منتديات قبائل شمران الرسمية - كلٍ نهار العيد يرسل لمغليه

كلٍ نهار العيد يرسل لمغليه
احلى الكلام اللي بوسطه حكايا

هذا يعايد والرسايل تباريه
وهذاك يرسل للحبيبه هدايا

إلا اليتيم اللي شكى ضيم ماضيه
يرسل ويستقبل ذنوب وخطايا !!

العم عافه .. ثم سرق كل امانيه
والخال باعه .. يوم خان الوصايا

والأم فيها من الأسى ما تعانيه
جور الزمان وظلم ذيك الحنايا

شتت ظلام الليل دمعن سرى فيه
وغز الحزن في ليلة العيد رايا

يشوف احمد لابسن ثوب يزهيه
وخالد يغنى وتنطربله صبايا

وهناك يجلس ولد عمه يراعيه
ويضحك على لبسه وضحكه زرايا

ويجلس بعيد هناك يسأل أنا ليه
ماني مثلهم .. ليه وقتي عنايا

حسره وضيقه جمعتها لياليه
وضيقة ألم تسكن يتيم النوايا

يجلس ينادي يا زمن وين طاريه
وين العضيد اللي يشد العطايا

وينك يبه اتشوف حالي وتنعيه
وتشوف ظلم الأهل ساري بحشايا

مشعان البراق