أسباب ما دار في بالي وهيض به
 

أسباب ما دار في بالي وهيض به
ناسا تولف علوم طوال وعراضي

مدري مرض في عقول الناس تمرض به
ولارجوله ولاهوب من الامراضي

ياللي لسانك على الغرات تركض به
تاخذ على غرت المقفين مركاضي

لسانك حصانك ارفقبه وريض به
جود لجامك وقصرها على الماضي

قدام تندم على قول تلفض به
كذبك على الناس مايقضيلك اغراضي

وراك في كل مجلاس تلامض به
تسلخ وتطبخ وللمقفين عضاضي

يقطع كما الحد فاقرابك وتلحض به
كذاب شذاب للعرقوب لحاضي

على المقفي تشيل اكبر من الهضبه
مليان قلبك صدى ومن الحياء فاضي

تبني من الكذب بلسانك وتنقضبه
بيت بلاساس تبنيه من الانقاضي

مدري زعل عن ضميرك تاتهيض به
اتقصر الوقت بهروجك فالاعراضي

خلك بدربك ودربي لا تعرض به
الناس وكبودها مليانة غاضي

وليا أمتلا وادي بالسيل فيضبه
سيله ليا سال فيض كل ملحاضي

أعطيك علم وكاد وعلمي أحمض به
قدم الضمايا ترد بكره على الحاضي

ان كان لك قلب حي الدم ينبض به
لاتاكل اعراض خلق الله باللا فاضي

ما عد بحد مراعي نفسك الحضبه
ولا حد مجاملك يا باشا ومتغاضي

اليا التفتنا نظرنا مانغمض به
واول ما نبغاه منك الحق والقاضي

الحق يقنع وغيره ما تفاوض به
من مصدر الحق يرضى كل مغتاضي

تقبل وسيمه وترضى ويش يفرض به
والكل منا يقوم وخاطره راضي

وليا قطع يدي لا زمعاء ولا عضبه
وليا قطع يدك كمل كل الافراضي

وان كان عدمت والمطلوب ترفض به
وعندك سواير عتيبه مالها حاضي

روح وميزانا ما ينقصه قضبه
ولا عاد نحسبك بعد اليوم في عاضي

معك ريالك وطب السوق واقتض به
والصبح نبا ننوه عنك ف عكاضي

من أهفا حقوق الرجال الزل ينفض به
ولاني على رفقته مشفي وحضاضي

والحق ملحوق والرد اتحفض به
ياللي تولف علوم طوال وعراضي


مزيد القاضي