هاجس من الماضي حداني على الدار
 

هاجس من الماضي حداني على الدار
ذكرى لنا فيها وِحنّا عْيالي

وشوقي على ديرة هَلِي سِر وجْهار
منقوشة الحنّا في صفحة خيالي

دارٍ تلاوت به صواديف الأقدار
في ليلها يبرق بعيد الخيالي

أطلالها تحكي لنا عذب الأشعار
ونبغى نِدوّر في الشفق للهلالي

وريّح وريّحنا بعد طول مشوار
واطلق ركايب شعرنا في المفالي

ومَد النظر معيه على فصمة الجار
وشِب الهشيم وخل ناره تلالي

في ديرةٍ كانت منازل للأخيار
ذولي بني عمّ ٍ وذولي خوالي

ربعٍ لهم وقفه مع الضيف والجار
عشّاقة الكايد في عسر اللّيالي

واليوم ما منهم على الدار ديّار
راحوا هبا منثور شرقُ وْشمالي

معتق الشماسي