ليا متى ودموع عيني محابيس
 

ليا متى ودموع عيني محابيس
لابد من يوم تهامل دموعي

ما هي بدايم ريف يا حادي العيس
احسب حساب مفرقّات الجموعي

بيض الليالي مقتفيهن معابيس
وما راح لا ترجي وراه الرجوعي

حتيش لو كافحت بعض الهواجيس
يسري عليّ الليل مركاي كوعي

لقيت في بعض المخاوا نواميس
خوّه وتنهضني محازم ضلوعي

للنار زند وللمساري مقابيس
إرجال عرف وللمواقف فزوعي

مجالس تعطيك من غير تدريس
علم يسّند بك طوال الفروعي

لين الفروخ يخالطنَّ القرانيس
تاخد طبايعهن نهار الطلوعي

ولقيت في بعض المخاوا هداريس
حثال قوم ولا تعرف السنوعي

تشخص نواظرهم على ارخايه الكيس
مستسوره مثل النصور الوقوعي

فوق الرخامه ياكلون القراطيس
بهايم تاكل وترقد وتوعي

وقتٍ يضّد القرم ويقدّر الهيس
وان عوّدت كل بعقله قنوعي

أبرأ الى الله من علوم الدنافيس
ماني بمرخي للنمايم سموعي

اللحوسه سلم الوجيه المفاليس
ما هي بسلم لي ولاهي طبوعي

وان شفت ما يجلب عليّ الوساويس
سميت باسم الله وهدّيت روعي


مشعل عوض العتيبي