مراهيش نوّك ما تبل الورق يا هنّ
 

مراهيش نوّك ما تبل الورق يا هنّ
لها اليوم تاسع يوم تبرق ولا سالت

يقولون لا ضاقت عليك الوسيعة غنّ
وأنا أقول شفت مقرّد الخلق وش قالت

أنا البارحة من يوم غابت إلين أذنّ
تحلوى عيوني للكرى مير ما احتالت

يثوع النعاس من أرمد الجفن يوم تعنّ
سراميد غيضٌ بالحشى حبلها فالت

ما غير أتدرّق بأسمر الليل حتى جنّ
هجوس ٍ تخطرت هيبة الجرح واختالت

هجوس ٍ ليا قامت تكرّب وقمت أونّ
تصرم معاليق الحنايا ليا انهالت

ذلول الهجاد اللي نبت في جماها سنّ
من العام تسعى في ضلوعي ولا زالت

حلال الذهب ليا استشاطت لبسها جنّ
يا كيف أتجوّد في نحرها ليا مالت

وأنا يوم أمس بطانها ما عليّا منّ
يدين الهوان إن حطت اللوم وإن شالت

أبي أزم نفسي عن طمان ٍ هواه مصنّ
وأعدي لجفني وأرقب العين وش خالت

((عليها الملام ولا عليها السلام أبدنّ
يدينن تبي قصرت يديني ولا طالت))

بعد ما نفضت غبار صدري ولد يا هن
بعد ما روت روحي من الغيض واكتالت

يقولون لا ضاقت عليك الوسيعة غنّ
وأنا أقول شفت مقرّد الخلق وش قالت


مساعد الرشيدي