‏انا اقول كرمة يا رفيق الرخا الشكاك
 

‏انا اقول كرمة يا رفيق الرخا الشكاك
واللي ما يقدر رفقتي لا يرافقني

تعوضت فيك بخبرة ماهم بشرواك
مع ان ما حدٍ منهم على الطيب يسبقني

ما عدبه مجامل واستلم والعلوم عفاك
انا كان اجامل والمجامل موهقني

ضهدني زماني وانت معطيني مقفاك
تسولف لي من الضل والشمس تحرقني

ابيع الكحيلا والملايين في مخباك
واحامي على اسمك والليالي تصلفقني

تغير علي طبعك ولا ادري وش اللي جاك
تعامل معي بالكذب وتقول صدقني

لو ان الفقر قد حط قيده على يمناك
ما والله تنشدني وش اللي مضايقني

لا شفت المعاتب قل حاول تروح هناك
انا لا وصلت لمرحلة صمت فارقني

من اليوم مشروعي على سلاحي الفتاك
ببوج الديار إيلين ربي يوفقني

ولا تحسب اني برخصك لا بغوك عداك
انا شاربي من قرب منه لحق دقني

صالح النشيرا