مسك البداية ومسك المنتصف والختام
 

مسك البداية ومسك المنتصف والختام
‏دونك بقايا شعوري بعد مات أكثره

‏لخاطر الشمس والغيمة وسرب الحمام
‏والليلة المعتمة والليلة المقمرة

‏شققت كل الرسايل لأجل أعيش بسلام
‏وكتبت لين أرتويت وجفّت المحبرة

‏وشدّيت سرج السهر وأرخيت حبل اللجام
‏ومديت شوفي وشفت الكون يا مصغره

‏كم لي وأنا في رجا صبحٍ يفج الظلام
‏ ألملم الدمع بعيون السهر وأنثره

‏قمرية البال رفّي جف غصن الكلام
‏تخيّري نبع ماينضب وظل شجرة

‏ياحضرة البيد وضلوعك جفاف وحطام
‏لو تعذر الغيم دمع الغيم وش يعذره

‏أنا أشبهك بالجفاف ويابسات الثمام
‏قد أمحل الوقت عمري وأستباح أخضره

‏يا كم ليالي علي مرّت مرور اللئام
‏ما لي على صدها حيلة ولا مقدرة

‏أجهل مصيري ولكني أظنه صِدام
‏وأعرف طريقي ولكني عجزت أعبره

‏أفلتّ حبل المساعي في خضم الزحام
‏لا العزم عزمي ولا احساسي مثل ما أخبره

؟؟؟