ياحبيبي من عيونك ضرب قلبي عيار
 

ياحبيبي من عيونك ضرب قلبي عيار
ضربـةٍ مسمومةٍ قاضيه ومدمّره

والسبايب منك قررت واصدرت القرار
قدم المعذار واللي دمرته عمّره

ياعيون اللي اليا ضف جنحانه وطار
الدرابيل الجديده تعجز تذمّره

ولايطير الا ليا شافله شوفٍ قرار
ومخلبه في صدر برقا الجناح يسمّره

والشفايا جمرتينٍ تواشا وسط نار
توّها من قوّ صلو اللهيب مجمّره

أنت كلّك نار تجمع بياضٍ مع حمار
تقل شمسٍ دوبها للغروب محمّره

والنهود صغار والبطن ظامر تقل غار
والردايف بالقماش الجديد مشمّره

والشعر يلمع على الضي من قوّ الشقار
بشت أميرٍ توّ أمير الرياض مومّره

لانسفته ذيل صفراً تحت طلاب ثار
توّ جت من فوق جرف المسيل مطمّره

كل يومٍ تقوبعه سطل من وزر البكار
وبالشمطري كل ليلة خميس تخمّره


عبدالله بن زويبن