كيف أمسي الليل وعيونك معازيبي
 

كيف أمسي الليل وعيونك معازيبي
والليل منثور بين الجيد والغرّه

يمسكني الحسن هذا من تلابيبي
ياغرّةٍ من شعاع الشمس مسمرّه

خلك معي ياسبب وجدي وتغريبي
الشوق قتّال وأيام الهجر مُره

جيتك مُبعثر وأبيك تعيد ترتيبي
ودي أحس بدفى ضمتْك لو مرّه

مشكلتك تحبني وتحب تعذيبي
في كل قَفْر بحنايا الصدر لك جرّه

لو ماشعر قلبك بلهفة مكاتيبي
ليه أشقي القلب في نجواك وأضرّه

في روحي أمطرت ياقبلة تراحيبي
كل الغصون اليباس اليوم مخضرّه

موتّني هْيام خلّ الناس تدري بي
وأحذر تغيب وتموتّني من الحره

أدوّر رضاك وتدوّر عذاريبي
قلبٍ تمناك دوّر فرحه تْسرّه

يحق لك عند خلق الله تماري بي
قصايدي فيك مثل البدر مغترّه

أعتضت بالديم عن لذّة مشاريبي
والنفس في ماتودّ وتشتهي حُره

اللي يحسب أن دموع العاطفه عيبي
ماسهرّه شوق والحرمان ما مَرّه

مابيك تهذيبي الليل وتهذري بي
أبيك طاري الزعل تنساه بالمره

....