقسـوم

وش بيدّي وقف حظ الفقيـر وماتـت الأحـلام
إذا حبّك من أوّل يوم وفراقك مـن أوّل بوم

رقبتي قفلتين وسيف هجرانك مسيـرة عام
جلدني وأنكرتي ملحة العشـره وربعـي قوم

يهونها لو أن الحـظ يسّلـك مسّلـك الأقـدام
ماكان أوصل حدود الأرض وأعوّد وأنا محـروم

تصافق لك معاليق الضماير يا بعـد مـن قـام
وخلاني خصيم لوسعة الصدر ولذيـذ النوم

أداري عبرةٍ ضامت عيوني والعيـون تضام
وأكبّر هقوتي لا كبرت الشرهـه وكبـر اللـوم

ياويلي من مناديب الضنون وطرقـة الأوهـام
تساويني معك في خانة المحمـود والمذمـوم

تشوف أنّك على حد اليمن وتشوفني في الشام
وأشوف أنّا على وجه الحياه أثنين توم وتـوم

تذكّر وأنت عنّي بعـد الأبـوّه عـن الأيتـام
رهين الغربه اللي من ديـاره ماتجيـه علـوم

بعد مادار عام من المفارق يـا غـرام العـام
وروحي مابقى الا زفرتيـن وتبلـغ الحلقـوم

لا ترخص قيمتي لامن تذكرتـك وأنـا قـدام
وجيهن تذكر الظالم ولا تـدري عـن المظلـوم

مابعتك بالسحايب والبروق السمـر والأنسـام
وساموني بتلويحة وداع وبعـت بـأوّل سـوم

سئمت العيش (نون وصاد) واللذات (سين ولام)
بنـادم والبنـادم حيلتـه ماتوجـد المـعـدوم

مادام الصحف جفت وأنت رحت ورفعت الأقلام
على حبٍ من أوّل يوم وفراقٍ مـن أوّل يـوم

مدغم ابو شيبه