وش تبي يا صاحبي في قديمات الجروح
 

وش تبي يا صاحبي في قديمات الجروح
خل تقليب المواجع .. وخل الذكريات

لاتودعني .. ليا من بغيت تروح / روح
روح واتركني من البعد والفرقا شتات

في سماي رعودك تحّن وبروقك تلوح
ميّت ٍ ضامي وانا بين دجله والفرات

الغموض اللي سكن فيك شايفه بوضوح
والحقيقه .. مالي الا خيوط الامنيات

بين وقفة خاطري منك واحساس ٍ جموح
إعرف ان الحب مامات .. كان الوصل مات

ماقدرت انساك ماضي / ولا احلم بك طموح
عايشك طيف ٍ بقاياه في كل الجهات

لا عرض لي .. كل جرح ٍ من اعماقه ينوح
اتّنهت .. واحرم العين من حلو المبات

الموادع صعب .. وان كانت دلاله تفوح
لا تقهويني .. وخل العلوم الخافيات

بس لاصديت ( خذني بقايا جروح ) روح
وغّن لي ( وشلون ما اغليك ياعذب الصفات )

مشعان البراق