منتديات قبائل شمران الرسمية - والله يلولا غايتي ما انقل الطير

والله يلولا غايتي ما انقل الطير
ما انقل على كفي خفوق الجناحي

ابي اليا فزت تقل شعف معصير
واقفت تعقد مع سهال فياحي

ليا تلني واقفى يخطرف له السير
جايع وحاديه الزعل من صياحي

لا طقها بالصايدين المواخير
طاحت تدوس ونجم الطير صاحي

وليا حصل جول رتوع ومخامير
في ماقع عن نشر الادباش زاحي

وتركزن له تقل شول معاشير
وغزن غلبهن عقب ماهن مطاحي

منهن علق اللي مثل بكرة الظير
ونكد عليهن عقب ماهن ضواحي

وجيته يمزرها على القاع تمزير
يشلق معلق ثديها بالجناحي

هذيك والله منوتي يالمناعير
ان كان انا مجنون وان كنت صاحي

وكل برايه له تصرف وتدبير
ولاحد(ن)على الدنيا جلس واستراحي

وارزاق خلق الله وهايب وتقدير
ورزقي على مجري هبوب الرياحي

ولا ينقص الرجال كثر المخاسير
لصاردون الوجه ماهو سفاحي

والقل ما عذرب رجال بهم خير
والمال ماعز الرجال الشحاحي

مار اتركوني يالوجيه المسافير
هذا الذي وافق عليه اقتراحي

بدر الحويفي