منتديات قبائل شمران الرسمية - تناديني وانا اسمع لك ولكن للفراق عزوم

تناديني وانا اسمع لك ولكن للفراق عزوم
‏وصميم القلب من عزّم ترك حُبك وبدّاني

‏فمان الله يا اخر درب واول صدمة المقسوم
‏فمان الله يا اكثر من جرح قلبي وعنّاني

‏على خط الفراق الموعد الليله امر محسوم
‏توفى مابقى من حُبك الليله وخلّاني

‏اجامل لوعة الفرقا غصب عني وانا ملزوم
‏ومن بين الرضى والياس ادور ناتج احزاني

‏مثل ماقلت من حبك سحابة صيف صعب تدوم
‏تحقق ماتوقعته لذا .. صح الله لساني

‏ثقيله خطوة الفرقا اذا كان الامل معدوم
‏لكنّ العزه تخفف على نفسي وترعاني

‏كبير اطيح من عينك ولا اصغر في عيوني يوم
‏انا ماني على كيفك تدوّرني وتلقاني

‏عطيتك من رضى قلبي وصدّرته بدون رسوم
‏وقدّرتك على غيرك وعرفتك على احساني

‏هقيتك بالهوى ملفى هقيتك ضحكة المهموم
‏خساره خيبة الهاقي غرامك وين وداني

‏ادور بعدك المنفى واطيح بـ غيبتك واقوم
‏وادور راحتي دونك وابي منك تناساني

‏تبي تفقد تبي تنسى تبي تشتاق صح النوم
‏انا مثل العمر لا رحت مابعد العمر ثاني

؟؟؟